រាជធានីភ្នំពេញ៖ នាព្រឹកថ្ងៃព្រហស្បតិ៍១២កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១២ខែធ្នូ ឆ្នាំ២០២៤ នៅសណ្ឋាគារសូហ្វីតែលភ្នំពេញ ឯកឧត្តមបណ្ឌិត នួន ដាញ៉ិល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្តីពី “យុទ្ធសាស្រ្តហិរញ្ញវត្ថុអនាម័យសម្រាប់កម្ពុជា” ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រីតំណាងក្រសួងសេដ្ឋកិច្ច និងហិរញ្ញវត្ថុ ក្រសួងសាធារណការ និងដឹកជញ្ជូន អង្គការយូនីសេហ្វ ក្រសួង ស្ថាប័ន អង្គការមិនមែនរដ្ឋាភិបាល ដៃគូអភិវឌ្ឍន៍ និងស្ថាប័នឯកជន ព្រមទាំងលោក លោកស្រី និងមន្រ្តីរាជការនៃមន្ទីរអភិវឌ្ឍន៍ជនបទទាំង២៥ រាជធានី/ខេត្ត ដែលចូលរួមដោយផ្ទាល់ និងតាមបណ្តាញនិមិត្ត (Zoom) សរុប ចំនួន ៧៥រូប។

 

សិក្ខាសាលានេះ មានគោលបំណង ដើម្បីបង្ហាញជូនអង្គសិក្ខាសាលាអំពីជម្រើស និងវិធានការនានា សម្រាប់ក្រសួង/ស្ថាប័នពាក់ព័ន្ធនៅកម្ពុជា យកទៅពិចារណា ដើម្បីកៀរគរហិរញ្ញវត្ថុយកមកអនុវត្តការងារ សម្រាប់ឈានទៅសម្រេចគោលដៅអនាម័យជនបទ និងទីក្រុង នៅត្រឹមឆ្នាំ២០៣០។

 

ក្នុងឱកាស ដ៏វិសេសវិសាលនេះ ឯកឧត្តមបណ្ឌិតរដ្ឋលេខាធិការ បានពាំនាំនូវការផ្តាំផ្ញើសួរសុខទុក្ខប្រកបដោយក្ដីនឹករលឹក និងពរសព្វសាធុការ ពីសំណាក់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ព្រមទាំងបានសម្ដែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ក្រុមការងារ ក.ស.គ. នាពេលកន្លងមក។

 

ឯកឧត្តមបណ្ឌិត នួន ដាញ៉ិល បានលើកឡើងអំពីយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល និងចក្ខុវិស័យកម្ពុជាឆ្នាំ២០៣០ ជាប្រទេសដែលមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសដែលមានចំណូលខ្ពស់។ លើសពីនេះ ដើម្បីឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី១ ខាងលើ ក្រសួងអភិវឌ្ឍន៍ជនបទ បានដាក់ចេញនូវផែនការអភិវឌ្ឍន៍ជនបទ ដោយធ្វើយ៉ាងណាខិតខំសម្រេចឱ្យបាននូវចក្ខុវិស័យរបស់ខ្លួនគឺ “កសាងតំបន់ជនបទកម្ពុជាប្រកបដោយវិបុលភាព បរិយាប័ន្ន នវានុវត្តន៍ ឌីជីថល និងភាពធន់ ទាំងផ្នែកសេដ្ឋកិច្ច សង្គមកិច្ច និងវប្បធម៌” និងមានគោលបំណងចម្បង២ គឺ៖ (១) បង្កើនប្រាក់ចំណូលគ្រួសារជនបទឱ្យមានជីវភាពសមរម្យ និងមានប្រាក់ចំណូលប្រកបដោយចីរភាព (២) បង្កើនសុខមាលភាពគ្រួសារនៅជនបទ ឱ្យមានសុខភាពល្អ និងរស់នៅក្នុងបរិស្ថានស្អាត ព្រមទាំងបានកំណត់យុទ្ធសាស្រ្តអាទិភាពចំនួន៥ គឺ (១) អភិវឌ្ឍន៍ហេដ្ឋារចនាសម្ព័ន្ធរូបវន្ត និងគមនាគមន៍ប្រកបដោយភាពធន់ (២) លើកកម្ពស់សុខភាពអនាម័យ និងបរិស្ថានរស់នៅរបស់សហគមន៍ជនបទប្រកបដោយនិរន្តរភាព (៣) អភិវឌ្ឍន៍សហគមន៍ជនបទឌីជីថល និងចលនាភូមិគំរូ (៤) ពិពិធកម្មសេដ្ឋកិច្ចជនបទ និងនវានុវត្តន៍ការងារ និង (៥) ពង្រឹងស្ថាប័ន តាមរយៈការរៀបចំគោលនយោបាយ ហិរញ្ញវត្ថុ ឌីជីថល និងសហប្រតិបត្តិការ។

