រាជធានីភ្នំពេញ ៖ នាព្រឹកថ្ងៃពុធ ២រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២១ ខែសីហា ឆ្នាំ២០២៤ នៅសាលប្រជុំក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ឯកឧត្តម យឹម ជុង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញចូលរួមកិច្ចប្រជុំលើកទី៤ នៃក្រុមប្រឹក្សាជាតិវិទ្យាសាស្រ្ត បច្ចេកវិទ្យា និងនវានុវត្តន៍ ក្រោមអធិបតីភាពដ៏ខ្ពង់ខ្ពស់ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងជាប្រធាននៃក្រុមប្រឹក្សាជាតិវិទ្យាសាស្រ្ត បច្ចេកវិទ្យា និងនវានុវត្តន៍ ដោយមានការអញ្ជើញចូលរួមពីតំណាងក្រសួង ស្ថាប័ន ពាក់ព័ន្ធចូលរួម ចំនួន ៤០នាក់។

 

កិច្ចប្រជុំនេះមានគោលបំណង ដើម្បីពិនិត្យ ពិភាក្សា កំណត់ទិសដៅការងារ និងអនុម័តលើឯកសារ ព្រមទាំងគំនិតផ្តួចផ្តើមនានា ក្នុងគោលបំណងគាំទ្រ និងជំរុញការអនុវត្តការងារក្នុងវិស័យវិទ្យាសាស្រ្ត បច្ចេកវិទ្យា និងនវានុវត្តន៍៕

រាជធានីភ្នំពេញ៖ នាថ្ងៃពុធ ២រោច ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២១ ខែសីហា ឆ្នាំ២០២៤ នៅសណ្ឋាគារ សូហ្វីតែល ភ្នំពេញភូគីត្រា ឯកឧត្តម គុយ ឆាយ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញចូលរួមទិវាសុវត្ថិភាពម្ហូបអាហារពិភពលោក នៅកម្ពុជា ក្រោមប្រធានបទ “ការត្រៀមបង្ការហានិភ័យដែលធ្វើឲ្យម្ហូបអាហារគ្មានសុវត្ថិភាព” ក្រោមអធិបតីភាពដ៏ខ្ពង់ខ្ពស់  ឯកឧត្តមបណ្ឌិតសភាចារ្យ  អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្ដារ អភិវឌ្ឍន៍វិស័យកសិកម្ម និងជនបទ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ រដ្ឋលេខាធិការ  អនុរដ្ឋលេខាធិការ តំណាងក្រសួងស្ថាប័នពាក់ព័ន្ធ លោក លោកស្រី តំណាងអង្គការ FAO, WHO, USAID, World Vision  និងមន្ត្រីជំនាញអង្គការជាតិ និងអន្ដរជាតិ ព្រមទាំងសិស្ស និស្សិតមួយ សរុបប្រមាណ ១២៥រូប ។

 

គោលបំណងនៃទិវានេះដើម្បី ៖

– បង្កើនការយល់ដឹងអំពីសុវត្ថិភាពម្ហូបអាហារ និងការត្រៀមខ្លួនជាមុនចំពោះហេតុការណាមួយ ដែលអាចកើតមានឡើងទាក់ទងនឹងសុវត្ថិភាពដល់សាធារណៈជន ដើម្បីពួកគេអាចដឹងពីព័ត៌មានទាំងអស់នេះ

– ជួយបង្កើនសម្លេងរបស់យុវជនស្ដីពីសុវត្ថិភាពម្ហូបអាហារឱ្យកាន់តែទូលំទូលាយ

– លើកកម្ពស់សកម្មភាពបែបច្នៃប្រឌិត និងប្រកបដោយនវានុវត្តន៍ ដើម្បីដោះស្រាយទល់នឹងបញ្ហាប្រឈមនានាពាក់ព័ន្ធសុវត្ថិភាពម្ហូបអារហារ។

 

