ខេត្តព្រះសីហនុ ៖ នាថ្ងៃអង្គារ៧កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១៤ ខែឧសភា ឆ្នាំ២០២៤ ក្រុមការងារផ្ទៀងផ្ទាត់ ODF ថ្នាក់ជាតិ ដឹកនាំដោយលោក លន់ សាយតេង ប្រធាននាយកដ្ឋានថែទាំសុខភាពជនបទ រួមជាមួយក្រុមការងារ នៃមន្ទីរអភិវឌ្ឍន៍ជនបទខេត្តព្រះសីហនុ លោកនាយករងរដ្ឋបាលសាលាខេត្ត អាជ្ញាធរមូលដ្ឋានស្រុកព្រៃនប់ និងស្រុកស្ទឹងហាវ បានចុះធ្វើការអង្កេត និងផ្ទៀងផ្ទាត់បញ្ចប់ការបន្ទោបង់ពាសវាលពាសកាល (ODF) តាមខ្នងផ្ទះប្រជាពលរដ្ឋ សាលារៀន មណ្ឌលសុខភាព វត្តអារាម និងកន្លែងផ្តល់សេវាសាធារណៈ នានា តាមនីតិវិធីរបស់ក្រុមការងារ ដើម្បីត្រៀមបញ្ចប់ស្រុកទាំងពីរ របស់ខេត្តព្រះសីហនុ ជាស្រុកបញ្ចប់បន្ទោរបង់ពាសវាលពាកាល (ODF)៕

ខេត្តសៀមរាប ៖ នាថ្ងៃចន្ទ៦កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១៣ ខែឧសភា ឆ្នាំ២០២៤ ក្រុមការងារការិយាល័យផ្គង់ផ្គង់ទឹកជនបទ នៃមន្ទីរអភិវឌ្ឍន៍ជនបទខេត្តសៀមរាប បានបន្តចុះពិនិត្យទីតាំងសម្រាប់សាងសង់អណ្ដូងស្នប់ និងពិនិត្យការដ្ឋានខួងអណ្តូងស្នប់អាហ្រ្វីដេវ ជូនប្រជាពលរដ្ឋចំនួន ១៥គ្រួសារ នៅឃុំគោកដូង ស្រុកអង្គរជុំ ខេត្តសៀមរាប ។

 

សូមបញ្ជាក់ថា ៖ ស្ថានភាពប្រភពទឹកសម្រាប់ប្រើប្រាស់ប្រចាំថ្ងៃរបស់ប្រជាពលរដ្ឋនៅទូទាំងខេត្តមិនទាន់ខ្វះខាតនៅឡើយទេ គឺប្រជាពលរដ្ឋអាចយកប្រភពទឹកពីប្រព័ន្ធចែកចាយទឹកតាមទុយោ អណ្តូងលូ អណ្តូងស្នប់ ស្រះ ជាដើម ៕

ពោធិ៍សាត់ ៖ នាព្រឹកថ្ងៃចន្ទ ៦កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១៣ ខែឧសភា ឆ្នាំ២០២៤ លោក និន ស៊ីណាត អនុប្រធានមន្ទីរអភិវឌ្ឍន៏បទខេត្តពោធិ៍សាត់ រួមជាមួយលោក ឃុត ទូច ប្រធានការិយាល័យផ្លូវជនបទ បានចូលរួមក្នុងពិធីបើកការដ្ឋានស្ថាបនាស្ពានបេតុងមួយកន្លែងប្រវែង ៧៥ម៉ែត្រ ទទឹង ៨ម៉ែត្រ ដែលជាស្ពានតភ្ជាប់ពីភូមិព្រៃក្ដី ឃុំកណ្ដៀង ទៅភូមិក្បាលរមាស ឃុំអន្លង់វិល ស្រុកកណ្ដៀង ខេត្តពោធិ៍សាត់ ក្នុងគម្រោងសង្គ្រោះហេដ្ឋារចនាសម្ព័ន្ធដែលខូចខាតដោយសារជំនន់ទឹកភ្លៀងក្នុង ឆ្នាំ២០២៣ អនុវត្តដោយកងវិស្វកម្ម ១៨១ ស្ពាន- ថ្នល់ ។

 

