ខេត្តរតនគិរី÷ ព្រឹកថ្ងៃទី០១ ខែឧសភា ឆ្នាំ២០២៤ លោក អៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី បានដឹកនាំមន្រ្តីបច្ចេកទេសផ្គត់ផ្គង់ទឹកជនបទ ចុះជួសជុលអណ្តូងស្នប់ដែលខូច ជូនប្រជាពលរដ្ឋជាជនជាតិទំពួន សម្រាប់ការប្រើប្រាស់ ចំនួន ៩៥គ្រួសារ ស្ថិតនៅភូមិចងរ៉ា ឃុំប៉ាតាង ស្រុកលំផាត់ តបតាមសំណើសុំពីអាជ្ញាធរមូលដ្ឋាន និងស្របតាមការណែនាំ ដ៏ខ្ពង់ខ្ពស់របស់ឯកឧត្តមរដ្ឋមន្រ្តី ដែលបានណែនាំឲ្យថ្នាក់ដឹកនាំនិងមន្រ្តីបច្ចេកទេសទាំងអស់ ចុះយុទ្ធនាការពិនិត្យនិងដោះស្រាយលើការប្រើប្រាស់និងបរិភោគ ទឹក របស់ប្រជាពលរដ្ឋតាមមូលដ្ឋាន ក្នុងអំឡុងពេលដែលមានការប្រឈមនឹងគ្រោះរាំងស្ងួតបច្ចុប្បន្ន។

ខេត្តព្រះសីហនុ៖ នាថ្ងៃពុធ ៨ រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១ ខែឧសភា ឆ្នាំ២០២៤ ក្រុមការងារផ្គត់ផ្គង់ទឹកជនបទខេត្តព្រះសីហនុ នៃមន្ទីរអភិវឌ្ឍន៍ជនបទបានចុះជួសជុលអណ្តូងស្នប់បានចំនួន ៤អណ្តូង ជូនប្រជាពលរដ្ឋស្ថិតនៅឃុំស្ទឹងឆាយ ស្រុកកំពង់សីលា ខេត្តព្រះសីហនុ។

ជាលទ្ធផល ក្រុមការងារបានចុះជួលជុលអណ្តូងស្នប់ជូនប្រជាពលរដ្ឋ ដែលកំពុងប្រឈមនឹងការខ្វះខាតទឹក បានចំនួន ៤អណ្តូង ក្នុងភូមិចំនួន ២ភូមិ ក្នុងនោះ ភូមិគីរីវន្ត បានចំនួន២អណ្តូង និងភូមិស្ទឹងឆាយខាងត្បូង បានចំនួន២អណ្តូង ។

ខេត្តស្ទឹងត្រែង ៖ នារសៀលថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ លោក ព្រំ ចាន់ថា ប្រធានមន្ទីរអភិវឌ្ឍន៍ជនបទខេត្តស្ទឹងត្រែង និងលោក សយ គា អនុប្រធានមន្ទីរ បានចុះពិនិត្យស្ថានភាពប្រើប្រាស់ទឹករបស់ប្រជាពលរដ្ឋ នៅភូមិឆ្វាំងសំអាង ស្រុកថាឡាបរិវ៉ាត់ និងភូមិថ្មី សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង ។

បន្ទាប់ពីបានពិនិត្យរួចមក ក្រុមការងារសង្កេតឃើញថា តំបន់ទាំងអស់នេះប្រជាពលរដ្ឋមានទឹកស្រះ និងអណ្ដូងប្រើប្រាស់ជាធម្មតា។

ខេត្តបន្ទាយមានជ័យ៖ នាថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ បានដឹកនាំក្រុមការងារផ្គត់ផ្គង់ទឹកជនបទ ចុះពិនិត្យប្រព័ន្ធចែកចាយទឹកតាមបំពង់ខ្នាតតូចសហគមន៍ របស់អង្គការទស្សនៈពិភពលោក នៅភូមិត្របែក ឃុំបុស្បូវ ស្រុកព្រះនេត្រព្រះ ដែលត្រូវបានផ្អាកដំណើរការ ដោយសារស្រះដែលជាប្រភពផ្ដល់ទឹករីងស្ងួត។

ជាលទ្ធផល មន្ទីរអភិវឌ្ឍន៍ជនបទខេត្តបន្ទាយមានជ័យនឹងសហការបន្តជាមួយ អង្គការទស្សនៈពិភពលោក ដើម្បីស្តារស្រះនេះឡើងវិញ នៅក្នុងពេលឆាប់ៗខាងមុខ។ ដោយបច្ចុប្បន្ន ប្រជាពលរដ្ឋរស់នៅក្នុងភូមិនេះ បាននិងកំពុងប្រើប្រាស់ទឹកស្រះសហគមន៍ ១កន្លែងផ្សេងទៀត ដែលអាចផ្ដល់ទឹកប្រើប្រាស់ជូនប្រជាពលរដ្ឋបានក្នុងរយៈពេល ២សប្តាហ៍ទៀត។

ដោយឡែក ក្រុមការងារការិយាល័យផ្គត់ផ្គង់ទឹកជនបទ បានចុះជួសជុលអណ្តូងស្នប់របស់ប្រជាពលរដ្ឋ ចំនួន ២អណ្តូង នៅភូមិចំណោមកើត ឃុំចំណោម ស្រុកមង្គលបូរី ហើយជាសំណូមពរ អាជ្ញាធរឃុំ និងប្រជាពលរដ្ឋ បានសំណូមពរឱ្យបំពាក់ម៉ូទ័របូមទឹកបន្ថែម ដើម្បីបង្កលក្ខណៈងាយស្រួលដល់ប្រជាពលរដ្ឋយកទឹកទៅប្រើប្រាស់បានលឿន៕ (បញ្ជាក់ ៖ ម៉ូទ័រនិងថ្លៃភ្លើងប្រើប្រាស់លោកមេឃុំជាអ្នកទទួលបន្ទុក)

