រាជធានីភ្នំពេញ៖ នាព្រឹកថ្ងៃព្រហស្បតិ៍ ៩កើត ខែពិសាខ ឆ្នាំរោង បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ នៅទីស្ដីការក្រសួង ឯកឧត្តមបណ្ឌិត នួន ពេជ្រនិមិត្ត រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារបន្ដ របស់នាយកដ្ឋានបណ្ដុះបណ្ដាល និងស្រាវជ្រាវ។

កិច្ចប្រជុំបូកសរុបនេះ មានការអញ្ជើញចូលរួមពីសំណាក់ ឯកឧត្តម វ៉ាន់ ស៊ីវឿន, ឯកឧត្តម សុង សុផល អនុរដ្ឋលេខាធិការ, លោក ជា សែម, លោក ទូច ស៊ីផាត អគ្គនាយករងរដ្ឋបាល និងហិរញ្ញវត្ថុ ព្រមទាំងថ្នាក់ដឹកនាំ និងមន្រ្ដីរាជការនៃនាយកដ្ឋានបណ្ដុះបណ្ដាល និងស្រាវជ្រាវ៕

រាជធានីភ្នំពេញ៖ នាព្រឹកថ្ងៃពុធ ៨កើត ខែពិសាខ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី ១៥ ខែឧសភា ឆ្នាំ២០២៤ ឯកឧត្តម ភួង សោភា រដ្ឋលេខាធិការ និងជាអ្នកសម្របសម្រួលគម្រោងពង្រឹងសមត្ថភាពផលិតភាពជនបទ (NRRPCP) តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលដំណើរបេសកកម្មត្រួតពិនិត្យគម្រោងពង្រឹងសមត្ថភាពផលិតភាពជនបទ( NRRPCP) របស់ក្រុមការងារបេសកកម្មនៃធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដោយមានការចូលរួមពី លោក អ៊ួង ប៉ុណ្ណាកា ប្រធានគ្រប់គ្រងគម្រោង តំណាងធនាគារ AIIB  លោក លោកស្រី ដែលជាសមាជិក សមាជិកានៃគម្រោង សរុបប្រមាណ ៤៥រូប។

កិច្ចប្រជុំនេះមានគោលបំណង ដើម្បីពិនិត្យ និងពិភាក្សាពីវឌ្ឍនភាពការងាររបស់គម្រោងដែលបានអនុវត្តកន្លងមក និងផែនការសម្រាប់អនុវត្តបន្តដែលឆ្លើយតបទៅនឹងបច្ចុប្បន្នភាពនៃគម្រោង៕

រាជធានីភ្នំពេញ ៖ នាថ្ងៃពុធ៨កើត ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៥ ខែឧសភា ឆ្នាំ២០២៤ ឯកឧត្តម ជួប សំអាត អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញចូលរួមប្រជុំផ្សព្វផ្សាយសេចក្តីសម្រេច ប្រកាសសមាសភាពដឹកនាំ គ.អ.គ.អ.ច.ក និងលើកទិសដៅការងារ ដើម្បីតាមដានត្រួតពិនិត្យការអនុវត្តក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជាឆ្នាំ២០១៦-២០៣០ ក្រោមអធិបតីភាពឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធាន គ.អ.គ.អ.ច.ក នៅសាលប្រជុំទីស្តីការក្រសួងផែនការ៕

រាជធានីភ្នំពេញ ៖ នារសៀលថ្ងៃពុធ៨កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១៥ ខែឧសភា ឆ្នាំ២០២៤  ឯកឧត្តម អ៊ិន ចន្ថា រដ្ឋលេខាធិការ និងជាប្រធានសម្របសម្រួលកម្មវិធីទី៣ បានដឹកនាំកិច្ចប្រជុំបូកសរុបលទ្ធផលនៃការចុះវាយតម្លៃភូមិគំរូទាំង៣០ភូមិ នៃខេត្តកំពង់ស្ពឺ តាកែវ និងខេត្តត្បូងឃ្មុំ ដោយមានការអញ្ជើញចូលរួមពីឯកឧត្តម អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ ព្រមទាំងក្រុមការងារនៃនាយកដ្ឋានអភិវឌ្ឍន៍សហគមន៍។

