រាជធានីភ្នំពេញ ៖ នាព្រឹកថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០២ ខែឧសភា ឆ្នាំ២០២៤ នៅទីស្ដីការ ឯកឧត្ដមបណ្ឌិត ជ្រុន ថេរ៉ាវ៉ាត រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈកម្មការចំពោះកិច្ច ក្រសួងអភិវឌ្ឍន៍ជនបទ រួមមាន ឯកឧត្ដម រដ្ឋលេខាធិការ អនុរដ្ឋលេខាធិការ ឯកឧត្ដម អគ្គនាយកបច្ចេកទេស និងមន្ត្រីជំនាញពាក់ព័ន្ទ ប្រជុំពិភាក្សាជាមួយគណៈកម្មការចំពោះកិច្ច ក្រសួងសាធារណការ និងដឹកជញ្ជូន ដឹកនាំដោយ ឯកឧត្ដមបណ្ឌិត លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន ដែលមានសមាសភាពរួមមាន ឯកឧត្ដម រដ្ឋលេខាធិការ អនុរដ្ឋលេខាធិការ ឯកឧត្ដម អគ្គនាយកដ្ឋានសាធារណការ អគ្គនាយកដ្ឋានបច្ចេកទេស លោក អគ្គនាយករង និងប្រធាននាយកដ្ឋានផ្លូវថ្នល់។

គោលបំណងនៃកិច្ចប្រជុំគឺដើម្បីបើកកិច្ចពិភាក្សាលើបញ្ហាប្រឈមមួយចំនួន និងស្វែងរកដោះស្រាយលើការគ្រប់គ្រងវិស័យហេដ្ឋារចនាសម្ព័ន្ធផ្លូវថ្នល់ រវាងក្រសួងអភិវឌ្ឍន៍ជនបទ និងក្រសួងសាធារណការ និងដឹកជញ្ជូន ដោយមានរបៀបវារៈសំខាន់ៗដូចខាងក្រោម៖
១. សមត្ថកិច្ចផ្លូវថ្នល់
២. វិសោធនកម្មអនុក្រឹត្យលេខ១៤១ អនក្រ.បក ចុះថ្ងៃទី៣១ ខែសីហា ឆ្នាំ២០០៩ ស្តីពីការបង្កើតគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់
៣. វិសោធនកម្មអនុក្រឹត្យលេខ ១៩៧ អនក្រ.បក ចុះថ្ងៃទី២១ ខែវិច្ឆិកា ឆ្នាំ២០០៩ ស្តីពីការគ្រប់គ្រងដីចំណីផ្លូវជាតិ និងផ្លូវរថភ្លើង

កិច្ចប្រជុំបានប្រពឹត្តទៅប្រកបដោយកិច្ចសហប្រតិបត្តិការខ្ពស់ និងបរិយាកាសស្និទ្ធស្នាលជាទីបំផុត ដោយបានឯកភាពគ្នាដូចខាងក្រោម ៖
១.​ លេខាធិការដ្ឋាននៃគណៈកម្មការចំពោះកិច្ចរបស់ក្រសួងទាំងពីរនឹងបន្តពិភាក្សាកម្រិតបច្ចេកទេស
២.​ កិច្ចប្រជុំលើកទី២ របស់គណៈកម្មការចំពោះកិច្ច នឹងត្រូវធ្វើនៅក្រសួងសាធារណៈការ និងដឹកជញ្ជូន
៣.របៀបវារៈ នៃការប្រជុំលើកទី២ គឺអនុក្រឹត្យលេខ ១៤១និង១៩៧ ផែនទីខ្សែផ្លូវដែលត្រួតស៊ីគ្នា សម្រង់ខ្សែផ្លូវរបស់ក្រសួងទាំងពីរ និងផ្សេងៗ។

កិច្ចប្រជុំបានបញ្ចប់ប្រកបដោយកិច្ចសហប្រតិបត្តិការខ្ពស់ និងបរិយាកាសស្និទ្ធស្នាលជាទីបំផុត៕

រាជធានីភ្នំពេញ៖នាព្រឹកថ្ងៃអង្គារ ៧ រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៣០ ខែមេសា ឆ្នាំ ២០២៤ នៅទីស្តីការគណៈរដ្ឋមន្ត្រី ឯកឧត្តម ឌី ឡាំថា អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តមឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ បានអញ្ជើញចូលរួមសិក្ខាសិលាស្ដីពី ផលប៉ះពាល់នៃការប្រែប្រួលអាកាសធាតុ និងគោលនយោបាយឆ្លើយតប  ក្រោមអធិបតីភាពដ៏ខ្ពង់ខ្ពស់ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។

 

