ខេត្តបាត់ដំបង៖ នារសៀលថ្ងៃព្រហស្បតិ៍ ១២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១ ខែសីហា ឆ្នាំ២០២៤ ឯកឧត្ដមបណ្ឌិត សៅ ជីវ័ន្ត រដ្ឋលេខាធិការ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកសំពៅលូន ខេត្តបាត់ដំបង តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ បានអញ្ជើញ ដឹកនាំកិច្ចប្រជុំបូកសរុបលទ្ធផលការងារប្រចាំខែកក្កដា និងលើកទិសដៅការងារខែសីហា ឆ្នាំ២០២៤ របស់ក្រុមការងាររាជរដ្ឋាភិបាលចុះមូលដ្ឋានស្រុកសំពៅលូន ដោយមានការអញ្ជើញចូលរួមពី ឯកឧត្តម លោក លោកស្រីសមាជិកក្រុមការងារនៃស្រុកសំពៅលូន សរុប ៩៦នាក់។

 

ឯកឧត្ដមបណ្ឌិត សៅ ជីវ័ន្ត  បានជម្រាបជូនអង្គប្រជុំពី គោលនយោបាយរបស់រាជរដ្ឋាភិបាលដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដី ដែលបានដាក់ចេញនូវយុទ្ធសាស្រ្តបញ្ចកោណ ដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព ដែលមានអាទិភាពគន្លឹះចំនួន ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា ដែលជាមូលដ្ឋានគ្រឹះសម្រាប់ការអភិវឌ្ឍប្រទេសកម្ពុជា ឱ្យក្លាយទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលខ្ពស់នៅឆ្នាំ២០៥០៕

រាជធានីភ្នំពេញ៖ នារសៀលថ្ងៃព្រហស្បតិ៍ ១២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០១ ខែសីហា ឆ្នាំ២០២៤ នៅទីស្ដីការក្រសួង ឯកឧត្ដម បាន បូរ័ត្ន អគ្គនាយករដ្ឋបាល និងហិរញ្ញវត្ថុ បានដឹកនាំកិច្ចប្រជុំសិក្សាស្វែងយល់ពី មូលដ្ឋាននៃការគណនាសូចនាករសមិទ្ធកម្ម សូចនាករសមិទ្ធកម្មគន្លឹះសម្រាប់ការគ្រប់គ្រងទិន្នន័យរបាយការណ៍ប្រចាំខែរបស់អង្គភាពជំនាញ ។

កិច្ចប្រជុំនេះមានករចូលរួមពី ឯកឧត្ដម លោកជំទាវ ប្រធានក្រុមការងារទាំង៤  ឯកឧត្ដម លោក លោកស្រី ជាអគ្គាធិការរង អគ្គនាយករងបច្ចេកទេស ប្រធានគ្រប់នាយកដ្ឋាន និងលោក លោកស្រីប្រធានមន្ទីរអភិវឌ្ឍន៍ជនបទរាជធានី ខេត្តតាមប្រព័ន្ធនិម្មិត (Zoom)សរុបចំនួន ៩៦រូប។

ឯកឧត្ដម បាន បូរ័ត្ន បានសម្ដែងការស្វាគមន៍ និងបានអនុញ្ញាតឱ្យ លោក ផេង សំបូរ ប្រធាននាយកដ្ឋានផែនការ និងទំនាក់ទំនងសាធារណៈ បានធ្វើបទបង្ហាញពី គោលបំណងនៃការគណនាសូចនាករសមិទ្ធកម្ម និងសូចនករសមិទ្ធកម្មគន្លឹះ។

ឯកឧត្ដម អគ្គនាយក រដ្ឋបាល និងហិរញ្ញវត្ថុ បានផ្ដល់វេទិកាជូននាយកដ្ឋានជំនាញដើម្បីចូលរួមពិភាក្សា និងមន្ទីរជំនាញធ្វើបទបង្ហាញពី វិធីសាស្ត្រនៃការគណនាសូចនាករសមិទ្ធកម្ម និងសូចនាករសមិទ្ធកម្មគន្លឹះរបស់អង្គភាពជំនាញនីមួយៗ ៕

