ខេត្តពោធិ៍សាត់៖ នាថ្ងៃពុធ ១កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៨ ខែឧសភា ឆ្នាំ២០២៤  មន្ទីរអភិវឌ្ឍន៍ជនបទខេត្តពោធិ៍សាត់ ចុះចែកជូនសម្ភារ និងបរិក្ខាសាងសង់បង្គន់អនាម័យជាលក្ខណៈគ្រួសារដល់ប្រជាពលរដ្ឋក្រីក្រ និងចុះជួសជុលអណ្តូង ដោយមានសកម្មភាពការងារដូចខាងក្រោម៖

 

+សកម្មភាពទី១៖

លោក ធីម សុធារ៉ា ប្រធានមន្ទីរ រួមនឹងមន្រ្តីការិយាល័យថែទាំសុខភាពជនបទ បានដឹកនាំយកសម្ភារ និងបរិក្ខាសាងសង់បង្គន់អនាម័យជាលក្ខណៈគ្រួសារចំនួន ១៧៩បង្គន់ ទៅចែកជូនដល់ប្រជាពលរដ្ឋក្រីក្រចំនួន ១៧៩គ្រួសារ ស្ថិតនៅឃុំតាលោ ស្រុកតាលោសែនជ័យ។

សម្ភារដែលគ្រួសារនីមួយៗទទួលបានរួមមាន៖

 

-លូមុខកាត់ប្រវែង ១ម៉ែត្រ កម្ពស់ ០,៥ម៉ែត្រ ចំនួន ៣កង់

-ជើងទម្រសម្រាប់លាមកហូរ

-ចានបង្គន់ព័រសឺឡែន

-គម្របលូស្តុក

-បំពង់បង្ហូរ

-បំពង់បង្ហុយ

-ធុងទឹកជ័រ

-ឥដ្ឋតាន់ចំនួន ៦០ដុំ

-ស័ង្កសីទំហំ ចំនួន១០សន្លឹក

 

ក្នុងឱកាសនោះដែរ លោកប្រធានមន្ទីរ បានស្នើសុំឱ្យបងប្អូនប្រជាពលរដ្ឋទាំងអស់សូមយកសម្ភារដែលបានចែកជូនយកទៅសាងសង់ឱ្យបានគ្រប់ៗគ្នា ដើម្បីគ្រួសារមានអនាម័យល្អគ្រប់ក្រុមគ្រួសារ និងដើម្បីស្រុកតាលោសែនជ័យ ក្លាយជាស្រុកបញ្ឈប់ការបន្ទោបង់ពាសវាលពាសកាល(ODF) ក្នុងឆ្នាំ២០២៤នេះ។

 

បន្ទាប់មក លោកប្រធានមន្ទីរ និងក្រុមការងារ បានចុះពិនិត្យការសាងសង់បង្គន់របស់បងប្អូនផងដែរ។

 

+សកម្មភាពទី២៖

ក្រុមការងារមន្ទីរអភិវឌ្ឍន៍ជនបទខេត្តពោធិ៍សាត់បានចុះជួសជុលអណ្ដូង នៅតំបន់ដីសម្បទានសង្គមកិច្ច ប៊ុនរ៉ានីសែនជ័យតំណាក់ត្រយឹង ស្ថិតនៅភូមិសាយ ឃុំព្រងិល ស្រុកភ្នំក្រវាញ ចំនួន ០២អណ្តូង រួមមាន៖

 

– អណ្តូងទី១ ម្ចាស់ផ្ទះឈ្មោះ សោម សាវ៉ាត មានគ្រួសារប្រេីប្រាស់ទឹក ចំនួន ១២គ្រួសារ។

 

