រាជធានីភ្នំពេញ៖ នាព្រឹកថ្ងៃពុធ ៣រោច ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៨ ខែធ្នូ ឆ្នាំ២០២៤ នៅសាលប្រជុំទីស្តីការ ឯកឧត្តម ប៉ែន ពេជ្រសាលី រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំក្រុមការងារទទួលជួបពិភាក្សាការងារជាមួយប្រតិភូទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដែលដឹកនាំដោយលោកបណ្ឌិត Kyechun Lee ជានាយកគម្រោង និងប្រតិភូក្រសួងអភិវឌ្ឍន៍ជនបទ មានការអញ្ជើញចូលរួមពី ឯកឧត្តម ពុត ហេម៉ុណ្ណា អនុរដ្ឋលេខាធិការ ឯកឧត្តមអគ្គនាយកនៃអគ្គនាយកដ្ឋានបច្ចេកទេស លោក លោកស្រីជាតំណាងអគ្គនាយកដ្ឋានរដ្ឋបាល និងហិរញ្ញវត្ថុ នាយកដ្ឋានផែនការ និងទំនាក់ទំនងអន្តរជាតិ នាយកដ្ឋានអភិវឌ្ឍន៍សហគមន៍ និងនាយកដ្ឋានរដ្ឋបាល និងបុគ្គលិក។

 

ក្នុងជំនួបពិភាក្សានេះ បានអង្គប្រជុំបានពិភាក្សាលើ កិច្ចសហប្រតិបត្តិការរវាងក្រសួងអភិវឌ្ឍន៍ជនបទ និងទីភ្នាក់ងារសហប្រតិបត្តិការអន្តរជាតិកូរ៉េ លើការងារអភិវឌ្ឍន៍ជនបទ ពាក់ព័ន្ធនឹងតម្រូវការ និងវិស័យអាទិភាពនៃផែនការប្រទេស (Country plan) របស់ទីភ្នាក់ងារសហប្រតិបត្តិការអន្តរជាតិកូរ៉េ សម្រាប់ព្រះរាជាណាចក្រកម្ពុជា៕

ខេត្តកំពង់ឆ្នាំង៖នាថ្ងៃអង្គារ ២រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១២ ខែធ្នូ ឆ្នាំ២០២៤ លោក កាយ សុខជា អនុប្រធានមន្ទីរអភិវឌ្ឍន៍ជនបទខេត្តកំពង់ឆ្នាំង បានចូលរួមបើកសិក្ខាសាលាពិគ្រោះយោបល់ស្តីពីដំណាំសក្តានុពល ក្នុងការផ្សាភ្ជាប់ផលិតផល ទៅកាន់ទីផ្សារសហគមន៍ រៀបចំដោយអង្គការបំប៉នវិជ្ជាជីវៈ អភិវឌ្ឍន៍សេដ្ឋកិច្ច និងកសិកម្មជនបទ ដោយមានការចូលរួមពីមន្រ្តីនៃមន្ទីរអភិវឌ្ឍន៍ជនបទខេត្ត ក្រុមប្រឹក្សាឃុំ និងភូមិ ដែលមានសិក្ខាកាមជាសមាជិកក្រុមផលិតចំនួន២៥នាក់ ស្រ្តី  ២០នាក់ ដែលប្រព្រឹត្តិទៅនៅសាលាបុណ្យភូមិអូរលាជ ឃុំបន្ទាយព្រាល ស្រុករលាប្អៀរ ខេត្តកំពង់ឆ្នាំង ។

 

សិក្ខាសាលានេះមានគោលបំណង៖

-ស្វែងរកការឯកភាពគ្នារវាងជនបង្គោល និងសមាជិកក្រុមផលិត  ដើម្បីចាត់អាទិភាពលើផលិតផលសក្តានុពល នៅក្នុងសហគមន៍ ដែលឆ្លើយតបនឹងតម្រូវការទីផ្សារ  ធ្វើផែនការផលិតជាក្រុម និងផែនការបង្វឹកកសិករ

-សមាជិកក្រុមផលិត និងអាជ្ញាធរមូលដ្ឋាន អាចកំណត់អ្នកប្រមូលទិញ ដើម្បីនាំទៅកាន់ទីផ្សារ(ផ្សារពង្រ និងផ្សារកំពង់ឆ្នាំង)

