ខេត្តរតនគិរី៖ នាព្រឹកថ្ងៃព្រហស្បតិ៍ ៨រោច ខែ ពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣០ខែឧសភា ឆ្នាំ២០២៤ លោក អៀម អឿន ប្រធានមន្ទីរអភិវឌ្ឍន៍ជនបទ ខេត្តរតនគិរី នឹងថ្នាក់ដឹកនាំព្រមទាំងមន្រ្តីរាជការរបស់មន្ទីរ បានចូលរួមក្នុងពិធីអបអរសាទរប្រកាសទទួលស្គាល់ ស្រុកវើនសៃ ខេត្តរតនគិរី ដែលបានបញ្ចប់ការបន្ទោបង់ពាសវាលពាសកាល (ODF)។

កម្មវិធីនេះប្រព្រឹត្តទៅក្រោមអធិបតីភាព ឯកឧត្តម ងួន គឿន សមាជិកក្រុមប្រឹក្សាខេត្តតំណាងដ៏ខ្ពង់ខ្ពស់ ឯកឧត្ដម ណាប់ ប៊ុនហេង ប្រធានក្រុមប្រឹក្សាខេត្ត ឯកឧត្តម ជា ថាវរិទ្ឋិ អភិបាលរងខេត្តជាប្រធាន (PWG) តំណាងដ៏ខ្ពង់ខ្ពស់ ឯកឧត្តម ញ៉ែម សំអឿន អភិបាលនៃគណអភិបាលខេត្តរតនគិរី និងលោក វេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាព របស់ក្រសួងអភិវឌ្ឍន៍ជនបទ ដោយមានការចូលរួមពីឯកឧត្តម លោកលោកស្រី ថ្នាក់ដឹកនាំខេត្ត លោក លោកស្រីប្រធាន អនុប្រធានមន្ទីរអង្គភាពជុំវិញខេត្តកងកម្លាំងប្រដាប់អាវុធទាំងបីប្រភេទ លោកប្រធានក្រុមប្រឹក្សាស្រុក ឃុំ និង អភិបាលស្រុក អភិបាលរងស្រុក មន្រ្តីជំនាញការិយាល័យជុំវិញស្រុក លោកគ្រូអ្នកគ្រូ សិស្សកាយរិទ្ទ សិស្សកាកបាទក្រហម តំណាងប្រជាពលរដ្ឋក្នុងឃុំទាំង៩របស់ស្រុកវើនសៃ ចំនួន ២៣៥នាក់ ស្រ្តី ៥៥ នាក់។

ខេត្តកំពង់ស្ពឺ៖ នាពីថ្ងៃអង្គារ ៦រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៨ ខែឧសភា ឆ្នាំ២០២៤ លោក ទូច ប៉ អនុប្រធាននាយកដ្ឋានអភិវឌ្ឍន៍ជនជាតិភាគតិច នៃក្រសួងអភិវឌ្ឍន៍ជនបទ បានដឹកនាំមន្រ្ដីជំនាញចំនួន ២រូប ទៅចូលរួមកិច្ចប្រជុំផ្សព្វផ្សាយពី ដំណើរការកំណត់អត្តសញ្ញាណសហគមន៍ជនជាតិដើមភាគតិច សួយ នៅភូមិតំបងវេញ ឃុំសង្កែសាទប ស្រុកឳរ៉ាល់ ខេត្តកំពង់ស្ពឺ ។

នៅក្នុងកិច្ចប្រជុំនេះដែរ មន្រ្ដីជំនាញក៏បានពិភាក្សាគ្នាជាមួយអាជ្ញាធរមូលដ្ឋានមាន ថ្នាក់ស្រុក ថ្នាក់ឃុំ និងថ្នាក់ភូមិ រួមជាមួយជនជាតិដើមភាគតិចក្នុងសហគមន៍ ដើម្បីធ្វើការជ្រើសរើសគណៈកម្មាធិការសហគមន៍ ដែលកិច្ចពិក្សានេះមានការចូលរួមពីជនជាតិដើមភាគតិចប្រមាណ ៦៦គ្រួសារ ។

