ខេត្តបាត់ដំបង ៖ នាថ្ងៃអង្គារ ១១ កើត ខែអាសាឍ ឆ្នាំរោង ឆស័ក ព.ស.២៥៦៨ត្រូវនឹងថ្ងៃទី១៦ ខែកក្កដា ឆ្នាំ២០២៤ គម្រោង “ការកសាងភូមិសន្តិភាព តាមរយៈការអភិវឌ្ឍន៍សហគមន៍ជនបទចម្រុះ” របស់ក្រសួងអភិវឌ្ឍន៍ជនបទ តាមរយៈការគាំទ្រថវិកាពីទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានរៀបចំទិវាចម្ការបង្ហាញ លើកទី២ នៅភូមិស៊ុង១ ឃុំស៊ុង ស្រុកសំឡូត ខេត្តបាត់ដំបង ក្នុងគោលបំណងពង្រីក និងលើកកម្ពស់កសិដ្ឋានបច្ចេកទេស កសិកម្មឆ្លាតវៃ និងផ្ទេរចំណេះដឹងកសិកម្មល្អកម្ពុជា(CamGAP) ដល់ក្រុមកសិករ ក្នុងតំបន់គោលដៅគម្រោង។ ទិវានេះមានការអញ្ជើញចូលរួមពីក្រុមសម្របសម្រួលគម្រោងនៃមន្ទីរអភិវឌ្ឍន៍ជនបទខេត្តបាត់ដំបង ទីប្រឹក្សាគ្រប់គ្រងគម្រោង អាជ្ញាធរស្រុក ឃុំ និងភូមិ ក្រុមកសិករគោលដៅសរុប ចំនួន ៦៧នាក់ ស្រី ៣៣នាក់ នៅភូមិចំការស្រូវ ឃុំកំពង់ល្ពៅ ស្រុកសំឡូត ខេត្តបាត់ដំបង។

សូមបញ្ជាក់ ៖ គម្រោងភូមិសន្តិភាពក្នុងគោលដៅស្រុកសំឡូត បានជ្រើរើសមេក្រុមកសិករចំនួន ១៥ក្រុម និងកសិករគំរូចំនួន ៣៥៨គ្រួសារ ដើម្បីបណ្ដុះបណ្ដាល និងផ្ទេរចំណេះដឹងបច្ចេកទេសកសិកម្មឆ្លាតវៃ ឬកសិកម្មល្អកម្ពុជា(CamGAP) ដើម្បីផ្លែឈើ និងផលិតកម្មបន្លែសុវត្ថិភាព៕

ខេត្តកំពង់ធំ ៖ នាថ្ងៃអង្គារ ៣រោច ខែអាសាឍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៣ ខែកក្កដា ឆ្នាំ២០២៤ នៅសាលប្រជុំមន្ទីរអភិវឌ្ឍន៍ជនបទខេត្តកំពង់ធំ មានកម្មវិធីបណ្តុះបណ្តាលស្តីពីការជម្រុញការសាងសង់បង្គន់អនាម័យជាមួយនឹងបច្ចេកវិទ្យាបង្គន់អនាម័យសមស្រប ជាពិសេសបច្ចេកវិទ្យាអនាម័យសមស្របសម្រាប់តំបន់បរិស្ថានប្រឈម ក្រោមអធិបតីភាពលោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ ដោយមានការចូលរួមលោក តាន់ វាសនាប្រធានមន្ទីរស្តីទី តំណាងអង្គការ RTI រួមជាមួយវត្តមានចូលរួម មន្ត្រីរដ្ឋបាលស្រុក ក្រុមប្រឹក្សាឃុំ សង្កាត់ និងអង្គការដៃគូពាក់ព័ន្ធ ក្នុងវិស័យទឹកស្អាត និងអនាម័យជនបទ សរុបចំនួន ៤០នាក់ ស្រ្តី ១១នាក់។

 

