![មន្ដ្រីជំនាញនាយកដ្ឋានផ្គត់ផ្គង់ទឹកជនបទ ចូលរួមសិក្ខាសាលា ស្ដីពីការផ្ទៀងផ្ទាត់លទ្ធផលការសិក្សា និងការរៀបចំផែនការទឹកស្អាត និងអនាម័យប្រកបដោយសុវត្ថិភាពថ្នាក់ស្រុក 2 photo 2024 08 13 15 43 28](https://www.mrd.gov.kh/wp-content/uploads/2024/08/photo_2024-08-13_15-43-28.jpg)
![មន្ដ្រីជំនាញនាយកដ្ឋានផ្គត់ផ្គង់ទឹកជនបទ ចូលរួមសិក្ខាសាលា ស្ដីពីការផ្ទៀងផ្ទាត់លទ្ធផលការសិក្សា និងការរៀបចំផែនការទឹកស្អាត និងអនាម័យប្រកបដោយសុវត្ថិភាពថ្នាក់ស្រុក 3 photo 2024 08 13 15 43 29 2](https://www.mrd.gov.kh/wp-content/uploads/2024/08/photo_2024-08-13_15-43-29-2.jpg)
![មន្ដ្រីជំនាញនាយកដ្ឋានផ្គត់ផ្គង់ទឹកជនបទ ចូលរួមសិក្ខាសាលា ស្ដីពីការផ្ទៀងផ្ទាត់លទ្ធផលការសិក្សា និងការរៀបចំផែនការទឹកស្អាត និងអនាម័យប្រកបដោយសុវត្ថិភាពថ្នាក់ស្រុក 4 photo 2024 08 13 15 43 29](https://www.mrd.gov.kh/wp-content/uploads/2024/08/photo_2024-08-13_15-43-29.jpg)
![មន្ដ្រីជំនាញនាយកដ្ឋានផ្គត់ផ្គង់ទឹកជនបទ ចូលរួមសិក្ខាសាលា ស្ដីពីការផ្ទៀងផ្ទាត់លទ្ធផលការសិក្សា និងការរៀបចំផែនការទឹកស្អាត និងអនាម័យប្រកបដោយសុវត្ថិភាពថ្នាក់ស្រុក 5 photo 2024 08 13 15 43 30 2](https://www.mrd.gov.kh/wp-content/uploads/2024/08/photo_2024-08-13_15-43-30-2.jpg)
![មន្ដ្រីជំនាញនាយកដ្ឋានផ្គត់ផ្គង់ទឹកជនបទ ចូលរួមសិក្ខាសាលា ស្ដីពីការផ្ទៀងផ្ទាត់លទ្ធផលការសិក្សា និងការរៀបចំផែនការទឹកស្អាត និងអនាម័យប្រកបដោយសុវត្ថិភាពថ្នាក់ស្រុក 6 photo 2024 08 13 15 43 30](https://www.mrd.gov.kh/wp-content/uploads/2024/08/photo_2024-08-13_15-43-30.jpg)
![មន្ដ្រីជំនាញនាយកដ្ឋានផ្គត់ផ្គង់ទឹកជនបទ ចូលរួមសិក្ខាសាលា ស្ដីពីការផ្ទៀងផ្ទាត់លទ្ធផលការសិក្សា និងការរៀបចំផែនការទឹកស្អាត និងអនាម័យប្រកបដោយសុវត្ថិភាពថ្នាក់ស្រុក 7 photo 2024 08 13 15 43 31](https://www.mrd.gov.kh/wp-content/uploads/2024/08/photo_2024-08-13_15-43-31.jpg)
រាជធានីភ្នំពេញ៖ នាព្រឹកថ្ងៃព្រហស្បតិ៍ ១១កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៥ ខែសីហា ឆ្នាំ២០២៤ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាគណៈអធិបតីក្នុងពិធីសំណេះសំណាលជាមួយអាចារ្យ អាចារិនីទូទាំងប្រទេសលើកទី៩ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ពិធីសំណេះសំណាលនេះ ត្រូវបានរៀបចំឡើងដោយក្រសួងធម្មការ និងសាសនា នៅវិទ្យាស្ថានជាតិអប់រំ ដោយមានការអញ្ជើញចូលរួមពីសំណាក់ អាចារ្យ អាចារិនី ចំនួន១ពាន់នាក់។
