ខេត្តបន្ទាយមានជ័យ៖ នាថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០២ ខែឧសភា ឆ្នាំ២០២៤ លោក ជា យុទ្ធារុណ ប្រធានមន្ទីរ បានដឹកនាំមន្ដ្រីបច្ចេកទេស នៃអភិវឌ្ឍន៍ជនបទខេត្តបន្ទាយមានជ័យ បន្ដចុះពិនិត្យស្ថានភាពប្រភពទឹកសម្រាប់ប្រើប្រាស់របស់ប្រជាពលរដ្ឋក្នុងឃុំសំរោង ស្រុកអូរជ្រៅ។

តាមរយៈការចុះពិនិត្យ មានអណ្តូងស្នប់ចំនួន ៤អណ្ដូង បានខូចមិនអាចជួសជុលប្រើប្រាស់បាន ដោយឡែក ស្រះទឹកសហគមន៍ ១កន្លែង ដែលសិស្សានុសិស្សក្នុងសាលាបឋមសិក្សាបត់ត្រង់ ប្រើប្រាស់ជាប្រចាំ ដែលអាចប្រឈមនឹងការរីងស្ងួតក្នុងប្រមាណ ១០ថ្ងៃទៀត ដែលនាំឱ្យមានការខ្វះទឹកសម្រាប់សិស្សានុសិស្សប្រើប្រាស់ប្រចាំថ្ងៃ។

ជាមួយគ្នានោះ មន្ទីរអភិវឌ្ឍន៍ជនបទខេត្តបានផ្តល់អណ្តូងខួង បំពាក់ស្នប់ថ្មី ចំនួន ០១អណ្ដូង៕

ខេត្តកំពង់ចាម៖ នាថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២ ខែឧសភា ឆ្នាំ២០២៤ លោក អ៉ឹង វិសុទ្ធ ប្រធានមន្ទីរអភិវឌ្ឍន៍ជនបទខេត្តកំពង់ចាម បានដឹកនាំក្រុមការងារបច្ចេកទេស ចុះជួសជុលអណ្តូងស្នប់ ក្នុងឃុំត្រពាំងព្រះ ស្រុកព្រៃឈរ ដែលពុំទាន់មានបណ្តាញទឹកទៅដល់បានចំនួន៤ទីតាំង ដូចខាងក្រោម៖
១-ជួសជុលអណ្តូងស្នប់ ជំនួយឥតសំណងរបស់សាធារណៈរដ្ឋប្រជាមានិតចិន សាងសង់ឆ្នាំ២០២០ ចំនួន១ អណ្តូង ស្ថិតភូមិខ្វាវ ឃុំត្រពាំងព្រះ ស្រុកព្រៃឈរ បានជោគជ័យ អាចផ្គត់ផ្គង់ទឹកបាន១០គ្រួសារ
២-ជួសជុលអណ្តូងស្នប់ ១អណ្តូង ស្ថិតភូមិខ្វាវ ឃុំត្រពាំងព្រះ បានជោគជ័យ តែទឹកខ្សោយ អាចផ្គត់ផ្គង់ទឹកបាន ៤ ទៅ ៥គ្រួសារ
៣-ជួសជុលអណ្តូងស្នប់ ១អណ្តូង ស្ថិតនៅក្នុងបរិវេណសាលាមត្តេយ្យទន្លេស ភូមិទន្លេស ឃុំត្រពាំងព្រះ បានជោគជ័យ អាចផ្គត់ផ្គង់ទឹកសម្រាប់សិស្សប្រើប្រាស់គ្រប់គ្រាន់
៤-ជួសជុលអណ្តូងស្នប់ ១អណ្តូង ស្ថិតនៅក្នុងភូមិអូរដូនញា ឃុំត្រពាំងព្រះ បានជោគជ័យ អាចផ្គត់ផ្គង់ទឹកបាន ១០គ្រួសារ៕

ខេត្តព្រះវិហារ៖ នាព្រឹកថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០២ ខែឧសភា ឆ្នាំ២០២៤ លេខាធិការដ្ឋានក្រុមការងារ PWG-RWSSH ខេត្តព្រះវិហារ បានរៀបចំកិច្ចប្រជុំដើម្បីពិភាក្សាបញ្ហាប្រឈម និងរកដំណោះស្រាយ លើការប្រើប្រាស់ទឹកប្រចាំថ្ងៃរបស់ប្រជាពលរដ្ឋ ក្នុង រដូវរាំងស្ងួតនេះ កិច្ចប្រជុំនេះក្រោមអធិបតី ឯកឧត្តម អ៊ុក គឹមសាន អភិបាលរងខេត្ត និងជាប្រធានក្រុមការងារPWG-RWSSHខេត្ត ដោយមានការចូលរួមពីលោក លោកស្រីប្រធាន អនុប្រធាន សមាជិក លេខាធិការដ្ឋាន និងលោក លោកស្រីតំណាងអង្គការដៃគូក្នុងខេត្ត សរុបចំនួន១៥នាក់ ស្រី២នាក់។

