ខេត្តកណ្តាល ៖ នារសៀលថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ លោកស្រី ជី ថាវី ប្រធានមន្ទីរអភិវឌ្ឍន៍ជនបទខេត្តកណ្តាល បានដឹកនាំមន្ត្រីបច្ចេកទេសការិយាល័យផ្គត់ផ្គង់ទឹកជនបទ ចុះត្រួតពិនិត្យទីតាំងអណ្តូង ព្រែកអំបិល និងព្រែករៃ ដែលបានរីងស្ងួត និងគោករាក់ ដោយកត្តាប្រែប្រួលអាកាសធាតុ។

ពិធីនេះមានការអញ្ជើញចូលរួមសហការពីលោក លោកស្រីប្រធាន អនុប្រធានការិយាល័យ និងមន្ត្រីជំនាញចំណុះរដ្ឋបាលស្រុកស្អាង លោក លោកស្រីមេឃុំ សមាជិកក្រុមប្រឹក្សាឃុំ លោក លោកស្រីមេភូមិ អនុភូមិ និងបងប្អូនប្រជាពលរដ្ឋជាច្រើនរូបទៀត។

បន្ទាប់ពីបានជួបប្រជុំពិភាក្សាការងារលើបញ្ហាប្រឈម នៃការខ្វះទឹក និងការងារស្តារព្រែក ជាមួយអាជ្ញា ធរមូលដ្ឋាននៅសាលាឃុំព្រែកអំបិលរួចមក លោកស្រីប្រធានមន្ទីរ បានបន្តដឹកនាំក្រុមការងារជំនាញរបស់មន្ទីរ និងក្រុមការងារជំនាញរបស់រដ្ឋបាលស្រុក រួមជាមួយលោកឃុំព្រែកអំបិល និងលោក លោកស្រីមេភូមិ អនុភូមិ បានចុះទៅពិនិត្យដល់ទីតាំងជាក់ស្តែង។

លោកមេឃុំព្រែកអំបិល បានជម្រាបជូនអំពីស្ថានភាពទឹកនៅទូទាំងឃុំថាសម្រាប់ទឹកស្អាតប្រើប្រាស់ពុំមានខ្វះខាតទេ ដោយសារឃុំមានស្ថានីយ៍ចែកចាយទឹកឯកជនយកប្រភពទឹកមកពីទន្លេបាសាក់។ រីឯប្រភពទឹកបម្រើឱ្យការស្រោចស្រព ព្រែកអំបិលបានគោករាក់ដោយដុំ កន្លែងខ្លះជ្រៅនៅប្រើប្រាស់បាន និងកន្លែងខ្លះរីងគោក ហើយបច្ចុប្បន្នឃុំកំពុងស្តារព្រែក និងប្រើប្រាស់វិញបានបណ្តើរៗហើយ។

បន្ទាប់ពីបញ្ចប់ការងារចុះពិនិត្យស្ថានភាពខ្វះទឹកប្រើប្រាស់ និងបរិភោគប្រចាំថ្ងៃនៅឃុំព្រែកអំបិលរួចមក លោកស្រីប្រធានមន្ទីរ បានបន្តដឹកនាំក្រុមការងារមន្ទីរ បន្តចុះពិនិត្យអណ្តូងដែលកំពុងរងផលប៉ះពាល់នៅភូមិព្រែករាំង និងភូមិព្រែករាំង (ក) នៅឃុំទឹកវិល ស្រុកស្អាង។ ជាលទ្ធផលបានបង្ហាញឱ្យឃើញថា នៅឃុំទឹកវិល ចំពោះកាខ្វះទឹកប្រើប្រាស់ ស្ថិតក្នុងកម្រិតទាបនៅឡើយថ្វីដ្បិតថា ព្រែករាំង បានគោករាក់ក្តី ប៉ុន្តែបងប្អូនប្រជាពលរដ្ឋភាគច្រើន ប្រើប្រាស់បណ្តាញចែកចាយទឹក និងមួយចំនួនតូចប្រើប្រាស់អណ្តូង ហើយអណ្តូងខ្លះរីង និងអណ្តូងខ្លះនៅមានទឹកនៅឡើយ គ្រាន់តែចេញតិចជាងមុន ហើយប្រជាពលរដ្ឋដែលខ្វះទឹក បានសុំប្រើប្រាស់ជាមួយអណ្តូងអ្នកជិតខាងដែលនៅមានទឹក។