សូមជម្រាបជូនផងដែរថា គិតមកដល់បច្ចុប្បន្ននេះ ក្រសួងធម្មការ និងសាសនា បានបើកវគ្គបណ្តុះបណ្តាល តួនាទី ភារកិច្ច និងក្រមសីលធម៌អាចារ្យខ្មែរ បានចំនួន ៤៥វគ្គ រួច មកហើយ ដែលមានសិក្ខាកាមជា អាចារ្យ អាចារិនី ចូលមកសិក្សា ចំនួន ១២ ៥១៧អង្គ/នាក់ ក្នុងនោះព្រះសង្ឃ ៨៦១ព្រះអង្គ អាចារិនី ១៩០នាក់។ ក្រៅពីវគ្គបណ្តុះបណ្តាលនេះ ក្រសួងក៏បានបើកវគ្គបណ្តុះបណ្តាលដូនជី បានចំនួន ២វគ្គ ផងដែរ ដោយមានសិក្ខាកាម ជាដូនជីចូលសិក្សា ចំនួន ១,១០៧នាក់៕
ខេត្តស្វាយរៀង ៖ នាថ្ងៃអង្គារ ៩កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៣ ខែសីហា ឆ្នាំ២០២៤ លោក ធៀម សុផល ប្រធានការិយាល័យបណ្តុះបណ្តាល និងស្រាវជ្រាវ និងប្រធានមជ្ឈមណ្ឌលបណ្តុះបណ្តាលជំនាញមូលដ្ឋានខេត្តស្វាយរៀង អមដោយមន្រ្តីបច្ចេកទេសមន្ទីរ បានអញ្ជើញចុះបើកវគ្គបណ្តុះបណ្តាលរយ:ពេលខ្លី ជំនាញការធ្វើជីកំប៉ុស្តិ៍និងការវេចខ្ចប់ ចំនួន២វគ្គ មានសិក្ខាកាមចូលរួមសរុបចំនួន ៤០នាក់ ស្រី ១៦នាក់ ស្ថិតនៅភូមិឬស្សីអម និងភូមិត្រពាំងកំពឹស ឃុំខ្សែត្រ ស្រុកកំពង់រោទិ៍ ខេត្តស្វាយរៀង៕
ខេត្តស្វាយរៀង ៖ នាថ្ងៃអង្គារ ៩កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៣ ខែសីហា ឆ្នាំ២០២៤ លោក សំ នីតូ ប្រធានមន្ទីរអភិវឌ្ឍន៍ជនបទខេត្តស្វាយរៀង បានអញ្ជើញចូលរួមអមដំណើរ លោក ទូច ស៊ីផាត អគ្គនាយករង នៃអគ្គនាយកដ្ឋានរដ្ឋបាល និងហិរញ្ញវត្ថុ ក្រសួងអភិវឌ្ឍន៍ជនបទ និងជាប្រធានគ្រប់គ្រង់ (SAAMBAT) ឯកឧត្តម ញ៉ែម សារី អភិបាលរងនៃគណៈអភបាលខេត្តស្វាយរៀង ចុះផ្សព្វផ្សាយព័ត៌មានគម្រោងនិងគោលការណ៍ផ្សេងៗ ដល់ភាគីពាក់ព័ន្ធ និងអ្នកទទួលផលពីការស្ថាបនាផ្លូវ (ចន្ត្រី-ម្រាម) ប្រវែង ១២,៤៣គ.ម និងផ្លូវ (អំពិល-គគីរ) ប្រវែង ១១,៨៦គ.ម ស្ថិតនៅស្រុករមាសហែក ខេត្តស្វាយរៀង របស់គម្រោងគាំទ្រនិរន្តរភាពហេដ្ឋារចនាសម្ព័ន្ធជនបទដើម្បីទីផ្សាកសិករ និងពាណិជ្ជូបនីយកម្មកសិកម្ម (SAAMBAT)៕
ខេត្តត្បូងឃ្មុំ៖ នៅព្រឹកថ្ងៃពុធ ១០កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៤ ខែសីហា ឆ្នាំ២០២៤ ឯកឧត្ដម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ បានអញ្ជើញចូលរួមជាអធិបតីក្នុងពិធីបើកការដ្ឋានស្ដារឡើងវិញនូវផ្លូវក្រាលកៅស៊ូពីរជាន់ (DBST) ចំនួន១ខ្សែ ប្រវែង៣គីឡូម៉ែត្រ ស្ថិតនៅភូមិចក ឃុំចក ទៅភូមិច្រវ៉ា ឃុំគងជ័យ ស្រុកអូររាំងឪខេត្តត្បូងឃ្មុំ ដែលមានការអញ្ជើញចូលរួមពីគណៈកម្មាធិការ គ.ត.វ មន្ត្រីបច្ចេកទេសនៃនាយកដ្ឋានផ្លូវលំជនបទ និងបញ្ជាការដ្ឋានវិស្វកម្ម កងទ័ពជើងគោក ផងដែរ។
ក្នុងឱកាសនោះ ឯកឧត្ដមរដ្ឋលេខាធិការប្រចាំការ បានអញ្ជើញជួបសំណេះសំណាលជាមួយបងប្អូនប្រជាពលរដ្ឋដែលរស់នៅតាមសងខាងផ្លូវនេះ ដោយឯកឧត្តមរដ្ឋលេខាធិការប្រចាំការ ពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយមនោសញ្ចេតនា សេចក្តីនឹករលឹកយ៉ាងជ្រាលជ្រៅបំផុត និងពរសព្ទសាធុការពីសំណាក់សម្ដេចអគ្គមហាសេនាបតីតេជោ ហ៊ុន សែន មគ្គុទេសក៏ឯកនយោបាយឈ្នះឈ្នះ, បិតាស្ថាបនិកសន្តិភាព, និងជាប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និង ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ផងដែរ។