– អាជ្ញាធរមូលដ្ឋាន និងមន្ទីរអង្គភាពជំនាញចូលរូមជំរុញ និងដោះស្រាយនូវបញ្ហាប្រឈមរបស់ក្រុមផលិត។

 

សូមបញ្ជាក់ថា៖ ភូមិអូរលាជ មានប្រពលរដ្ឋសរុប១២០គ្រួសារ និងផ្ទៃដីកសិកម្ម មានចំនួន៤៧៥ហិកតា  ប្រជាកសិករដាំដំណាំគ្រួសារ ដាំគ្រប់រដូវ មានចំនួន៩០ គ្រួសារ លើផ្ទៃ ៧៣ហិកតា ដូចជាត្រសក់ ស្ពៃ សាលាដ ត្រកួន ផ្ទី ត្រប់ ជីរណា និងសណ្តែកដី ។

ខេត្តបាត់ដំបង ៖ នាថ្ងៃអង្គារ ២រោច ខែមិគ្គសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៧ ខែធ្នូ ឆ្នាំ២០២៤ ឯកឧត្តម អ៊ិន ចន្ថា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មាធិការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ព្រមទាំងមន្រ្តី គ.ត.វ និងមន្ត្រីជំនាញនៃនាយកដ្ឋានផ្លូវលំជនបទ ដើម្បីចុះត្រួតពិនិត្យ និងវាយតម្លៃ លើការងារថែទាំខួបផ្លូវ ដោយក្រាលកៅស៊ូ DBST បន្ថែមពីលើ (Reseal DBST) លើផ្លូវកំពង់ព្រៀង-ស្វាយជាតិ ប្រវែង ៦ ៥០០ម ព្រមទាំងគូសគំនូសចរាចរណ៍ទំហំ ១ ៣០០ម២ ស្ថិតនៅឃុំកំពង់ព្រៀង ឃុំស្វាយជាតិ ស្រុកសង្កែ ខេត្តបាត់ដំបង អនុវត្តដោយនាយកដ្ឋានផ្លូវលំជនបទ។

ក្នុងឱកាសនោះ ឯកឧត្តម អ៊ិន ចន្ថា បានជួបសំណេះសំណាល ជាមួយប្រជាពលពលរដ្ឋនិងអាជ្ញាធរមូលដ្ឋានរស់នៅសងខាងផ្លូវ ព្រមទាំងបានពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយមនោសញ្ចេតនា និងពរសព្ទសាធុការពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និង ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងបាននាំយកអំណោយដ៏ថ្លៃថ្លារបស់សម្ដេច ចែកជូនដល់អាជ្ញាធរមូលដ្ឋាននិងប្រជាពលរដ្ឋដែលបានចូលរួម ដោយម្នាក់ៗ ទទួលបានក្រមាមួយ និងបានសំណូមពរដល់បងប្អូនប្រជាពលរដ្ឋ និងអាជ្ញាធរមូលដ្ឋាន ត្រូវខិតខំថែរក្សាសមិទ្ធផលទាំងនេះ ដើម្បីឱ្យការប្រើប្រាស់បានយូរអង្វែង ។
ក្រោយពីបានចុះត្រួតពិនិត្យវាយតម្លៃ លទ្ធផលការងារ ១០០% រួចមក ឯកឧត្តមរដ្ឋលេខាធិការ បានដឹកនាំកិច្ចប្រជុំដើម្បីវាយតម្លៃស្តីលក្ខណៈបច្ចេកទេសជាមួយគណៈកម្មការអន្តរក្រសួង ដោយលទ្ធផលបានសម្រេចទទួលយកផ្លូវ កំពង់ព្រៀង-ស្វាយជាតិនេះ ដោយសេចក្តីរីករាយ៕

