ខេត្តព្រះសីហនុ៖ នាព្រឹកថ្ងៃព្រហស្បតិ៍ ៩កើត ខែពិសាខ ឆ្នាំរោង បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ ឯកឧត្តម ជាម ហ៊ីម រដ្ឋលេខាធិការ ក្រសួងអភិវឌ្ឍន៍ជនបទ ដំណើរដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រី ក្រសួងអភិវឌ្ឍន៍ជនបទ អញ្ជើញជាអធិបតី ក្នុងសិក្ខាសាលាស្ដីពីសិក្ខាសាលាឆ្លុះបញ្ចាំង ស្តីពីលទ្ធផលចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលODF ដោយមានការអញ្ជើញចូលរួមពី ឯកឧត្តម គង់ វិតាណ: អភិបាលរង នៃគណៈអភិបាលខេត្ត នៅខេត្តព្រះសីហនុ លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ និងសហការី  សិក្ខាសាលានេះមានការអញ្ជើញចូលរួមផងដែរពីលោក លោកស្រីមកពីមន្ទីរពាក់ព័ន្ធជំវិញខេត្ត និងអាជ្ញាធរឃុំ/សង្កាត់ ស្រុក/ក្រុង សរុបចំនួន ៥២រូប ស្រី ៤រូប គាំទ្រដោយអង្គការភ្លែនអន្តរជាតិ។

 

គោលបំណងសំខាន់នៃសិក្ខាសាលា៖

១.បង្ហាញពីវិធីសាស្ត្រ ដំណើរការ និងលទ្ធផលនៃការចុះផ្ទៀងផ្ទាត់ខេត្ត។

២.បើកវេទិកាពិភាក្សា និងប្រមូលធាតុចូលបន្ថែមពីថ្នាក់ដឹកនាំ និងអ្នកពាក់ព័ន្ធក្នុងខេត្ត លើលទ្ធផលដែលក្រុមការថ្នាក់ជាតិបានរកឃើញ។

៣.ផ្តល់ព័ត៌មាន និងអនុសាសន៍សម្រាប់ខេត្ត។

 

ជាលទ្ធផល

១.បានបង្ហាញពីលទ្ធផលរបស់ក្រុមការងារថ្នាក់ជាតិចុះផ្ទៀងផ្ទាត់នៅតាមសហគមន៍ សាលារៀន មណ្ឌលសុខភាព ស្ថាប័ន កន្លែងផ្តល់សេវាសាធារណៈ វត្តអារាម។

២.ថ្នាក់ដឹកនាំ និងអាជ្ញាធរឃុំ/សង្កាត់/ស្រុក/ក្រុង បានផ្តល់ធាតុចូលជាច្រើន ព្រមទាំងទទួលយកនូវលទ្ធផលរបស់ក្រុមការងារថ្នាក់ជាតិបានចុះផ្ទៀងផ្ទាត់។

៣.ក្រុមការងារថ្នាក់ជាតិទទួលស្គាល់ថាខេត្តព្រះសីហនុ គឺជាខេត្តជ័យលាភីបញ្ចប់ការបន្ទោបង់ពាសវាលពាសកាល(ODF)។

រាជធានីភ្នំពេញ៖ នាថ្ងៃព្រហស្បតិ៍ ៩កើត-សុក្រ ១០កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី១៦-១៧ ខែឧសភា ឆ្នាំ២០២៤ លោកស្រី នួន មុនីចិន្តា ប្រធាននាយកដ្ឋានអភិវឌ្ឍន៍ជនជាតិភាគតិច បានចូលរួមវេទិកាពិភពលោកស្តីពី សកម្មភាពអាកាសធាតុ ២០២៤ (Global Climate Action Forum 2024)  ដែលរៀបចំដោយក្រសួងបរិស្ថាន និង W-Foundation នៅសណ្ឋាគារ Himawari រាជធានីភ្នំពេញ ដោយមានការអញ្ជើញចូលរួមពី លោក ទៀង ឆាយហៀង អនុប្រធាននាយកដ្ឋានផែនការនិងទំនាក់ទំនងសាធារណៈ លោក នុត សំភី អនុប្រធាននាយកដ្ឋានអភិវឌ្ឍន៍សហគមន៍ មន្រ្តីថ្នាក់ជាតិ និងថ្នាក់ក្រោមជាតិ អ្នកជំនាញការជាតិ អន្តរជាតិ ដៃគូអភិវឌ្ឍ អង្គការសង្គមស៊ីវិល និងវិស័យឯកជន។