ឯកឧត្តមរដ្ឋលេខាធិការប្រចាំការ បានលើកឡើងអំពីការអភិវឌ្ឍន៍លើគ្រប់វិស័យនៅកម្ពុជា ក៏ដូចជាសម្ដែងនូវការអបអរសាទរ កោតសរសើរ និងវាយតម្លៃខ្ពស់ចំពោះ ការរីកចម្រើន និងសមិទ្ធផលនានា នៅក្នុងខេត្តត្បូងឃ្មុំ ដែលសមិទ្ធិផលទាំងនេះកើតចេញពីកត្តាសុខសន្តិភាព ក្រោមនយោបាយឈ្នះ ឈ្នះ ដែលមានសម្ដេចអគមហាសេនាធិបតីតេជោ ហ៊ុន សែន ជាស្ថាបនិក និងបច្ចុប្បន្នត្រូវបានបន្តវេនដោយ សម្ដេចមហាបវរធិបតី ហ៊ុន ម៉ាណែត បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីសម្រេចបាននៅចក្ខុវិស័យកម្ពុជាជាប្រទេសមានដែលប្រាក់ចំណូលកម្រិតខ្ពស់នៅឆ្នាំ២០៥០។ ដើម្បីចូលរួមសម្រេចឲ្យបាននូវយុទ្ធសាស្ត្ររបស់រាជរដ្ឋាភិបាល ក្រសួងអភិវឌ្ឍន៍បានដាក់ចេញនៅអទិភាពគន្លឹះចំនួន៤ ដែលរួមមានៈ (១) ការកែលម្អហេដ្ឋារចនាសម្ព័ន្ធរូបវ័ន្ត និងគមនាគមន៍, (២) ការលើកកម្ពស់លក្ខខណ្ឌនៃការរស់នៅរបស់សហគមន៍ជនបទ, (៣) ការធ្វើពិពិធកម្មសកម្មភាពសេដ្ឋកិច្ចជនបទ និង(៤) ការពង្រឹងស្ថាប័ន និងកិច្ចការទូទៅ។ អទិភាពទាំង ៤ ខាងលើនេះគឺសំដៅលើកកម្ពស់គុណភាព និងគុណតម្លៃជីវិតប្រជាជននៅតំបន់ជនបទឲ្យរស់នៅប្រកបដោយបរិយាបន្ន ទាំងផ្នែកសេដ្ឋកិច្ច សង្គម និងវប្បធម៌។
ឆ្លៀតក្នុងឱកាសនោះ ឯកឧត្តមរដ្ឋលេខាធិការប្រចាំការ និងប្រជាពលរដ្ឋទាំងអស់ សូមប្រកាសគាំទ្រយ៉ាងពេញទំហឹងចំពោះសារសំឡេងពិសេសរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលបានថ្លែងពន្យល់បន្ថែមអំពីកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA)។ សារសំឡេងពន្យល់បន្ថែមរបស់ សម្តេចតេជោ បានធ្វើឱ្យសាធារណជនជាតិ និងអន្តរជាតិ កាន់តែយល់ច្បាស់ និងស៊ីជម្រៅលើកិច្ចសហប្រតិបត្តិការតំបន់ត្រីកោណអភិវឌ្ឍន៍ នេះថា៖ (ទី១) មិនមែនជាការធ្វើឱ្យបាត់បង់ទឹកដីទៅបរទេសណាមួយ ដូចការចោទប្រកាន់ឡើយ (ទី២) មិនមែនជា ការអភិវឌ្ឍរួមគ្នា ឬចូលហ៊ុនជាមួយគ្នា ដូចការមួលបង្កាច់នោះឡើយ និង(ទី៣) មិនមែនជាតំបន់ស្វយ័ត ឬប្រទេស មួយឡើយ គឺដីខ្មែរគ្រប់គ្រងដោយខ្មែរ។
កិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) ជាកិច្ចសហប្រតិបត្តិការ គ្នាទៅវិញទៅមក ដើម្បីអភិវឌ្ឍន៍តាមតំបន់ជាប់ព្រំដែន ក្នុងនាមប្រទេសភូមិផងរបងជាមួយគ្នា ហើយបានផ្លាស់ប្ដូរ ស្ថានភាពខេត្តទាំងបួនរបស់កម្ពុជាដែលជាប់ព្រំដែនដូចជា៖ (ទី១) ទៅជាតំបន់មានសុវត្ថិភាពគ្មានមីន និងយុទ្ធភណ្ឌ មិនទាន់ផ្ទុះ (ទី២) ប្រែក្លាយពីតំបន់ស្ងាត់ជ្រងំក្រីក្រ ទៅជាតំបន់ផ្តល់នូវផលប្រយោជន៍សេដ្ឋកិច្ចសង្គមដល់ប្រជាពលរដ្ឋ ដែលមានប្រទេសជប៉ុន និងអន្តរជាតិផ្សេងៗទៀតចូលទៅគាំទ្រនិងផ្ដល់ជំនួយតាមយន្តការនានា និង(ទី៣) ក្លាយជា តំបន់មានការតភ្ជាប់ប្រព័ន្ធផ្លូវទឹកបណ្តាញអគ្គិសនី សម្រាប់ប្រើប្រាស់ប្រចាំថ្ងៃ និងបម្រើដល់វិស័យពាណិជ្ជកម្ម ទេសចរណ៍ ទូរគមនាគមន៍ និងជំនួយគាំទ្រដល់សកម្មភាពសង្គមផ្សេងៗទៀតជាដើម។
