ខេត្តកំពត៖ នាថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី០៣ ខែ ឧសភា ឆ្នាំ២០២៤ ក្រុមការងារមន្ទីរអភិវឌ្ឍន៏ជនបទខេត្តកំពត សហការជាមួយអាជ្ញាធរ ស្រុកអង្គរជ័យ ក្នុងការដឹកទឹកស្អាត ចែកជូនប្រជាពលរដ្ឋក្នុងមូលដ្ឋានស្រុកសម្រាប់ហូប និងប្រើប្រាស់រួមមានដូចខាងក្រោម៖
១. ស្រុកអង្គរជ័យ ឃុំប្រភ្នំ ភូមិទួលខ្ពស់ ភូមិដំណាក់ក្រសាំង និង ភូមិក្រាំងថ្កូវ សរុបចំនួន ២០០ គ្រួសារ ស្មើនិង ៤ ឡាន ចំណុះ ២០ ០០០ លីត្រ និងពីដុងចំនួន៩ ។
២. ស្រុកទឹកឈូ ឃុំថ្មី ភូមិដូនស៊យ ជីកស្រះសហគមន៍ ០១កន្លែង និងបានដឹកទឹកស្អាតចែកជូនប្រជាពលរដ្ឋនៅភូមិត្រសេកកោង ជាពិសេសជូនគ្រួសារជនពិការ ចំនួន៦ពីដុងស្មើរនិង ១២០លីត្រ ព្រមទាំងជូនសំបកពីដុងចំនួន៦ផងដែរ ។

ដោយឡែកស្ថានភាពទូទៅសម្រាប់ខេត្តកំពត នៅពេលព្រឹក ម៉ោង ៦:៣០នាទី មានភ្លៀងធ្លាក់ប្រហែល២០នាទីនៅក្រុងកំពត និងផ្នែកខ្លះ នៃស្រុកទឹកឈូនិងស្រុកកំពង់ត្រាច។

ខេត្តពោធិ៍សាត់៖ នាព្រឹកថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៣ ខែឧសភា ឆ្នាំ២០២៤ ក្រុមការងារបច្ចេកទេសទឹកជនបទនៃមន្ទីរអភិវឌ្ឍន៍ជនបទ ខេត្តពោធិ៍សាត់ បានចុះជួសជុលអណ្ដូងទឹកខូចចំនួន ០២អណ្ដូង សម្រាប់ផ្តល់ជូនប្រជាពលរដ្ឋប្រើប្រាស់ នៅក្នុងអំឡុងពេលគ្រោះរាំងស្ងួត ដែលមានទីតាំងដូចខាងក្រោម ៖
១. អណ្តូងទី១ នៅភូមិបរវង្ស សង្កាត់ចំរើនផល ក្រុងពោធិ៍សាត់ មានប្រជាពលរដ្ឋប្រើប្រាស់ចំនួន ១៧ គ្រួសារ ។
២. អណ្តូងទី២ នៅភូមិជ្រៃក្រឹម ឃុំតាលោក ស្រុកតាលោកសែនជ័យ មានប្រជាពលរដ្ឋប្រើប្រាស់ចំនួន ១៥ គ្រួសារ។
ដោយឡែកចំពោះក្រុមការងារខួងអណ្តូងថ្មីកំពុងបន្តសកម្មភាព ខួងរណ្តៅទី២ នៅភូមិសំសាន្ត ឃុំតាលោ ស្រុកតាលោសែនជ័យ ខេត្តពោធិ៍សាត់ ។
ចំពោះស្ថានភាពខេត្ត ថ្ងៃនេះក្រុងពោធិ៍សាត់ និងស្រុកកណ្តៀង បានទទួលភ្លៀងធ្លាក់លាយឡំជាមួយខ្យល់ចាប់តាំងពីម៉ោង ១៥:៣០រសៀលរហូតដល់ម៉ោង ១៦:៣០រសៀល ។

ខេត្តរតនគិរី៖ នាព្រឹកថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី០៣ ខែឧសភា ឆ្នាំ២០២៤ លោក អៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី ដឹកនាំមន្រ្តីបច្ចេកទេសនៃការិយាល័យផ្គត់ផ្គង់ទឹកជនបទ បានចូលរួមជាមួយ លោក ធូ ឃឿ អភិបាលនៃគណៈអភិបាលក្រុងបានលុង និងអាជ្ញាធរមូលដ្ឋានសង្កាត់កាចាញ និងតំណាងរដ្ឋាករទឹកស្អាតខេត្ត បានចុះពិនិត្យស្ថានភាពទីតាំងភូមិសាស្រ្ត និងសិក្សាពីលទ្ឋភាពដើម្បីត្រៀមតបណ្តាញទឹកស្អាតចូលភូមិចំនួន២ គឺភូមិដោះក្រមុំ និងភូមិវីឡាកាត់ស្ថិតក្នុងសង្កាត់កាចាញ ដែលមានគ្រួសារសរុប ២១៨គ្រួសារ ។