 

វេទិកានេះ រៀបចំឡើងក្នុងគោលបំណងចំនួន៣រួមមាន៖

១. បង្កើនការយល់ដឹងអនាគតកម្ពុជាពីទស្សនៈទាន និងសកម្មភាពប្រែប្រួលអាកាសធាតុ និងអព្យាក្រឹត្យកាបូន

 

២.សម្ព័ន្ធភាពសកម្មភាពអាកាសធាតុ ការផ្តល់ឱ្យសុវត្ថិភាព

 

៣. សកម្មភាព ប្រែប្រួលអាកាសធាតុ និងសក្តានុពលឥណទានកាបូនតាមវិស័យនានា និង(៤) លើកកម្ពស់ការផ្ទេរបច្ចេកវិទ្យានាវនុវត្តន៍ សម្រាប់ការបំភាយ ឧស្ម័នផ្ទះកញ្ចក់កម្រិតទាប និងភាពធន់ទៅនឹងការប្រែប្រួលអាកាសធាតុ។

 

វេទិការយ:ពេល២ថ្ងៃនេះ បានបញ្ចប់ប្រកបដោយផ្លែផ្កា និងបរិយាកាសស្និទ្ធស្នាល។

ខេត្តសៀមរាប ៖ នាថ្ងៃសុក្រ ១០កើត ខែពិសាខ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី១៧ ខែឧសភា ឆ្នាំ២០២៤ ឯកឧត្ដម ហួត សារឹម អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ប្ញទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានដឹកនាំគណៈកម្មការអន្ដរក្រសួង រួមមាន តំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អញ្ជើញទៅពិនិត្យ និងប្រគល់-ទទួល សមិទ្ធផលចំនួន ២គម្រោងដូចខាងក្រោមនេះ ៖

 

-គម្រោងទី១៖

– ការងារឈូសឆាយសម្អាតព្រៃ និងរាវកាកសំណល់គ្រាប់មិនទាន់ផ្ទុះ លើផ្ទៃដីទំហំ ១ ៤១០ហិកតា និងចាក់ដីបំពេញតាមឡូតិ៍ និងទីតាំងសាធារណៈបានចំនួន ៦ ៦៧៦ ៣៤៨ ម៉ែត្រគូប

– ស្ថាបនាផ្លូវក្រាលបេតុងចំនួន ១៩ខ្សែ ប្រវែងសរុប ២៧ ៤១៣ម៉ែត្រ ទទឹងប្រវែង ៩ម៉ែត្រ កម្រាស់ ០,២ម៉ែត្រ ចិញ្ចើមផ្លូវក្រាលដីល្បាយថ្មភ្នំសងខាង ដោយម្ខាងៗមានប្រវែង ២ម៉ែត្រ

– សាងសង់លូប្រអប់មុខពីរចំនួន ១៦កន្លែង លូមូលគ្រប់ប្រភេទចំនួន ៩៥កន្លែង

– អណ្តូងលូ ( ទំហំ១,៦ម៉ែត្រ×១,៦ម៉ែត្រ×២ម៉ែត្រ ) ចំនួន ១ ០៣០កន្លែង ។ សមិទ្ធផលខាងលើនេះស្ថិតនៅក្នុងតំបន់អភិវឌ្ឍន៍ ពាក់ស្នែង ស្រុកអង្គរធំ ខេត្តសៀមរាប។

 

-គម្រោងទី២៖

– ការស្ថាបនាផ្លូវក្រាលបេតុងចំនួន ២៨ខ្សែ ប្រវែងសរុប ៣១ ៣៣៩ម៉ែត្រ ( ខ្សែទី១ ទី២ និងទីទី៣  ប្រវែងសរុប ២ ៣១០ម៉ែត្រ ទទឹង ៧ម៉ែត្រ និងខ្សែទី៤ ដល់ខ្សែទី ២៨ ប្រវែងសរុប ២៩ ០២៩ម៉ែត្រ ទទឹង ៩ម៉ែត្រ ) ចិញ្ចើមផ្លូវក្រាលដីល្បាយថ្មភ្នំសងខាងម្ខាងៗប្រវឋែង ២ម៉ែត្រ កម្រាស់ ០,២ម៉ែត្រ