នាឪកាសនោះ ឯកឧត្តម អឿន ធារិទ្ធ បានធ្វើបទបង្ហាញស្តីពីលទ្ធផលនៃការចុះវាយតម្លៃកំណត់លក្ខណៈសម្បតិ្តភូមិគំរូទាំង៣០ភូមិ ។ តាមរយៈលទ្ធផលនៃការចុះវាយតម្លៃនេះ ឯកឧត្តមប្រធានអង្គប្រជុំ បានលើកឡើងថាលទ្ធផលនេះ មានលក្ខណៈបែបវិទ្យាសាស្រ្តដោយមានភាពច្បាស់លាស់ និងអាចវាស់វែងបាន ភូមិគំរូ គឺជា “ភូមិដ្ឋានដែលមានសុខុដុមនីយកម្ម ធានាបាននូវចរន្តសេដ្ឋកិច្ច និងនិរន្តរភាពប្រាក់ ចំណូលគ្រួសារ មានសេវាសង្គមកិច្ច ហេដ្ឋារចនាសម្ព័ន្ធសមស្រប និងអភិបាលកិច្ចល្អ” ដើម្បីនិរន្តភាពនៃការអភិវឌ្ឍ លើកកម្ពស់គុណភាព និងគុណតម្លៃនៃជីវិតរស់នៅឱ្យប្រសើរឡើង ប្រកបដោយបរិយាបន្ន ទាំងផ្នែកសេដ្ឋកិច្ច សង្គមកិច្ច និងវប្បធម៌។ បន្ថែមពីនេះ ឯកឧត្តមរដ្ឋលេខាធិការ បានផ្តល់អនុសាសន៍ដល់ក្រុមការងារដើម្បីត្រៀមរៀបចំឯកសារ និងបទបង្ហាញពាក់ព័ន្ធនានាក្នុងសិក្ខាសាលា ព្រមទាំងបានលើកទិសដៅបន្តក្នុងការចុះវាយតម្លៃលក្ខណៈវិនិច្ឆ័យភូមិគំរូទាំង៥០ភូមិសម្រាប់ឆ្នាំ២០២៥ នាពេលខាងមុខ៕

រាជធានីភ្នំពេញ ៖ នាថ្ងៃពុធ៨កើត ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៥ ខែឧសភា ឆ្នាំ២០២៤ ឯកឧត្តម ម៉ា សុវណ្ណា អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងលោក ឃួច លីននី អគ្គនាយករងបច្ចេកទេស បានអញ្ជើញចូលរួមសិក្ខាសាលាផ្សព្វផ្សាយស្តីពី ការដាក់ឱ្យអនុវត្តភាពជាដៃគូ រវាងរាជរដ្ឋាភិបាលកម្ពុជា និងអង្គការយូនីសេហ្វ ក្នុងការលើកកម្ពស់អភិបាលកិច្ចរដ្ឋបាលថ្នាក់ក្រោមជាតិ នៅសណ្ឋាគារសុខាភ្នំពេញ ក្រោមអធិបតីភាពដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងមានការចូលរួមពីថ្នាក់ដឹកនាំ និងមន្រ្តីបច្ចេកទេស ប្រធានមន្ទីរអភិវឌ្ឍន៍ជនបទខេត្ត ចំនួន៦ រួមមាន ខេត្តមណ្ឌលគីរី រតនគីរី ក្រចេះ ស្ទឹងត្រែង សៀមរាប និងខេត្តព្រះវិហារ ព្រមទាំងក្រសួងស្ថាប័នពាក់ព័ន្ធ សរុបចំនួន ២១៥នាក់ ។

សិក្ខាសាលានេះមានគោលបំណងផ្សព្វផ្សាយ អំពីការងារកំណែទម្រង់វិមជ្ឈការ និងវិសហមជ្ឈការក្នុងកម្មវិធីជាតិដំណាក់កាលទី២ , វិមជ្ឈការហិរញ្ញវត្ថុ និងយុទ្ធសាស្រ្តកែទម្រង់ប្រព័ន្ធថវិការដ្ឋបាលថ្នាក់ក្រោមជាតិ និងភាពជាដៃគូជាមួយ UNICEF , គោលដៅអភិវឌ្ឍន៍ដោយចីរភាពកម្ពុជា និងគោលដៅជាតិព្រមទាំងអាទិភាពដែលរដ្ឋបាលថ្នាក់ក្រោមជាតិគួរតំរឹមផែនការ និងថវិការបស់ខ្លួនឱ្យស្របតាម, ការវាយតម្លៃអភិក្រមរដ្ឋបាលថ្នាក់ក្រោមជាតិ មានគោលដៅ និងយុទ្ធសាស្រ្ត ទ្រឹស្តីស្តីពីការផ្លាស់ប្តូរ និងក្របខ័ណ្ឌតាមដាន និងវាយតម្លៃ៕