 

ជាមួយគ្នានេះដែរ ឯកឧត្តមបណ្ឌិតរដ្ឋលេខាធិការ បានអំពាវនាវដល់ក្រុមការងារ ក.ស.គ ក្រសួង ស្ថាប័នពាក់ព័ន្ធ និងអង្គការដៃគូ មេត្តាបន្តសហការគ្នា ដើម្បីឈានទៅសម្រេចគោលដៅនៃការផ្គត់ផ្គង់ទឹក និងអនាម័យជនបទ ១០០% នៅឆ្នាំ២០៣០៕

ខេត្តកោះកុង៖ នៅថ្ងៃអង្គារ-ពុធ ១០-១១កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០-១១ ខែធ្នូ ឆ្នាំ២០២៤ ឯកឧត្តម សាន វិសាល រដ្ឋលេខាធិការក្រសួងអភិវឌ្ឍន៍ជនបទ និង លោក អ៊ួង ប៉ុណ្ណាកា ប្រធានគ្រប់គ្រងគម្រោង ព្រមទាំងលោកប្រធានមន្ទីរអភិវឌ្ឍន៍ជនបទខេត្តកោះកុង បានដឹកនាំមន្រ្តីបច្ចេកទេសថ្នាក់ក្រសួង (PMU) មន្រ្តីបច្ចេកទេសថ្នាក់ខេត្ត (PIU) របស់គម្រោងពង្រឹងសមត្ថភាពផលិតភាពជនបទ (NRRPCP) បានចុះត្រួតពិនិត្យនូវវឌ្ឍនភាពការងាររួមមាន៖

-សាងសង់ស្រះសហគមន៍ ស្ថិតក្នុងបរិវេណវត្តគងឆា ភូមិជីខលើ ឃុំជីខលើ ស្រុកស្រែអំបិល ខេត្តកោះកុង ដែលជាស្រះទឹកសហគមន៍លេខ (CP 016)។ ស្រះទឹកនេះជាប្រភេទស្រះដី មានទំហំ (100mX45m) និងមានជម្រៅ 4.5m មានជណ្តើរចុះក្នុងស្រះសង់ពីបេតុង ចំនួន២ លូរំដោះទឹកចំនួន២ អាងចម្រោះទឹកចំនួន១ និងមានបំពាក់ប្រព័ន្ធម៉ូទ័របូមទឹកស្វ័យប្រវត្ត ដែលដំណើរការថាមពលពន្លឺព្រះអាទិត្យ។ ស្រះទឹកនេះក៏មានរបងការពារសុវត្ថិភាពហុំព័ទ្ធជុំវិញផងដែរ។  ស្រះសហគមន៍នេះបានចាប់ផ្តើមសាងសង់នៅ ថ្ងៃទី ២៩ ខែ តុលា ឆ្នាំ២០២៤ និងគ្រោងបញ្ចប់ការសាងសង់នៅថ្ងៃទី៣១ ខែធ្នូ ឆ្នាំ២០២៤ខាងមុខនេះ។

-ការងារសាងសង់ផ្លូវថ្មបាំង ដែលជាខ្សែផ្លូវក្នុង (B2-Lot5) មានប្រវែងសរុប ២៦,១០គីឡូម៉ែត្រ ដែលជាប្រភេទផ្លូវក្រាលកៅស៊ូពីរជាន់ (DBST) និងផ្លូវបេតុង ដែលមានលូមូលកាត់ផ្លូវចំនួន ៩កន្លែង ដែលតជាប់ពីផ្លូវជាតិលេខ៤៨ ដល់ស្រុកថ្មបាំង ដែលបានចាប់ផ្តើមសាងសង់ថ្ងៃទី០៣ ខែមិនា ឆ្នាំ២០២៤  និងគ្រោងបញ្ចប់ការសាងសង់ថ្ងៃទី៣០ ខែមិនា ឆ្នាំ២០២៥  លទ្ធផលសម្រេចបាន ២៥%។