ពិធីបើកការដ្ឋានស្ថាបនាស្ពាននេះបានប្រព្រឹត្តទៅក្រោមអធិបតីភាពឯកឧត្តម គង់ អៀង អនុរដ្ឋលេខាធិការ ក្រសួងការពារជាតិ ដោយមានការចូលរួមពីសំណាក់ លោក ងួន ប៉ោសេង អភិបាលរង នៃគណៈអភិបាលខេត្តពោធិ៍សាត់ ព្រមទាំងមានការចូលរួមពីលោក អភិបាលស្រុក ក្រុមប្រឹក្សាស្រុក ការិយាល័យនាៗ ជុំវិញស្រុក ព្រមទាំងប្រជាពលរដ្ឋឃុំកណ្តៀ និងឃុំអន្លង់វិល សរុបចំនួន ៥១២នាក់៕

ខេត្តពោធិ៍សាត់៖ នាព្រឹកថ្ងៃសុក្រ ៣កើត ខែពិសាខ ឆ្នាំរោង ឆស័ក ព.ស២៥៦៧ ត្រូវនឹងថ្ងៃទី ១០  ខែឧសភា  ឆ្នាំ២០២៤  លោក ធីម សុធារ៉ា ប្រធានមន្ទីរអភិវឌ្ឍន៍ជនបទ ខេត្តពោធិ៍សាត់ បានបញ្ជូនក្រុមការងារបច្ចេកទេសទឹកស្អាតរបស់មន្ទីរ ចុះជួសជុលអណ្ដូងស្នប់នៅរួមមាន៖

 

១-ជួសជុលចំនួន ១អណ្ដូង ភូមិត្បែងជ្រុំ ឃុំត្នោតជុំ ស្រុកក្រគរ ខេត្តពោធិ៍សាត់  ប្រជាពលរដ្ឋប្រើប្រាស់មាន ១០  គ្រួសារ។

២- ជួសជុលចំនួន ១អណ្ដូង នៅភូមិត្រពាំរំដេញ ឃុំក្បាលត្រាច ស្រុកក្រគរ ខេត្តពោធិ៍សាត់ មានប្រជាពលរដ្ឋប្រើប្រាស់អណ្ដូងមាន  ១១  គ្រួសារ។

 

សូមបញ្ជាក់ផងដែរដែរថា ក្រុមការងារនៃមន្ទីរអភិវឌ្ឍន៍ជនបទ ខេត្ត បានបន្តខួងអណ្ដួង ទីតាំងទី ៧ ស្ថិតនៅភូមិហាលទិល ឃុំលោសែនជ័យ ស្រុកតាលោសែនជ័យ ហើយក្រុមការងារនិងបន្តខួងអណ្ដូង បន្ថែមទៀត ដើម្បីជូនប្រជាពលរដ្ឋដែលខ្វះខាតទឹកប្រើប្រាស់។

ស្ថានភាពទូរទៅក្នុងខេត្តខេត្តពោធិ៍សាត់មានភ្លៀងធ្លាក់តាមតំបន់នៅក្នុងស្រុកបាកាន ស្រុកភ្នំក្រវាញ ស្រុកក្រគរ ស្រុកវាលវែង និងក្រុមពោធិ៍សាត់។

ខេត្តរតនគិរី៖  នាព្រឹកថ្ងៃសៅរ៍ ៤កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១១ ខែឧសភា ឆ្នាំ២០២៤ លោក អៀម អឿន ប្រធានមន្ទីរ និងអនុប្រធានមន្ទីរ បានដឹកនាំមន្រ្តីបច្ចេកទេសផ្គត់ផ្គង់ទឹកជនបទ នៃមន្ទីរអភិវឌ្ឍន៍ជនបទខេត្តរតនគិរីចូលរួមអមដំណើរ ឯកឧត្តម ម៉ា វិចិត្រ អភិបាលរងនៃគណៈអភិបាលខេត្ត និងជាប្រធានលេខាធិការដ្ឋានគ្រប់គ្រងគ្រោះមហន្តរាយថ្នាក់ខេត្ត ចុះជួបសំណេះសំណាលជាមួយក្រុមប្រឹក្សាឃុំកោះពាក្យ ស្រុកវើនសៃ និងបានចុះធ្វើការជួសជុលអណ្តូងស្នប់ខូចចំនួន ០២គ្រឿង ជូនប្រជាពលរដ្ឋប្រើប្រាស់បានឡើងវិញ ដោយមានការចូលរួមពីលោកមេឃុំកោះពាក្យ ក្រុមប្រឹក្សាឃុំកោះពាក្យ មេភូមិ អនុភូមិ សមាជិកភូមិផាកណាម តំណាងប្រជាពលរដ្ឋ កងកម្លាំងប្រដាប់អាវុធ ទាំង៣ប្រភេទរបស់ឃុំនិងមន្រ្តីថ្នាក់ស្រុក សរុបចំនួន ២៧នាក់៕