– ការងារស្ថាបនា ផ្លូវក្រាលកៅស៊ូពីរជាន់ ចំនួន ២៦ខ្សែ ប្រវែងសរុប ១០ ៤៤៤ម៉ែត្រ ( ខ្សែទី២៩ ដល់ខ្សែទី ៥៤ ) មានទទឹងប្រវែង ៧ម៉ែត្រ ចិញ្ចើមផ្លូវក្រាលដីល្បាយថ្មភ្នំសងខាងផ្លូវ ដោយ ម្ខាងមានប្រវែង ២ម៉ែត្រ កម្រាស់ ០,២ម៉ែត្រ

– សាងសង់លូប្រអប់ចំនួន ០២កន្លែង

– លូមូលគ្រប់ប្រភេទចំនួន ១១៥កន្លែង

– លូមូលបណ្តោយផ្លូវប្រភេទ HDPE មុខកាត់ ១ម៉ែត្រ ប្រវែងសរុប ៦០០០ម៉ែត្រ

– លូមូលបណ្តោយផ្លូវប្រភេទ HDPE មុខកាត់ ០,៦ម៉ែត្រ ប្រវែងសរុប ២ ៥៩០ម៉ែត្រ

– អណ្តូងលូ( ទំហំ ១,៦ម៉ែត្រ×១,៦ម៉ែត្រ×២ម៉ែត្រ ) ចំនួន ៧០០កន្លែង

– អណ្តូងលូ ( ទំហំ១ម៉ែត្រ×១ម៉ែត្រ×១,២ម៉ែត្រ ) ចំនួន ៥០០កន្លែង

– ការងារឈូសឆាយសម្អាតព្រៃទំហំ ៦ ២៤៨ ៦៧៥ម៉ែត្រការ៉េ

– ការងារចាក់ដីបំពេញតាមឡូតិ៍ជូនប្រជាពលរដ្ឋ និងទីតាំងសាធារណៈបានចំនួន ៤ ២៨១ ៩៤៩ម៉ែត្រគូប

– សាងសង់ផ្សារចំនួន ១កន្លែង មានចំនួន ៨ខ្នង មានសំណង់បង្គន់អនាម័យចំនួន ២ខ្នង មួយខ្នង ៥បន្ទប់ និង មួយខ្នង ១០បន្ទប់ និងហេដ្ឋារចនាសម្ព័ន្ធគាំទ្រផ្សេងៗ  ។ សមិទ្ធផលខាងលើនេះស្ថិតក្នុងតំបន់អភិវឌ្ឍន៍រុនតាឯក ស្រុក បន្ទាយស្រី ខេត្តសៀមរាប

 

សមិទ្ធផលទាំង ២គម្រោងខាងលើនេះអនុវត្តដោយ កងវិស្វកម្មតេជោ ហ៊ុន សែន សៀមរាប ។

 

បន្ទាប់ពីបានពិនិត្យ ទៅលេីលក្ខណ:បច្ចេកទេស គុណភាព និងសោភ័ណភាព រួចមក គណៈកម្មការបានសម្រេចឯកភាពប្រគល់-ទទួល ១០០% ៕

រាជធានីភ្នំពេញ៖ នៅព្រឹកថ្ងៃព្រហស្បត៍ ៩កើត ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៦ ខែឧសភា ឆ្នាំ២០២៤ នៅទីស្ដីការក្រសួង លោកជំទាវ ឈាង សុខណា អគ្គាធិការស្ដីទី ក្រសួងអភិវឌ្ឍន៍ជនបទ ដឹកនាំកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារបន្តខែមិថុនា ឆ្នាំ២០២៤ របស់អគ្គាធិការដ្ឋាន ដោយមានការអញ្ជើញចូលរួមពីសំណាក់ ឯកឧត្តម លោក លោកស្រី  អគ្គាធិការង អធិការ អធិការរង ប្រធានការិយាល័យ អនុប្រធានការិយាល័យ និងមន្ត្រីរាជការ សរុប ២៦រូប៕