កិច្ចប្រជុំមានគោលបំណងដើម្បីស្វែងរកដំណោះស្រាយ ពិភាក្សាការបញ្ហាប្រឈម ដែលខេត្តព្រះវិហារកំពុងទទួលរងភាពរាំងស្ងួត និងខ្វះខាតទឹកប្រើប្រាស់។

ជាលទ្ធផលនៃកិច្ចប្រជុំគឺអង្គការដៃគូនឹងត្រៀមសហការជាមួយមន្ទីរអភិវឌ្ឍន៍ជនបទខេត្ត ក្នុងការជួសជុលអណ្តូងស្នប់ដែលខូចខាត អោយដំណើរការឡើងវិញ នៅភូមិដែលនឹងប្រឈមការខ្វះប្រភពទឹកប្រើប្រាស់។
ស្ថានភាពទូទៅក្នុងខេត្តថ្ងៃនេះ គិតត្រឹមម៉ោង៤:៣០នាទីរសៀលថ្ងៃ០២ ខែឧសភា ឆ្នាំ២០២៤ នៅខេត្តព្រះវិហារ ពុំទាន់មានភ្លៀងធ្លាក់នៅឡើយទេ។

ខេត្តក្រចេះ៖ ថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី២ ខែឧសភា ឆ្នាំ២០២៤ លោក លឹម ជីវហាវ ប្រធានមន្ទីរអភិវឌ្ឍន៍ជនបទខេត្តក្រចេះ ចាត់ក្រុមការងារបច្ចេកទេសទឹកស្អាតដោយបែងចែកជា ២ក្រុម ដើម្បីបន្តចុះជួសជុលអណ្តូងស្នប់ដែលខូចមិនអាចប្រើប្រាស់បាន។
ជាលទ្ធផល ក្រុមការងារបច្ចេកទេសទឹកស្អាតរបស់មន្ទីរអភិវឌ្ឍន៍ជនបទខេត្តក្រចេះ គឺបានជួសជុលអណ្ដូងសម្រេចបានចំនួន ១០អណ្តូង ក្នុងស្រុកស្នួល ស្រុកចិត្របុរី និងស្រុកសំបូរ។ គិតត្រឹមថ្ងៃនេះ មន្ទីរអភិវឌ្ឍន៍ជនបទខេត្តក្រចេះ បានជួសជុលអណ្ដូង ចំនួន៤២អណ្តូង និងមានភ្លៀងចំនួន ១មេ កម្រិតមធ្យម នៅឃុំស្រែចារ ស្រុកស្នួលក្នុងថ្ងៃនេះ។

ខេត្តពោធិ៍សាត់៖ នាព្រឹកថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០២ ខែឧសភា ឆ្នាំ២០២៤ ក្រុមការងារបច្ចេកទេសទឹកស្អាតរបស់មន្ទីរអភិវឌ្ឍន៍ជនបទខេត្តពោធិ៍សាត់ ចុះជួសជុលអណ្ដូងទឹកបន្ទាន់ចំនួន ០៣ អណ្ដូង សម្រាប់ផ្តល់ជូនប្រជាពលរដ្ឋប្រើប្រាស់ នៅក្នុងអំឡុងពេលមានគ្រោះរាំងស្ងួត ដែលអណ្តូងទាំង៣កន្លែងនេះមានទីតាងដូចខាងក្រោម៖
១- ភូមិព្រៃឱម៉ាល់ សង្កាត់រលាប ក្រុងពោធិ៍សាត់ បានចំនួន ២អណ្ដូង ដែលមានប្រជាពលរដ្ឋប្រើប្រាស់ចំនួន ៥៥គ្រួសារ។
២- ភូមិបវង្ស សង្កាត់ចំរើនផល ក្រុងពោធិ៍សាត់ បានចំនួន ១អណ្ដូង ដែលមានពលរដ្ឋប្រើប្រាស់ចំនួន ១៥គ្រួសារ។

សូមបញ្ជាក់ផងដែរថាចំពោះស្ថានភាពរួមទូទៅក្នុងខេត្តពោធិ៍សាត់ ប្រជាពលរដ្ឋនៅមានសល់ទឹកប្រើប្រាស់នៅឡើយ ដោយពុំទាន់មានភូមិណាមួយដាច់ទឹកប្រើប្រាស់ទេ។ ដោយឡែកចំពោះក្រុមការងារសាងសង់អណ្តូងថ្មី កំពុងបានដំណើរការសកម្មភាពខួងអណ្តូងចំនួន២ទីតាំងទៀតស្ថិតនៅភូមិសំសាន ឃុំតាលោ ស្រុកតាលោសែនជ័យ ខេត្តពោធិ៍សាត់។

