ខេត្តសៀមរាប៖ នាថ្ងៃសៅរ៍ ១១រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៤ ខែឧសភា ឆ្នាំ២០២៤ លោកទូច ម៉ាឡា ប្រធានមន្ទីរអភិវឌ្ឍន៍ជនបទខេត្តសៀមរាប បានចាត់តាំងលោកប្រធានការិយាល័យផ្គត់ផ្គង់ទឹកជនបទ ព្រមទាំងមន្រ្តីបច្ចេកទេសផ្គត់ផ្គង់ទឹកជនបទ ចុះជួសជុលអណ្តូងស្នប់អាហ្រ្វីដេវ ចំនួន ២អណ្តូង ក្នុងភូមិបាយដុះ ឃុំស្វាយស ស្រុកវ៉ារិន ជាមួយគ្នានេះដែរក្រុមការងារក៏បន្តចុះត្រួតពិនិត្យការងារខួងអណ្តូងស្នប់ថ្មី ចំនួន ២កន្លែង នៅភូមិអភិវឌ្ឍន៍ ឃុំកន្ទួត ស្រុកស្វាយលើ ខេត្តសៀមរាប។

 

សូមបញ្ជាក់ផងដែរថាស្ថានភាពប្រភពទឹកប្រើប្រាស់បច្ចុប្បន្នរបស់ប្រជាពលរដ្ឋនៅទូទាំងខេត្តសៀមរាប ក៏មិនទាន់មានបញ្ហាប្រឈមពីបញ្ហាខ្វះខាតទឹកស្អាតប្រើប្រាស់របស់ប្រជាពលរដ្ឋនៅឡើយទេ៕

រាជធានីភ្នំពេញ ៖ នាថ្ងៃសៅរ៍១០រោច-អាទិត្យ១១រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៤-៥ ខែឧសភា ឆ្នាំ២០២៤  លោក គឹម វិបុល ប្រធានមន្ទីរ បានដឹកនាំកុ្រមការងារទឹកស្អាត នៃមន្ទីរអភិវឌ្ឍន៍ជនបទរាជធានីភ្នំពេញ ចុះពិនិត្យស្ថានភាពទឹកអណ្តូង និងស្រះទឹក សម្រាប់ប្រជាពលរដ្ឋប្រើប្រាស់ក្នុងកំឡុងពេលរដូវរាំងស្ងួតនៅខណ្ឌព្រែកព្នៅ និងខណ្ឌកំបូល ដោយសហការជាមួយភូមិ និងរដ្ឋបាលសង្កាត់សំរោង ពញ្ញាពន់ ពន្សាំង គោករកា ឪឡឹក និងសង្កាត់កំបូល។ ជារួមអណ្តូងនៅក្នុងភូមិសាស្ត្រខាងលើមានទឹកប្រើប្រាស់ ប្រជាពលរដ្ឋនៅមានទឹកប្រើប្រាស់នៅឡើយ និងមានប្រព័ន្ធទឹកស្អាតរបស់ក្រុមហ៊ុនឯកជនសម្រាប់ប្រើប្រាស់នៅទីនោះផងដែរ។ ដោយឡែកចំពោះស្រះទឹកនៅមានទឹកសម្រាប់យកប្រើប្រាស់។

 

បន្ទាប់មកក្រុមការងារបានធ្វើការជួសជុលអណ្តូងដែលខូចនៅសង្កាត់ឪឡឹករួចរាល់ ជូនប្រជាពលរដ្ឋសម្រាប់ប្រើប្រាស់ក្នុងភូមិ៕

ខេត្ដបន្ទាយមានជ័យ៖ នាថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៣ ខែឧសភា ឆ្នាំ២០២៤ មន្ដ្រីបច្ចេកទេសផ្គត់ផ្គង់ទឹកជនបទ នៃមន្ទីរអភិវឌ្ឍន៍ជនបទខេត្តបន្ទាយមានជ័យ បានចុះត្រួតពិនិត្យស្ថានភាពប្រភពទឹកស្រះសហគមន៍ ដែលប្រឈមនឹងការរីងស្ងួត ចំនួន ៣កន្លែង ដូចខាងក្រោម៖