ខេត្តកំពង់ឆ្នាំង និងខេត្តពោធិ៍សាត់ ៖ នាថ្ងៃចន្ទ ១រោច ខែមិគសិរ ឆ្នាំរោង ឆស័ក ពុទ្ធសករាជ២៥៦៨ ត្រូវនឹងថ្ងៃទី១៦ ខែធ្នូ ឆ្នាំ២០២៤ ឯកឧត្តមបណ្ឌិត សៅ ជីវ័ន្ត រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំគណ:កម្មការអន្តរក្រសួង ដោយមានការចូលពីលោកជំទាវ ឯក គន្ធវ៉ារី អនុរដ្ឋលេខាធិការ ក្រុមការងារបច្ចេកទេសនៃនាយកដ្ឋានផ្លូវលំជនបទ ក្រុមការងារ គ.ត.វ និង មន្រ្តីនៃក្រសួងសេដ្ឋកិច្ចនិងហិរញ្ញវត្ថុ ដោយមានការចូលរួមពីរួមជាមួយ មន្រ្តីបច្ចេកទេសនៃមន្ទីរអភិវឌ្ឍន៍ជនបទខេត្តកំពង់ឆ្នាំង និងខេត្តពោធិ៍សាត់ ចុះត្រួតពិនិត្យនិងវាយតម្លៃលើការងារថែទាំខួបផ្លូវចំនួន៣ គម្រោងស្ថិតនៅខេត្តកំពង់ឆ្នាំង និងខេត្តពោធិ៍សាត់ អនុវត្តដោយនាយកដ្ឋានផ្លូវលំជនបទ រួមមានដូចខាងក្រោម ៖

 

– គម្រោងទី១ ៖ ចុះត្រួតពិនិត្យនិងវាយតម្លៃបញ្ចប់សុពលភាពការងារថែទាំខួបផ្លូវចំនួន១ខ្សែ មាន២ កំណាត់ដោយក្រាលកៅស៊ូ DBST ប្រវែងសរុប ៥៣០០ម៉ែត្រ ស្ថិតនៅឃុំក្រាំងស្គារ ស្រុកទឹកផុស ខេត្តកំពង់ឆ្នាំង។

-គម្រោងទី២ ៖ ចុះត្រួតពិនិត្យនិងវាយតម្លៃការងារថែទាំខួបផ្លូវដោយក្រាលកៅស៊ូ DBST ចំនួន៥ កំណាត់ប្រវែងសរុប៣៥០០ម៉ែត្រ និងផ្លូវក្រាលបេតុងសរសៃដែក ចំនួន១កំណាត់ ប្រវែង ១៨០ម៉ែត្រ ព្រមទាំងគូសគំនូសចរាចរណ៍ទំហំ ៧០០ម៉ែត្រការ៉េ ស្ថិតនៅឃុំបឹងខ្នារ ស្រុកបាកាន និងឃុំតាលោ ស្រុកតាលោសែនជ័យ ខេត្តពោធិ៍សាត់។

-គម្រោងទី៣ ៖ ចុះត្រួតពិនិត្យនិងវាយតម្លៃការងារថែទាំខួបផ្លូវចំនួន ១កំណាត់ ដោយក្រាលកៅស៊ូ DBST បន្ថែមពីលើ (Reseal DBST) ប្រវែង ៦១៤០ម៉ែត្រ ព្រមទាំងគូសគំនូសចរាចរណ៍ទំហំ ១ ២២៨ម៉ែត្រការ៉េ ស្ថិតនៅឃុំខ្នារទទឹង ស្រុកបាកាន និងឃុំផ្ទះរុង ស្រុកតាលោសែនជ័យខេត្តពោធិ៍សាត់។

 

នៅក្នុងឱកាសនោះ ឯកឧត្តមបណ្ឌិត ក៏បានជួបសំណេះសំណាលជាមួយបងប្អូនប្រជាពលរដ្ឋដែលរស់នៅតាមបណ្តោយផ្លូវទាំងនេះដោយបានពាំនាំនូវការផ្តាំផ្ញើសួរសុខទុក្ខពីឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ជូនចំពោះលោកតា លោកយាយ ពូមីង បងប្អូននៅទីនោះ និងបានផ្តាំផ្ញើដល់អាជ្ញាធរមូលដ្ឋាន និងប្រជាពលរដ្ឋទាំងអស់ឱ្យចូលរួមថែទាំសមិទ្ធផលផ្លូវ និងលូនៅក្នុងមូលដ្ឋានកុំឱ្យមានរថយន្តដឹកទំនិញលើសចំណុះធ្វើចរាចរណ៍លើផ្លូវ ដើម្បីរក្សាគុណភាពផ្លូវនិងលូឱ្យប្រើប្រាស់បានគង់វង្សយូរអង្វែង។ ជាមួយគ្នានេះ ឯកឧត្តមបណ្ឌិត ក៏បាននាំយកអំណោយដ៏ថ្លៃថ្លារបស់ឯកឧត្តមរដ្ឋមន្រ្តី ប្រគល់ជូនប្រជាពលរដ្ឋដោយម្នាក់ៗទទួលបានក្រម៉ាមួយផងដែរ។

