ខេត្ដបន្ទាយមានជ័យ៖ នៅថ្ងៃសុក្រ ៣រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៦ ខែមេសា ឆ្នាំ២០២៤ លោក ជា យុទ្ធារុណ ប្រធានមន្ទីរអភិវឌ្ឍន៍ឌងដ បានដឹកនាំក្រុមការងារបច្ចេកទេសនៃមន្ទីរអភិវឌ្ឍន៍ជនបទខេត្ដបន្ទាយមានជ័យ ដោយមានការចូលរួមពីអាជ្ញាធរភូមិ ឃុំ ចុះត្រួតពិនិត្យស្ថានភាពភូមិដែលប្រឈមនឹងការខ្វះខាតទឹកប្រើប្រាស់ក្នុងរដូវប្រាំងនេះបានចំនួន១០ភូមិ ដូចខាងក្រោម៖

–  បានពិនិត្យស្រះឯកជនតូចៗ ស្រះរួមសហគមន៍ និងអណ្តូងខួង របស់ប្រជាពលរដ្ឋរស់នៅក្នុងភូមិប្រាសាទរ៉ាង បុស្សធំ ចែងម៉ែង ប៉ោយអង្គរ ស្រះភ្លោះ និងភូមិខ្ជាយ ឃុំតាគង់ ស្រុកម៉ាឡៃ

–  បានពិនិត្យស្ថានភាពស្រះសហគមន៍ នៅតាមវត្ត និងសាលារៀន និងអណ្ដូងស្នប់របស់ប្រជាពលរដ្ឋរស់នៅភូមិកណ្តោល កំបោរ កាបៅ និងភូមិពង់ក្រសាំង ក្នុងឃុំភ្នំលៀប ស្រុកព្រះនេត្រព្រះ៕

ខេត្តពោធិ៍សាត់៖ នៅថ្ងៃអាទិត្យ ៥រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៨ ខែមេសា ឆ្នាំ២០២៤ លោក ធីម សុធារ៉ា ប្រធានមន្ទីរ ព្រមទាំងថ្នាក់ដឹកនាំ និងមន្ត្រីជំនាញ នៃមន្ទីរអភិវឌ្ឍន៍ជនបទខេត្តពោធិ៍សាត់ បានចុះពិនិត្យស្ថានភាពប្រភពទឹកប្រើប្រាស់របស់ប្រជាពលរដ្ឋរស់នៅភូមិទូលគូ ភូមិគៀន និងភូមិស្តុកជុំ ឃុំកោះជុំ ស្រុកកណ្តៀង ខេត្តពោធិ៍សាត់។

ប្រជាពលរដ្ឋរស់នៅភូមិខាងលើ គឺប្រើប្រាស់ទឹកស្រះ   ទឹកអណ្តូងសហគមន៍ ដែលភាគច្រើនប្រឈមនឹងការរីងស្ងួត នៅរដូវប្រាំងនេះ ដោយសារការប្រែប្រួលអាកាសធាតុ។

អាជ្ញាធរភូមិ ឃុំ ខាងលើបានបញ្ជាក់ថា បងប្អូនប្រជាពលរដ្ឋក្នុងភូមិ និងសត្វពាហនៈ នឹងរងប៉ះពាល់ខ្លាំងណាស់ ដោយសារស្ថានភាពទឹកដែលនៅសេសសល់នឹងអស់ក្នុងរយៈពេលដ៏ខ្លីខាងមុខ ក្នុងករណីដែលគ្មានភ្លៀងធ្លាក់៕

ខេត្តកំពង់ធំ៖ នារសៀលថ្ងៃសុក្រ ៣រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៦ ខែមេសា ឆ្នាំ២០២៤ លោក តាន់ វាសនា ប្រធានមន្ទីរស្តីទី និងមន្ត្រីបច្ចេកទេសផ្គត់ផ្គង់ទឹកជនបទ បានចូលរួមប្រជុំផ្សព្វផ្សាយលើការខ្វះខាតទឹកប្រើប្រាស់ និងទឹកបរិភោគ ដោយសារកត្តាប្រែប្រួលអាកាសធាតុ ជាមួយអភិបាលស្រុកស្ទោង ព្រមទាំងមេឃុំទាំង១៣ ដើម្បីឱ្យពួកគាត់ធ្វើរបាយការណ៍សង្ខេបតាមឃុំគោលដៅ ដោយសារឃុំនីមួយៗនៅឆ្ងាយពីគ្នា និងងាយស្រួលដល់ក្រុមការងារមន្ទីរ ដាក់ផែនការ និងទិសដៅចុះពិនិត្យឱ្យបានលម្អិត។