– ប្រភពទឹកស្រះសហគមន៍ ១កន្លែង មានបណ្ដោយ ៥០ម៉ែត្រ ទទឹង ៤០ម៉ែត្រ ជម្រៅ ៣ម៉ែត្រ ស្ថិតនៅភូមិតាអ៊ុន ឃុំទានកាំ ស្រុកព្រះនេត្រព្រះ ដែលប្រជាពលរដ្ឋនៅអាចប្រើប្រាស់បាន។

– ប្រភពទឹកស្រះសហគមន៍ ២កន្លែង ស្រះទី១ មានបណ្ដោយ ៤០ម៉ែត្រ ទទឹង ២០ម៉ែត្រ និងជម្រៅ ៣,៥ម៉ែត្រ និងស្រះទី២ មានបណ្ដោយ ៨០ម៉ែត្រ ទទឹង ៣៥ម៉ែត្រ និងជម្រៅ ៣ម៉ែត្រ សម្រាប់ផ្គត់ផ្គង់ទឹកដល់ប្រព័ន្ធចែកចាយទឹកតាមបណ្តាញបំពង់ខ្នាតតូចសហគមន៍ចំនួន ១កន្លែង មានប្រជាពលរដ្ឋបានភ្ជាប់បណ្តាញប្រើប្រាស់ចំនួន ១៧៥ខ្នងផ្ទះ នៅភូមិកក់ ឃុំជប់វារី ស្រុកព្រះនេត្រព្រះ អាចផ្គត់ផ្គង់ទឹកបានប្រហែល ១ខែទៀតប្រសិនបើគ្មានភ្លៀងធ្លាក់៕

ខេត្តរតនគិរី ៖ នាព្រឹកថ្ងៃសៅរ៍ ១១រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៤ ខែឧសភា ឆ្នាំ២០២៤ ក្រុមការងារ បច្ចេកទេស ផ្គត់ផ្គង់ទឹកជនបទ ដឹកនាំដោយលោក ឃឹម នី អនុប្រធានមន្ទីរទទួលបន្ទុកការិយាល័យផ្គត់ផ្គង់ទឹក និង លោក មឿន ស្រស់ ប្រធានការិយាល័យផ្គត់ផ្គង់ទឹកជនបទ នៃមន្ទីរអភិវឌ្ឍន៍ជនបទខេត្តរតនគិរី បានអញ្ជើញទៅពិនិត្យស្ថានភាព នៃការប្រេីប្រាស់ប្រភពទឹករបស់ប្រជាពលរដ្ឋនៅភូមិគ្លិ ឃុំ ស៊េីង ស្រុកបរកែវ ដែលមានប្រជាពលរដ្ឋចំនួន ១៣៩គ្រួសារ ស្មើនឹង ៦៣៦នាក់ ។

នៅថ្ងៃដដែលនោះដែរ ក្រុមការងារបានអញ្ជើញបន្តទៅពិនិត្យស្ថានភាព នៃការប្រេីប្រាស់ប្រភពទឹក រួមមានអណ្តូងស្នប់ អណ្តូង លូ តាមគ្រួសារ នីមួយៗ នៅភូមិប្លង់ ភូមិគងធំ និងភូមិគងយុ ឃុំប៉ាតេ ស្រុកអូរយ៉ាដាវ ចំនួន ៩០៦គ្រួសារ ស្មើនឹង ៣ ១៨៥នាក់ ៕