សិក្ខាសិលា ត្រូវបានរៀបចំដោយក្រុមប្រឹក្សាសេដ្ឋកិច្ច និងវប្បធម៌ នៃទីស្តីការគណៈរដ្ឋមន្ត្រី សហការជាមួយធនាគារពិភពលោក ដោយមានការអញ្ជើញចូលរួមពីតំណាងក្រសួង-ស្ថាប័ន, អង្គទូត,  វិទ្យាស្ថានស្រាវជ្រាវ,  សាកលវិទ្យាល័យ, និងដៃគូអភិវឌ្ឍន៍ សរុបចំនួន ៥០០នាក់។

 

សិក្ខាសាលា បានដំណើរការដោយមានការធ្វើបទបង្ហាញអំពី ការអភិវឌ្ឍ ការប្រែប្រួលអាកាសធាតុ និងកំណែទម្រង់ស្ថាប័ន៕

ខេត្តព្រៃវែង៖ នាថ្ងៃចន្ទ ៦រោច ខែចេត្រ ឆ្នាំរោង ឆស័ក ព.ស២៥៦៧ ត្រូវនឹងថ្ងៃទី២៩ ខែមេសា ឆ្នាំ២០២៤ លោក អ៊ា ឈាង ប្រធានការិយាល័យផ្លូវជនបទ និងលោក ឈន់ ភត្រ្តា អនុប្រធានការិយាល័យផែនការ និងស្ថិតិ នៃមន្ទីរអភិវឌ្ឍន៍ជនបទខេត្តព្រៃវែង បានចូលរួមជាមួយគណៈកម្មការត្រួតពិនិត្យ និងវាយតម្លៃគុណភាព ការងារសាងសង់ ស្តារឡើងវិញ កែលម្អ ពង្រីក ថែទាំ ជួសជុល និងលើកកម្រិតផ្លូវជនបទ និងសំណង់សិល្បការ្យ នៃក្រសួងអភិវឌ្ឍន៍ជនបទ និងក្រុមហ៊ុនទទួលការសាងសង់ ចុះត្រួតពិនិត្យលើការងារចាក់ដីពង្រីក និងលើកកម្ពស់តួផ្លូវសម្រាប់ការងារស្ថាបនាផ្លូវក្រាលកៅស៊ូពីរជាន់ (DBST) ចំនួន០១ខ្សែ ប្រវែង ៤ ០០០ ម ទទឹង៦ម ចិញ្ចើមផ្លូវក្រាលដីល្បាយគ្រួសសងខាង ម្ខាងៗ ប្រវែង១ម សាងសង់ លូមូល ចំនួន ៤កន្លែង ស្ថិតនៅភូមិក្រាំងស្ករ ឃុំក្រាំងតាយ៉ង ស្រុកពាមជរ ខេត្តព្រៃវែង៕

ខេត្តកំពត ៖ នាព្រឹកថ្ងៃចន្ទ ៦រោច ខែចេត្រ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី២៩ ខែមេសា ឆ្នាំ២០២៤  ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងឯកឧត្តម អុឹង វណ្ណា អនុរដ្ឋលេខាធិការ ដោយមានការចូលរួមពី លោក ហ៊ សូរិន ប្រធានមន្ទីរ និងមន្ត្រីជំនាញ នៃមន្ទីរអភិវឌ្ឍន៍ជនបទខេត្តកំពត បានចុះពិនិត្យជាក់ស្តែងដល់ទីតាំងវត្តឆ្កែកូន ស្ថិតនៅភូមិដូនតី ឃុំត្រពាំងភ្លាំង ស្រុកឈូក ខេត្តកំពត បន្ទាប់ពីទទួលបានព័ត៌មានថាពុំមានទឹកគ្រប់គ្រាន់សម្រាប់ប្រើប្រាស់៕

 

 

 

រាជធានីភ្នំពេញ ៖ នាព្រឹកថ្ងៃចន្ទ ៦រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២៩ ខែមេសា ឆ្នាំ២០២៤ ឯកឧត្តម យឹម ជុង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងលោក វណ្ណ សាឬទ្ធិ ប្រធានការិយាល័យ នៃនាយកដ្ឋានថែទាំសុខភាពជនបទ បានចូលរួមក្នុងកិច្ចប្រជុំអន្តរក្រសួង ដើម្បីពិនិត្យ និងពិភាក្សាលើសេចក្តីព្រាងច្បាប់ស្តីពីប្រព័ន្ធទឹកកខ្វក់ ក្រោមអធិបតីភាពឯកឧត្តម ឆឺយ រឿន រដ្ឋលេខាធិការទីស្តីការគណៈរដ្ឋមន្រ្តី ដោយមានការចូលរួមពីតំណាង ក្រសួង ស្ថាប័ន ពាក់ព័ន្ធ ក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ និងក្រុមប្រឹក្សាភាសារខ្មែរ។

 

សេចក្តីព្រាងច្បាប់ស្តីពីប្រព័ន្ធទឹកកខ្វក់ មាន ១៦ជំពូក និង១១៤ មាត្រា៕