ខេត្តកំពង់ឆ្នាំង៖ ថ្ងៃព្រហស្បតិ៍​ ១២រោច  ខែអាសាឍ ឆ្នាំរោង​ ឆស័ក ព.ស២៥៦៨ ត្រូវនិងថ្ងៃទី១ ខែសីហា ឆ្នាំ២០២៤ លោក​ ជិន​ រដ្ឋា​ ប្រធាន​មន្ទីរ​អភិវឌ្ឍន៍ជនបទខេត្តកំពង់ឆ្នាំង​ អមដំណើរ​ដោយ​ លោក​ ឈុន សុផាត​ ប្រធាន​ការិយាល័យ​ផ្គត់ផ្គង់​ទឹកជនបទ​  បានទទួលក្រុមការងារនាយកដ្ឋានផ្គត់ផ្គង់ទឹកជនបទ ដឹកនាំដោយ​ លោក ឡុង វណ្ណដា អនុប្រធាននាយកដ្ឋាន ចុះពិនិត្យ​ និងវាយតម្លៃសមិទ្ធផលប្រពន្ធ័ផ្គត់ផ្គង់ទឹក ដែលអនុវត្តដោយមន្ទីរ​ ថវិកាជាតិឆ្នាំ២០២៤ រួមមានអណ្តូងស្នប់អាហ្រ្វីដេវ ចំនួន៨ កន្លែង ស្ថិតនៅក្នុង ភូមិមានជ័យ​ ឃុំគោកបន្ទាយ ភូមិទឹកចេញ ឃុំជើងគ្រាវ ភូមិត្បែងខ្ពស់ គោកណាំង​ ឃុំតាំងក្រសាំង  ភូមិខ្នាច​ ឃុំ​សេដ្ឋី ភូមិថ្មស​ ឃុំខ្នារឆ្មា ភូមិ​អូរកាខុប​ ឃុំក្រាំងល្វា ភូមិមា​ នកកើត​ ឃុំត្បែងខ្ពស់   និងស្តារស្រះសហគមន៍​ ចំនួន១កន្លែង  ស្ថិតនៅក្នុងភូមិត្រពាំងត្រាច ឃុំជើងគ្រាវ ស្រុករលាប្អៀរ​។

ខេត្តព្រះវិហារ៖ នៅថ្ងៃអង្គារ-ពុធ ១០-១១រោច ខែអាសាឍ ឆ្នាំរោង ឆស័ក ព.ស. ២៥៦៨ ត្រូវនិងថ្ងៃទី៣០-៣១ ខែកក្កដា ឆ្នាំ២០២៤  លោកវេជ្ជបណ្ឌិត លន់ សាយតេង ប្រធាននាយដ្ឋានថែទាំសុខភាពជនបទ  អញ្ជើញជាអធិបតីភាព ក្នុងវគ្គបណ្តុះបណ្តាលស្តីអំពី “ការជម្រុញការសាងសង់បង្គន់អនាម័យជាមួយនឹងបច្ចេកវិទ្យាសមស្រប និងប្រកបដោយបរិយាបន្ន” និងសមាសភាពអញ្ជើញចូលរួមមាន លោកស្រី ឆាយ សុវណ្ណា អនុប្រធានមន្ទីរអភិវឌ្ឍន៍ជនបទខេត្តព្រះវិហារ លោកស្រី អ៊ឹង សុធា អភិបាលរងនៃគណៈអភិបាលស្រុករវៀង កញ្ញា Ug Yen ទីប្រឹក្សាបច្ចេកទេស(អូស្រ្តាលី)នៃអង្គការវិស្វករគ្មានព្រំដែន (Engineers Without border Australia) លោក កាតំម សូណាវន អនុការិយាល័យអនាម័យបរិស្ថាន  មន្រ្តីមន្ទីរអភិវឌ្ឍន៍ជនបទខេត្តព្រះវិហារ លោក លោកស្រីអភិបាលនៃគណៈអភិបាល-អភិបាលរងនៃគណៈអភិបាល ៨ ស្រុក-ក្រុង លោក លោកស្រីដែលជាជនបង្គោលអនាម័យ១៧ឃុំនៃស្រុករវៀងនិងស្រុកសង្គមថ្មី ដែលរៀបចំឡើងដោយក្រុមការងារផ្នែកទឹកស្អាត និងអនាម័យ (WASHSDO) នៃគម្រោងអភិវឌ្ឍន៍កុមារតូច ដែលទទួលបានការគាំទ្រមូលនិធិពីទីភ្នាក់ងារជំនួយអាមេរិក USAID Cambodia បានគាំទ្រនិងសហការណ៍ជាមួយអង្គការដៃគូ EWB & WASH SDO សរុបចំនួន៤៦នាក់ (ស្រី១៥នាក់)។

