ខេត្តព្រះសីហនុ ៖ នាព្រឹកថ្ងៃអង្គារ ១១រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០២ ខែកក្កដា ឆ្នាំ២០២៤ លោកជំទាវ គង់ សុធារី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ប្ញទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំប្រចាំឆមាសទី១ ឆ្នាំ២០២៤ របស់មន្ទីរអភិវឌ្ឍន៏ជនបទខេត្តព្រះសីហនុ ដោយមានការអញ្ជើញចូលរួមក្នុងកិច្ចប្រជុំនេះរួមមាន ឯកឧត្តម កែវ សិគុណ អនុរដ្ឋលេខាធិការ ក្រសួងអភិវឌ្ឍន៏ជនបទ លោក អី សុខឡេង អភិបាលរងខេត្តព្រះសីហនុ  និងជាប្រធាន PWG ខេត្ត និងថ្នាក់ដឹកនាំមន្ត្រីរាជការមន្ទីរអភិវឌ្ឍន៍ជនបទខេត្ត សរុបចំនួន ២១ នាក់។

ជាកិច្ចចាប់ផ្តើម លោក ប្រាក់ សុវណ្ណ ប្រធានមន្ទីរ អភិវឌ្ឍន៍ជនបទខេត្តព្រះសីហនុ បានសម្ដែងកិច្ចស្វាគមន៏ និងធ្វើរបាយការណ៍សង្ខេបពីសកម្មភាពការងារប្រចាំឆមាសទី ១ និងទិសដៅបន្តររបស់មន្ទីរអភិវឌ្ឍន៏ជនបទ ។

បន្ទាប់មកលោក អី សុខឡេង អភិបាលរងខេត្ត បាន ឯកភាពលើរបាយការណ៏ របស់លោកប្រធានមន្ទីរ និងគាំទ្រដល់មន្ទីរអភិវឌ្ឍន៍ជនបទបន្ថែមទៀតលើផែនការប្រចាំឆ្នាំ នឹងផែនការឆ្នាំបន្ទាប់។

ក្នុងឱកាសនោះលោកជំទាវ គង់ សុធារី បានពាំនាំប្រសាសន៍ផ្តាំផ្ញើ សាកសួរសុខទុក្ខ ប្រកបដោយក្ដីនឹករលឹក ពីសំណាក់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៏ជនបទ  ដែលកន្លងមក ឯកឧត្តមរដ្ឋមន្ត្រី តែងតែយកចិត្តទុកដាក់ពីសុខទុក្ខរបស់មន្ត្រីរាជការនៃមន្ទីរជានិច្ច។ ជាមួយគ្នានេះ លោកជំទាវ បានឯកភាព ទៅលើរបាយការណ៏វឌ្ឍនភាពរបស់មន្ទីរ ហើយក្នុងនោះផងដែរ លោកជំទាវ វាយតម្លៃខ្ពស់ចំពោះការរៀបចំសណ្ដាប់ធ្នាប់  ការរៀបចំការិយាល័យធ្វើការរបស់មន្រ្តីរាជការ មានបរិស្ថានជុំវិញល្អ មានបន្ទប់ទឹក មានអនាម័យល្អ មានកន្លែងសម្រាប់លាងសំអាតដៃជាដើម។

ទន្ទឹមនឹងនេះ លោកជំទាវ រដ្ឋលេខាធិការ បានសំណូមពរអោយមន្ត្រីរាជការទាំងអស់ចូលរួមសំអាត ថែរក្សាបរិវេណមន្ទីរ បន្ទប់ធ្វើការរៀងៗខ្លួនជាប្រចាំ និងបានផ្សព្វផ្សាយ ផែនការរបស់រាជរដ្ឋាភិបាល ក្នុងអាណត្តិទី ៧ បានបន្តអនុវត្តយុទ្ធសាស្ត្របញ្ចកោណដំណាក់កាលទី១ ផ្តោតលើវិស័យអាទិភាពគន្លឹះទាំង៥ រួមមាន ៖ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ដើម្បីជំរុញការអភិវឌ្ឍសេដ្ឋកិច្ច និងសង្គមកម្ពុជាឱ្យសម្រេចបានចក្ខុវិស័យ កម្ពុជាជាប្រទេសមានប្រាក់ចំណូលមធ្យមកម្រិតខ្ពស់នៅ ឆ្នាំ២០៣០ និងជាប្រទេសមានចំណូលខ្ពស់នៅ ឆ្នាំ២០៥០។

លោកជំទាវ បានបន្តថា ៖ ដើម្បីរួមចំណែកអនុវត្តតាមយុទ្ធសាស្ដ្រ និងចក្ខុវិស័យដ៏ប្រាកដនិយម របស់រាជរដ្ឋាភិបាល ក្រសួងអភិវឌ្ឍន៍ជនបទ បាននឹងកំពុងអនុវត្តយ៉ាងសកម្មនូវកម្មវិធីអាទិភាពសំខាន់ៗទាំង៤ គឺ៖

