ខេត្តបាត់ដំបង៖ នារសៀលថ្ងៃសុក្រ ៤រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែសីហា ឆ្នាំ២០២៤ ក្រុមការងារបច្ចេកទេស នៃគណៈកម្មការត្រួតពិនិត្យ និងវាយតម្លៃគុណភាពសាងសង់ ស្ដារឡើងវិញ កែលម្អ ជួសជុល ថែទាំ និងលើកកម្រិតផ្លូវជនបទ និងសំណង់សិល្បការ្យ (គ.ត.វ) ក្រសួងអភិវឌ្ឍន៍ជនបទ បានចុះត្រួតពិនិត្យបច្ចេកទេសផ្លូវថែទាំខួប ក្រាលល្បាយថ្មភ្នំ ឆ្នាំ២០២៤ ចំនួន ១ខ្សែ ប្រវែង ១២,៦០គីឡូម៉ែត្រ តភ្ជាប់ពីភូមិថ្លុកសង្កែ ទៅភូមិបុស្សស្អំ ឃុំសិរីមានជ័យ ស្រុកសំពៅលូន ខេត្តបាត់ដំបង៕

រាជធានីភ្នំពេញ ៖ នាថ្ងៃព្រហស្បតិ៍ ៣រោច ខែស្រាពណ៏ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២២ ខែសីហា ឆ្នាំ២០២៤ នៅសណ្ឋាគារលុចស៊ីធី រាជធានីភ្នំពេញ លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ នៃក្រសួងអភិវឌ្ឍន៍ជនបទ បានអញ្ជើញជាអធិបតី បើកសិក្ខាសាលាពិគ្រោះយោបល់អំពី ការរចនាប្លង់បង្គន់អនាម័យដែលបង្កលក្ខណៈងាយស្រួលក្នុងកម្រិតគ្រួសារ ។

 

សិក្ខាសាលានេះមានការអញ្ជើញចូលរួមពីសំណាក់ លោក ឈន អក្ខរា ប្រធានផ្នែកអភិវឌ្ឍសេវាពិការភាព នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ នៃក្រសួងសង្គមកិច្ច អតីតយុទ្ធជន និងយុវនិតិសម្បទា និងលោក អ៊ុន ប៊ុនភឿន ប្រធានកម្មវិធីទឹកស្អាតនិងអនាម័យប្រកបដោយបរិយាបន្ន នៃអង្គការវ័តធឺអេតកម្ពុជា តំណាងក្រសួង ស្ថាប័ន ពាក់ព័ន្ធ និងអង្គការដៃគូ ។

ក្រោមកិច្ចសហប្រតិបត្តិការនិងគាំទ្ររបស់​អង្គការ WaterAid & Australian Aid សិក្ខាសាលាបានរៀបចំក្នុងគោលបំណងចែករំលែកការរចនាប្លង់នៃការសាងសង់បង្គន់អនាម័យដែលមានលក្ខណៈងាយស្រួលក្នុងកម្រិតគ្រួសារ និងដើម្បីពិគ្រោះយោបល់ និងប្រមូលមតិកែលម្អសម្រាប់ការបញ្ចប់ការរចនាប្លង់បង្គន់អនាម័យក្នុងសហគមន៍។

សូមបញ្ជាក់ផងដែរថា សិក្ខាសាលានេះ បានធ្វើបទបង្ហាញស្តីពី គោលបំណងរបស់គម្រោង គំនូសប្លង់បច្ចេកទេសបង្គន់អនាម័យ និងបានធ្វើការពិភាក្សាដោយផ្ដោតទៅលើបច្ចេកទេស និងសំណង់នៃបង្គន់ និងឯកសារជាងសម្រាប់សាងសង់បង្គន់អនាម័យផងដែរ ៕