រាជធានីភ្នំពេញ៖ នាថ្ងៃព្រហស្បតិ៍ ១២កើត ខែមិគសិរ ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី១២ ខែធ្នូ ឆ្នាំ២០២៤ នៅសាលមហោស្រព និងពិព័រណ៍កោះពេជ្រ លោកជំទាវ ម៉ាត់ ម៉ារ៉ា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អមដោយ លោកស្រី សារី សិលា អគ្គាធិការរង កញ្ញាឱសថបណ្ឌិត ច័ន្ទថេត សុខាទេវា អគ្គនាយករងបច្ចេកទេស ព្រមទាំងអនុប្រធាននាយកដ្ឋានបីរូបទៀត បានអញ្ជើញ ចូលរួមទិវាជាតិ ប្រឆាំងការជួញដូរ មនុស្ស ១២ធ្នូ លើកទី១៨ ក្រោមប្រធានបទ «កម្ពុជាប្រឆាំងដាច់ខាតអំពើជួញដូរមនុស្សគ្រប់ទម្រង់ និងគ្រប់មធ្យោបាយក្នុងយុគសម័យឌីជីថល» ក្រោមអធិបតីដ៏ខ្ពង់ខ្ពស់ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

 

ទិវាជាតិប្រឆាំងអំពើជួញដូរមនុស្ស ១២ធ្នូនេះ ប្រារព្ធឡើង មានគោលបំណងបង្ហាញពីឆន្ទៈមោះមុតរបស់រាជរដ្ឋាភិបាល នៃព្រះរាជាណាចក្រកម្ពុជាដែលនៅតែបន្តឥតឈប់ឈរ ក្នុងការប្រយុទ្ធប្រឆាំងអំពើជួញដូមនុស្សគ្រប់ទម្រង់ តាមគ្រប់មធ្យោបាយ និងផ្សព្វផ្សាយដល់សាធារណៈជន អង្គការមិនមែនរដ្ឋាភិបាលក្នុងស្រុក អន្តរជាតិ វិស័យឯកជន មន្ត្រីរាជការគ្រប់ឋានានុក្រម នៅគ្រប់ក្រសួង-ស្ថាប័ន កងកម្លាំងប្រដាប់អាវុធគ្រប់ប្រភេទ ព្រមទាំងបុព្វជិតគ្រប់និកាយ សាសនា ប្រជាពលរដ្ឋទូទាំងប្រទេសឱ្យមានការយល់ដឹង ដើម្បីសហការចូលរួមបង្ការទប់ស្កាត់ និងបង្ក្រាបបទល្មើសថ្មីៗលើគ្រប់រូបភាពដែលពាក់ព័ន្ធ ទៅនឹងអំពើជួញដូរមនុស្សនៅកម្ពុជា ។

 

ខេត្តក្រចេះ ៖ ថ្ងៃពុធ ១១កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែធ្នូ ឆ្នាំ២០២៤ ឯកឧត្តម ផូ ផារិទ្ធ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈកម្មាធិការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដើម្បីចុះត្រួតពិនិត្យ និងវាយតម្លៃលើការងារថែទាំខួបផ្លូវចំនួន ១ខ្សែ ដោយក្រាលល្បាយក្រួស ប្រវែងសរុប ១១ ៨០០ម ទទឹង៤,៥ម និង ៥ម កម្រាស់ ០,១៥ម៉ែត្រ និងសំណង់សិល្បការ្យមួយចំនួនទៀត ស្ថិតនៅក្នុងឃុំកំពង់ចាម និងឃុំបឹងចារ ស្រុកសំបូរ ខេត្តក្រចេះ។

 

ជាមួយគ្នានោះ ឯកឧត្តមរដ្ឋលេខាធិការ បានជួបសំណេះសំណាលជាមួយអាជ្ញាធរ និងប្រជាពលរដ្ឋជាច្រើនរូប ដោយក្នុងនោះឯកឧត្តមបានពាំនាំនូវប្រសាសន៍ផ្តាំផ្ញើសាកសួរសុខទុក្ខពី ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងបាននាំយកអំណោយដ៏ថ្លៃថ្លារបស់ ឯកឧត្តមរដ្ឋមន្ត្រី ជូនដល់ប្រជាពលរដ្ឋ ដោយម្នាក់ៗទទួលបានក្រម៉ា១ផងដែរ ។