ខេត្តកណ្តាល៖ នាថ្ងៃពុធ ១១រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣១ ខែកក្កដា ឆ្នាំ២០២៤ ដោយចាប់ពីថ្ងៃទី២៨ ដល់ថ្ងៃទី០១ ខែសីហា ឆ្នាំ២០២៤នេះ សង្កាត់មួយចំនួនក្នុងក្រុងតាខ្មៅនិងឃុំមួយចំនួន ក្នុងស្រុកកណ្ដាលស្ទឹង ខេត្តកណ្ដាលបានទទួលរងគ្រោះដោយសារជំនន់ស្ទឹងព្រែកត្នោត ក្នុងនោះផងដែរដោយទទួលបានការណែនាំ និងការយកចិត្តទុកដាក់ខ្ពស់ពីសំណាក់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លោកស្រី ជី ថាវី ប្រធានមន្ទីរអភិវឌ្ឍន៍ជនបទ បានដឹកនាំថ្នាក់ដឹកនាំ និងមន្ត្រីរាជការនៃមន្ទីរអភិវឌ្ឍន៍ជនបទខេត្ត បានសហការជាមួយអាជ្ញាធរមូលដ្ឋាន បានចុះជួយអន្តរាគមន៍ភ្លាមៗ ជូនប្រជាពលរដ្ឋនៅភូមិអាចម៍កុក (នៅទីតាំងទំនប់ ៩៤ និងទំនប់៩៦) សង្កាត់កំពង់សំណាញ់ ក្រុងតាខ្មៅ និងភូមិអំពៅព្រៃ ឃុំកណ្តោក ស្រុកកណ្តាលស្ទឹង ខេត្តកណ្តាល ដែលបាននិងកំពុងរងគ្រោះដោយសារជំនន់ទឹកភ្លៀងហូរធ្លាក់ពីស្ទឹងព្រែកត្នោត និងខេត្តកំពង់ស្ពឺ បណ្តាលឱ្យមានការលិចលង់លំនៅដ្ឋានរបស់បងប្អូនប្រជាពលរដ្ឋប្រមាណជា ៤០៤គ្រួសារ។

 

ក្នុងនោះមន្ទីរអភិវឌ្ឍន៍ជនបទខេត្ត បានចូលរួមជួយអន្តរាគមន៍ភ្លាមៗ ដល់បងប្អូនប្រជាពលរដ្ឋដែលលិចលង់លំនៅដ្ឋាន ជាពិសេសបងប្អូនប្រជាពលរដ្ឋដែលបានឡើងមកសាងសង់រោងតង់នៅទីទួលសុវត្ថិភាព មន្ទីរអភិវឌ្ឍន៍ជនបទខេត្ត បានសហការជាមួយអាជ្ញាធរមូលដ្ឋានបានធ្វើការផ្គត់ផ្គង់ទឹកស្អាតជូនបងប្អូនប្រជាពលរដ្ឋដែលកំពុងស្នាក់នៅទីតាំង (ទំនប់៩៤ និងទំនប់៩៦) នៅភូមិអាចម៍កុក សង្កាត់កំពង់សំណាញ់ ដែលក្នុងនោះក្រុមការងារមន្ទីរ បានដាក់ធុងស្តុកទឹកចំណុះ ១០០០លីត្រ ចំនួន ២ធុង អមដោយធុងទឹកចំណុះ ២០០លីត្រ ចំនួន ២៤ធុង និងប៊ីដុងទឹកចំណុះ ២០លីត្រ ចំនួន ១៥០ប៊ីដុង

ព្រមទាំងបានសាងសង់បង្គន់អនាម័យជូនបងប្អូនប្រជាពលរដ្ឋសម្រាប់ប្រើប្រាស់ផងដែរ។

 

បច្ចុប្បន្នក្រុមការងារមន្ទីរបាននិងកំពុងបន្តការងារផ្គត់ផ្គង់ទឹកស្អាតជាប្រចាំថ្ងៃជូនបងប្អូនប្រជាពលរដ្ឋ រហូតទឹកជំនន់នេះស្រកទៅវិញ ដែលអាចឱ្យប្រជាពលរដ្ឋចូលទៅស្នាក់នៅតាមលំនៅដ្ឋានរៀងៗខ្លួនដូចដើមវិញ។

ខេត្តបាត់ដំបង៖ នាថ្ងៃព្រហស្បតិ៍ សុក្រ  ១២ រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០១ ខែសីហា ឆ្នាំ២០២៤ ឯកឧត្ដមបណ្ឌិត ចាន់ ដារ៉ុង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ  បានដឹកនាំក្រុមការងារបច្ចេកទេសអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អមដំណើរដោយក្រុមការបច្ចេកទេសផ្លូវជនបទរបស់មន្ទីរអភិវឌ្ឍន៍ជនបទខេត្ត ចុះពិនិត្យ និងវាយតំលៃគម្រោងចំនួន ៦ កន្លែង ដែលបានគ្រោងប្រើប្រាស់ថវិកា ក្នុងផែនការឆ្នាំ២០២៥ ដូចខាងក្រោម៖

– ខ្សែទី១. ផ្លូវក្រាលដីល្បាយក្រួស ផ្លូវពីភូមិព្រែកត្រប ឃុំព្រែកនរិន្ទ ទៅភូមិបាក់ព្រា ឃុំព្រៃចាស់ ប្រវែង ៥ គីឡូម៉ែត្រ ស្ថិតក្នុងឃុំព្រែកនរិន្ទ, ឃុំព្រៃចាស់ ស្រុកឯកភ្នំ ។