ជាមួយគ្នានោះផងដែរ ឯកឧត្តមរដ្ឋលេខាធិការប្រចាំការ បានអំពាវនាវដល់ប្រជាពលរដ្ឋទូទាំងប្រទេស និងរស់នៅក្រៅប្រទេស សូមមេត្តាកុំចាញ់បោកតាមការឃោសនា ញុះញង់ បោកបញ្ឆោតរបស់ក្រុមជនអគតិមួយក្តាប់តូច ដែលបានធ្វើការចោទប្រកាន់រាជរដ្ឋាភិបាល លេីគម្រោងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) ស្ថិតក្នុងខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង របស់កម្ពុជា និងសូមអំពាវនាវដល់បងប្អូនប្រជាពលរដ្ឋគ្រប់មជ្ឈដ្ឋានជឿជាក់លើរាជរដ្ឋាភិបាលកម្ពុជា ជឿជាក់លើ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង សម្តេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ក្នុងការការពារមាតុភូមិ អភិវឌ្ឍ សេដ្ឋកិច្ចជាតិ និង លើកតម្កើងតម្លៃ និងជីវភាពរបស់ប្រជាជនគ្រប់រូប។
នៅរសៀលថ្ងៃដដែលនេះ ឯកឧត្ដម រដ្ឋលេខាធិការប្រចាំការ រួមជាមួយឯកឧត្តមបណ្ឌិត នួន ដាញ៉ិល រដ្ឋលេខាធិការ បានបន្តដឹកនាំក្រុមការងារអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ព្រមទាំងមន្ត្រីជំនាញពាក់ព័ន្ធជាច្រើនរូប ចុះត្រួតពិនិត្យ និងវាយតម្លៃ ដំណាក់កាលទី១ លើខ្សែផ្លូវថែទាំប្រចាំដែលកំពង់ស្ថាបនាចំនួន ១០ខ្សែ មានប្រវែង ១៦១,០៦ គីឡូម៉ែត្រ ជាប្រភេទផ្លូវក្រាលកៅស៊ូ២ជាន់ ( DBST) និងបានជួបសំណេះសំណាលជាមួយបងប្អូនប្រជាពលរដ្ឋដែលរស់នៅតាមសងខាងផ្លូវទាំងនេះ ស្ថិតក្នុងភូមិសាស្ត្រស្រុកចំនួន ០៦គឺ ស្រុកអូររាំងឳ ស្រុកត្បូងឃ្មុំ ស្រុកក្រូចឆ្មារ ស្រុកពញ្ញាក្រែក ស្រុកតំបែរ និងស្រុកមេមត់ នៃខេត្តត្បូងឃ្មុំ រួមមាន ៖
១. ខ្សែទី១ ៖ ផ្សារតស៊ូ ឃុំព្រះធាតុ ឃុំពង្រ ឃុំមហាលាភ ស្រុកអូររាំងឪ ប្រវែង ១៧ ០០ម៉ែត្រ
២. ខ្សែទី២ ៖ ផ្លូវជាតិ១១ (ពាមជាំង)-ភូមិទួលកណ្តាល ជើងឡង ឃុំព្រះធាតុ ឃុំជីគរ ឃុំមួងរៀវ ស្រុកត្បូងឃ្មុំ ប្រវែង ១៧ ០០០ម៉ែត្រ
៣. ខ្សែទី៣ ៖ ពងទឹក – ឈូក ឃុំរកាពរប្រាំ ឃុំទួលស្នួល ឃុំឈូក ស្រុកត្បូងឃ្មុំ ស្រុកក្រូចឆ្មារ ប្រវែង ៩ ៨០០ម៉ែត្រ
៤. ខ្សែទី៤ ៖ ភូមិតាហៀវក្រោម – ភូមិពោធិ៍ស្រុក ឃុំកោងកាង ស្រុកពញាក្រែក ប្រវែង ២ ៤៦០ម៉ែត្រ
៥. ខ្សែទី៥ ៖ តំបន់អភិវឌ្ឍន៍អន្លង់ជ្រៃ ឃុំកក់ ស្រុកពញាក្រែក ប្រវែង ១១ ០០០ម៉ែត្រ
៦. ខ្សែទី៦ ៖ សេដា – ក្របីគ្រៀក ឃុំសេដា ឃុំឈូក ស្រុកតំបែរ ស្រុកក្រូចឆ្មារ ប្រវែង ១៣ ៨៨០ម៉ែត្រ
៧. ខ្សែទី៧ ៖ វាលតូច – កំបាស់ ឃុំសេដា ឃុំត្រពាំងព្រីង ឃុំរំចេក ឃុំមេមង ស្រុកតំបែរ ស្រុកមេមត់ ប្រវែង ៤២ ០៩០ម៉ែត្រ
៨. ខ្សែទី៨ ៖ ផ្លាកសំរោង – ទឹកទុំ ឃុំដារ ឃុំគគីរ ឃុំកំពាន់ ស្រុកមេមត់ ប្រវែង ២៤ ៦៣០ម៉ែត្រ