 

បន្ទាប់ពីត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណ:កម្មការអន្តរក្រសួងរួចមក គណ:កម្មការបានឯកភាពទទួលយកការអនុវត្តការងារ តាមការស្នើសុំរបស់ភាគីទទួលការ ។

ខេត្តត្បូងឃ្មុំ កំពង់ឆ្នាំង និងខេត្តកណ្តាល ៖ នាព្រឹកថ្ងៃពុធ ១១កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែធ្នូ ឆ្នាំ ២០២៤ ឯកឧត្តមបណ្ឌិត សៅ ជីវ័ន្ត រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួង រួមមាន ក្រុមការងារបច្ចេកទេសនៃនាយកដ្ឋានផ្លូវលំជនបទ ក្រុមការងារ គ.ត.វ និងតំណាងក្រសួងសេដ្ឋកិច្ចនិងហិរញ្ញវត្ថុ ដោយមានការចូលរួមពីមន្រ្តីបច្ចេកទេសនៃមន្ទីរអភិវឌ្ឍន៍ជនបទខេត្តត្បូងឃ្មុំ ខេត្តកំពង់ឆ្នាំង និងខេត្តកណ្តាល ចុះត្រួតពិនិត្យនិងវាយតម្លៃលើការងារស្ថាបនា និងស្តារឡើងវិញផ្លូវ ចំនួន៣គម្រោង អនុវត្តដោយនាយកដ្ឋានវិស្វកម្ម ក្រសួងការពារជាតិ រួមមានដូចខាងក្រោម ៖

 

– គម្រោងទី១ ៖ ការងារស្តារឡើងវិញផ្លូវក្រាលបេតុងចំនួន១ខ្សែ ប្រវែង ២ ០៤០ម៉ែត្រ និងសំណង់សិល្បការ្យមួយចំនួន ស្ថិតនៅភូមិខ្សាច់ប្រឆេះលើ ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ។

– គម្រោងទី២ ៖ ការងារជួសជុលផ្លូវក្រាលកៅស៊ូ DBST ចំនួន១ខ្សែ មាន ៣កំណាត់ ប្រវែងសរុប ១ ០០០ម៉ែត្រ និងសំណង់សិល្បការ្យមួយចំនួន ស្ថិតនៅភូមិរ៉ា ឃុំត្បែងខ្ពស់ និងភូមិក្រាំងស្រម៉ ឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង។

– គម្រោងទី៣ ៖ ការងារស្ថាបនាផ្លូវក្រាលបេតុងចំនួន ១ខ្សែមានប្រវែង ១ ៥០០ម៉ែត្រ និងសំណង់សិល្បការ្យមួយចំនួន ស្ថិតនៅភូមិអន្លុងព្រីង ទៅភូមិទែន ឃុំដើមឬស ស្រុកកណ្តាលស្ទឹង ខេត្តកណ្តាល។

 

នៅក្នុងឱកាសនោះដែរ ឯកឧត្តមបណ្ឌិតរដ្ឋលេខាធិការ ក៏បានជួបសំណេះសំណាលជាមួយបងប្អូនប្រជាពលរដ្ឋដែលរស់នៅតាមបណ្តោយផ្លូវទាំងនេះដោយបានពាំនាំនូវការផ្តាំផ្ញើសួរសុខទុក្ខពីឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ជូនចំពោះលោកតា លោកយាយ ពូមីង បងប្អូននៅទីនោះនិងបានផ្តាំផ្ញើដល់អាជ្ញាធរមូលដ្ឋាន និងប្រជាពលរដ្ឋទាំងអស់ឱ្យចូលរួមថែទាំសមិទ្ធផលផ្លូវ និងសំណង់សិល្បការ្យ នៅក្នុងមូលដ្ឋានកុំឱ្យមានរថយន្តដឹកទំនិញលើសចំណុះធ្វើចរាចរណ៍លើផ្លូវ ដើម្បីរក្សាគុណភាពផ្លូវនិងលូឱ្យប្រើប្រាស់បានគង់វង្សយូរអង្វែង។ ជាមួយគ្នានេះ ឯកឧត្តមបណ្ឌិតរដ្ឋលេខាធិការ បាននាំយកអំណោយដ៏ថ្លៃថ្លារបស់ឯកឧត្តមរដ្ឋមន្រ្តី ជូនប្រជាពលរដ្ឋដោយម្នាក់ៗទទួលបានក្រម៉ាមួយផងដែរ។