កិច្ចប្រជុំនេះទទួលបានដូចខាងក្រោម ៖

១- អាជ្ញាធរមូលដ្ឋានថ្នាក់ស្រុក ថ្នាក់ឃុំ និងថ្នាក់ភូមិ និងជនជាតិដើមភាគតិច សួយទាំងអស់បានយល់ច្បាស់អំពីដំណើរការនៃការកំណត់អត្តសញ្ញាណ និងអត្ថប្រយោជន៍របស់សហគមន៍ ក្រោយពេលត្រូវបានទទួលស្គាល់អត្តសញ្ញាណដោយក្រសួងអភិវឌ្ឍន៍ជនបទ។
២- ជនជាតិដើមភាគតិច មានឆន្ទៈចូលរួមសហការគ្រប់ជំហាន ដើម្បីឈានទៅការទទួលស្គាល់អត្តសញ្ញាណដោយជោគជ័យ
៣- ជនជាតិដើមភាគតិច បានចូលរួមបោះឆ្នោតជ្រើសតាំងគណៈគម្មាធិការសហគមន៍ប្រកបដោយតម្លាភាព និងជោគជ័យ
៤- ប្រធានគណៈកម្មាធិការសហគមន៍ និងសមាជិកទាំងអស់បានធ្វើការប្តេជ្ញាថា នឹងខិតខំថែរក្សា វប្បធម៌ ទំនៀមទម្លាប់ ប្រពៃណី ភាសា របស់សហគមន៍ជនជាតិដើមភាគតិច សួយ ដែលដូនតារបស់ពួកគាត់បានបន្សល់ទុក ឱ្យបានគង់វង្ស សម្រាប់កូនចៅជនជាតិដើមភាគតិច សួយ ជំនាន់ក្រោយ ជាពិសេសជួយលើកស្ទួយកម្រិតជីវភាពរបស់ជនជាតិដើមភាគតិច សួយ ឱ្យកាន់តែល្អប្រសើឡើង៕

ខេត្តស្វាយរៀង ៖ នាថ្ងៃពុធ ៧រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៩ ខែឧសភា ឆ្នាំ២០២៤ លោក សំ នីតូ ប្រធានមន្ទីរអភិវឌ្ឍន៍ជនបទខេត្តស្វាយរៀង បានចូលរួមក្នុងកិច្ចប្រជុំបូកសរុបលទ្ធផលការងារប្រចាំខែឧសភា និងលើកទិសដៅការងារខែមិថុនា ឆ្នាំ២០២៤ របស់រដ្ឋបាលខេត្តស្វាយរៀង ក្រោមអធិបតីភាព ឯកឧត្តម ប៉េង ពោធិ៍សា អភិបាល នៃគណៈអភិបាលខេត្តស្វាយរៀង។

កិច្ចប្រជុំនេះមានការចូលរួមពីសំណាក់  ឯកឧត្ដមអភិបាល នៃគណៈអភិបាលរងខេត្ត ឯកឧត្តមប្រធានសាលាដំបូងខេត្ត ឯកឧត្តមព្រះរាជអាជ្ញាអមសាលាដំបូងខេត្ត លោកនាយករដ្ឋបាលសាលាខេត្ត លោកស្នងការនគរបាលខេត្ត លោកមេបញ្ជាការកងរាជអាវុធហត្ថខេត្ត លោកមេបញ្ជាការរងតំបន់ប្រតិបត្តិការសឹករងខេត្ត លោកប្រធានស្នាក់ការស៊ីបការណ៍ខេត្ត លោកប្រធានទីស្នាក់ការត្រួតពិនិត្យច្រកទ្វាអន្តរជាតិបាវិត និងព្រៃវល្លិ៍ លោកមេធាវីប្រចាំរដ្ឋបាលខេត្ត លោក លោកស្រី ប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង/ស្រុកទាំង៨ លោក លោកស្រី នាយកទីចាត់ការ/ប្រធានអង្គភាពចំណុះសាលាខេត្ត។