វគ្គបណ្តុះបណ្តាលមានគោលបំណងសំខាន់ដើម្បីពង្រឹងសមត្ថភាពដល់អ្នកចូលរួម អោយទទួលបានចំណេះដឹងពីវិធីសាស្រ្ត នៃការជំរុញការសាងសង់បង្គន់អនាម័យជាមួយនឹងបច្ចេកវិទ្យាបង្គន់អនាម័យសមស្រប និងប្រកបដោយបរិយាបន្ន ជាពិសេសបច្ចេកវិទ្យាបង្គន់អនាម័យសមស្រប សម្រាប់តំបន់បរិស្ថានប្រឈមដើម្បីជួយជំរុញភូមិ ឃុំ និងស្រុក ឱ្យសម្រេចបានតាមផែនការគោលដៅការបញ្ចប់ការបន្ទោបង់ពាសវាលពាសកាល(ODF) នៅឆ្នាំ ២០២៤។

ខេត្តពោធិ៍សាត់៖ នាព្រឹកថ្ងៃព្រហស្បត៍ ១២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១ ខែសីហា ឆ្នាំ២០២៤ ឯកឧត្ដម ជី ស៊ីថា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រី ក្រសួងអភិវឌ្ឍន៍ជនបទ បានអញ្ជើញចូលរួមកិច្ចប្រជុំអន្ដរក្រសួងស្ដីពីការរៀបចំប្លង់គោលប្រើប្រាស់ដីស្រុកវាលវែង ខេត្តពោធិ៍សាត់ នៅទីស្ដីការក្រសួងរៀបចំដែនដី នគរូបនីយកម្ម និង សំណង់ ក្រោមអធិបតីភាពដ៏ខ្ពង់ខ្ពស់ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និង សំណង់ ដោយមានការចូលរួមពីឯកឧត្តម លោកជំទាវ លោក លោកស្រី តំណាងក្រសួង ស្ថាប័នពាក់ព័ន្ធ ព្រមទាំងអាជ្ញាធរខេត្តពោធិ៍សាត់ ។

រាជធានីភ្នំពេញ ៖ នាព្រឹកថ្ងៃព្រហស្បតិ៍ ១២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០១ ខែសីហា ឆ្នាំ២០២៤ នៅទីស្តីការក្រសួង ឯកឧត្តម ម៉ា សុវណ្ណា អនុរដ្ឋលេខាធិការ និងជាប្រធានលេខាធិការដ្ឋានក្រុមការងាររៀបចំគោលនយោបាយជាតិអភិវឌ្ឍន៍ជនបទឆ្នាំ ២០២៥-២០៣៨ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំកិច្ចប្រជុំពិភាក្សាខ្លឹមសារនៃសេចក្តីផ្តើម សមិទ្ធផល បញ្ហា និងការប្រឈម នៃគោលនយោបាយជាតិអភិវឌ្ឍន៍ជនបទឆ្នាំ ២០២៥-២០៣៨ ដោយមានការចូលរួមពីឯកឧត្តម ចុង ផែត អនុរដ្ឋលេខាធិការ និងលោក ប៊ុន ចាន់ អគ្គនាយករង និងជាអនុប្រធានក្រុម ព្រមទាំងសមាជិកក្រុមសរុប ៦នាក់៕

រាជធានីភ្នំពេញ ៖ នាព្រឹកថ្ងៃសុក្រ ១៣រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០២ ខែសីហា ឆ្នាំ២០២៤ ឯកឧត្ដម អ៉ិនចន្ថា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈប្រតិភូក្រសួង អញ្ជើញទៅដាក់កម្រងផ្កា គោរពវិញ្ញាណក្ខន្ធសពលោកឧត្ដមសេនីយ៍ត្រី ស៊ុន ផល្លា និងសពលោក វរសេនីយ៍ទោ ខេង ឆៃយុទ្ធ បម្រើការងារផ្នែកហោះហើរ កងហោះហើរ កងហោះឧទ្ធម្ភាគចក្រ បញ្ជាការដ្ឋានកងទ័ពជើងអាកាស នៅទីតម្កល់សពមូលដ្ឋានទ័ពអាកាស រាជធានីភ្នំពេញ ។