ដោយឡែកនៅឃុំក្រាំងយ៉ូវ ស្រុកស្អាង មានបណ្តាញចែកចាយទឹក ប៉ុន្តែប្រជាពលរដ្ឋមួយចំនួនពុំបានត បណ្តាញទឹកស្អាតប្រើប្រាស់ ដោយនៅតែប្រើប្រាស់ទឹកអណ្តូងផ្ទាល់ខ្លួន បច្ចុប្បន្នអណ្តូងខ្លះបានរីង ហើយពួកគាត់ទៅប្រើប្រាស់អណ្តូងទឹកជាមួយអ្នកជិតខាង។

តាមរយៈការចុះពិនិត្យស្ថានភាពការខ្វះខាតទឹកប្រើប្រាស់ និងបរិភោគប្រចាំថ្ងៃនៅតាមទីតាំងជាក់ស្តែងខាងលើនេះ អាជ្ញាធរមូលដ្ឋាន និងគ្រប់ភាគីពាក់ព័ន្ធ បានចូលរួមសហការយ៉ាងសកម្ម និងមានការគាំទ្រប្រកបដោយសេចក្តីសប្បាយរីករាយពីសំណាក់បងប្អូនប្រជាពលរដ្ឋ ដោយបានគោរពថ្លែងអំណរគុណយ៉ាងជ្រាលជ្រៅបំផុតដល់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ដែលតែងតែយកចិត្តទុកដាក់ដល់បងប្អូនប្រជាពលរដ្ឋគ្រប់កាលៈទេសៈ និងគ្រប់ស្ថានការណ៍ នៃការជួបការលំបាក និងទុកកង្វល់ផ្សេងៗ៕

ខេត្តប៉ៃលិន៖ នាថ្ងៃអង្គារ ៧រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៣០ ខែមេសា ឆ្នាំ២០២៤ លោក សុខ សុវណ្ណរតនា អនុប្រធានមន្ទីរអភិវឌ្ឍន៍ជនបទខេត្តប៉ៃលិន បានដឹកនាំមន្រ្តីបច្ចេកទេស សហការជាមួយក្រុមការងាររដ្ឋបាលស្រុកសាលាក្រៅ ចុះពិនិត្យស្ថានភាពទឹកក្នុងស្រះចំនួន ២ទីតាំង ក្នុងភូមិកូនដំរី និងភូមិផ្ទះស្បូវ និងធ្វើការជួសជុលអណ្តូងស្នប់បានចំនួន ៣អណ្តូង នៅភូមិភ្នំព្រាលនិងភូមិអន្លុងរក្សា ដែលស្ថិតនៅក្នុង ឃុំស្ទឹងត្រង់ ស្រុកសាលាក្រៅ។

ខេត្តប៉ៃលិន៖ នាថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ លោក ហ៊ត ឬទ្ធី ប្រធានមន្ទីរអភិវឌ្ឍន៍ជនបទខេត្តប៉ៃលិន បានដឹកនាំក្រុមការងារមន្ទីរទទួលបន្ទុកការងារផ្គត់ផ្គង់ទឹកស្អាត សហការជាមួយមន្ត្រីរដ្ឋបាលក្រុង ចុះជួសជុលអណ្តូងស្នប់ជូនប្រជាពលរដ្ឋនៅក្រុងប៉ៃលិន បានចំនួន ៤អណ្តូង ក្នុងនោះនៅភូមិថ្មីចំនួន ២អណ្តូង ភូមិអូរច្រាកណ្តាលចំនួន ០១អណ្តូង និងភូមិវាលវង់បានចំនួន ០១អណ្តូង៕