 

បន្ទាប់មកគណៈកម្មការអន្តរក្រសួងបានប្រជុំពិភាក្សាជាមួយអ្នកទទួលការនិងអ្នកបច្ចេកទេសដោយបានឯកភាពទទួលយកលទ្ធផលការងារ ១០០% ចំពោះគម្រោងទី១ និងទទួលយកការបញ្ចប់សុពលភាពចំពោះគម្រោងទី២ និងគម្រោងទី៣ តាមការស្នើសុំរបស់អ្នកទទួលការ៕

ខេត្តសៀមរាប ៖ នាព្រឹកថ្ងៃពុធ ១១កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែធ្នូ ឆ្នាំ ២០២៤ លោក ឃួច លីននី អគ្គនាយករង នៃអគ្គនាយកដ្ឋានបច្ចេកទេស បានអញ្ជើញជាអធិបតីក្នុងពិធីសម្ភោធស្ថានីយទឹកផឹកសុវត្ថិភាព (S4) និងមានលក្ខណៈវិមជ្ឈការនៅក្នុងប្រទេសកម្ពុជា ដែលមានទីតាំងស្ថិតនៅសាលាបឋមសិក្សាដូនឪ ភូមិដូនឪ ឃុំលាងដៃ ស្រុកអង្គរធំ ខេត្តសៀមរាប។ កម្មវិធីនេះរៀបចំដោយអង្គការទឹកស្អាត ១០០១ ដោយសហការ និងបានការគាំទ្រថវិកាពីមូលនិធិ កូកា-កូឡា ដោយមានការអញ្ជើញចូលរួមពីសំណាក់លោក ស្រ៊ិន ពុទ្ធី ប្រធាននាយកដ្ឋានផ្គត់ផ្គង់ទឹកជនបទ និងតំណាងពាក់ព័ន្ធ សរុបប្រមាសណ ២០០នាក់ (ស្រី ៨៥ នាក់)៕

រាជធានីភ្នំពេញ ៖ នាព្រឹកថ្ងៃពុធ ១១កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែធ្នូ ឆ្នាំ២០២៤ លោក អឿន ធារិទ្ធ ប្រធាននាយកដ្ឋានអភិវឌ្ឍន៍សហគមន៍ និងលោក ហ៊ុន ប៊ុនរ៉ា នាយកមជ្ឈមណ្ឌលអភិវឌ្ឍន៍ជនបទកម្ពុជា-កូរ៉េ និងក្រុមការងារនាយកដ្ឋានអភិវឌ្ឍន៍សហគមន៍ បានជួបប្រជុំជាមួយលោក ស៊ីន យ៉ុងហ្វា នាយករងទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងតំណាងអង្គការ Goodneighbors ដែលត្រូវបានជ្រើសរើសសម្រាប់ទទួលអនុវត្តផ្នែកពង្រឹងសមត្ថភាពមជ្ឈមណ្ឌលអភិវឌ្ឍន៍ជនបទ កម្ពុជា-កូរ៉េ នៃគម្រោង “ការគាំទ្រមជ្ឈមណ្ឌលអភិវឌ្ឍន៍ជនបទ កម្ពុជា-កូរ៉េ ក្រោយបញ្ចប់គម្រោង” រយៈពេល ១ឆ្នាំ ២០២៥-២០២៦)។

 

ក្នុងជំនួបលើកដំបូងនេះភាគី  KOICA បានណែនាំក្រុមទីប្រឹក្សា របស់អង្គការ Good nieghbors និងបានបង្ហាញសេចក្ដីព្រាងផែនការសកម្មភាពដែលនឹងត្រូវអនុវត្តរួមមាន ការបណ្ដុះបណ្ដាលពង្រឹងសមត្ថភាពមន្ត្រីមជ្ឈមណ្ឌលឱ្យក្លាយជាគ្រូបង្គោល និងការបណ្ដុះបណ្ដាលមន្រ្តីមន្ទីរអភិវឌ្ឍន៍ជនបទរាជធានី ខេត្ត ឱ្យក្លាយជាគ្រូបង្គោលទាក់ទងនឹងការងារអភិវឌ្ឍន៍ជនបទ៕