 

បន្ទាប់មកគណៈកម្មការអន្តរក្រសួងបានប្រជុំពិភាក្សាជាមួយអ្នកទទួលការនិងអ្នកបច្ចេកទេស ដោយបានឯកភាពទទួលយកការបញ្ចប់សុពលភាពចំពោះគម្រោងទី១ និងទទួលយកលទ្ធផលការងារ១០០% ចំពោះគម្រោងទី២ និងគម្រោងទី៣៕

រាជធានីភ្នំពេញ៖ នាព្រឹកថ្ងៃពុធ ៣រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៨ ខែធ្នូ ឆ្នាំ២០២៤ នៅទីស្ដីការក្រសួង ឯកឧត្តម ឈឹម សៅគី រដ្ឋលេខាធិការប្រចាំការ និងជាអនុប្រធានគណៈកម្មការគ្រប់គ្រងធនធានមនុស្ស តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំវាយតម្លៃ និងត្រួតពិនិត្យលើការដំឡើងឋានន្តរស័ក្តិ ថ្នាក់សម្រាប់ឆ្នាំ២០២៥ របស់មន្ដ្រីរាជការក្នុងក្របខ័ណ្ឌក្រសួងអភិវឌ្ឍន៍ជនបទ ដោយមានការអញ្ជើញចូលរួមពីសំណាក់ថ្នាក់ដឹកនាំ និងមន្ដ្រីជំនាញ នៃគណៈកម្មការគ្រប់គ្រងធនធានមនុស្សក្រសួងអភិវឌ្ឍន៍ជនបទ។

យោងតាមរបាយការណ៍សង្ខេបរបស់លោក ផល សុខសំណាង ប្រធាននាយកដ្ឋានរដ្ឋបាល និងបុគ្គលិក បានឱ្យដឹងថា សម្រាប់ឆ្នាំ២០២៥ មានមន្ដ្រីរាជការគ្រប់អង្គភាពក្នុងក្របខ័ណ្ឌក្រសួងបានស្នើសុំដំឡើងឋានន្តរស័ក្តិ និងថ្នាក់ ចំនួន ៥៩៤ នាក់ ក្នុងនោះស្នើសុំឡើងតាមវេន និងវេនអតីតភាព ចំនួន ៥៦៧ នាក់ និងតាមកិត្តិយសមុនចូលនិវត្តន៍ ចំនួន ២៧ នាក់ ។

បន្ទាប់បានស្ដាប់របាយការណ៍ដោយលោកប្រធាននាយកដ្ឋានរដ្ឋបាល និងបុគ្គលិករួចមក ឯកឧត្តម ឈឹម សៅគី បានសម្តែងការកោតសរសើរ និងវាយតម្លៃខ្ពស់ ចំពោះនាយកដ្ឋានរដ្ឋបាល និងបុគ្គលិក និងគណៈកម្មការគ្រប់គ្រងធនធានមនុស្ស ដែលបានខិតខំបំពេញការងារយ៉ាងសកម្មលើការងារដំឡើងឋានន្តរស័ក្តិ ថា្នក់ ជូនមន្ត្រីរាជការ ដើម្បីជាការលើកទឹកចិត្តដល់មន្ត្រីរាជការដែលបានបំពេញភារកិច្ចតាមអង្គភាពក្រោមឱវាទក្រសួងយ៉ាងមានប្រសិទ្ធភាព។ ឯកឧត្តមរដ្ឋលេខាធិការប្រចាំការ បានលើកឡើងថា គណៈកម្មការចំណាត់ថ្នាក់របស់ក្រសួង ត្រូវរៀបចំពិនិត្យ និងសម្រេចដំឡើងថ្នាក់ និងឋានន្តរស័ក្តិ ជូនមន្រ្តីរាជការតាមប្រភេទក្របខ័ណ្ឌនីមួយៗដូចជា៖ ការដំឡើងតាមវេនជ្រើសរើស, ការដំឡើងតាមវេនអតីតភាព និងការដំឡើងថ្នាក់ករណីពិសេស ដូចមានចែងក្នុងច្បាប់ស្តីពី សហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា៕