លទ្ធផលរំពឹងទុកនៃការប្រាព្ធទិវានេះ គឺសារៈសំខាន់ៗស្ដីពីសុវត្ថិភាពម្ហូបអារហារត្រូវបានផ្សព្វផ្សាយយ៉ាងទូលំទូលាយដល់សាធារណៈជន។ លើកកម្ពស់ការចូលរួមពីសំណាក់ភាគីពាក់ព័ន្ធទៅលើសារៈសំខាន់នៃសុវត្ថិភាពម្ហូបអារហារ។ អនាគតអ្នកដឹកនាំរបស់យើងនឹងចូលរួមកាន់តែសកម្មក្នុងការអំពាវនាវ ក៏ដូចជាសកម្មភាពតស៊ូមតិនានាដើម្បីសុវត្ថិភាពម្ហូបអារហារ៕

រាជធានីភ្នំពេញ ៖ នារសៀលថ្ងៃអង្គារ ១រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងទី២០ ខែសីហា ឆ្នាំ២០២៤ នៅទីស្ដីការក្រសួង ឯកឧត្តមបណ្ឌិត ជ្រុន ថេរ៉ាវ៉ាត រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែសីហា និងលើកទិសដៅការងារអនុវត្តបន្ត របស់គណៈកម្មការត្រួតពិនិត្យ និងវាយតម្លៃគុណភាពការងារសាងសង់ ស្ដារឡើងវិញ កែលម្អ ជួសជុល ថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ.) ដោយមានការចូលរួមពីឯកឧត្តមអនុប្រធាន និងសមាជិក សមាជិកា លេខាធិការដ្ឋាន គ.ត.វ. និងលោក លោកស្រីប្រធាន/អនុប្រធានមន្ទីរពិសោធន៍ សរុបចំនួន ៤៣រូប (ស្រ្តី ០៣ រូប)។

 

ជាដំបូង លេខាធិការដ្ឋាន គ.ត.វ. បានរាយការណ៍សង្ខេបអំពីវឌ្ឍនភាពការងារដែលបានអនុវត្ត និងបានធ្វើការបង្ហាញលម្អិតពីបរិបទ និងនីតិវិធីនៃដំណើរការត្រួតពិនិត្យគម្រោងតាមដំណាក់កាលទាំងគម្រោងដែលប្រើប្រាស់ថវិកាជាតិជំពូក២១ និងជំពូក៦១ ដើម្បីឱ្យការអនុវត្តការងារកាន់តែទទួលបានប្រសិទ្ធភាពខ្ពស់។

 

ជាលទ្ធផលអង្គប្រជុំ បានឯកភាពលើខ្លឹមសាររបាយការណ៍ដែលបានពិភាក្សាគ្នា និងដើម្បីជាមូលដ្ឋានក្នុងការអនុវត្តការងារបន្ត បានសម្រេចដូចខាងក្រោម ៖

 

១.  បង្កើនការយកចិត្តទុកដាក់លើការចុះត្រួតពិនិត្យឱ្យត្រូវតាមស្ដង់ដារបច្ចេកទេស ដោយយកគុណភាពនៃការងារស្ថាបនាហេដ្ឋារចនាសម្ព័ន្ធជនបទ និងសំណង់សិល្បការ្យ ជាស្នូលធានាឱ្យការប្រើប្រាស់បានយូរអង្វែង និងមានភាពធន់នឹងការប្រែប្រួលអាកាសធាតុ។

២.  ពេលចុះត្រួតពិនិត្យគុណភាព ក្រុមនីមួយៗ ត្រូវមានសម្ភារៈ និងឧបករណ៏គ្រប់គ្រាន់ ដោយយកពីមន្ទីរពិសោធន៍

៣.  គ.ត.វ. ត្រូវបំពេញការងារប្រកបដោយការទទួលខុសត្រូវ ក្រមសីលធម៌ និងវិជ្ជាជីវ:  ហើយរបាយការណ៍ត្រូវតែច្បាស់លាស់

