ខេត្តកំពត៖ នាព្រឹកថ្ងៃព្រហស្បតិ៍  ៩កើត ខែពិសាខ ឆ្នាំរោង ឆស័ក ព.ស. ២៥៦៧ ត្រូវនឹង ថ្ងៃទី១៦ ខែឧសភា ឆ្នាំ២០២៤

នៅសាលាស្រុកឈូក លោកស្រី ឈឹម ផល្លា អនុប្រធានការិយាល័យថែទាំសុខភាពជនបទ នៃមន្ទីរអភិវឌ្ឍន៍ជនបទខេត្តកំពត បានចូលរួមកិច្ចប្រជុំឆ្លុះបញ្ចាំងប្រចាំត្រីមាសទី១ សម្រាប់ការងារផ្សព្វផ្សាយអនាម័យ និងរៀបចំផែនការបញ្ចប់ ការបន្ទោបង់ពាសវាលពាសកាល (ODF ) ក្នុងភូមិគោលដៅចំនួន ០៥ភូមិ នៃឃុំចំនួន ០៣ រួមមាន៖ ឃុំតាកែន ឃុំត្រពាំងភ្លាំង និងឃុំតេជោអភិវឌ្ឍន៍ ស្រុកឈូក ខេត្តកំពត ដែលមានអ្នកចូលរួមសរុបចំនួន ៣២រូប ស្រី ១៧រូប ។

ខេត្តស្វាយរៀង៖ នាព្រឹកថ្ងៃព្រហស្បតិ៍ ៩កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ លោក សំ នីតូ ប្រធានមន្ទីរអភិវឌ្ឍន៍ជនបទខេត្តស្វាយរៀង បានដឹកនាំកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារប្រចាំខែមិថុនា ឆ្នាំ២០២៤ របសមន្ទីរអភិវឌ្ឍន៍ជនបទខេត្តស្វាយរៀង ស្ថិតនៅសាលប្រជុំធំមន្ទីរ។

ក្នុងកិច្ចប្រជុំនេះមានការចូលរួមពីសំណាក់ លោក លោកស្រី អនុប្រធានមន្ទីរ ប្រធានការិយាល័យ អនុប្រធានការិយាល័យ និងមន្ត្រី មន្ត្រីជាប់កិច្ចសន្យា សរុបចំនួន ៤១នាក់ ស្រី ៨នាក់។

ខេត្តរតនគិរី ៖ នាព្រឹកថ្ងៃព្រហស្បតិ៍ ៩កើត ខែពិសាខ ឆ្នាំរោង ឆស័កព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ លោក អៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី រួមជាមួយសហការី មានលោក ឃឹម នី អនុប្រធានមន្ទីរ លោក មឿន ស្រស់ ប្រធានការិយាល័យផ្គត់ផ្គង់ទឹកជនបទ និងលោក ផាន់ សុផល អនុប្រធានការិយាល័យសេដ្ឋកិច្ចជនបទនៃមន្ទីរអភិវឌ្ឍន៍ជនបទខេត្តរតនគិរី បានចូលរួមអមដំណើរ លោក ម៉ា វិចិត្រ អភិបាលរងនៃគណអភិបាលខេត្តរតនគិរី និងជាប្រធានលេខាធិការដ្ឋានគ្រប់គ្រងគ្រោះមហន្តរាយថ្នាក់ខេត្ត ចុះពិនិត្យពីស្ថានភាពប្រើប្រាស់ទឹករបស់ប្រជាពលរដ្ឋ នៅភូមិបាក់កែ ឃុំវើនសៃ ស្រុកវើនសៃ ខេត្តរតនគិរី ។

ក្នុងឱកាសនោះក្រុមការងារជួសជុលអណ្ដូងស្នប់ជូនប្រជាពលរដ្ឋបានចំនួន ២អណ្ដូង ដែលមានអ្នកប្រើប្រាស់សរុប ១២៥ខ្នងផ្ទះ ស្មើនឹង ១៣៥គ្រួសារ ៕