សូមរំលឹកថា លោកឧត្ដមសេនីយ៍ត្រី ស៊ុន ផល្លា បានពលីក្នុងជន្មាយុ ៥២ឆ្នាំ និងលោក វរសេនីយ៍ទោ ខេង ឆៃយុទ្ធបានពលីក្នុងជន្មាយុ ៣៥ឆ្នាំ កាលពីថ្ងៃទី១២ ខែកក្កដា ឆ្នាំ២០២៤ ដោយគ្រោះថ្នាក់ក្នុងឧបទ្ទវហេតុធ្លាក់ឧទ្ធម្ភាគចក្រក្នុងពេលបំពេញបេសកកម្ម។

ឯកឧត្ដមរដ្ឋលេខាធិការ បានសម្ដែងនូវការចូលរួមរំលែកទុក្ខដោយក្តីក្រៀមក្រំបំផុតជាមួយក្រុមគ្រួសារនៃសពទាំងពីរ និងសូមឧទ្ទិសបួងសួងដល់ដួងវិញ្ញាណក្ខន្ធលោកទាំងពីរសូមបានទៅកាន់សុគតិភពកុំបីឃ្លៀងឃ្លាតឡើយ៕

រាជធានីភ្នំពេញ ៖ នាថ្ងៃពុធ ១១រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១ ខែសីហា ឆ្នំា២០២៤ នៅទីស្តីការក្រសួង ឯកឧត្តម ប៊ុន ច័ន្ទវណ្ណៈ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែកក្កដា និងលើកទិសដៅការងារបន្តសម្រាប់ខែសីហា ឆ្នាំ២០២៤ របស់នាយកដ្ឋានរដ្ឋបាល និងបុគ្គលិក ដោយមានការអញ្ជើញចូលរួមពីឯកឧត្តម ឌូ ដាលីតូ អនុរដ្ឋលេខាធិការ លោកជំទាវ លឹម មុយខេង ទីប្រឹក្សាក្រសួង ឯកឧត្តម គង់ វិទ្យា អគ្គនាយករង នៃអគ្គនាយកដ្ឋានរដ្ឋបាល និងហិរញ្ញវត្ថុ និងលោក លោកស្រី ប្រធាន អនុប្រធាននាយកដ្ឋាន ប្រធាន អនុប្រធានការិយាល័យ និងមន្ត្រីរាជការ នៃនាយកដ្ឋានរដ្ឋបាលនិងបុគ្គលិក សរុបចំនួន ៤៥នាក់៕

ខេត្តពោធិ៍សាត់៖ នាព្រឹកថ្ងៃពុធ ១១រោច ខែអាសាឍ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី៣១ ខែកក្កដា ឆ្នាំ ២០២៤ ឯកឧត្តមបណ្ឌិត លឹម អុីវ​ អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ដឹកនាំគណៈកម្មាធិការអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អមដំណើរដោយក្រុមការបច្ចេកទេសផ្លូវជនបទ​របស់មន្ទីរអភិវឌ្ឍន៍ជនបទខេត្តពោធិ៍សាត់ ចុះពិនិត្យគម្រោង ៣កន្លែង ដែលប្រើប្រាស់ថវិកា ក្នុងផែនការឆ្នាំ២០២៥ ដូចខាងក្រោម៖

១/​ ផ្លូវក្រាលល្បាយក្រួស ប្រវែង ៥,១គីឡូម៉ែត្រ និងសំណង់សិល្បការ្យ នៅតំបន់ដី​ សម្បទានសង្គមកិច្ចប៊ុនរ៉ានីសែនជ័យដំណាក់ត្រយឹង ស្ថិតនៅក្នុង ឃុំព្រងិល ស្រុកភ្នំក្រវាញ ខេត្តពោធិ៍សាត់។

២/​ ផ្លូវក្រាលកៅស៊ូ២ជាន់ ១ខ្សែប្រវែង ៧ គីឡូម៉ែត្រ ដោយតភ្ជាប់ពីឃុំអន្លង់វិល ស្រុកកណ្តៀង ទៅកាន់ ឃុំកំពង់ពោធិ៍ ស្រុកក្រគរ ខេត្តពោធិ៍សាត់។

៣/ស្ពាន ១កន្លែង ប្រវែង ១៤៤ម៉ែត្រ តភ្ជាប់ពីភូមិបោះពួយ ឃុំលាច ទៅភូមិព្រែក៣ ឃុំសំរោង ស្រុកភ្នំក្រវាញ ខេត្តពោធិ៍សាត់​ ។