ខេត្តកោះកុង៖ នាថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ប.ស.២៥៦៧ ថ្ងៃត្រូវនឹងថ្ងៃទី០២ ឧសភា ឆ្នាំ២០២៤ លោក ប៉ុល ចន្ថា អនុប្រធានមន្ទីរអភិវឌ្ឍន៍ជនបទខេត្តកោះកុង ទទួលបន្ទុកការងារទឹកស្អាត និងអនាម័យ បានដឹកនាំក្រុមការងារបច្ចេកទេសវិស័យផ្គត់ផ្គង់ទឹក នៃមន្ទីរអភិវឌ្ឍន៍ជនបទ អញ្ជើញទៅពិនិត្យប្រភពទឹកប្រើប្រាស់របស់ប្រជាពលរដ្ឋនៅស្រុកចំនួន ៤ គឺ ស្រុកស្រែអំបិល គីរីសាគរ បុទុមសាគរ និង ស្រុកកោះកុង ខេត្តកោះកុង ។

ក្នុងឱកាសនោះដែរ ក្រុមការងារបានអញ្ជើញទៅពិនិត្យស្ថានភាព ស្រះសហគមន៍ អណ្ដូងស្នប់ អណ្ដូងលូ និងប្រព័ន្ធចែកចាយទឹក នៅក្នុងស្រុកទាំង ៤ ក្នុងឃុំចំនួន ១០ឃុំ រួមមាន ឃុំដងពែង ស្រែអំបិល បឹងព្រាវ ជីខលើ ព្រែកខ្សាច់ ភ្ញីមាស អណ្ដូងទឹក កណ្ដោល តានូន និងឃុំជ្រោយប្រស់ ដែលអណ្ដូងទាំងនោះស្ថិតនៅក្នុងភូមិទាំង ២០ភូមិ គឺភូមិដងពែង តាធង ព្រាំង ចម្ការក្រោម សាលាម្នាង អូរជ្រៅ ជ្រោយ ផ្លោង តានី ឈូក ព្រែកខ្សាច់ យាយសែន ភ្ញីមាស ជីមាល កណ្ដោល ធ្នង់ បាក់រនាស់ និងភូមិជ្រោយប្រស់ ។

ជាលទ្ធផលក្រុមការងារបានពិនិត្យឃើញថា អណ្ដូងដែលមានភាពរីងស្ងួត មានអណ្ដូងស្នប់មានចំនួន ២៥អណ្ដូង អណ្ដូងលូចំនួន ១៨អណ្ដូង និងស្រះសហគមន៍មានចំនួន ២ស្រះ ៕

ខេត្តតាកែវ៖ នាថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី ០១ ខែឧសភា ឆ្នាំ២០២៤ ដោយមានការយកចិត្តទុកដាក់ពីសំណាក់ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានធ្វើការណែនាំអោយក្រុមការងារមន្ទីរអភិវឌ្ឍន៍ជនបទខេត្តតាកែវ បន្តធ្វើការដឹកទឹកចែកជូនបងប្អូនប្រជាពលរដ្ឋចំនួន៣ភូមិស្មើនឹង២១៧គ្រួសារ ក្នុងនោះភូមិត្រពាំងវិហារ ចំនួន៦០ គ្រួសារ ភូមិស្វាយចេកចំនួន ៥២ គ្រួសារនិងភូមិអញ្ចាញ១០៥គ្រួសារ ស្ថិតនៅឃុំជើងគួន ស្រុកសំរោង កំពុងខ្វះខាតទឹកសម្រាប់ប្រើប្រាស់ និងទឹកបរិភោគ ក្នុងដំណាក់កាលជួបគ្រោះរាំងស្ងួត ។

សូមបញ្ជាក់ផងដែរថា ៖ យោងតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងអភិវឌ្ឍន៍ជនបទបានរួមចំណែកយកចិត្តទុកដាក់ខ្ពស់បំផុតចំពោះការខ្វះខាតទឹកប្រើប្រាស់របស់ប្រជាជនទូទាំងប្រទេស ។ អាស្រ័យហេតុនេះក្រសួងក៏បានចេញសេចក្ដីណែនាំដល់ថ្នាក់ដឹកនាំ និងអង្គភាពក្រោមឱវាទក្រសួងទាំងអស់ចាត់វិធានការ និងកិច្ចអន្តរាគមន៍បន្ទាន់លើការខ្វះខាតទឹកប្រើប្រាស់ និងទឹកបរិភោគ ដោយសារកត្តាប្រែប្រួលធាតុអាកាស ដោយតម្រូវឱ្យ គ្រប់អង្គភាព មន្ទីរអភិវឌ្ឍន៍ជនបទខេត្តបានចុះធ្វើសកម្មភាពលើប្រភពផ្គត់ផ្គង់ទឹកតាមរយៈវិធានការស្ដាស្រះ ជួសជុល និងខួងអណ្ដូងធ្វើយ៉ាងណាឱ្យប្រជាពលរដ្ឋមានទឹកប្រើប្រាស់ និងទឹកសម្រាប់បរិភោគគ្រប់គ្រាន់៕