វគ្គបណ្តុះបណ្តាលនេះ មានគោលបំណងដើម្បីគាំទ្រដល់សកម្មភាពពង្រឹងសមត្ថភាពមន្ទីរអភិវឌ្ឍន៍ជនបទខេត្ត មន្ត្រីរដ្ឋបាលស្រុក ក្រុមប្រឹក្សាឃុំ សង្កាត់ និងដៃគូពាក់ព័ន្ធ ក្នុងវិស័យទឹកស្អាត និងអនាម័យជនបទ អោយយល់ដឹង ពីមូលដ្ឋានគ្រឹះនៃអនាម័យ និងបច្ចេកវិទ្យាបង្គន់អនាម័យសមស្រប ជាពិសេសបច្ចេកវិទ្យាអនាម័យសមស្របសម្រាប់តំបន់បរិស្ថានប្រឈម៕

ខេត្តត្បូងឃ្មុំ ៖ នាថ្ងៃអង្គារ ៣រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៣ ខែកក្កដា ឆ្នាំ២០២៤ ឯកឧត្ដម អ៊ឹង វណ្ណា អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ប្ញទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ រួមដំណើរដោយ វិស្វករគម្រោង ព្រមទាំងលោក ជៀស តេង ប្រធានការិយាល័យផ្លូវលំជនបទនៃមន្ទីរអភិវឌ្ឍន៍ជនបទខេត្តត្បូងឃ្មុំ បានអញ្ជើញទៅពិនិត្យខ្សែផ្លូវដែលកំពុងបោសម្អាតមីន និងយុទ្ធភ័ណ្ឌមិនទាន់ផ្ទុះក្នុងក្របខណ្ឌគម្រោងខ្សែច្រវាក់តម្លៃប្រកបដោយភារៈបរិស្ថាន រួមមាន៖

១ – ផ្លូវដែលមានចំនួន ៧កំណាត់ប្រវែងសរុប ២៩ ៤៥៥ម៉ែត្រ ស្ថិតនៅស្រុកអូររាំងឪ ស្រុកត្បូងឃ្មុំ ស្រុកតំបែរ និងស្រុកពញាក្រែក

២- ផ្លូវសេដាសែនជ័យទៅភូមិរំពាក់២ មានប្រវែង ៧ ១៦៧ម៉ែត្រ ស្ថិតនៅក្នុងឃុំសេដាសែនជ័យ ស្រុកតំបែរ ខេត្តត្បូងឃ្មុំ

៣- សេដាសែនជ៍យទៅភូមិរំពាក់២ ជាផ្លូវបេតុងប្រវែង ៤៤៨ម៉ែត្រ ស្ថិតនៅក្នុង ឃុំសេដាសែនជ័យ ស្រុកតំបែរ ខេត្តត្បូងឃ្មុំ

៤- ផ្លូវភូមិជ័យនិគមទៅចារ និងស្ទឹងតាថុកមានប្រវែង ៥ ៦២១ម៉ែត្រ ស្ថិតនៅ ឃុំកណ្តោលជ្រុំ ស្រុកពញ្ញាក្រែក៕

រាជធានីភ្នំពេញ៖​ នារសៀលថ្ងៃចន្ទ ២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែកក្កដា ឆ្នាំ២០២៤ ឯកឧត្តម​ ប៊ុន ច័ន្ទវណ្ណៈ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំត្រួតពិនិត្យលទ្ធផលការងារប្រចាំខែកក្កដា និងលើកទិសដៅការងារខែសីហា ឆ្នាំ២០២៤ របស់កម្មវិធីទី៤ ដោយមានការអញ្ជើញចូលរួមពីសំណាក់ ឯកឧត្ដម-លោជំទាវជារដ្ឋលេខាធិការ ឯកឧត្ដម-លោជំទាវជាអនុរដ្ឋលេខាធិការ អគ្គនាយករង អគ្គាធិការរង ឯកឧត្តម-លោកជំទាវជាទីប្រឹក្សាអមក្រសួង ព្រមទាំងលោក លោកស្រីជាប្រធាន-អនុប្រធាននាយកដ្ឋានសរុបចំនួន ៣២រូប។