៩. ខ្សែទី៩ ៖ ខ្លុងត្បូង – បឹងជ្រោង ឃុំចាន់មូល ឃុំជាំ ស្រុកមេមត់ ប្រវែង ១៣ ១០០ម៉ែត្រ
១០. ខ្សែទី១០ ៖ មេមត់ – ដូនរ័ត្ន ឃុំមេមត់ ឃុំទ្រៀក ឃុំរូង ស្រុកមេមត់ ប្រវែង ១០ ១០០ម៉ែត្រ។
ខ. ការងារបំពាក់ស្លាកចរាចរណ៍៖
១. ខ្សែទី១ ៖ សួង – ភ្នំចាន់ សង្កាត់សួង ឃុំជប់ ក្រុងសួង ស្រុកត្បូងឃ្មុំ ចំនួន ៨៩ស្លាក
២. ខ្សែទី២ ៖ ចាន់ទូង – សង្គមថ្មី – កៀនល្មៀត – ដងកាំបិត ឃុំស្រឡប់ ស្រុកត្បូងឃ្មុំ ចំនួន ៧២ស្លាក
៣. ខ្សែទី៣ ៖ វត្តដំរិល – យាកត្បូង – ត្រពាំងទា – ចក ឃុំដំរិល ឃុំចក ស្រុកអូររាំងឪ ចំនួន ៧០ស្លាក
៤. ខ្សែទី៤ ៖ សាលាឃុំព្រះធាតុ – ពោធិ៍ស្វាយមីង ឃុំព្រះធាតុ ឃុំមៀន ស្រុកអូររាំងឪ ចំនួន ៩៨ស្លាក
៥. ខ្សែទី៥ ៖ វត្តកំពង់បឹង – ថ្មប្រជុំ – ផ្លូវជាតិលេខ១១ ឃុំមៀន ស្រុកអូររាំងឪ ចំនួន ១០៥ស្លាក
៦. ខ្សែទី៦ ៖ សាលាឃុំពន្លៃ – រៀលផ្អែម ឃុំកក់ និងឃុំដូនតី ស្រុកពញាក្រែក ចំនួន ៣៤ស្លាក។
បន្ទាប់ពីបានត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណៈកម្មការអន្តរក្រសួងរួចមក គណៈកម្មាធិការបានឯកភាព និងទទួលយកការអនុវត្តការងារបញ្ចប់ដំណាក់កាលទី១ តាមការស្នើសុំរបស់អ្នកទទួលការ។ ទន្ទឹមនឹងនេះ គណៈកម្មាធិការអន្តរក្រសួងបានណែនាំដល់អ្នកទទួលការ លើចំណុចមួយចំនួន ដូចខាងក្រោម ៖
១. ក្រសួងសេដ្ឋកិច្ច និងហិរញ្ញវត្ថុ បានណែនាំឱ្យអ្នកទទួលការ រៀបចំរបាយការណ៍អំពីការរាប់ចំនួនស្លាកចរាចរណ៍ឱ្យច្បាស់លាស់
២. ករណីគែមផ្លូវ ដែលបានសិករិចរិលទាបជាងតួផ្លូវ ឬកៅស៊ូ ០,៥សង់ទីម៉ែត្រ អ្នកទទួលការត្រូវតែជួសជុលតម្រង់គែមកម្រាលផ្លូវ ដោយគ្រួសថ្មម៉ិច ដើម្បីធានាបាននូវសុវត្ថិភាព និងសោភ័ណភាព និងគ្រោះថ្នាក់ផ្សេងៗនៅរថយន្តបើកកិនគែមផ្លូវនោះ។
នៅក្នុងឱកាសនៃការចុះត្រួតពិនិត្យខាងលើ ឯកឧត្តមរដ្ឋលេខាធិការប្រចាំការ ព្រមទាំងគណៈកម្មការអន្តរក្រសួង បានជួបសំណេះសំណាលជាប្រជាពលរដ្ឋដែលជាអ្នកទទួលផល និងក្រុមការងាររាជរដ្ឋាភិបាលចុះមូលដ្ឋាន អាជ្ញាធរមូលដ្ឋានភូមិ ឃុំ ស្រុក និងបានសំណូមពរសូមឱ្យបងប្អូនប្រជាពលរដ្ឋជួយថែទាំផ្លូវនេះឱ្យបានដិតដល់ ដើម្បីធានាថាផ្លូវនេះអាចប្រើប្រាស់បានយូរអង្វែង អាចបម្រើផលប្រយោជន៍ជូនប្រជាពលរដ្ឋ។
ខេត្តត្បូងឃ្មុំ៖ នាព្រឹកថ្ងៃពុធ ១០កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៤ ខែសីហា ឆ្នាំ២០២៤ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងលោកជំទាវ បានអញ្ជើញបើកការដ្ឋានស្ថាបនាផ្លូវជនបទក្រាលកៅស៊ូពីរជាន់ (DBST) ១ខ្សែ ប្រវែង ៦,៥៧០គីឡូម៉ែត្រ ទទឹង ៦ម៉ែត្រ តភ្ជាប់ពីផ្លូវជាតិលេខ៧ ត្រង់ចំណុចភូមិបេង ទៅភូមិស្ពាន ឃុំដារ ស្រុកមេមត់ ខេត្តត្បូងឃ្មុំ។ ខ្សែផ្លូវនេះ ស្ថិតក្នុងក្របខ័ណ្ឌគម្រោងខ្សែច្រវាក់ផលិតកម្មដោយភាតរៈបរិស្ថាន ដោយប្រើប្រាស់ហិរញ្ញប្បទានសហប្រតិបត្តិការ រវាងរាជរដ្ឋាភិបាលកម្ពុជា, ធនាគារអភិវឌ្ឍន៍អាស៊ី (ADB) និងមូលនិធិអាកាសធាតុបៃតង។ ពិធីនេះ ត្រូវបានរៀបចំឡើងនៅក្នុងបរិវេណវត្តគីរីវ័ន្ដស្ពាន ដោយមានការអញ្ជើញចូលរួមពីសំណាក់ ឯកឧត្តម ជាថ្នាក់ដឹកនាំក្រសួងអភិវឌ្ឍន៍ជនបទ, ឯកឧត្តមអភិបាលនៃគណៈអភិបាលខេត្តត្បូងឃ្មុំ ឯកឧត្តម លោក លោកស្រី ជាថ្នាក់ដឹកនាំខេត្ត អាជ្ញាធរមូលដ្ឋានថ្នាក់ស្រុក ឃុំ និងប្រជាពលរដ្ឋក្នុងមូលដ្ឋានយ៉ាងច្រើនកុះករផងដែរ។