ខេត្តកំពង់ស្ពឺ ៖ នារសៀលថ្ងៃថ្ងៃចន្ទ ១រោច ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១៦ ខែធ្នូ ឆ្នាំ២០២៤ នៅសាលាខេត្តកំពង់ស្ពឺ ឯកឧត្តមបណ្ឌិត សួស គង់ រដ្ឋលេខាធិការ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកភ្នំស្រួច តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញចូលរួមក្នុងកិច្ចប្រជុំបូកសរុបលទ្ធផលការងារ ប្រចាំឆ្នាំ២០២៤ និងលើកទិសដៅឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ក្រោមអធិបតីភាពដ៏ខ្ពង់ខ្ពស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណ: និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ជាប្រធានក្រុមការងាររាជរដ្ឋាភិបាលចមូលដ្ឋានស្រុក ក្រុង អភិបាលរងខេត្ត អភិបាលស្រុកក្រុង ប្រធានមន្ទីរ អង្គភាពជុំវិញខេត្ត លេខាធិការដ្ឋានក្រុមការងារខេត្តស្រុក ក្រុង សរុបចំនួន ១០០នាក់៕

រាជធានីភ្នំពេញ ៖ នាព្រឹកថ្ងៃចន្ទ ១រោច ខែធ្នូ ឆ្នាំ២០២៤ ត្រូវនឹងថ្ងៃទី១៦ ខែធ្នូ ឆ្នាំ២០២៤ ឯកឧត្តម ផូ ផារិទ្ធ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញចូលរួមក្នុងកិច្ចប្រជុំគណកម្មាធិការគោលនយោបាយ សេដ្ឋកិច្ច និងហិរញ្ញវត្ថុ ដើម្បីពិភាក្សាលើសេចក្តីព្រាង “កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ច នៅក្នុងបរិការណ៍សកលដែលមានភាពមិនប្រាកដប្រជាខ្ពស់ ២០២៥-២០២៨” នៅទីស្តីការក្រសួងសេដ្ឋកិច្ច និងហិរញ្ញវត្ថុ ក្រោមអធិបតីភាពដ៏ខ្ពង់ខ្ពស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ៕

រាជធានីភ្នំពេញ៖ នាថ្ងៃចន្ទ ១រោច ខែមិគសិរ ឆ្នាំរោង ឆស័ក ពុទ្ធសករាជ២៥៦៨ ត្រូវនឹងថ្ងៃទី១៦ ខែធ្នូ ឆ្នាំ២០២៤ លោកជំទាវ លីម មុយឡេង រដ្ឋលេខាធិការ អមដំណេីរដោយ លោក ហាក់ សុខម៉េង សមាជិកលេខាធិការដ្ឋានក្រុមការងារនីតិកម្ម បានចូលរួមសិក្ខាសាលាថ្នាក់ជាតិស្តីពី «ការងារនីតិកម្ម និងការកែទម្រង់ច្បាប់របស់រាជរដ្ឋាភិបាល» នៅសណ្ឋាគារសូហ្វីតែលភ្នំពេញ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី។

 

សិក្ខាសាលាថ្នាក់ជាតិនេះ បានរៀបចំដោយគណៈកម្មាធិការដឹកនាំការកែទម្រង់ច្បាប់នៃទីស្តីការគណៈរដ្ឋមន្រ្តី ដោយមានការអញ្ជេីញចូលរួមពីថ្នាក់ដឹកនាំក្រសួងស្ថាប័ន រដ្ឋ តំណាងអង្គការអន្តរជាតិ ស្ថាប័នឯកជន តំណាងក្រសួងនីតិកម្មសាធារណៈរដ្ឋកូរ៉េ តំណាងគ្រឹះស្ថានសិក្សា និងការិយាល័យមេធាវី ព្រមទាំងភ្ញៀវជាតិ អន្តរជាតិប្រមាណ២៥០រូប។