ទី១-ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រទាក់ក្រឡា ដែលជាបុរេលក្ខខណ្ឌ និងជាសរសៃឈាមសេដ្ឋកិច្ចដ៏សំខាន់

ទី២-ការកែលម្អលក្ខខណ្ឌនៃការរស់នៅ តាមរយៈការផ្តល់សេវាផ្គត់ផ្គង់ទឹកស្អាត និងការអនុវត្តអនាម័យផ្ទាល់ខ្លួនតាមក្បួនខ្នាតត្រឹមត្រូវ ចៀសផុតពីជំងឺឆ្លងផ្សេងៗ ហើយអាយុកាលសង្ឃឹមរស់ជាមធ្យមរបស់ប្រជាជន កាន់តែខ្ពស់ដែលជាក្តីប្រាថ្នារបស់មនុស្សគ្រប់រូប

ទី៣-ការធ្វើពិពិធកម្មសកម្មភាពសេដ្ឋកិច្ចជនបទ ដើម្បីលើកកម្ពស់ជីវភាពរស់នៅ និង

ទី៤-ការពង្រឹងស្ថាប័ន និងអភិបាលកិច្ច  ដើម្បីធានាប្រសិទ្ធភាព នៃការគ្រប់គ្រងរដ្ឋបាល និងថវិកាកម្មវិធី ក្នុងគោលបំណង  “លើកកម្ពស់គុណភាព និងគុណតម្លៃនៃជីវិតរស់នៅរបស់ប្រជាជននៅតំបន់ជនបទប្រកបដោយបរិយាបន្នទាំងផ្នែកសេដ្ឋកិច្ច សង្គមកិច្ច និងវប្បធម៌”។

តមក លោកជំទាវ រដ្ឋលេខាធិការ បានដឹកនាំក្រុមការងារ និងថ្នាក់ដឹកនាំមន្ទីរ ទៅសួសុខទុក្ខ លោក សូផាត ចន្ត្រាវុធ អនុប្រធានមន្ទីរ ដែលរងគ្រោះថ្នាក់ចរាចរណ៏របួសបាក់ឆ្អឹងជំនីខាងស្តាំ ដល់គេហដ្ខានផ្ទាល់ ហើយបានផ្តល់ជូនថវិកាមួយចំនួនផងដែរ ៕

ខេត្តកំពង់ឆ្នាំង ៖ នៅថ្ងៃអង្គារ៍ ១១រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២ ខែកក្កដា ឆ្នាំ២០២៤ ក្រុមការងារវិមជ្ឈការ និងវិសហមជ្ឈការ ក្រសួងអភិវឌ្ឍន៍ជនបទ ដឹកនាំដោយ ឯកឧត្តម ម៉ា សុវណ្ណា អនុរដ្ឋលេខាធិការ និងជាប្រធានលេខាធិការដ្ឋានវិមជ្ឈការ និងវិសហមជ្ឈការ តំណាងដ៏ខ្ពង់ខ្ពស់ឯកឧត្តម ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អមដំណើរ បេសកកម្មដោយ លោកជំទាវ ខៀវ មាលតី អគ្គនាយករងរដ្ឋបាលហិរញ្ញវត្ថុ កញ្ញា ខែក ឡូរ៉ែន លោក ងួន មង្គល អនុប្រធាននាយកដ្ឋានរដ្ឋបាល បុគ្គលិក សមាជិកក្រុមការងារ និងមន្រ្តីមន្ទីរអភិវឌ្ឍន៍ជនបទខេត្តកំពង់ឆ្នាំងចំនួន៣រូប គឺលោក ជួន សុភា ប្រធានការិយាល័យសុខភាពជនបទ លោក ឈុន សុផាត ប្រធានការិយាល័យផ្គត់ផ្គង់ទឹកជនបទ និងលោក លីវ នឿ អនុប្រធានការិយាល័យផ្លូវ លំជនបទ បានចុះទៅកាន់ស្រុកសាមគ្គីមានជ័យ ស្រុកកំពង់ត្រឡាច និងស្រុករលាប្អៀរ ខេត្តកំពង់ឆ្នាំង ដើម្បីសិក្សាស្វែងយល់ពីកិច្ចដំណើរការ ការងារវិមជ្ឈការលើមុខងារទាំង ៣ ដែលក្រសួងបានធ្វើប្រតិភូកម្មជូនរួមមាន៖

១.មុខងារជួសជុល ថែទាំផ្លូវជាលក្ខណៈប្រចាំ

២.មុខងារជួសជុល និងថែទាំប្រព័ន្ធផ្គត់ផ្គង់ទឹក ស្អាត

៣.មុខងារផ្តល់សេវាអប់រំអនាម័យ ។

មុខងារទាំង ៣ នេះត្រូវបានរដ្ឋបាលស្រុកកំពុងអនុវត្តបានល្អ ពិសេសស្រុកកំពង់ត្រឡាច ដែលអនុវត្តបានល្អប្រសើរ ដោយមានការចូលរួមក្នុងកិច្ចប្រជុំពិភាក្សាមាន លោក អភិបាលស្រុក អភិបាលរងស្រុក លោកប្រធានការិយាល័យស្រុក គណនេយ្យស្រុក នាយករដ្ឋបាលស្រុក ។

ក្នុងឱកាសជួបពិភាក្សាជាមួយរដ្ឋបាលស្រុក ឯកឧត្តម បានផ្សព្វផ្សាយយុទ្ធសាស្រ្តបញ្ចកោណដំណាក់កាលទី១ គោលនយោបាយ ចក្ខុវិស័យ ក្រសួងអភិវឌ្ឍន៍ជនបទ ពីគោលបំណង និងកម្មវិធីទាំង ៥ របស់ក្រសួងអភិវឌ្ឍន៍ជនបទ ពិសេសបាន ពន្យល់ពីគោលដៅ បង្កើតភូមិគម្រូ ឲ្យបាន ៥០ភូមិក្នុង ១ឆ្នាំ ជូនរដ្ឋបាលស្រុក និងលើកទឹកចិត្តឲ្យស្រុកចូលរួមការងារ ។

កម្មវិធីបន្ទាប់កិច្ចពិភាក្សាអំពីការអនុវត្តការងារវិមជ្ឈការរបស់ស្រុក ៣ របស់ខេត្តកំពង់ឆ្នាំងដោយមានគោលបំណងរួមមាន៖

១. ស្វែងយល់ពីការអនុវត្ត ការងារវិមជ្ឈការ

២. លំហូរថវិកាប្រចាំឆ្នាំស្តីពីការងារវិមជ្ឈការ

៣.ឯកសារបទដ្ឋានបច្ចេកទេសលើមុខងារដែលបានផ្ទេរ

៤.ធនធានមនុស្សសម្រាប់អនុវត្តការងារវិមជ្ឈការ

៥.តម្រូវការបណ្តុះបណ្តាលការងារជំនាញ ៦.បញ្ហាការប្រឈមនានាលើការអនុវត្តការងារក្នុងវិស័យអភិវឌ្ឍន៍ជនបទ

៧.សំណូមពរផ្សេងៗរបស់ស្រុកនីមួយៗ ។

រាជធានីភ្នំពេញ ៖ នាព្រឹកថ្ងៃពុធ ១២រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣ ខែកក្កដា ឆ្នាំ២០២៤ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ លោកជំទាវ លោក លោកស្រីអគ្គាធិការស្ដីទី អគ្គាធិការរង អគ្គនាយករង នៃក្រសួងអភិវឌ្ឍន៍ជនបទ សរុបចំនួន ១៦រូប បានអញ្ជើញចូលរួមក្នុងវគ្គបណ្ដុះបណ្ដាលភាពជាអ្នកដឹកនាំបរិវត្តកម្មឌីជីថល វគ្គទី១ រយៈពេល ៣ថ្ងៃ ចាប់ពីថ្ងៃទី៣ ដល់ថ្ងៃទី៥ ខែកក្កដា ឆ្នាំ២០២៤ នៅវិទ្យាស្ថានអភិបាលកិច្ចឌីជីថល៕

រាជធានីភ្នំពេញ ៖ នាព្រឹកថ្ងៃអង្គារ ១១ រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២ ខែកក្កដា ឆ្នាំ ២០២៤ ឯកឧត្តម ស្រ៊ិន ពុទ្ធី ប្រធាននាយកដ្ឋានផ្គត់ផ្គង់ទឹកជនបទ បានអញ្ជើញដឹកនាំកិច្ចប្រជុំក្រុមការងារការផ្គត់ផ្គង់ទឹក ការសំអាត និងអនាម័យជនបទ(WATSAN) ប្រចាំខែកក្កដា ឆ្នាំ២០២៤   ដោយមានការអញ្ជើញចូលរួមថ្នាក់ដឹកនាំ និងមន្រ្តីបច្ចេកទេស នៃនាយកដ្ឋានផ្គត់ផ្គង់ទឹកជនបទ និងនាយកដ្ឋានថែទាំសុខភាពជនបទ តំណាងអង្គការដៃគូអភិវឌ្ឍន៍ សរុបចំនួន ៤០ នាក់(ស្រី ០៩ នាក់) ក្នុងគោលបំណង ៖