បន្ទាប់ពីពិធីបើកការដ្ឋានរួច ឯកឧត្តមរដ្ឋមន្ដ្រី និងប្រតិភូអមដំណើរ បានដឹកនាំមន្ដ្រីបច្ចេកទេស ទៅពិនិត្យវឌ្ឍនភាព និងស្ថានភាពផ្លូវចំនួន ២ខ្សែ ដូចខាងក្រោម៖ ខ្សែទី១៖ ការស្ថាបនាផ្លូវក្រាលកៅស៊ូពីរជាន់ (DBST) និងផ្នែកខ្លះក្រាលបេតុង មានប្រវែងសរុប ១១,២៣៦គីឡូម៉ែត្រ។ ខ្សែផ្លូវនេះ តភ្ជាប់ពីភូមិមេម៉ៃ ឃុំក្រែក ស្រុកពញាក្រែក ទៅដល់ភូមិស្ពាន ឃុំដារ ស្រុកមេមត់ ដែលគិតមកដល់ពេលនេះសម្រេចលទ្ធផលបាន ៥៨,៣២% ហើយគ្រោងនឹងបញ្ចប់ ១០០% នៅចុងឆ្នាំ២០២៤។ ខ្សែទី២៖ ការស្ថាបនាផ្លូវក្រាលកៅស៊ូពីរជាន់ (DBST) និងផ្នែកខ្លះក្រាលបេតុង មានប្រវែងសរុប ១៤,០៣៦គីឡូម៉ែត្រ។ ខ្សែផ្លូវនេះ តភ្ជាប់ពីភូមិជីពាំង ឃុំជីពាំង ស្រុកពញាក្រែក ទៅដល់ភូមិក្រសាំង ឃុំទឹកជ្រៅ ស្រុកដំបែរ ដែលបានស្ថាបនាចប់ជាស្ថាពរកាលពីខែឧសភា ឆ្នាំ២០២៤។ ខ្សែផ្លូវទាំង ២នេះ ស្ថិតក្នុងក្របខ័ណ្ឌគម្រោងពង្រឹងសមត្ថភាពផលិតភាពជនបទ ដោយប្រើប្រាស់មូលនិធិកិច្ចប្រតិបត្តិការរវាង រាជរដ្ឋាភិបាលកម្ពុជា និងធនាគារវិនិយោគហេដ្ឋារចនាសម្ព័ន្ធអាស៊ី (AIIB)។
តមកទៀត ឯកឧត្តមរដ្ឋមន្ដ្រី និងគណៈប្រតិភូអមដំណើរ បានអញ្ជើញទៅត្រួតពិនិត្យវឌ្ឍនភាពការអភិវឌ្ឍដីសម្បទានសង្គមកិច្ចអតីតយុទ្ធជន នៅតាមព្រំដែន ស្ថិតក្នុងឃុំទ្រៀក ស្រុកមេមត់។ ជាមួយគ្នានោះដែរ ឯកឧត្តមរដ្ឋមន្ដ្រី បានណែនាំឱ្យមន្ដ្រីបច្ចេកទេសក្រសួងសហការជាមួយមន្ទីរអភិវឌ្ឍន៍ជនបទខេត្ត សាងសង់អណ្ដូងស្នប់ ចំនួន ១៥អណ្ដូង និង សាងសង់បង្គន់អនាម័យ ចំនួន ១០៦បង្គន់ ជូនគ្រួសារអតីតយុទ្ធជន ដែលរស់នៅតំបន់នោះផងដែរ។
សូមជម្រាបជូនផងដែរថា ក្នុងឱកាសបើកការដ្ឋាន និងត្រួតពិនិត្យវឌ្ឍនភាពការងារនៃទីតាំងនីមួយៗខាងលើ ឯកឧត្តម ឆាយ ឫទ្ធិសែន បានជួបសំណេះសំណាលជាមួយប្រជាពលរដ្ឋ និងគ្រួសារកងទ័ព ដោយបានពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយមនោសញ្ចេតនា សេចក្តីនឹករលឹកយ៉ាងជ្រាលជ្រៅបំផុត និងពរសព្ទសាធុការពីសំណាក់ សម្ដេចអគ្គមហាសេនាបតីតេជោ ហ៊ុន សែន មគ្គុទេសក៏ឯកនយោបាយឈ្នះឈ្នះ, បិតាស្ថាបនិកសន្តិភាព, និងជាប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនចំពោះថ្នាក់ដឹកនាំ និងប្រជាពលរដ្ឋទាំងអស់ផងដែរ។ ឯកឧត្តមរដ្ឋមន្ត្រី បានមានប្រសាសន៍ថា រាជរដ្ឋាភិបាលបច្ចុប្បន្ន បាននិងកំពុងខិតខំអភិវឌ្ឍប្រទេសជាតិ លើគ្រប់វិស័យឱ្យកាន់តែមានភាពរីកចម្រើនទៅមុខបន្ថែមទៀត ដោយបានដាក់ចេញនូវ “យុទ្ធសាស្ត្របញ្ចកោណ” ដំណាក់កាលទី១ ដេីម្បីកម្ពុជាអាចសម្រេចចក្ខុវិស័យជាប្រទេសមានប្រាក់ចំណូលខ្ពស់នៅឆ្នាំ ២០៥០ “។ ឯកឧត្តមរដ្ឋមន្ត្រី ក៏បានបញ្ជាក់ជូនពីការយកចិត្តទុកដាក់របស់សម្ដេច ជាប្រមុខរាជរដ្ឋាភិបាល ក្នុងការអភិវឌ្ឍប្រទេសជាតិ និងការការពារបូរណភាពដែនដី ដោយមិនឱ្យមានការឈ្លានពានពីបរទេសឡើយ។ ជាក់ស្ដែងកាលពីថ្ងៃទី៥ ខែសីហា ឆ្នាំ២០២៤ កន្លងទៅនេះ រាជរដ្ឋាភិបាលបានបើកការដ្ឋានព្រែកជីកហ្វូណនតេជោ ដែលនឹងផ្ដល់អត្ថប្រយោជន៍ជាច្រើនដល់ប្រទេសកម្ពុជាលើវិស័យសេដ្ឋកិច្ច សង្គមកិច្ច និងបរិស្ថាន។ ជាមួយគ្នានោះផងដែរ ឯកឧត្តមរដ្ឋមន្ត្រី បានអំពាវនាវដល់ប្រជាពលរដ្ឋទូទាំងប្រទេសឱ្យចូលរួមថែរក្សាសុខសន្តិភាពឱ្យបានគង់វង្ស និងសូមកុំចាញ់បោកតាមការឃោសនាញុះញង់ បោកបញ្ឆោតធ្វើបាតុកម្មបង្កើតបដិវត្តន៍ពណ៌របស់ក្រុមជ្រុលនិយមអគតិមួយក្តាប់តូច និងសូមជឿទុកចិត្ត និងគាំទ្ររាជរដ្ឋាភិបាល លើកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) ស្ថិតក្នុងខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង របស់កម្ពុជា៕
ខេត្តកំពង់ធំ ៖ នារសៀលថ្ងៃអង្គារ ៩ កើត ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៣ ខែសីហា ឆ្នាំ២០២៤ លោក តាន់ វាសនា ប្រធានមន្ទីរអភិវឌ្ឍន៍ជនបទ ខេត្តកំពង់ធំស្ដីទី បានទទួលជួបពិភាក្សាការងារជាមួយក្រុមការងារអង្គការ RTI ដើម្បីពិនិត្យមើលវឌ្ឍនភាពពាក់កណ្តាល គម្រោង លើវិស័យទឹកស្អាត និងអនាម័យជនបទ ដោយមានការអញ្ជើញចូលរួមពីលោកប្រធានការិយាល័យថែទាំសុខភាពជនបទ ការិយាល័យផ្គត់ផ្គង់ទឹកជនបទ និងមន្ត្រីពាក់ព័ន្ធ។
ក្នុងជំនួបកិច្ចពិភាក្សាការងារនេះផ្តោតទៅលើ ការពង្រឹងសមត្ថភាពស្ថាប័ន ថ្នាក់ខេត្ត ស្រុក ឃុំ
វិស័យផ្គត់ផ្គង់ទឹកស្អាតជនបទ និងវិស័យអនាម័យជនបទ ដើម្បីធ្វើយ៉ងណាឱ្យវិស័យទឹកស្អាតនិងអនាម័យរបស់ខេត្តកំពុងមានភាពកាន់តែល្អប្រសើរហើយឈានដល់ការប្រកាស ជាខេត្តដែលបញ្ជប់បន្ទោបង់ពាសពាសកាល (ODF)។
គួរបញ្ជាក់ផងដែរថា គម្រោងនេះបាននឹងកំពុងអនុវត្តកម្មវិធីទឹកស្អាត និងអនាម័យរបស់ខ្លួន នៅក្នុងស្រុកចំនួន៣ ក្នុងស្រុកស្ទោង ស្រុកប្រាសាទសំបូរ និងស្រុកប្រាសាទបល្ល័ង្ក៕
ខេត្តកំពត ៖ នាព្រឹកថ្ងៃចន្ទ ៨កើត ខែស្រាពណ៏ ឆ្នាំរោង ឆស័ក ព.ស .២៥៦៨ ត្រូវនឹងថ្ងៃទី១២ ខែសីហា ឆ្នាំ២០២៤នេះ ឯកឧត្តមបណ្ឌិត សៅ ជីវ័ន្ត រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពីធីបើកការដ្ឋានស្ថាបនាផ្លូវក្រាលដីល្បាយក្រួស ចំនួន ០២ខ្សែ មានប្រវែងសរុប ៤ ៧៥០ម៉ែត្រ ទទឹងដីស ៨ម៉ែត្រ ក្រាលដីល្បាយក្រួសទទឹង ៧ម៉ែត្រ កម្រាស់ ០,២ម៉ែត្រ សាងសង់លូមូលចំនួន ០៦កន្លែង ស្ថិតនៅភូមិខ្ពបរុន ឃុំស្រែចែង ស្រុកជុំគិរី ខេត្តកំពត ដែលនឹងត្រូវបញ្ចប់ការស្ថាបនាក្នុងអំឡុងខែកុម្ភៈ ឆ្នាំ២០២៥ ខាងមុខនេះ។