ខេត្តកំពង់ឆ្នាំង: នាថ្ងៃចន្ទ ១រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៦ ខែធ្នូ ឆ្នាំ២០២៤ ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឬទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ  បានអញ្ជើញចូលរួមជាគណៈអធិបតីក្នុងពិធីបើកវគ្គបណ្តុះបណ្តាលនាយទាហានរង នៃកងរាជអាវុធហត្ថ ជំនាន់ទី៤៧ ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស នៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំសែនរីករាយ)។  ក្នុងពិធីបើកវគ្គបណ្តុះបណ្តាលនាយទាហានរង នៃកងរាជអាវុធហត្ថ ជំនាន់ទី៤៧ មានការអញ្ជើញចូលរួមពីតំណាងក្រសួងស្ថាប័នពាក់ព័ន្ធ អគ្គនាយករង នាយក នាយរងចំណុះក្រសួងការពារជាតិ នាយរងសេនាធិការចម្រុះ នាយក នាយករង មេបញ្ជាការរង ចំណុះអគ្គបញ្ជាការដ្ឋាននៃកងយោធពលខេមរភូមិន្ទ អភិបាលរងខេត្ត អភិបាលស្រុក មេបញ្ជាការរង នាយសេនាធិការរង ស្នងការ ស្នងការរង នាយការិយាល័យ នាយកសាលាទាំងពីរ ចំណុះបញ្ជាការដ្ឋានកងរាជអាវុធហត្ថលើផ្ទៃប្រទេស មេបញ្ជាការ មេបញ្ជាការរងកងរាជអាវុធហត្ថរាជធានី-ខេត្តទាំង២៥ និងសិក្ខាកាម។

ខេត្តប៉ៃលិន ៖ នាព្រឹកថ្ងៃច័ន្ទ ១រោច ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងទី១៦ ខែធ្នូ ឆ្នាំ២០២៤ ឯកឧត្ដម អុិន ចន្ថា រដ្ឋលេខាធិការតំណាងដ៏ខ្ពង់ខ្ពស់ ឯកឧត្តម ឆាយ ឬទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានដឹកនាំគណ:កម្មការអន្តរក្រសួងរួមមានតំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុអញ្ជើញទៅត្រួតពិនិត្យនិង វាយតម្លៃការងារថែទាំខួបផ្លូវចំនួន២ខ្សែ ដោយក្រាលល្បាយថ្មភ្នំមានប្រវែងសរុប ១០ ៩០០ម៉ែត្រ ទទឹង ៥ម៉ែត្រ កម្រាស់ ០,២ម៉ែត្រ សាងសង់លូមូលមុខមួយចំនួន ២កន្លែង និងលូមូលមុខពីរចំនួន ១កន្លែង ស្ថិតនៅសង្កាត់អូរតាវ៉ៅ ឃុំស្ទឹងកាច់ឃុំអូរអណ្តូងក្រុងប៉ៃលិន និងស្រុកសាលាក្រៅខេត្តប៉ៃលិន។

ផ្លូវទាំងពីរខ្សែនេះមាន ៖

-ខ្សែទី១ ៖ ផ្លូវភ្នំជ្រូក សង្កាត់អូរតាវ៉ៅក្រុងប៉ៃលិនមាន ប្រវែង ៥៤០០ម៉ែត្រ ទទឹង ៥ម៉ែត្រ កម្រាស់ ០២ម៉ែត្រ សាងសង់លូមុខមួយចំនួន ១កន្លែង ។

-ខ្សែទី២ ៖ ជាផ្លូវលេខ៥២ ភូមិបឹងប្រលិត ឃុំស្ទឺងកាច់ និងឃុំអូរអណ្តូងស្រុកសាលាក្រៅខេយ្តប៉ៃលិន។

 

ឯកឧត្ដម អុិន ចន្ថា បានជួបសំណេះសំណាលជាមួយមេឃុំ ក្រុមប្រឹក្សាឃុំ  ប្រធានភូមិ និងប្រជាពលរដ្ឋដែលរស់នៅសងខាងផ្លូវ ដោយបានពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយមនោសញ្ចេតនា សេចក្តីនឹករលឹកយ៉ាងជ្រាលជ្រៅបំផុត ពីសំណាក់សម្ដេចអគ្គមហាសេនាបតីតេជោ ហ៊ុន សែន មគ្គុទេសក៏ឯកនយោបាយឈ្នះ ឈ្នះ, បិតាស្ថាបនិកសន្តិភាព, និងជាប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និង ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ជូនប្រជាពលរដ្ឋនៅទីនោះ ។

 

បន្ទាប់ពីបានត្រួតពិនិត្យរួចមកគណៈកម្មការអន្តរក្រសួងបានសម្រេចទទួលយកផ្លូវទាំង ២ខ្សែតាមសំណូមពរអ្នកទទួការ ៕