– អណ្តូងទី២ ម្ចាស់ផ្ទះ ឈ្មោះ ឆុន សុខុម មានគ្រួសារប្រេីប្រាស់ទឹក ចំនួន ១០គ្រួសារ។

ខេត្តស្វាយរៀង៖ នៅថ្ងៃពុធ ១កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៨ ខែឧសភា ឆ្នាំ២០២៤  លោក ថោង អ៊ុំវ៉ារិន អនុប្រធានមន្ទីរ និងមន្ត្រីបច្ចេកទេសការិយាល័យផ្គត់ផ្គង់ទឹកជនបទរបស់មន្ទីរ បានចុះសហការជាមួយរដ្ឋបាលឃុំគគីរសោម និងឃុំមនោរម្យ ស្រុកស្វាយទាប ដើម្បីពិនិត្យមើលការប្រើប្រាស់ទឹកអណ្តូងស្នប់នៅតាមខ្នងផ្ទះប្រជាពលរដ្ឋ សរុបចំនួន ៥អណ្តូង ដែលមាននីវ៉ូទឹកកម្រិត ៦,៧ម ដល់ ៧,៧ម ជាហេតុធ្វើអោយទឹកអណ្តូងស្នប់មានទុយយោមុខកាត់ ៤២មម ទៅ ៤៩មម ពិបាកក្នុងការបូមប្រើប្រាស់នៅរដូវប្រាំងនេះ។

 

បន្ទាប់ពីបានចុះពិនិត្យជាក់ស្តែងរួចមកឃើញថា នៅតាមខ្នងផ្ទះប្រជាពលរដ្ឋ នៅទីតាំងខាងលើ ការប្រើប្រាស់ទឹកអណ្តូងរបស់ពួកគាត់នៅប្រើប្រាស់បានជារៀងរាល់ថ្ងៃ។

 

ជាមួយគ្នានេះដែរ ក្រុមការងារបានណែនាំដូចជា៖

ទី១.បានផ្សព្វផ្សាយ និងណែនាំពីរបៀបកែច្នៃប្រើម៉ូទ័របូម និងណែនាំឱ្យខួងអណ្តូងទុយយោមុខកាត់ចាប់ពី៨០មម ទៅ១០០មមឡើងទៅ។

ទី២. សូមអោយគ្រួសារមានខ្នងផ្ទះជាប់ៗគ្នាឬនៅក្នុងភូមិជាមួយគ្នាជួយចែករំលែកការប្រើប្រាស់ទឹកសម្រាប់គ្រួសារមានបញ្ហាអណ្តូងស្នប់មិនអាចប្រើប្រាស់បាននៅរដូវប្រាំងនេះ។

ទី៣. សូមផ្អាកការបូមទឹកក្រោមដីយកធ្វើចំការ និងស្រែប្រាំង។

ខេត្តស្វាយរៀង៖ នាព្រឹកថ្ងៃព្រហស្បតិ៍ ២កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៩ ខែឧសភា ឆ្នាំ២០២៤  លោក សំ នីតូ  ប្រធានមន្ទីរអភិវឌ្ឍន៍ជនបទ ខេត្តស្វាយរៀង អមដំណើរដោយ លោកអនុប្រធានមន្ទីរ លោកប្រធានការិយាល័យផ្គត់ផ្គង់ទឹកជនបទ ចុះសហការជាមួយលោកស្រីមេឃុំបន្ទាយក្រាំង ដើម្បីពិនិត្យមើលការខួងអណ្តូងធន់នឹងការប្រែប្រួលអាកាសធាតុរបស់មន្ទីរអភិវឌ្ឍន៍ជនបទខេត្ត ចំនួន ០១កន្លែង ផ្ទៃមុខកាត់ ១០០មីលីម៉ែត្រ ដែលមានទីតាំងនៅក្នុងឃុំបន្ទាយក្រាំង ស្រុកកំពង់រោទិ៍ ខេត្តស្វាយរៀង។

អណ្ដួងខួងថ្មីនេះ នឹងជួយសម្រួលដល់ប្រជាពលរដ្ឋក្នុងឃុំបន្ទាយក្រាំង ក្នុងការទិញទឹកឯកជនប្រើប្រាស់ មានតម្លៃថ្លៃ ព្រមទាំងខេត្តស្វាយរៀងទាំងមូលកំពុងទទួលរងនូវភាពរាំងស្ងួតផងដែរនោះ។