នៅថ្ងៃដដែលនោះដែរ នៅឃុំស្វាយធំ ស្រុកស្វាយជ្រំ  ខេត្តស្វាយរៀង ដោយមានការឧបត្ថម្ភ និងគាំទ្រពីអង្គការជីវិតថ្លៃថ្នូរ មន្ត្រីការិយាល័យថែទាំសុខភាពជនបទ នៃមន្ទីរអភិវឌ្ឍន៍ជនបទខេត្តស្វាយរៀង  បានចូលរួមសម្របសម្រួលក្នុងវគ្គបណ្ដុះបណ្ដាលស្ដីពី “សារៈសំខាន់នៃការទម្លាប់អនាម័យល្អ” ក្នុងគោលបំណងដើម្បីលើកកម្ពស់ការយល់ដឹងដល់ ស្រ្តីថែទាំកុមារនៅផ្ទះ នូវការទម្លាប់អនាម័យល្អប្រចាំថ្ងៃ តាមរយៈការប្រើប្រាស់បង្គន់អនាម័យ ការលាងសម្អាតដៃជាមួយសាប៊ូ ការទទួលទានទឹក និងទុកដាក់ទឹកប្រកបដោយសុវត្ថិភាព ព្រមទាំងការសំអាតបរិស្ថានជុំវិញផ្ទះ  ដែលមានអ្នកចូលរួមសរុប ៣៨នាក់ ស្រី៣៥នាក់ ៕

ខេត្តកំពត៖  ថ្ងៃពុធ ៧រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៩ ខែឧសភា ឆ្នាំ២០២៤ មន្ត្រី​ការិយាល័យផ្គត់ផ្តង់ទឹក នៃមន្ទីរ​អភិវឌ្ឍ​ន៍ជនបទខេត្តកំពត បានចុះពិនិត្យការដំឡើងអាងចម្រោះជាតិ​ដែកទឹកពី អណ្តូងស្នប់ នៅភូមិល្វេ​ ឃុំ​ ករាំង​ស្នាយ​ ស្រុក​ឈូក​ ខេត្តកំពត៕

ខេត្តប៉ៃលិន៖ នាព្រឹកថ្ងៃពុធ ៧រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៩ ខែឧសភា ឆ្នាំ២០២៣ ក្រុមការងារសម្របសម្រួលគម្រោង “កសាងភូមិសន្តិភាព តាមរយៈការអភិវឌ្ឍសហគមន៍ជនបទចម្រុះ” របស់មន្ទីរអភិវឌ្ឍន៍ជនបទខេត្តប៉ៃលិន ដោយមានការសម្របសម្រួលពី មន្ទីរកសិកម្ម រុក្ខាប្រមាញ់ និងនេសាទ បានបើកវគ្គការបណ្ដុះបណ្ដាលស្តីពី ការធ្វើថ្នាំពុលសម្លាប់សត្វល្អិតពីធមម្មជាតិ ។

វគ្គបណ្ដុះបណ្ដាលនេះ ធ្វើនៅភូមិភ្នំព្រាល ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដែលមានសិក្ខាកាមចូលរួមចំនួន ២០នាក់។

បន្ទាប់ពីបញ្ចប់វគ្គបណ្ដុះបណ្ដាលនេះ សិក្ខាកាមទាំងអស់អាចធ្វើថ្នាំពុលតាមបែបធម្មជាតិដោយខ្លួនឯង និងមិនចាំបាច់ទិញថ្នាំពុលគីមីពីទីផ្សារទេ ព្រមទាំងកាត់បន្ថយការចំណាយថវិកាផងដែរ៕