ខេត្តពោធិ៍សាត់ ៖ ថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ លោក ប្លង់ បញ្ញា អនុប្រធានមន្ទីរអភិវឌ្ឍន៍ជនបទខេត្តពោធិសាត់ ព្រមទាំងមន្ត្រីជំនាញ បានចុះពិនិត្យស្ថានភាពប្រើប្រាស់ទឹករបស់ប្រជាពលរដ្ឋ និងបានជ្រើសរើសទីតាំងសម្រាប់សាងសង់អណ្ដូងស្នប់ចំនួន ៣អណ្ដូង នៅឃុំតាលោ ស្រុកតាលោសែន ខេត្តពោធិ៍សាត់ ។

ជាលទ្ធផល ក្រុមការងារបានកំណត់បានទីតាំងចំនួន ៣ សម្រាប់ខួងអណ្តូងប្រើប្រាស់ គឺនៅភូមិប្រហាលចំនួន ០១អណ្តូង និងភូមិរហាលទិលចំនួន ០២អណ្តូង និងជាមួយគ្នានេះក៏បានចុះពិនិត្យការដ្ឋានខួងអណ្តូងនៅភូមិសំសាន្ត ឃុំតាលោ ស្រុកតាលោសែនផងដែរ។ នៅថ្ងៃដដែលនេះ ក្រុមការងារមន្ទីរអភិវឌ្ឍន៍ជនបទចំនួន ៤រូប ក៏បានចុះជួសជុលអណ្ដូងស្នប់ជូនប្រជាពលរដ្ឋបានចំនួន០២ អណ្ដូង នៅភូមិស្ទឹង ឃុំកណ្ដៀង ស្រុកកណ្ដៀង និងបានជួសជុលអណ្តូងស្នប់នៅភូមិស្រះស្រង់ សង្កាត់ព្រៃញី ក្រុងពោធិ៍សាត់ ដោយមានប្រជាពលរដ្ឋប្រើប្រាស់សរុប ៣៨គ្រួសារ។

ខេត្តក្រចេះ៖ នាថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១ ខែឧសភា ឆ្នាំ២០២៤ មន្ទីរអភិវឌ្ឍន៍ជនបទខេត្តក្រចេះ បានបែងចែកជា ២ក្រុម ចុះជួសជុលអណ្តូងស្នប់ជូនប្រជាពលរដ្ឋដែលក្នុងស្ថានភាពកំពុងជួយគ្រោះរាំងស្ងួត នៅឃុំកន្ទួត បានចំនួន ០៦អណ្តូង ស្មើនឹង ៨៧គ្រួសារទទួលផល និងឃុំក្បាលដំរី បានចំនួន០៩ អណ្តូង ស្មើនឹង១៣២គ្រួសារទទួលផល។

-ក្រុមទី១: ដឹកនាំដោយលោក ម៉ៅ សុខជា អនុប្រធានមន្ទីរ និងមន្ត្រីសមាជិក៤រូបទៀតសហការជាមួយរដ្ឋបាលឃុំកន្ទួត ស្រុកចិត្របុរី ចុះជួសជុលអណ្តូងស្នប់ដែលខូតខាតមាន៖ ភូមិស្រែនន ចំណុចទេចម្លង អន្លង់កេះ អង្គ្រងបានចំនួន០៦អណ្តូង ដែលមានគ្រួសារទទួលផលពីការប្រើប្រាស់ទឹកអណ្តូងចំនួន ៨៧គ្រួសារ។

-ក្រុមទី២: ដឹកនាំដោយលោក លឹម ជាវហាវ ប្រធានមន្ទីរ លោក ធន សារី អនុប្រធានមន្ទីរការិយាល័យផ្គត់ផ្គង់ទឹកជនបទ និងមន្ត្រីសមាជិក៣រូបទៀត សហការជារដ្ឋបាលឃុំក្បាលដំរី ស្រុកអូរគ្រៀងសែនជ័យ ចុះជួសជុលអណ្តូងស្នប់ នៅភូមិស្រែស្បូវ ចំនួន ០៤ អណ្តូង ភូមិអូតាណឹង ចំនួន០២ អណ្តូង ភូមិចង្ហប ចំនួន ០២អណ្តូង ភូមិអូពោធ៍ ចំនួន ០១អណ្តូង សរុបចំនួន ០៩ អណ្តូង ដែលមានគ្រួសារទទួលផលពីការប្រើប្រាស់ទឹកអណ្តូងចំនួន ១៣២គ្រួសារ។