រាជធានីភ្នំពេញ៖ នាថ្ងៃព្រហស្បតិ៍ ៣រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែសីហា ឆ្នាំ២០២៤ ឯកឧត្តម ហាប់ អូម៉ាលី រដ្ឋលេខាធិការក្រសួងអភិវឌ្ឍន៍ជនបទ បានអញ្ជើញចូលរួមវេទិកាបណ្តាញអេកូទេសចរណ៍បឹងទន្លេសាបប្រចាំឆ្នាំលើកទី១ ក្រោមប្រធានបទ ការពង្រឹងរសវាកម្មទេសចរណ៍ និងអេកូទេសចរណ៍ ឆ្ពោះទៅរកការលើកកម្ពស់ជីវភាពសហគមន៍ និងការគ្រប់គ្រងធនធានធម្មជាតិតំបន់បឹងទន្លេសាបប្រកបដោយនិរន្តរភាព ក្រោមអធិបតីភាពឯកឧត្តម សុខ សូកេន រដ្ឋមន្ត្រីក្រសួងទេសចរណ៍  ដែលមានអញ្ជើញចូលរួមពីសំណាក់គណៈកម្មការអន្តរក្រសួង អភិបាលរងរាជធានីខេត្ត ក្រុង វិស័យឯកជន និងតំណាងសហគមន៍អេកូទេសចរណ៍ជុំវិញបឹងទន្លេសាបសរុបចំនួន ៣០០ នាក់ ។

ខេត្តស្វាយរៀង ៖ នាថ្ងៃព្រហស្បតិ៍ ៣រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែសីហា ឆ្នាំ២០២៤ ឯកឧត្តមបណ្ឌិត នួន ដាញ៉ិល  រដ្ឋលេខាធិការក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង ចុះត្រួតពិនិត្យ វាយតម្លៃដំណាក់កាលទី១ លើការងារថែទាំផ្លូវជាលក្ខណៈប្រចាំ ចំនួន ៣ខ្សែ ក្រាលកៅស៊ូពីរជាន់ (DBST) ប្រវែងសរុប ៤៥ ៩០០ម៉ែត្រ  និងផ្លូវក្រាលក្រួស និងខ្សាច់ភ្នំ ចំនួន ១២ខ្សែ ប្រវែងសរុប ១១២ ៣០០ម៉ែត្រ ស្ថិតនៅខេត្តស្វាយរៀង អនុវត្តដោយមន្ទីរអភិវឌ្ឍន៍ជនបទខេត្តស្វាយរៀង រួមមាន ៖

 

១.ខ្សែទី១៖ ផ្លូវផ្សារចក – ជីភូ ឃុំចក ឃុំស្វាយរំពា ឃុំគគីរសោម ឃុំព្រៃតាអី ឃុំពពែត និងឃុំច្រកម្ទេស ស្រុករំដួល និងស្រុកស្វាយទាប ប្រវែង ៣៣ ៤០០ម៉ែត្រ

២.ខ្សែទី២៖ ផ្លូវភូមិតាជៃ – ភូមិឬស្សីព្រៃ ឃុំកំពង់ចំឡង ស្រុកស្វាយជ្រំ ប្រវែង៨ ២០០ម៉ែត្រ

៣.ខ្សែទី៣៖ ផ្លូវភូមិតាណែង – ភូមិស្រម៉ ឃុំសង្កែ និងឃុំបុសមន ស្រុករំដួល ប្រវែង ៤ ៣០០ម៉ែត្រ

៤.ខ្សែទី៤៖ កំពង់ត្រាច – សំបូរ ឃុំកំពង់ត្រាច និងឃុំសំបូរ ស្រុករមាសហែក ប្រវែង ១៥ ០០០ម៉ែត្រ

៥.ខ្សែទី៥៖ ផ្សារចន្ត្រី – ត្រពាំងរុន ឃុំចន្ត្រី និងឃុំម្រាម ស្រុករមាសហែក ប្រវែង ៨ ២០០ម៉ែត្រ

៦.ខ្សែទី៦៖ ខ្លាលោត – ព្រៃក្រញ៉ូង ឃុំជ្រៃធំ និងឃុំសម្បត្តិមានជ័យ ស្រុករមាសហែក ប្រវែង ៨ ៣០០ម៉ែត្រ

៧. ខ្សែទី៧ ៖ ត្រោក – រមាសហែក ឃុំអំពិល និងឃុំត្រេស ស្រុករមាសហែក ប្រវែង ៨ ០០០ម៉ែត្រ