ខេត្តសៀមរាប៖ នាថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ លោក ទូច ម៉ាឡា ប្រធានមន្ទីរ បានដឹកនាំមន្ដ្រីបច្ចេកទេសផ្គត់ផ្គង់ទឹកជនបទ នៃមន្ទីរអភិវឌ្ឍន៍ជនបទខេត្តសៀមរាប  បានបន្តចុះពិនិត្យស្ថានភាពការប្រើប្រាស់ទឹក តាមបណ្តាញចែកចាយទឹក ស្រះ អណ្តូង អូរ ប្រឡាយ នៅរដូវប្រាំងដែលមានភាពរីងស្ងួត និងមានបញ្ហាប្រឈមខ្លាំងក្នុងទីតាំងភូមិមួយចំនួន ក្នុងឃុំគោកដូង, និងភូមិតាសោម ឃុំតាសោម ស្រុកអង្គរជុំ, ឃុំប្រាសាទ និងឃុំស្វាយស ស្រុកវ៉ារិន ខេត្តសៀមរាប ។

ក្នុងឱកាសចុះពិនិត្យជាក់ស្តែង លោកប្រធានមន្ទីរ បានសំណេះសំណាល និងសំណូមពរដល់អាជ្ញាធរមូលដ្ឋាន និងប្រជាពលរដ្ឋ ឱ្យយកចិត្តទុកដាក់ខ្ពស់ក្នុងការថែរក្សាប្រភពទឹកឱ្យបានល្អ និងប្រើប្រាស់ទឹកដោយការសន្សំសំចៃ ដើម្បីរក្សាបាននូវសុខភាព អនាម័យល្អ និងមានទឹកប្រើប្រាស់គ្រប់គ្រាន់ ជាពិសេសបានស្នើសុំឱ្យជួយផ្ដល់ព័ត៌មានជូនមន្ទីរ ក្នុងករណី ភូមិ ឃុំ ស្រុកណា មានការប្រឈមខ្លាំងនឹងបញ្ហាទឹករីងស្ងួត អណ្តូងខូច ខ្វះខាតទឹកបរិភោគ ឬប្រើប្រាស់ ដើម្បីមន្ទីរចាត់វិធានការដោះស្រាយឱ្យបានទាន់ពេលវេលា៕

ខេត្តស្វាយរៀង៖ នាព្រឹកថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ ក្រុមការងារបច្ចេកទេសទឹកស្អាតរបស់មន្ទីរអភិវឌ្ឍន៍ជនបទខេត្តស្វាយរៀង បានចុះត្រួតពិនិត្យប្រភពទឹក និងបានជួសជុលអណ្ដួងទឹកចំនួន២ ជូនដល់ប្រជាពលរដ្ឋសម្រាប់ការប្រើប្រាស់ ក្នុងស្រុកកំពង់រោទិ៍។

ជាលទ្ធផលនៃការត្រួតពិនិត្យដោយសារបញ្ហានៃការកើនកំដៅ និងមិនមានភ្លៀងធ្លាក់ផងនោះ ធ្វើឱ្យនីវ៉ូទឹកអណ្ដូងមានការធ្លាក់ចុះ បូមពុំចេញទឹក ចំនួន ៤៥អណ្ដូង ស្ថិតនៅភូមិបន្ទាយក្រាំង ឃុំបន្ទាយក្រាំង ស្រុកកំពង់រោទិ៍ ។

ក្នុងនោះក្រុមជាងជុលម៉ូទ័រអណ្ដូងទឹក គឺបានជួសជុលអណ្តូងឱ្យដំណើរការធម្មតាឡើងវិញ បានចំនួន ២អណ្ដូង ដែលជាលទ្ធផលស្ថានភាពទឹកមានភាពចេញខ្លាំងជាងមុន ហើយប្រជាពលរដ្ឋសប្បាយចិត្ត និងធ្វើការថ្លែងអំណរគុណដល់ក្រុមការងារមន្ទីរអភិវឌ្ឍន៍ជនបទខេត្តស្វាយរៀង ដែលបានរកជាងធ្វើការកែច្នៃអណ្តូងពួកគាត់ដំណើរការបានល្អជាងមុន។

ខេត្តកំពង់ឆ្នាំង៖ នាព្រឹកថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ ក្រុមការងារបច្ចេកទេសទឹកស្អាតរបស់មន្ទីរអភិវឌ្ឍន៍ជនបទខេត្តកំពង់ឆ្នាំង បានចុះបំពាក់ក្បាលអណ្តូងស្នប់ និងដាក់ម៉ូទ័រ ១កន្លែង នៅភូមិថ្មស ឃុំខ្នាឆ្មា ស្រុកសាមគ្គីមានជ័យ និងខួងអណ្តូងថ្មី ចំនួន ១កន្លែងជូនប្រជាពលរដ្ឋនៅភូមិគោកណាំង ឃុំតាំងក្រសាំង ស្រុកទឹកផុស ដើម្បីបម្រើឱ្យការប្រើប្រាស់របស់ប្រជាពលរដ្ឋមូលដ្ឋាន ក្នុងស្ថានភាពកំដៅកើនឡើងជាលំដាប់ ដែលធ្វើឱ្យប្រភពទឹករងការរីងស្ងួតផងដែរ។