 

កិច្ចប្រជុំនេះរៀបចំឡើងក្នុងគោលបំណងពិនិត្យលទ្ធផលការងារប្រចាំខែកក្កដានិងលើកទិសដៅការងារប្រចាំខែសីហា ឆ្នាំ២០២៤ របស់កម្មវិធីទី៤ ដោយ​ពិភាក្សាស្វែងរកដំណោះស្រាយ បញ្ហាផ្សេងៗ និងសំណូមពរបន្ថែមដើម្បីដាក់បញ្ចូលទៅក្នុងរបាយការណ៍ និងទិសដៅអនុវត្តបន្ត៕

ខេត្តកំពត៖ នាព្រឹកថ្ងៃអង្គារ ៣រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៣ ខែកក្កដា ឆ្នាំ២០២៤ ឯកឧត្តម ភួង សោភា រដ្ឋលេខាធិការ និងជាអ្នកសម្របសម្រួលគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទដើម្បីទីផ្សាកសិករ និងពាណិជ្ជូបណីយកម្មកសិកម្ម (SAAMBAT) តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី ការកសាងសមត្ថភាពក្នុងការយល់ដឹងអំពី ការរៀបចំសុវត្ថិភាពផ្លូវជនបទនៅកម្ពុជា។

 

វគ្គបណ្តុះបណ្តាលនេះ មានការគាំទ្រពីធនាគារវិនិយោគ (EIB) ,ក្រុមហ៊ុន DAI Global និងមានការអញ្ជើញជាគ្រូឧទ្ទេសដោយ លោក Mark Thriscutt និង លោកស្រី Betty Wetering ជាអ្នកបច្ចេកទេស មកពីប្រទេសហូឡង់។

 

វគ្គបណ្តុះបណ្តាលនេះមានសមាសភាពចូលរួមពីសំណាក់ លោកប្រធានមន្ទីរអភិវឌ្ឍន៍ជនបទខេត្តកំពត និងលោក លោកស្រីជាមន្រ្តីបច្ចេកទេស នៃមន្ទីរអភិវឌ្ឍន៍ជនបទខេត្តកំពត, ខេត្តកែប, ខេត្តព្រះសីហនុ, ខេត្តតាកែវ, ខេត្តកោះកុង និងខេត្តកំពង់ស្ពឺ សរុបប្រមាណ ៤៣ នាក់។

 

ក្នុងឱកាសនោះ ឯកឧត្តមរដ្ឋលេខាធិការ បានពាំនាំនូវបណ្តាំសាកសួរសុខទុក្ខពីសំណាក់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជូនដល់សិក្ខាកាមទាំងអស់ ព្រមទាំងបានបញ្ជាក់ថា៖

 

–  វគ្គបណ្ដុះបណ្ដាលនេះ នឹងបង្ហាញអំពីគោលបំណង និងតួនាទីនៃសៀវភៅណែនាំសម្រាប់ការរចនាផ្លូវជនបទប្របកដោយសុវត្ថិភាព

–  ស្គាល់ពីការគ្រប់គ្រងរបស់ក្រសួង, មន្ទីរ និងវិស្វករផ្លូវថ្នល់ជាមួយនឹងទិដ្ឋិភាពសំខាន់ៗនៃសុវត្ថិភាពផ្លូវថ្នល់

–  ចែករំលែកចំណេះដឹងជាមូលដ្ឋានដែលបានបញ្ចូលក្នុងសៀវភៅណែនាំសម្រាប់ការរចនាផ្លូវជនបទប្រកបដោយសុវត្ថិភាព ជាមួយក្រសួង មន្ទីរ និងវិស្វករផ្លូវថ្នល់ក្នុងមុខវិជ្ជាផ្សេងៗទាក់ទងនឹងការគ្រប់គ្រងសុវត្ថិភាពផ្លូវថ្នល់