៨. ខ្សែទី៨ ៖ វត្តសណ្តោត – ឃុំអង្គតាសូ ស្រុកស្វាយជ្រំ ប្រវែង ៨ ៥០០ម៉ែត្រ

៩. ខ្សែទី៩ ៖ ត្បែង – ខ្នុរខាងជើង ឃុំស្វាយអង្គ ស្រុកស្រាយជ្រំ ប្រវែង ១០ ០០០ម៉ែត្រ

១០. ខ្សែទី១០ ៖ ភូមិអំពិល – វត្តត្រល់ចាស់ ឃុំអំពិល ស្រុករមាសហែក ប្រវែង ១០ ០០០ម៉ែត្រ

១១. ខ្សែទី១១ ៖ វត្តត្បែរាំ – វត្តគំនុំ ឃុំសំបូរ ស្រុករមាសហែក ប្រវែង ១៩ ០០០ម៉ែត្រ

១២. ខ្សែទី១២ ៖ ភូមិតាសេក – កែងភូមិត្រោក ឃុំអំពិល ស្រុករមាសហែក ប្រវែង ៥ ០០០ម៉ែត្រ

១៣. ខ្សែទី១៣ ៖ ថ្នាធ្នង់ – បុស្សមន ឃុំថ្នាធ្នង់ ស្រុករំដួល ប្រវែង៥ ៣០០ម៉ែត្រ

១៤. ខ្សែទី១៤ ៖ ភូមិជីកដី ឃុំអណ្តូងត្របែក ស្រុករមាសហែក ប្រវែង ៧ ០០០ម៉ែត្រ

១៥. ខ្សែទី១៥ ៖ ស្វាយប៉ោ – ត្របាំងស្គន់ចាស់ ឃុំត្រពាំងស្តៅ ស្រុករមាសហែក ប្រវែង ៨ ០០០ម៉ែត្រ។

 

បន្ទាប់ពីបានត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណៈកម្មការអន្តរក្រសួងរួចមក គណៈកម្មការបានឯកភាព និងទទួលយកការអនុវត្តការងារបញ្ចប់ដំណាក់កាលទី១ តាមការស្នើសុំរបស់អ្នកទទួលការ។ ទន្ទឹមនឹងនេះ គណៈកម្មការអន្តរក្រសួងបានណែនាំដល់អ្នកទទួលការត្រូវអនុវត្តឱ្យបានរួចរាល់ត្រឹមត្រូវតាមកិច្ចសន្យា នៅពេលចុះវាយតម្លៃបញ្ចប់ដំណាក់កាលទី២។

 

ជាមួយគ្នានេះ ឯកឧត្តមបណ្ឌិត ក៏បានជួបសំណេះសំណាល និងពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយមនោសញ្ចេតនា សេចក្តីនឹករលឹកយ៉ាងជ្រាលជ្រៅបំផុត និងពរសព្ទសាធុការពីសំណាក់ ឯកឧត្តមរដ្ឋមន្ត្រី  ព្រមទាំងបានអំពាវនាវដល់ប្រជាពលរដ្ឋ សូមមេត្តាកុំចាញ់បោកតាមការឃោសនា ញុះញង់ បោកបញ្ឆោតរបស់ក្រុមជនអគតិមួយក្តាប់តូច ដែលបានធ្វើការចោទប្រកាន់មកលើរាជរដ្ឋាភិបាល ពាក់ព័ន្ធកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) និងសូមអំពាវនាវដល់បងប្អូនប្រជាពលរដ្ឋគ្រប់មជ្ឈដ្ឋាន ជឿជាក់លើរាជរដ្ឋាភិបាលកម្ពុជា ជឿជាក់លើ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និង សម្តេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា។

ខេត្តកំពង់ឆ្នាំង ៖ នាថ្ងៃព្រហស្បតិ៍ ៣រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែសីហា ឆ្នាំ២០២៤ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អមដំណើរដោយថ្នាក់ដឹកនាំ និងមន្រ្តីជំនាញរបស់មន្ទីរអភិវឌ្ឍន៍ជនបទខេត្តកំពង់ឆ្នាំង ចុះពិនិត្យ និងវាយតម្លៃដំណាក់កាលទី១ លើការងារថែទាំផ្លូវជាលក្ខណៈប្រចាំ អនុវត្តដោយមន្ទីរអភិវឌ្ឍន៍ជនបទខេត្តកំពង់ឆ្នាំង ដូចខាងក្រោម៖