ខេត្តសៀមរាប ៖ នាព្រឹកថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី៣ ខែឧសភា ឆ្នាំ២០២៤ លោក ទូច ម៉ាឡា ប្រធានមន្ទីរអភិវឌ្ឍន៏ជនបទខេត្តសៀមរាប បានចូលរួមកិច្ចប្រជុំស្តីពី ការចុះផ្ទៀងផ្ទាត់ការបញ្ចប់ការបន្ទោបង់ពាសវាលពាសកាលថ្នាក់ស្រុក នៅក្នុងស្រុកក្រឡាញ់ ខេត្តសៀមរាប។ កិច្ចប្រជុំនេះមានការអញ្ជើញចូលរួមពី លោក លោកស្រី ជាក្រុមការងារផ្ទៀងផ្ទាត់ការបញ្ចប់ការបន្ទោបង់ពាសវាលពាសកាលថ្នាក់ខេត្ត ដែលរួមមាន លោកនាយករងរដ្ឋបាលខេត្ត លោកនាយកទីចាត់ការផែនការ និងវិនិយោគខេត្ត លោកនាយកទីចាត់ការអន្តរវិស័យសាលាខេត្ត លោកប្រធានការិយាល័យផែនការនៃទីចាត់ការផែនការ និងវិនិយោគខេត្ត លោក លោកស្រី មកពីមន្ទីរអភិវឌ្ឍន៍ជនបទខេត្ត មន្ទីរសុខាភិបាល មន្ទីរធម្មការ និងសាសនាខេត្ត មន្ទីរទេសចរណ៍ មន្ទីរអប់រំ យុវជន និងកីឡា។ ជាមួយគ្នានេះផងដែរ កម្មវិធីនេះក៏មានការចូលរួមពី លោកអភិបាលនៃគណៈអភិបាលស្រុកក្រឡាញ់ លោកនាយករដ្ឋបាលស្រុក មន្ត្រីរាជការនៃរដ្ឋបាលស្រុកអង្គរធំ លោកប្រធានក្រុមប្រឹក្សាឃុំក្នុងស្រុកអង្គរធំ សរុប ១៨រូប។

ការចុះផ្ទៀងផ្ទាត់ការបញ្ចប់ការបន្ទោបង់ពាសវាលពាសកាលនេះ មានគោលបំណងសំខាន់គឺ៖
១. ធានាសុក្រិតភាព តម្លាភាព នៃការផ្ទៀងផ្ទាត់ការបញ្ចប់ការបន្ទោបង់ពាសវាលពាសកាល

២. លើកទឹកចិត្តរដ្ឋបាលថ្នាក់ក្រោមជាតិ និងភាគីពាក់ព័ន្ធ

៣. លើកទឹកចិត្ត និងផ្តល់កិត្តិយសដល់សហគមន៍

៤. ចូលរួមចំណែកលើកកម្ពស់សុខភាពសាធារណៈ សុខុមាលភាពសហគមន៍ និងការអភិវឌ្ឍន៍សេដ្ឋកិច្ចសង្គម។

ក្រុមការងារក៏បានធ្វើការចាប់សំណាកដើម្បីធ្វើការចុះអង្កេតបង្គន់តាមខ្នងផ្ទះ និងតាមទីកន្លែងផ្តល់សេវាសាធារណៈរដ្ឋ និងឯកជន ដូចជាសាលាស្រុក មណ្ឌលសុខភាព សាលារៀន សាលាឃុំ វត្តអារ៉ាម ជាដើម។ បន្ទាប់ពីធ្វើការអង្កេតរួចរាល់តាមចំនួនដែលបានកំណត់រួចមក ជាលទ្ធផលក្រុមការងារផ្ទៀងផ្ទាត់ការបញ្ចប់ការបន្ទោបង់ពាសវាលពាសកាលថ្នាក់ខេត្ត បានសម្រេចថា ស្រុកក្រឡាញ់ពិតជាស្រុកដែលបញ្ចប់ការបន្ទោបង់ពាសវាលពាសកាលពិតប្រាកដមែន ។