ក្នុងអង្គពិធីនេះមានការចូលរួមអមដំណើរដោយថ្នាក់ដឹកនាំ និងមន្រ្តីជំនាញ ថ្នាក់ដឹកនាំ និងមន្រ្តីជំនាញនាយកដ្ឋានវិស្វកម្មនៃក្រសួងការពារជាតិ ថ្នាក់ដឹកនាំ និងមន្រ្តីជំនាញនៃក្រសួងអភិវឌ្ឍន៍ជនបទ រួមមាននាយកដ្ឋានផ្លូវលំ មន្ទីរអភិវឌ្ឍន៍ជនបទខេត្ត និងគណៈកម្មការត្រួតពិនិត្យ និងវាយតម្លៃគុណភាពការងារសាងសង់ ស្តារឡើងវិញ ជួសជុល ថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ) លោកអភិបាលរងស្រុកជុំគិរី លោកមេឃុំស្រែចែង ប្រធានភូមិខ្ពបរុន និងប្រជាពលរដ្ឋសរុបចំនួន ៧០នាក់។
ក្នុងពិធីបើកការដ្ឋាននេះដែរ ឯកឧត្តមបណ្ឌិត ក៏បានសំណេះសំណាលជាមួយបងប្អូនប្រជាពលរដ្ឋ ដោយផ្សព្វផ្សាយនូវ គោលនយោបាយ និងផែនការយុទ្ធសាស្ត្រសំខាន់ៗ ពាក់ព័ន្ធវិស័យអភិវឌ្ឍន៍ជនបទ របស់រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានដាក់ចេញនូវបេសកកម្មជាប្រវត្តិសាស្រ្ត ដឹកនាំពន្លឿនការអភិវឌ្ឍ ឈានឆ្ពោះទៅកាន់ចក្ខុវិស័យកម្ពុជា ជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលកម្រិតខ្ពស់នៅឆ្នាំ២០៥០ ក្រោមកម្មវិធីការងារជាអាទិភាពទាំង៤ របស់ក្រសួងអភិវឌ្ឍន៍ជនបទក្រោមការដឹកនាំរបស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ដូចខាងក្រោម៖
១-ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទ
២-ការកែលម្អលក្ខខណ្ឌនៃការរស់នៅរបស់សហគមន៍ជនបទ
៣-ការធ្វើពិពិធកម្មសកម្មភាពសេដ្ឋកិច្ចជនបទ
៤-ពង្រឹងសេវាគាំទ្ររដ្ឋបាល និងកិច្ចការទូទៅ៕
រាជធានីភ្នំពេញ៖ នាព្រឹកថ្ងៃចន្ទ ៨កើត ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១២ ខែសីហា ឆ្នាំ២០២៤ លោកជំទាវ ឡាយ វីរៈបុត្រ អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយលោកស្រី សំ សុម៉ាលី អនុប្រធាននាយកដ្ឋានអភិវឌ្ឍន៍ជនជាតិភាគតិច បានអញ្ជើញចូលរួមកិច្ចប្រជុំក្រុមការងារបច្ចេកទេស អន្តរក្រសួង-ស្ថាប័ន ក្រុមប្រឹក្សាជាតិកម្ពុជាដើម្បីស្រ្តី ដើម្បីតាមដានរបាយការណ៍វឌ្ឍនភាព ស្តីពីផែនការសកម្មភាព CEDAW-COB ២០២០-២០២៣ សម្រាប់ដំណើរការរាយការណ៍តាមនីតិវិធីសាមញ្ញថ្មី របស់គណៈកម្មាធិការ CEDAW នៅសណ្ឋាគារ កាំបូឌីយ៉ាណា ដោយសមាសភាពចូលរួមមាន ឯកឧត្តម លោកជំទាវ ជាសមាជិក សមាជិកា ក្រុមការងារបច្ចេកទេសក្រសួង ស្ថាប័ន ពាក់ព័ន្ធ និងតំណាង UNWOMEN សរុបចំនួន ៧២ នាក់ ស្រី ៥៦នាក់ ។
គោលបំណងគឺ ដើម្បីពិភាក្សាប្រមូលព័ត៌មាន និងផ្តល់យោបល់លើសេចក្តីព្រាងផ្តល់របាយការណ៍វឌ្ឍនភាព នៃផែនការសេចក្តីសង្កេតសន្និដ្ឋាន ៥៧ ចំណុច CEDAW-COB ២០២០-២០២៣ របស់គណៈកម្មាធិការ CWDAW នៃអង្គការសហប្រជាជាតិ លើរបាយការណ៍លើកទី៦ នៃការអនុវត្តអនុសញ្ញា CEDAW របស់កម្ពុជា ។
ក្រសួងអភិវឌ្ឍន៍ជនបទ ស្ថិតនៅCOB ៣១ខ ស្រ្តីជនជាតិដើមភាគតិច និង COB ៤១ ស្រ្តីនៅជនបទ លើការងារឥណទានហិរញ្ញវត្ថុ និងការងារសហគ្រាសខ្នាតមីក្រូ តូច និងមធ្យម និងខ្នាតធំ៕