– ខ្សែទី២. ផ្លូវក្រាលដីល្បាយក្រួស ផ្លូវពីផ្លូវជាតិលេខ៥៧បេ(ភូមិខ្នាចរមាស) ទៅស្រែ ប្រវែង ២,២៧គីឡូម៉ែត្រ ទទឹង ៥ម៉ែត្រ និងផ្លូវក្រាលកៅស៊ូពីជាន់ ប្រវែង ១,៣ គីឡូម៉ែត្រ ទទឹង ៧ ម៉ែត្រ និងស្ពានបេតុង ០១កន្លែង ប្រវែង ១៥ ម៉ែត្រ  និងលូមូល ០៧កន្លែង ស្ថិតក្នុងភូមិខ្នាចរមាស ឃុំខ្នាចរមាស ស្រុកបវេល ។

– ខ្សែទី៣. ពីភូមិបឹងរុន ឃុំសំឡូត ទៅ ភូមិតាសាញជើង ឃុំតាសាញ ស្រុកសំឡូត ប្រវែង ៨ គីឡូម៉ែត្រស្ថិតក្នុងឃុំសំឡូត, ឃុំតាសាញ  ស្រុកសំឡូត។

– ខ្សែទី៤. ដីសម្បទានសង្គមកិច្ច ប្រវែង ១៦ គីឡូម៉ែត្រ និងសំណង់លូ ស្ថិតក្នុងភូមិគោករកា ឃុំដូនបា ស្រុកគាស់ក្រឡ។

– ខ្សែទី៥. ពីរង្វង់មូលគាស់ក្រឡ ឃុំឆ្នាល់មាន់ ស្រុកគាស់ក្រឡ ទៅ អក្សរតេ ភូមិព្រៃធំ ឃុំកំពង់ល្ពៅ ប្រវែង ៤,៥ គីឡូម៉ែត្រស្ថិតក្នុងស្រុកគាស់ក្រឡ និងស្រុមសំឡូត។

– ខ្សែទី៦. ផ្លូវក្រាលកៅស៊ូពីរជាន់ ពីភូមិរូង១ ទៅភូមិរូង២ ប្រវែង ៥ គីឡូម៉ែត្រ ទទឹង ៨ម៉ែត្រ ស្ថិតក្នុងឃុំព្រៃត្រឡាច ស្រុករុក្ខគីរី ។

រាជធានីភ្នំពេញ ៖នាថ្ងៃព្រហស្បតិ៍ ១២រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១ ខែសីហា ឆ្នាំ២០២៤ ឯកឧត្តមបណ្ឌិត នួន ដាញ៉ិល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយឯកឧត្តម ហួត សារឹម អនុរដ្ឋលេខាធិការ បានអញ្ជើញដឹកនាំគណៈកម្មការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ដើម្បីត្រួតពិនិត្យ និងវាយតម្លៃបញ្ចប់សុពលភាពលើការងារស្ថាបនាផ្លូវចំនួន ៣គម្រោង នៅខេត្តតាកែវ កំពង់ស្ពឺ និងខេត្តព្រះសីហនុ អនុវត្តដោយនាយកដ្ឋានផ្លូវលំជនបទ រួមមានដូចខាងក្រោម ៖

 

គម្រោងទី១ ៖ ការងារស្ថាបនាស្ពានបេតុង ចំនួន១កន្លែង ប្រវែង ៣០ម៉ែត្រ ទទឹង ៨ម៉ែត្រ និងស្ថាបនាផ្លូវក្រាលដីល្បាយក្រសួងសងខាងក្បាលស្ពានម្ខាងៗ ប្រវែង ១០០ម៉ែត្រ ទទឹង ៨ម៉ែត្រ ស្ថិតនៅភូមិតាហៀន ឃុំព្រៃយុថ្កា ស្រុកកោះអណ្តែត ខេត្តតាកែវ។

 

គម្រោងទី២ ៖ ការងារស្ថាបនាផ្លូវក្រាលកៅស៊ូពីរជាន់ (DBST) ចំនួន ១ខ្សែ មាន ២កំណាត់ ប្រវែងសរុប ៣ ២០០ម៉ែត្រ និងសំណង់សិល្បការ្យមួយចំនួន ស្ថិតនៅភូមិច្រកត្រាច ឃុំមហាសាំង ទៅភូមិក្រាំងប្រស្រុក ឃុះគិរីវ័ន្ត ស្រុកភ្នំស្រួច ខេត្តកំពង់ស្ពឺ។

 