ដោយឡែកនារសៀលថ្ងៃ លោក ទូច ម៉ាឡា រួមដំណើរជាមួយលោកប្រធានការិយាល័យផ្គត់ផ្គង់ទឹកជនបទ និងមន្រ្តីជំនាញ បានបន្តបានចុះពិនិត្យស្ថានភាពផលប៉ះពាល់ពីបម្រែបម្រួលអាកាសធាតុគ្រោះរាំងស្ងួតខ្លាំង និងធ្វើការជួសជុលអណ្តូងស្នប់សហគមន៍មួយកន្លែងដែលរងការខូចខាតឱ្យដំណើរការឡើងវិញជូនប្រជាពលរដ្ឋក្នុងភូមិករលំ ឃុំតាសោម ស្រុងអង្គរជុំផងដែរ៕

ខេត្តកំពង់ឆ្នាំង ៖ នាថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៣ ខែឧសភា ឆ្នាំ២០២៤ ថ្ងៃទី៣ ខែឧសភា ឆ្នាំ២០២៤ ឯកឧត្តម ប៉ា សុខុម រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយឯកឧត្តម ឈួរ ច័ន្ទឌឿន អនុរដ្ឋលេខាធិការ ព្រមទាំងថ្នាក់ដឹកនាំមន្ទីរអភិវឌ្ឍន៍ជនបទខេត្ត ប្រធាន-អនុប្រធានការិយាល័យ និងមន្រ្តី នៃមន្ទីរអភិវឌ្ឍន៍ជនបទខេត្តកំពង់ឆ្នាំង បានចុះពិនិត្យស្ថានភាពរាំងស្ងួតនៅឃុំចំនួន២ នៅក្នុងស្រុកទឹកផុស រួមមាន ៖

១. ឃុំក្តុលសែនជ័យ ៖ ភូមិតាអុស ស្រះចំនួន ១ នៅមានទឹកសម្រាប់ប្រាស់បាន និងភូមិក្តុល ចំនួន ២ស្រះ ដោយស្រះ ១ បានរីងស្ងួត

២. ឃុំតាំងក្រសាំង ៖ ភូមិចំបក់កន្រ្ទាញ ចំនួន ១ស្រះ និងភូមិទួលខ្ពស់ ចំនួន ២ស្រះ បានរីងស្ងួត៕

ខេត្តរតនគិរី៖ នារសៀលថ្ងៃសុក្រ ១០រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៣ ខែឧសភា ឆ្នាំ២០២៤ លោក អៀម អឿន ប្រធានមន្ទីរអភិវឌ្ឍន៍ជនបទ ខេត្តរតនគិរី ដឹកនាំមន្រ្តីជំនាញការិយាល័យផ្គត់ផ្គង់ទឹកជនបទ ចុះពិនិត្យស្ថានភាពប្រភពទឹកច្រប់កែលំអរ (ជីវសាស្រ្ត)នៅភូមិប៉ាណល ឃុំទីងចាក់ ស្រុកបរកែវ មានគ្រួសារសរុបរួម ១៣៦គ្រួសារ។

បន្ទាប់មកក្រុមការងារចុះពិនិត្យស្ថានភាពការប្រើប្រាស់ប្រភពទឹក ទឹកស្រះ ទឹកច្រប់ និងប្រព័ន្ឋចែកចាយទឹកសហគមន៍ព្រមទាំងណែនាំដល់ប្រជាពលរដ្ឋពីការប្រើប្រាស់ទឹកដោយមានការសន្សំសំចៃ មានភូមិប៉ាអរ ឃុំលុងឃុង ស្រុកបរកែវ និងភូមិអ៊ុល ឃុំប៉ាតាង ស្រុកលំផាត់ ។
ចំពោះស្ថានភាពទូទៅខេត្តរតនគិរី នៅវេលាម៉ោង ១៤:០២នាទី ខេត្តមានភ្លៀងធ្លាក់នៅភូមិកាតែ ឃុំលំជ័រ ស្រុកអូរយ៉ាដាវ រីឯនៅភូមិលំផាត់ ឃុំជ័យឧត្តម និងឃុំប៉ាតាង ស្រុកលំផាត់ ក៏មានភ្លៀងធ្លាក់ដូចគ្នាដែរ។