បន្ទាប់ពីបញ្ចប់កិច្ចប្រជុំក្រុមការងារមន្ទីរ រួមជាមួយក្រុមការងារស្រុក ឃុំ បានចុះពិនិត្យលើស្ថានភាពអណ្ដូងលូនៅឃុំព្រះដំរី ដែលបានរីងអស់ទឹកនៅរដូវប្រាំងនេះ៕

ខេត្តស្ទឹងត្រែង៖ នាថ្ងៃសៅរ៍ ៤ រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី២៧ ខែមេសា ឆ្នាំ២០២៤ លោក ព្រំ ចាន់ថា ប្រធានមន្ទីរអភិវឌ្ឍន៍ជនបទខេត្តស្ទឹងត្រែង បានដឹកនាំមន្រ្តីបច្ចេកទេសនៃមន្ទីរ សហការជាមួយរដ្ឋបាលឃុំ ចុះពិនិត្យស្ថានភាព ប្រភពទឹក និងការប្រើប្រាស់ទឹកប្រចាំថ្ងៃនារដូវប្រាំងរបស់ប្រជាពលរដ្ឋនៅភូមិចំនួន៣ គឺភូមិចំការលើ ភូមិរំដេង និងភូមិរុន ស្ថិតក្នុងឃុំចំការលើ ស្រុកថាឡាបរិវ៉ាត់។

សូមបញ្ចាក់ផងដែរថា ចំពោះប្រជាពលរដ្ឋទាំង៣ភូមិខាងលើបានប្រើប្រាស់ទឹកអណ្តូងស្នប់ និងប្រើប្រាស់ទឹកស្រះសហគមន៍ដែលនៅផ្គត់ផ្គង់ទឹកសម្រាប់ប្រើប្រាស់បានជាធម្មតាដោយពុំមានការខ្វះខាតទឹកឡើង ។

ខេត្តសៀមរាប៖ នៅថ្ងៃសុក្រ ៣រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៦ ខែមេសា ឆ្នាំ២០២៤ លោក ទូច ម៉ាឡា ប្រធានមន្ទីរអភិវឌ្ឍន៍ជនបទខេត្តសៀមរាប  អមដំណើរដោយលោកប្រធានការិយាល័យផ្គត់ផ្គង់ទឹកជនបទ និងមន្រ្តីបច្ចេកទេសទឹកមន្ទីរ បានចុះពិនិត្យ ស្ថានភាពការប្រើប្រាស់ទឹក តាមបណ្តាញចែកចាយទឹក ស្រះ អណ្តូង អូរ ប្រឡាយ នៅរដូវប្រាំងដែលមានភាពរីងស្ងួតខ្លាំង ស្ថិតនៅក្នុងទីតាំង ឃុំបាយដុត និងឃុំស្វាយស ស្រុកវ៉ារិន, ឃុំយាង និងឃុំរើល ស្រុកពួក និងឃុំស្រែខ្វាវ ស្រុកអង្គជុំ ខេត្តសៀមរាប ។

បន្ទាប់ពីបានចុះពិនិត្យជាក់ស្តែងរួចមកឃើញថា នៅតាមខ្នងផ្ទះប្រជាពលរដ្ឋក្នុងឃុំ ស្រុកគោលដៅទាំងបីខាងលើ ការប្រើប្រាស់ទឹករបស់ពួកគាត់នៅអាចប្រើប្រាស់បានជាប្រចាំ ពុំទាន់មានចោទជាបញ្ហាអ្វីនោះឡើយ។

ទោះបីជាយ៉ាងណាក៏ដោយ ក្នុងនាមថ្នាក់ដឹកនាំមន្ទីរ លោកប្រធានមន្ទីរ ក៏បានមានមតិសំណេះសំណាលដល់ប្រជាពលរដ្ឋ និងអាជ្ញាធរមូលដ្ឋានឲ្យយកចិត្តទុកដាក់ខ្ពស់ក្នុងការថែរក្សាប្រភពទឹកឲ្យបានល្អ និងប្រើប្រាស់ទឹកដោយការសន្សំសំចៃ ដើម្បីរក្សាបាននូវសុខភាព និងអនាម័យល្អ និងមានទឹកប្រើប្រាស់គ្រប់គ្រាន់។ មួយវិញទៀតករណី នៅភូមិស្រុកណាដែលមានបញ្ហាប្រឈមខ្លាំងទឹករីងស្ងួត ឬអណ្តូងខូច ខ្វះខាតទឹកហូបចុក ឬប្រើប្រាស់ សូមជួយរាយការណ៍ជាបន្ទាន់មកមន្ទីរ ដើម្បីមន្ទីរចាត់វិធានការដោះស្រាយបន្ទាន់ឱ្យបានទាន់ពេលវេលាជូនប្រជាពលរដ្ឋ។