រាជធានីភ្នំពេញ៖ នាព្រឹកថ្ងៃទី៤ ខែមិថុនា ឆ្នាំ២០២៤  ឯកឧត្តម គុយ ឆាយ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយលោកស្រី ប៊ុត វីរីយ៉ា អនុប្រធាននាយកដ្ឋាន និងលោក អ៊ុក ឆៃយ៉ា ប្រធានការិយាល័យ នៃនាយកដ្ឋានអភិវឌ្ឍន៍សហគមន៍ បានអញ្ជើញចូលរួមប្រជុំអនឡាញ  (MS Teams)  ដើម្បីពង្រឹងការសម្របសម្រួល និងការកសាងសមត្ថភាពការប្រើប្រាស់បច្ចេកវិទ្យាឌីជីថល ចែករំលែកបទពិសោធន៍ និងមេរៀនក្នុងការអនុវត្ត តួនាទី ភារកិច្ច របស់ក្រុមការងារដឹកនាំសម្របសម្រួលវិស័យសន្ដិសុខស្បៀង និងអាហារូបត្ថម្ភ រាជធានី-ខេត្ត ហៅកាត់ ក.ដ.ស.ស.អ. ចែករំលែក បញ្ហាប្រឈម និងស្វែងរកដំណោះស្រាយរួមគ្នា ក្រោមអធិបតីភាពដ៏ខ្ពង់ខ្ពស់ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ដោយមានសមាសភាពចូលរួមពីសំណាក់ថ្នាក់ដឹកនាំនៃ ក.ដ.ស.ស.អ. ថ្នាក់ដឹកនាំអគ្គលេខាធិការដ្ឋាននៃ ក.ដ.ស.ស.អ. បណ្តាអង្គការដៃគូអភិវឌ្ឍន៍ដែលគាំទ្រកិច្ចដំណើរការ ក.ដ.ស.ស.អ. រាជធានី ខេត្តមួយចំនួន បណ្តាក្រសួង ស្ថាប័នពាក់ព័ន្ធ និងអង្គការដៃគូអភិវឌ្ឍ ព្រមទាំងថ្នាក់ដឹកនាំ សមាជិក សមាជិកា ក.ដ.ស.ស.អ. ទាំង ២៥ រាជធានី-ខេត្ត សរុបចំនួន ១៧៤នាក់។

គោលបំណងនៃកិច្ចប្រជុំ គឺដើម្បី៖

១- ពង្រឹងតួនាទី ភារកិច្ចរបស់ ក.ដ.ស.ស.អ. ក្នុងការសម្របសម្រួលអន្តរវិស័យនៅថ្នាក់ក្រោមជាតិ ក្នុងការអនុវត្តយុទ្ធសាស្ត្រជាតិ ស្តីពីសន្តិសុខស្បៀង និងអាហារូបត្ថម្ភ លើកទី៣ ២០២៤-២០២៨។

២- ចែករំលែកបទពិសោធន៍ និងមេរៀនក្នុងការអនុវត្តតួនាទី ភារកិច្ចរបស់ ក.ដ.ស.ស.អ. ពីខេត្តមួយ ទៅខេត្តនានា និងគម្រោងនានាលើការលើកកម្ពស់សន្តិសុខស្បៀង និងអាហារូបត្ថម្ភ។

៣- ចែករំលែកបញ្ហាប្រឈម និងស្វែងរកដំណោះស្រាយរួមគ្នានៃការអនុវត្តតួនាទី ភារកិច្ចរបស់ ក.ដ.ស.ស.អ. និងការអនុវត្តយុត្តិសាស្ត្រជាតិ ស្តីពីសន្តិសុខស្បៀង និងអាហារូបត្ថម្ភ លើកទី៣ ២០២៤-២០២៨។

ជាកិច្ចចាប់ផ្តើម ឯកឧត្តមបណ្ឌិតសភាចារ្យ បានអញ្ជើញបើកកិច្ចប្រជុំ និងការធ្វើបទបង្ហាញរបស់លោកវេជ្ជបណ្ឌិត ប៉ូល ច័ន្ទរិទ្ធី ទីប្រឹក្សាបច្ចេកទេសគម្រោង GIZ-MUSEFO ស្តីពីលទ្ធផលការស្រាវជ្រាវគម្លាតនៃការអនុវត្តនីតិវិធីប្រតិបត្តិស្តង់ដារសម្រាប់កិច្ចដំណើរការ ក.ដ.ស.ស.អ. នៅខេត្តកំពត និងខេត្តកំពង់ធំ ព្រមទាំងបទបង្ហាញ បទពិសោធន៍កិច្ចដំណើរការរបស់ ក.ដ.ស.ស.អ. ខេត្តរតនគិរី លើបញ្ហាប្រឈម ដំណោះស្រាយ មេរៀនបទពិសោធន៍ និងសំណូមពរពីសំណាក់លោកប្រធាន ក.ដ.ស.ស.អ. ខេត្តរតនគិរី ។