ខេត្តរតនគិរី៖ នាព្រឹកថ្ងៃព្រហស្បតិ៍ ២កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៩ ខែឧសភា ឆ្នាំ២០២៤ ក្រុមការងារគ្រោះមហន្តរាយថ្នាក់ខេត្ត ដឹកនាំដោយ ឯកឧត្តម ម៉ា វិចិត្រ អភិបាលរង នៃគណៈអភិបាលខេត្តរតនគិរី រួមជាមួយប្រធានលេខាធិការដ្ឋានគ្រោះមន្តរាយថ្នាក់ខេត្ត  ស្ថាប័នពាក់ព័ន្ធក្នុងខេត្ត និងក្រុមការងារមន្ទីរអភិវឌ្ឍន៍ជនបទខេត្តរតនគិរី ដឹកនាំដោយលោកឃឹម នី អនុប្រធានមន្ទីរ  និងប្រធានការិយាល័យផ្គត់ផ្គង់ទឹកជនបទ  បានចុះពិនិត្យស្ថានភាពនៃការប្រើប្រាស់ប្រភពទឹក តាមបណ្តាភូមិនិងឃុំ មួយចំនួនរួមមាន៖

-អណ្តូងស្នប់ អណ្តូងលូ និងស្រះសហគមន៍

-ប្រព័ន្ធចែកចាយទឹកតាមបណ្តាញបំពង់ខ្នាតតូចតាមសហគមន៍

ស្ថិតនៅឃុំល្បាំង១ ឃុំបាតាង និងឃុំសេដា ស្រុកលំផាត់ ខេត្តរតនគិរី មានចំនួន ១៥ភូមិ ស្មើរនឹង  ៣ ០៣២គ្រួសារ។

 

ក្នុងឱកាសចុះត្រួតពិនិត្យនេះ ក្រុមការងារគ្រោះមហន្តរាយថ្នាក់ខេត្តបានណែនាំដល់ប្រជាពលរដ្ឋអោយចេះប្រើប្រាស់ទឹកដោយសន្សំសំចៃព្រោះតែខេត្តកំពង់ទទួលរងនូវភាពរាំងស្ងួត ។

ខេត្តប៉ៃលិន ៖ នាថ្ងៃព្រហស្បតិ៍ ២ កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី៩ ខែឧសភា ឆ្នាំ២០២៤ ក្រុមការងារមន្ទីរអភិវឌ្ឍន៍ជនបទខេត្តប៉ៃលិន សហការជាមួយមន្ត្រីស្រុក ក្រុង ចុះជួសជុលអណ្តូងស្នប់ សម្រេចបានចំនួន០៤អណ្តូង ស្ថិតនៅភូមិសួនអំពៅកើត ០១អណ្តូង សួនអំពៅលិច ០១អណ្តូង ក្នុងសង្កាត់ប៉ៃលិន និងភូមិភ្នំស្ពង់ ០២អណ្តូង ក្នុងឃុំសាលាក្រៅ។

ខេត្តស្ទឹងត្រែង ៖ នាថ្ងៃព្រហស្បតិ៍ ២កើត ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី៩ ខែឧសភា ឆ្នាំ២០២៤ ក្រុមការងារបច្ចេកទេស នៃមន្ទីរអភិវឌ្ឍន៍ជនបទខេត្តស្ទឹងត្រែង បានបន្តចុះអន្តរាគមន៍ជួសជុលអណ្តូងស្នប់ដែលខូចបានចំនួន២អណ្តូង ស្ថិតនៅឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ដែលក្នុងនោះរួមមាន ៖

– ភូមិឆ្វាំ ចំនួន១អណ្តូង

-ភូមិស្រឡាយខ្លុង ចំនួន០១អណ្តូង៕