តាមរយៈការសិក្សានេះតំណាងរដ្ឋាករទឹកមានប្រសាសន៍ថា ដោយភូមិទាំងពីរនៅឆ្ងាយដាច់ស្រយាល ការតបណ្តាញមានរយៈពេលយូរ។ បច្ចុប្បន្នមានអណ្តូងរវ៉ៃដោយដៃមានទឹកតិចតួចប្រើមិនគ្រប់គ្រាន់សម្រាប់អ្នកភូមិទេ ដូច្នេះប្រជាពលរដ្ឋទាំង២ភូមិបានស្នើសុំដល់លោកប្រធានមន្ទីរអភិវឌ្ឍន៍ជនបទ ក្នុងការផ្តល់អណ្តូងស្នប់អោយគាត់ក្នុងមួយភូមិឱ្យបានអណ្តូងស្នប់០១អណ្ដូង។

ចំពោះស្ថានភាពទូទៅក្នុងខេត្តកាលពីយប់ថ្ងៃទី០២ ខែឧសភា ឆ្នាំ២០២៤ វេលាម៉ោង១០:១៥នាទី នៅស្រុកវើនសៃ មានភ្លៀងធ្លាក់មួយមេដោយកន្លែងខ្លះមានភ្លៀងច្រើន និងកន្លែងខ្លះមានភ្លៀងធ្លាក់ខ្លាំងព្រមទាំងមានលាយឡំដោយផ្គររន្ទះផងដែរ។ ដោយឡែកព្រឹកថ្ងៃទី០៣ ខែ ឧសភា ឆ្នាំ២០២៤ វេលាម៉ោង១១:៤៥នាទី ក៏មានភ្លៀងធ្លាក់ដោយកន្លែងបន្តិចបន្តួចនៅសង្កាត់កាចាញ និងសង្កាត់យក្ខឡោម ក្រុងបានលុង ។

ខេត្តប៉ៃលិន៖ នាថ្ងៃព្រហស្បតិ៍ ៩រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០២ ខែឧសភា ឆ្នាំ២០២៤ លោក សុខ សុវណ្ណរតនា អនុប្រធានមន្ទីរ បានដឹកនាំក្រុមការងារមន្ទីរអភិវឌ្ឍន៍ជនបទខេត្តប៉ៃលិន សហការជាមួយរដ្ឋបាលស្រុកសាលាក្រៅ និងរដ្ឋបាលក្រុងប៉ៃលិន បានចុះពិនិត្យស្ថានភាពទឹកស្រះ ១កន្លែង ដែលនៅមានទឹកសម្រាប់ប្រើប្រាស់បានស្ថិតនៅភូមិព្រៃសន្ទះ ឃុំស្ទឹងត្រង់ ស្រុកសាលាក្រៅ និងធ្វើការជួសជុលអណ្តូងស្នប់សរុបចំនួន ០៨អណ្តូង ជូនប្រជាពលរដ្ឋដើម្បីប្រើប្រាស់បន្ទាន់បានចំនួន ៥១គ្រួសារ ស្ថិតក្នុងឃុំស្ទឹងត្រង់ ស្រុកសាលាក្រៅ និងសង្កាត់ទួលល្វា ក្រុងប៉ៃលិន៕

ខេត្តព្រះវិហារ ៖ នាថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៣ ខែឧសភា ឆ្នាំ២០២៤ លោក ម៉ប់ ធីរិត ប្រធានមន្ទីរអភិវឌ្ឍន៍ជនបទខេត្តព្រះវិហារ រួមជាមួយប្រធានអង្គការទស្សន:ពិភពលោកប្រចាំខេត្តព្រះវិហារ បានអញ្ជើញទៅពិនិត្យការប្រើប្រាស់ទឹករបស់ប្រជាពលរដ្ឋនៅស្រុកសង្គមថ្មីខេត្តព្រះវិហារ។

ក្នុងដំណើរចុះពិនិត្យនេះក្រុមការងារបានប្រជុំពិភាក្សាគ្នា ដើម្បីរៀបចំផែនការជួសជុលអណ្តូងស្នប់ជូនប្រជាពលររដ្ឋដែលខូចនៅតាមបណ្ដាភូមិដែលប្រឈមនឹងខ្វះប្រភពទឹក ។ ជាមួយនេះអង្គការទស្សនៈពិភពលោក បានចូលរួមខួងអណ្តូងស្នប់ថ្មីជូនប្រជាពលរដ្ឋចំនួន ១៧អណ្តូង ក្នុងស្រុកសង្គមថ្មី នោះនៅក្នុងសាលារៀនចំនួន ១អណ្តូង ។ ជាមួយគ្នានេះដែរ ក្រុមការងារបានចុះពិនិត្យស្ថានភាពប្រភពទឹកនៅតាមសហគមន៍ និងនៅតាមសាលារៀនក្នុងភូមិសាស្ត្រឃុំស្តៅ ស្រុកសង្គមថ្មីបានចំនួន ៤ទីតាំង ផងដែរ ៕