–  ណែនាំពីការអភិវឌ្ឍចុងក្រោយបង្អស់នៃវិធីសាស្ត្រវាយតម្លៃសុវត្ថិភាពផ្លូវថ្នល់ ដូចមានចែងក្នុងសៀវភៅណែនាំសម្រាប់ការរចនាផ្លូវជនបទប្រកបដោយសុវត្ថិភាព៕

រាជធានីភ្នំពេញ ៖ នៅថ្ងៃចន្ទ ២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែកក្កដា ឆ្នាំ២០២៤  ឯកឧត្តម ផូ ផារិទ្ធ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញចូលរួមសិក្ខាសាលាពិគ្រោះយោបល់ ស្តីពី សេចក្តីព្រាងក្របខ័ណ្ឌតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្រ្តបញ្ចកោណ ដំណាក់កាលទី១ ក្រោមអធិបតីភាព ឯកឧត្តម វង្ស៊ី វិស្សុត ឧបនាយករដ្ឋមន្រ្តីប្រចាំការ រដ្ឋមន្ត្រីទីស្តីការគណៈរដ្ឋមន្ត្រី ដោយមានសមាសភាពអញ្ជើញចូលរួមពីក្រសួង-ស្ថាប័ន និងដៃគូអភិវឌ្ឍន៍ចំនួន ២០០រូប។

សិក្ខាសាលាពិគ្រោះយោបល់បានពិភាក្សាទៅលើ សូចនាករសម្រាប់ត្រួតពិនិត្យ និងវាយតម្លៃយុទ្ធសាស្រ្តបញ្ចកោណ ដំណាក់កាលទី១ មានកន្សោម សូចនាករចំនួន ១២ និងសូចនាករចំនួន ៥០ ក្នុងនោះ ក្រសួងអភិវឌ្ឍន៍ជនបទ បានចូលរួមអនុវត្តសូចនាករចំនួន ៣ គឺ៖

១. អនុបាតតម្លៃបាត់បង់ និងខូចខាតដោយគ្រោះមហន្តរាយ ធៀបនឹង ផសស (ផលិតផលក្នុងស្រុកសរុប)

២. ការយល់ឃើញរបស់ក្រសួង ស្ថាប័ន លើប្រសិទ្ធភាពនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ

៣. ប្រសិទ្ធភាពចំណាយសាធារណៈលើវិស័យអាទិភាពរួមមាន៖ កសិកម្ម ធនធានទឹក សាធារណការ អភិវឌ្ឍន៍ជនបទ អប់រំ និងសុខាភិបាល៕

រាជធានីភ្នំពេញ ៖ នាព្រឹកថ្ងៃសុក្រ ១៤កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៩ ខែកក្កដា ឆ្នាំ២០២៤ និងព្រឹកថ្ងៃចន្ទ ២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែកក្កដា ឆ្នាំ២០២៤ ឯកឧត្តម អ៊ិន ចន្ថា រដ្ឋលេខាធិការ និងជាប្រធានកម្មវិធីទី៣ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំពិភាក្សាវឌ្ឍនភាពការងារប្រចាំខែកក្កដា និងទិសដៅការងារបន្ត ខែសីហា ឆ្នាំ២០២៤ របស់កម្មវិធីទី២ ដោយមានការចូលរួមពីសំណាក់ ឯកឧត្តម លោកជំទាវរដ្ឋលេខាធិការ អនុរដ្ឋលេខាធិការ តំណាងឯកឧត្តមអគ្គនាយកទាំងពីរ អគ្គនាយករង ឯកឧត្តម លោក លោកស្រីប្រធាននាយកដ្ឋាន ជាថ្នាក់ដឹកនាំ ព្រមទាំងមន្ដ្រីរាជការ នៃនាយកដ្ឋានទាំង ៤ ក្នុងកម្មវិធីទី៣ សមាភាពសរុប ៣៧នាក់៕