ខេត្តពោធិ៍សាត់ ៖ នាថ្ងៃព្រហស្បតិ៍ ៩កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ លោក ប្លង់ បញ្ញា អនុប្រធានមន្ទីរ និងក្រុមការងារ នៃមន្ទីរអភិវឌ្ឍន៍ជនបទខេត្តពោធិ៍សាត់ បានចុះពិនិត្យទីតាំងអណ្តូងថ្មី១កន្លែង ស្ថិតនៅភូមិរហាលទិល ឃុំតាលោ និងបានជួសជុលអណ្តូងស្នប់បានចំនួន១អណ្តូង នៅភូមិប្រហាល ឃុំតាលោ ស្រុកតាលោសែនជ័យ ដែលមានម្ចាស់ផ្ទះឈ្មោះ ផង់ ស្រីម៉ៅ មានអ្នកប្រើប្រាស់ចំនួន ១៣គ្រួសារ។

បន្ទាប់មកក្រុមការងារ បានចុះត្រួតពិនិត្យការខួងអណ្តូងថ្មី និងផ្លុំសម្អាតអណ្តូង ១កន្លែង នៅភូមិប្រហាល ឃុំតាលោ ស្រុកតាលោសែនជ័យ និងបានត្រួតពិនិត្យមើលការចាក់សាបអណ្តូងចំនួន ៤ទីតាំង នៅភូមិសំសាន ឃុំតាលោ និងភូមិតាសាស់ ឃុំផ្ទះរុង ស្រុកតាលោសែនជ័យ ដើម្បីជូនប្រជាពលរដ្ឋប្រើប្រាស់៕

ខេត្តព្រះវិហារ ៖ នាថ្ងៃពុធ និងថ្ងៃព្រហស្បតិ៍ ៨ -៩កើត ខែពិសាខ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី១៥-១៦ ខែឧសភា ឆ្នាំ២០២៤ លោក ញាណ គង់ ប្រធានការិយាល័យផ្គត់ផ្គង់ទឹកជនបទ និងមន្ត្រីជំនាញនៃមន្ទីរអភិវឌ្ឍន៍ជនបទខេត្តព្រះវិហារចំនួន ៣រូប បានសហការជាមួយអាជ្ញាធរឃុំ ភូមិ អញ្ជើញទៅជួសជុលអណ្តូងស្នប់ជូនប្រជាពលរដ្ឋបានចំនួន ៤អណ្តូង នៅក្នុងស្រុកឆែប ក្នុងនោះ នៅក្នុងឃុំសង្កែមួយ បានចំនួន ២អណ្តូង គឺភូមិសង្កែចំនួន ១អណ្តូង ភូមិសាអែមចំនួន ១អណ្តូង និងនៅក្នុងភូមិក្តុល ឃុំម្លូព្រៃមួយ បានចំនួន ២អណ្តូង ៕

ខេត្តព្រះសីហនុ៖ នៅថ្ងៃព្រហស្បតិ៍ ៩ កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ មន្ទីរអភិវឌ្ឍន៍ជនបទ ខេត្តព្រះសីហនុ និងអ្នកពាក់ព័ន្ធក្នុងខេត្ត បានរៀបចំសិក្ខាសាលាឆ្លុះបញ្ចាំងស្តីពី លទ្ធផលផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលក្រុងព្រះសីហនុ ក្រោមអធិបតីភាព ឯកឧត្តម ជាម ហ៊ីម រដ្ឋលេខាធិការក្រសួងអភិវឌ្ឍន៍ជនបទ និង លោក គង់ វិតាណៈ អភិបាលរង នៃគណៈអភិបាលខេត្តព្រះសីហនុ ដែលមានសមាជិក សមាជិកាចូលរួមចំនួន៤៩នាក់ (ស្រី៣នាក់) នៅសាលប្រជុំក្រុមប្រឹក្សាខេត្តព្រះសីហនុ។