ជាកិច្ចបញ្ចប់ ឯកឧត្តមបណ្ឌិតសភាចារ្យ បានដឹកនាំកិច្ចពិភាក្សា និងបូកសរុបលទ្ធផលនៃកិច្ចប្រជុំ និងបានប្រកាសបិទអង្គប្រជុំ៕

រាជធានីភ្នំពេញ ៖ នាព្រឹកថ្ងៃអង្គារ៍ ១៣រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី ០៤ ខែមិថុនា ឆ្នាំ២០២៤ នៅក្រសួងការងារ និងបណ្តុះបណ្តាលវិជ្ជាជីវៈ លោកជំទាវ ឡាយ វីរៈបុត្រ អនុរដ្ឋលេខាធិការ បានអញ្ជើញចូលរួមក្នុងពិធីគម្រប់ខួបលើកទី ៧៥ ទិវាកុមារអន្តរជាតិ ១មិថុនា ខួបលើកទី ២៣ ទិវាពិភពលោកប្រឆាំងពលកម្មកុមារ ១២ មិថុនា និងទិវាកុមារកម្ពុជាឆ្នាំ ២០២៤ ក្រោមអធិបតីភាពដ៏ខ្ពង់ខ្ពស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មាធិការជាតិប្រឆាំងពលកម្មកុមារ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ក្រសួងស្ថាប័នពាក់ពន័្ធ តំណាងរាជធានី ខេត្ត តំណាងអង្គការជាតិ អន្តរជាតិ តំណាងនិយោជក សហជីព មាតា បិតាសិស្ស និងកុមារា កុមារី ដែលមានចំនួនសរុបទាំងអស់ ២៨៩នាក់ ក្រោមប្រធានបទ “រួមគ្នាអនុវត្តការប្តេជ្ញាចិត្ត ដើម្បីបញ្ចប់ទម្រង់ធ្ងន់ធ្ងរនៃពលកម្មកុមារ”៕

ខេត្តក្រចេះ និងខេត្តស្ទឹងត្រែង ៖ នាថ្ងៃចន្ទ ១២រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣ ខែមិថុនា ឆ្នាំ២០២៤ ឯកឧត្តម ទ្រី មេង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដើម្បីត្រួតពិនិត្យ និងវាយតម្លៃបញ្ចប់សុពលភាពលើលទ្ធផលការងារថែទាំខួបចំនួន២ខ្សែ អនុវត្តដោយមន្ទីរអភិវឌ្ឍន៍ជនបទខេត្តក្រចេះ និងខេត្តស្ទឹងត្រែង រួមមានដូចខាងក្រោម ៖

ខ្សែផ្លូវទី១ ៖ ផ្លូវដោយក្រាលក្រួសក្រហមចំនួន ០១ខ្សែ ប្រវែង ១២ ០០០ម ទទឹងខ្នងលើ ៥ម ស្ថិតនៅក្នុងឃុំកំពង់ចាម និងឃុំបឹងចារ ស្រុកសំបូរ ខេត្តក្រចេះ។

ខ្សែផ្លូវទី២ ៖ ផ្លូវក្រាលក្រួសអាចម៍ផ្កាយចំនួន ០១ខ្សែ (ផ្លូវជាតិលេខ៧-ត្បូងខ្លា) ប្រវែង ៨ ៦០០ម ទទឹងខ្នងលើ ៦ម សាងសង់លូមូលមុខមួយ មុខកាត់ ១ម ប្រវែង ៨ម ចំនួន ១កន្លែង និងលូប្រអប់មុខពីរទំហំ (២ x ៣ម x ២,៥ម x ៨ម) ចំនួន ១កន្លែង ស្ថិតនៅឃុំអូរម្រះ ស្រុកសៀមរាប ខេត្តស្ទឹងត្រែង។

បន្ទាប់ពីបានត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណៈកម្មការអន្តរក្រសួងរួចមក គណៈកម្មាធិការបានឯកភាព និងទទួលយកការអនុវត្តការងារបញ្ចប់រយៈពេលធានាសុពលភាព តាមការស្នើសុំរបស់អ្នកទទួលការ។ ទន្ទឹមនឹងនេះ គណៈកម្មាធិការអន្តរក្រសួងបានណែនាំដល់អ្នកទទួលការ និងបងប្អូនប្រជាពលរដ្ឋ ឱ្យជួយថែទាំផ្លូវនេះឱ្យបានដិតដល់ ដើម្បីធានាថាផ្លូវនេះអាចប្រើប្រាស់បានយូរអង្វែង បម្រើផលប្រយោជន៍ជូនប្រជាពលរដ្ឋ៕