១- បង្ហាញអំពីវឌ្ឍនភាព នៃការអនុវត្តផែនការសកម្មភាពខេត្តព្រះសីហនុ និងកែប

២- បង្ហាញអំពីវឌ្ឍនភាពការងាររបស់អនុក្រុមផ្គត់ផ្គង់ទឹកជនបទ អនុក្រុមអនាម័យជនបទ និងអនុក្រុមអាហារូបត្ថម្ភ ៕

រាជធានីភ្នំពេញ៖ នាព្រឹកថ្ងៃអង្គារ ១១រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០២ ខែកក្តដា ឆ្នាំ២០២៤ ឯកឧត្តម យឹម ជុង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយលោកស្រី មិត្ត សុមន្ថា អនុប្រធាននាយកដ្ឋាន នៃនាយកដ្ឋានផ្គត់ផ្គងទឹកជនបទ បានអញ្ជើញចូលរួមកិច្ចប្រជុំស្តីពី Mid-term Review Mission for Irrigated Agriculture Improvement Project, IAIP ដែលទទួលហិរញ្ញប្បទានពីធនាគាអភិវឌ្ឍន៍អាស៊ី (ADB)  រៀបចំដោយក្រសួងធនធានទឹក និងឧត្តុនិយម ក្រោមអធិបតីភាពឯកឧត្តម ចាន់ ស៊ីណាត រដ្ឋលេខាធិការ ក្រសួងធនធានទឹក និងឧតុនិយម និងជានាយកគម្រោង ដោយមានការអញ្ជើញចូលរួមពី តំណាងថ្នាក់ដឹកនាំក្រសួងពាក់ព័ន្ធ មន្ទីរធនធានទឹក និងឧតុនិយម និងអាជ្ញាធរដែនដីខេត្តគោលដៅគម្រោង ដៃគូអភិវឌ្ឍន៍ និងតំណាងអង្គការអន្តរជាតិពាក់ព័ន្ធ សរុបចំនួន ៩៣នាក់។

 

កិច្ចប្រជុំនេះ មានគោលបំណង ដើម្បីពិនិត្យអំពីវឌ្ឍនភាពគម្រោង បញ្ហា ការប្រឈមនានា និងលើកទិសដៅបន្ត ព្រមទាំងដោះស្រាយបញ្ហាផ្សេងៗដែលជួបប្រទះ។

រាជធានីភ្នំពេញ៖ នាព្រឹកថ្ងៃអង្គារ ១១រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២ ខែកក្កដា ឆ្នាំ២០២៤ ឯកឧត្តម អ៊ិន ចន្តា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ប្ញទ្ឋិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំចរចាថ្លៃលើការងារស្តារឡើងវិញផ្លូវក្រាលដីល្បាយក្រួសចំនួន ០១ខ្សែ មាន ២កំណាត់ ប្រវែងសរុប ១០ ០០០ម ទទឹង៥ម កម្រាស់ ០,២ម នឹងផ្លាកឈ្មោះផ្លូវចំនួន ២កន្លែង ស្ថិតនៅភូមិស្វាយដំណាក់ និងភូមិព្រែកតាហ៊ុប ឃុំជំនីក ស្រុកក្រូចឆ្មារ ខេត្តត្បូងឃ្មុំ ដោយមានការអញ្ជើញចូលរួមមាន ឯកឧត្ដម ជី សេដ្ឋា រដ្ឋលេខាធិការ និងឯកឧត្តម ឈន សេដ្ឋា អនុរដ្ឋលេខាធិការ ព្រមទាំង ឯកឧត្ដមតំណាងក្រសួងសេដ្ឋកិច្ច និងហិរញ្ញវត្ថុ និងឧត្ដមសេនីយ៍តំណាងនាយកដ្ឋានស្ថាបនា និងវិស្វកម្ម នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ និងសមាជិកសមាជិកាគណៈកម្មាធិការលទ្ធកម្ម នៃក្រសួងអភិវឌ្ឍន៍ជនបទ។

 

ក្នុងឱកាសនោះ ឯកឧត្តមរដ្ឋលេខាធិការ បានផ្ដល់ជូននូវអនុសាសន៍ណែនាំរបស់ ឯកឧត្តមរដ្ឋមន្រ្តី ដល់នាយកដ្ឋានវិស្វកម្ម ក្រសួងការពារជាតិ មេត្តាអនុវត្តឱ្យមានគុណភាពខ្ពស់ និងងល្អប្រសើរ និងភាពធនដើម្បីរក្សាគុណភាពក្នុងការប្រើប្រាស់ឱ្យបានយូរអង្វែង ដើម្បីឆ្លើយតបទៅនឹងយុទ្ធសាស្រ្ដបញ្ជកោណរបស់រាជរដ្ឋាភិបាល។