គម្រោងទី៣ ៖ ការងារស្ថាបនាផ្លូវក្រាលដីក្រួស ចំនួន ១ខ្សែ ប្រវែង ៣ ២០០ម៉ែត្រ  ទទឹង ៨ម៉ែត្រ និងសំណង់សិល្បការ្យមួយចំនួន ស្ថិតនៅក្នុងដីសម្បទានសង្គមកិច្ច ភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ។

 

បន្ទាប់ពីបានត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណៈកម្មការអន្តរក្រសួងរួចមក គណៈកម្មាធិការបានឯកភាព និងទទួលយកការអនុវត្តការងារបញ្ចប់រយៈពេលធានាសុពលភាព តាមការស្នើសុំរបស់អ្នកទទួលការ។ ទន្ទឹមនឹងនេះ គណៈកម្មាធិការអន្តរក្រសួងបានណែនាំដល់អ្នកទទួលការ និងបងប្អូនប្រជាពលរដ្ឋ ឱ្យជួយថែទាំផ្លូវនេះឱ្យបានដិតដល់ ដើម្បីធានាថាផ្លូវនេះអាចប្រើប្រាស់បានយូរអង្វែង បម្រើផលប្រយោជន៍ជូនប្រជាពលរដ្ឋ៕

រាជធានីភ្នំពេញ៖ នាព្រឹកថ្ងៃសុក្រ ១៣រោច ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០២ ខែកក្កដា ឆ្នាំ២០២៤ ឯកឧត្តម ពិត ករុណា អនុរដ្ឋលេខាធិការ និងជាអនុប្រធានគណកម្មាធិការសម្របសម្រួលការងារជាមួយអង្គការមិនមែនរដ្ឋាភិបាល តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំពិភាក្សាបិទបញ្ចប់កិច្ចព្រមព្រៀងសហប្រតិបត្តិការចាស់ និងពិនិត្យកិច្ចព្រមព្រៀងសហប្រតិបត្តិការថ្មី រវាងក្រសួងអភិវឌ្ឍន៍ជនបទ និងអង្គការភ្លែនអន្តរជាតិកម្ពុជា (Plan International Cambodia) ដើម្បីបន្តអនុវត្តគម្រោង”ការចាប់ផ្តើមជាមួយសុខភាពល្អ “ ដែលផ្តោតសំខាន់លើការងារ ទឹកស្អាត អនាម័យ អាហារូបត្ថម្ភ ការគាំពារនិងអភិវឌ្ឍន៍កុមារតូច ក្នុងខេត្តគោលដៅចំនួន៣គឺ ខេត្តសៀមរាប ខេត្តរតនគិរី និងខេត្តស្ទឹងត្រែង។ កិច្ចប្រជុំនេះមានការចូលរួមពី លោក ហង់ ហ៊ីប៊ុណ្ណា ប្រធានកម្មវិធីនិងភាពជាដៃគូ និង លោក អ៉ឹម ប៊ី ប្រធានកម្មវិធីភាពជាដៃគូ អង្គការភ្លែនអន្តរជាតិ លោក ផេង សំបូរ ប្រធាននាយកដ្ឋានផែនការនិងទំនាក់ទំនងសាធារណៈ និងអមដោយថ្នាក់ដឹកនាំនិងមន្រ្តីជំនាញ សរុប ចំនួន១១នាក់។

 

កិច្ចប្រជុំមានគោលបំណងសំខាន់ៗចំនួន២ដូចខាងក្រោម៖

១. ពិនិត្យនិងបូកសរុបសមិទ្ធផលការងាររបស់អង្គការ រយៈពេល៣ឆ្នាំកន្លងមកនៃកិច្ចព្រមព្រៀងសហប្រតិបត្តិការចាស់ (២០២១-២០២៤)

២. ពិនិត្យនិងពិភាក្សានូវកម្មវិធីការងារ ផែនការសកម្មភាពនិងថវិកា របស់អង្គការរយៈពេល៣ឆ្នាំបន្តទៅមុខ ក្នុងកិច្ចព្រមព្រៀងសហប្រតិបត្តិការថ្មី (២០២៤-២០២៧)។

 

ជាលទ្ធផល កិច្ចប្រជុំបានប្រព្រឹត្តតាមរបៀបវារៈនិងក្រោមកិច្ចពិភាក្សា ផ្លាស់ប្តូរយោបល់លើប្រធានបទសំខាន់ៗបន្ថែមរួមមាន៖

១. និរន្តភាពនៃគម្រោង និងកម្មវិធីការងាររបស់អង្គការក្រោយបញ្ចប់ការងារ

២. ការចូលរួមនិងកិច្ចសហប្រតិបត្តិការរវាង ក្រសួងអភិវឌ្ឍន៍ជនបទ រដ្ឋបាលថ្នាក់ក្រោមជាតិ និងអង្គការ ក្នុងការអនុវត្តកម្មវិធីការងារនៅមូលដ្ឋាននិងខេត្តគោលដៅ។