៤. ស្នើសុំក្រុមនីមួយៗ ត្រូវផ្តល់របាយការណ៍មកលេខាធិការដ្ឋានយ៉ាងយូរ ២ថ្ងៃ និងរបាយការណ៍កែតម្រូវបច្ចេកទេសពីអ្នកទទួលការក្នុងរយៈពេលយ៉ាងយូរ ៧ ថ្ងៃ៕

រាជធានីភ្នំពេញ៖ នារសៀលថ្ងៃអង្គារ  ១រោច ខែស្រាពណ៍  ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២០ ខែសីហា ឆ្នាំ២០២៤ នៅទីស្ដីការក្រសួង នាយកដ្ឋានផែនការ និងទំនាក់ទំនងសាធារណៈ បានរៀបចំកិច្ចប្រជុំត្រួតពិនិត្យលទ្ធផលការងារប្រចាំខែសីហា និងលើកទិសដៅការងារខែកញ្ញា ឆ្នាំ២០២៤ របស់កម្មវិធីទី៤  ក្រោមអធិបតីភាព ឯកឧត្ដម ផូ ផារិទ្ធ រដ្ឋលេខាធិការ និងជាប្រធានសម្របសម្រួលកម្មវិធីទី៤ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ។

 

កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្ដម លោកជំទាវ រដ្ឋលេខាធិការ អនុរដ្ឋលេខាធិការ អគ្គាធិការស្ដីទី ឯកឧត្តម អគ្គនាយករដ្ឋបាល និងហិរញ្ញវត្ថុ ឯកឧត្ដម លោក លោកស្រីទីប្រឹក្សាអមក្រសួង ប្រធាននាយកដ្ឋាន អនុប្រធាននាយកដ្ឋាន​  និងលោក លោកស្រី ជាមន្ត្រីជំនាញពាក់ព័ន្ធ​ ចំនួន​ ៣៣រូប ស្រី៧រូប។

 

កិច្ចប្រជុំនេះមានគោលបំណង ដើម្បីត្រួតពិនិត្យនូវរបាយការណ៍វឌ្ឍនភាពប្រចាំខែសីហា ដែលបានអនុវត្តកន្លងមក និងត្រៀមអនុវត្តក្នុងខែកញ្ញា បន្តទៀត ព្រមទាំងលើកយកបញ្ហាផ្សេងៗ មកពិភាក្សាដើម្បីស្វែងរកដំណោះស្រាយ។

 

ជាកិច្ចចាប់ផ្ដើម ឯកឧត្តមរដ្ឋលេខាធិការ បានមានមតិស្វាគមន៍នៃកិច្ចប្រជុំ និងបានអនុញ្ញាតឱ្យលោកស្រីប្រធានការិយាល័យរដ្ឋបាល និងកិច្ចការទូទៅ នៃនាយកដ្ឋានផែនការ និងទំនាក់ទំនងសាធារណៈ ធ្វើសេចក្ដីរាយការណ៍ពីលទ្ធផលដែលបានអនុវត្តនៅខែសីហា ឆ្នាំ២០២៤ បន្ទាប់ពីបញ្ចប់សេចក្ដីរាយការណ៍ ឯកឧត្តមរដ្ឋលេខាធិការបានវាយតម្លៃខ្ពស់ និងកោតសរសើរទៅលើការខិតខំប្រឹងប្រែងរបស់នាយកដ្ឋានជំនាញទាំងបួនដែលស្ថិតនៅក្នុងកម្មវិធីទី ៤ ។

 

ជាទីបញ្ចប់ ឯកឧត្តមប្រធាន អង្គប្រជុំបានផ្ដល់ជាអនុសាសន៍ណែនាំឱ្យនាយកដ្ឋានជំនាញទាំង៤ បន្តខិតខំអនុវត្តការងារក៏ដូចជាសកម្មភាពរបស់ខ្លួនឲ្យសម្រេចបាន ១០០% ទៅតាមផែនការដែលបានគ្រោងទុក៕