ខេត្តព្រះសីហនុ ៖ នៅថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៣ ខែឧសភា ឆ្នាំ២០២៤
លោក ប្រាក់ សុវណ្ណ ប្រធានមន្ទីរអភិវឌ្ឍន៍ជនបទខេត្ត បានសហការជាមួយ អាជ្ញាធរក្រុងកោះរ៉ុង មានលោកអភិបាលរងក្រុង អាជ្ញាធរ សង្កាត់កោះរ៉ុង មេភូមិ អនុភូមិ បានចុះពិនិត្យស្ថានភាពជាក់ស្តែងនៅមូលដ្ឋានផ្ទាល់សង្កាត់កោះរ៉ុង៖

1) ពិនិត្យស្ថានភាពប្រភពទឹកអណ្តូងស្នប់ អណ្តូងលូ ប្រភពទឹកអូរ នៅក្នុងភូមិសាស្ត្រ ភូមិដើមថ្កូវ និង ភូមិព្រែកស្វាយ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ ។ ស្ថានភាពទឹកប្រើប្រាស់ របស់ប្រជាពលរដ្ឋ គ្រប់ប្រភពទឹក អណ្តូងស្នប់ នៅដំណើរការធម្មតា មានទឹក តែសំពាធទឹកចេញ ធ្លាក់កម្រិតពាក់កណ្តាល ទឹកអូរ អាចនៅប្រើប្រាស់បាន។ ដោយឡែកនៅភូមិដើមថ្កូវ ប្រភពទឹកអណ្តូងស្នប់ នៅមានទឹក តែទឹកមានច្រេះពណ៌ក្រហម ។

2) ក្រុមការងារបច្ចេកទេសជំនាញ ការិយាល័យផ្គត់ផ្គង់ទឹក របស់មន្ទីរអភិវឌ្ឍន៍ជនបទខេត្ត បានចុះជួសជុលអណ្តូងស្នប់ដែលរងខូចខាត គិតមកដល់ថ្ងៃនេះ ជួសជុលអោយប្រជាពលរដ្ឋបានប្រើប្រាស់វិញ បានសរុបចំនួន ២០អណ្តូង ។

3)លោកប្រធានមន្ទីរ បានចុះសួរសុខទុក្ខប្រជាពលរដ្ឋ ជួបពិភាក្សាជាមួយអាជ្ញាធរក្រុង សង្កាត់ ភូមិ អំពីការត្រៀមនូវយន្តការ និងមធ្យោបាយសម្រាប់ជួយអន្តរាគមន៍ដោះស្រាយទឹកជូនប្រជាជននៅពេលដែលមានតម្រូវការចាំបាច់ ប្រសិនបើអាកាសធាតុក្តៅ រាំងស្ងួត គ្មានភ្លៀងនៅតែអូសបន្លាយតទៅទៀត ។ សូមអោយអាជ្ញាធរគ្រប់ថ្នាក់ជួយផ្តល់ព័ត៌មានបន្ទាន់ នៅតាមភូមិ ឃុំ ដែលខ្វះខាតទឹក ដល់ក្រុមការងារពាក់ព័ន្ឋពិសេសមន្ទីរអភិវឌ្ឍន៍ជនបទ ។

បន្ទាប់ពីបានចុះពិនិត្យនៅតាមទីតាំងជាក់ស្តែង និងជួបពិភាក្សាជាមួយអាជ្ញាធរមូលដ្ឋាន និងសំណេះសំណាលជាមួយប្រជាជន បានកត់សម្គាល់ឃើញថា ស្ថានភាពទឹកសម្រាប់ប្រើប្រាស់ និងទឹកសម្រាប់ហូបប្រចាំថ្ងៃ របស់ប្រជាពលរដ្ឋ ក្រុងកោះរ៉ុង និងសង្កាត់កោះរ៉ុង ពុំទាន់មានបញ្ហាប្រឈមនៅឡើយទេ ថ្វីត្បិតតែ ភូមិដើមថ្កូវ ប្រភពទឹកអណ្តូង មានជាតិច្រេះពណ៌ក្រហម ក៏ប៉ុន្តែប្រភពទឹកនៅជិតតំបន់នោះ អាចអោយប្រជាពលរដ្ឋដឹកយកមកប្រើប្រាស់បាន។

ពិនិត្យជារួម គិតមកដល់ថ្ងៃនេះ ប្រជាពលរដ្ឋនៅទូទាំងខេត្តព្រះសីហនុពុំទាន់មានបញ្ហាប្រឈមធ្ងន់ធ្ងរនៅឡើយទេ លើការប្រើប្រាស់ទឹកប្រចាំថ្ងៃ។