 

– ថែទាំផ្លូវក្រាលកៅស៊ូ DBST ចំនួន ៧ខ្សែ ប្រវែងសរុប ៥២ ៧៣០ ម ទទឹងខ្នងលើ ៥ម ៥,៥ម ៦ម និង ៦,៥ម ស្ថិតក្នុងឃុំស្វាយជុក ឃុំពាម ឃុំឈានឡើង ឃុំសេដ្ឋី ឃុំត្បែងខ្ពស់ ឃុំពានី ឃុំរលាប្អៀរ និងឃុំជ្រៃបាក់ ស្រុកសាមគ្គីមានជ័យ និងស្រុករលាប្អៀរ

– ថែទាំផ្លូវក្រាលល្បាយក្រួស ចំនួន ១៥ខ្សែ ប្រវែងសរុប ១១៥ ១០០ម ទទឹងខ្នងលើ ៤ម ៥ម និង ៦ម ស្ថិតក្នុងឃុំក្រាំងល្វា ឃុំស្វាយជុក ឃុំគោកបន្ទាយ ឃុំតាំក្រសាំង ឃុំអភិវឌ្ឍន៍ ឃុំចោងម៉ោង ឃុំឈូកស ឃុំអណ្តូងស្នាយ និងឃុំទឹកហូត ស្រុកសាមគ្គីមានជ័យ ស្រុកទឹកផុស ស្រុកកំពង់ត្រឡាច និងស្រុករលាប្អៀរ។

 

បន្ទាប់ពីបានធ្វើការពិនិត្យរួចមក គណៈកម្មការអន្តរក្រសួង បានសម្រេចឯកភាពទទួលយកនូវថែទាំផ្លូវជាលក្ខណៈប្រចាំខាងលើ ដោយបញ្ចប់ការថែទាំដំណាក់កាលទី១ ជាស្ថាពរ៕

រាជធានីភ្នំពេញ៖  នាថ្ងៃពុធ ២រោច-ព្រហស្បតិ៍ ៣រោច ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី ២១-២២ ខែសីហា ឆ្នាំ២០២៤ នៅទីស្តីការគណៈរដ្ឋមន្រ្តី លោកជំទាវ ឡាយ វីរៈបុត្រ អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រី ក្រសួងអភិវឌ្ឍន៍ជនបទ បានអញ្ជើញចូលរួមកិច្ចប្រជុំអន្តរក្រសួង ដើម្បីពិនិត្យ និងពិភាក្សាបន្តលើសេចក្តីព្រាងអនុក្រឹត្យស្តីពីអនាម័យនៃម្ហូបអាហារសម្រាប់មនុស្ស ក្រោមអធិបតី ឯកឧត្តម ឡេង សេង រដ្ឋលេខាធិការ ទីស្តីការគណពរដ្ឋមន្រ្តី ។​ កិច្ចប្រជុំនេះមានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី អញ្ជើញពីក្រសួង ស្ថាប័ន ក្រុមប្រឹក្សាអ្នកច្បាប់ និងក្រុមប្រឹក្សាសេដ្ឋកិច្ច ចំនួន ៧៨រូប។

 

គួរបញ្ជាក់ផងដែរថា សេចក្តីព្រាងអនុក្រឹត្យនេះ មាន ១៤ជំពូក ៥២មាត្រា និងឧបសម្ព័ន្ធចំនួន ១១ ដែលស្នើឡើងដោយក្រសួងពាណិជ្ជកម្ម ហើយបានដាក់ជូនកិច្ចប្រជុំអន្តរក្រសួង ដើម្បីពិភាក្សាកែសម្រួល។ ជាលទ្ធផលនៃកិច្ចពិភាក្សានេះ អង្គប្រជុំបានពិភាក្សាដល់ជំពូកទី៥  ហើយគ្រោងនឹងរៀបចំពិភាក្សាបន្តនៅពេលកិច្ចប្រជុំក្រោយទៀត ដើម្បីបញ្ចប់សេចក្ដីព្រាងអនុក្រឹត្យនេះឲ្យទាន់ពេលវេលាកំណត់។