ខេត្តព្រៃវែង កំពង់ចាម និងខេត្តព្រះវិហារ ៖ នាថ្ងៃអង្គារ ២កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៦ ខែសីហា ឆ្នាំ២០២៤ ឯកឧត្ដម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ប្ញទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អញ្ជើញទៅត្រួតពិនិត្យ វាយតម្លៃបញ្ចប់សុពលភាព លើការងារស្ថាបនា ស្តារឡើងវិញផ្លូវ ស្ពាន និងលូចំនួន ៣គម្រោង ស្ថិតនៅខេត្តព្រៃវែង ខេត្តកំពង់ចាម និងខេត្តព្រះវិហារ អនុវត្តដោយនាយកដ្ឋានវិស្វកម្មក្រសួងការពារជាតិ រួមមានដូចខាងក្រោម ៖

១. គម្រោងទី១ ៖ ការងារស្ថាបនាផ្លូវក្រាលកៅស៊ូពីរជាន់ប្រភេទ DBST ចំនួន ១ខ្សែ ប្រវែង ៤ ០០០ម៉ែត្រទទឹង ៦ម៉ែត្រ និងសំណង់សិល្បាការ្យមួយចំនួន តភ្ជាប់ពីភូមិអណ្តូងថ្មី ឃុំពានរោង និងភូមិក្បាលខ្វែក ឃុំស្វាយជ្រុំ ស្រុកមេសាង ខេត្តព្រៃវែង

២. គម្រោងទី២ ៖ ការងារស្ថាបនាស្ពានបេតុងចំនួន ១កន្លែង ប្រវែង ១០៨ម៉ែត្រ ទទឹង ១០ម៉ែត្រ ស្ថិតនៅភូមិគោហ៊េរ ឃុំព្រែកកុយ ស្រុកកងមាស ខេត្តកំពង់ចាម

៣. គម្រោងទី៣ ៖ ការងារស្តារឡើងវិញផ្លូវក្រាលដីល្បាយក្រួសចំនួន ១ខ្សែ ប្រវែង ១១ ៥០០ម៉ែត្រ ទទឹង ៧ម៉ែត្រ និងសំណង់សិល្បការ្យមួយចំនួន ស្ថិតនៅភូមិកោងយោង ទៅភូមិយាង ឃុំយាង ស្រុកជាំក្សាន្ត ខេត្តព្រះវិហារ។

ជាលទ្ធផលគណៈកម្មការអន្តរក្រសួង បានសម្រេចឯកភាពទទួលយកដោយបញ្ចប់រយៈពេលធានាសុពលភាពជាស្ថាបពរ ៕

ខេត្តពោធិ៍សាត់ ៖ នាថ្ងៃពុធ ៥កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី ៧ ខែសីហា ឆ្នាំ ២០២៤ ឯកឧត្តម ហួត សារឹម អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃដំណាក់កាលទី១ លើការងារថែទាំជាប្រចាំផ្លូវចំនួន ៧ខ្សែ ដោយក្រាលកៅស៊ូ DBST ប្រវែងសរុប ១០៨ ១៦០ម និងបំពាក់ស្លាកចរាចរចំនួន ៣១០ផ្លាក លើផ្លូវចំនួន៣ខ្សែ ស្ថិតនៅក្នុងឃុំកណ្តៀង ឃុំស្រែស្តុក ឃុំកោះជុំ ឃុំបឹងបត់កណ្តាល ឃុំស្នាមព្រះ ឃុំត្រពាំងជង ឃុំបឹងខ្នា ឃុំផ្ទះរុង ឃុំតាលោ ឃុំបាក់ចិញ្ចៀន សង្កាត់ផ្ទះព្រៃ ស្រុកកណ្តៀង ស្រុកបាកាន ស្រុកភ្នំក្រវ៉ាញ ស្រុកតាលោសែនជ័យ ក្រុងពោធិ៍សាត់ ខេត្តពោធិ៍សាត់ អនុវត្តដោយនាយកដ្ឋានផ្លូវលំជនបទ។

បន្ទាប់ពីបានធ្វើការត្រួតពិនិត្យរួចមក គណៈកម្មការអន្តរក្រសួង បានសម្រេចឯកភាពទទួលយកនូវការថែទាំផ្លូវជាលក្ខណៈប្រចាំទាំង ៧ខ្សែខាងលើ ដោយបញ្ចប់ការថែទាំដំណាក់កាលទី១ ជាស្ថាពរ៕

រាជធានីភ្នំពេញ ៖ នាព្រឹកថ្ងៃអង្គារ ៣កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៧ ខែសីហា ឆ្នាំ២០២៤ ឯកឧត្តមបណ្ឌិត សួស គង់ រដ្ឋលេខាធិការ និងជាអ្នកសម្របសម្រួលគម្រោងកែលម្អផ្លូវជនបទ ជំហានទី៣ (RRIP III) តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ដោយមានការអញ្ជើញចូលរួមពីឯកឧត្តមបណ្ឌិត ចាន់ ដារ៉ុង រដ្ឋលេខាធិការ និងជានាយកគម្រោង បានអញ្ជើញដឹកនាំកិច្ចប្រជុំដោយផ្ទាល់នៅទីស្តីការក្រសួងអភិវឌ្ឍន៍ជនបទ និងតាមរយៈប្រព័ន្ធនិម្មិតសម្រាប់មន្ទីរអភិវឌ្ឍន៍ជនបទខេត្តគោលដៅ (Virtual Meeting with Zoom) ដើម្បីពិនិត្យវឌ្ឍនភាពគម្រោងរួមគ្នា លើកទី៥ ក្រោមហិរញ្ញប្បទានរបស់ធនាគារអាហរ័ណ-នីហរ័ណកូរ៉េ។

សមាសភាពដែលបានអញ្ជើញចូលរួមមាន ថ្នាក់ដឹកនាំ និងមន្រ្តីក្រុមការងារអនុវត្តគម្រោង នៃក្រសួងអភិវឌ្ឍន៍ជនបទ តំណាងអគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រងបំណុល នៃក្រសួងសេដ្ឋកិច្ច និងហិរញ្ញវត្ថុ ក្រុមការងារការិយាល័យធនាគារអាហរ័ណ-នីហរ័ណកូរ៉េ (Korea Eximbank) ប្រចាំនៅរាជធានីភ្នំពេញ ដែលតំណាងដោយ លោកស្រី Minnie Chey ក្រុមទីប្រឹក្សាបច្ចេកទេស Seoyoung Engineering Co., Ltd ថ្នាក់ដឹកនាំ និងមន្រ្តីបច្ចេកទេសគម្រោង នៃមន្ទីរអភិវឌ្ឍន៍ជនបទខេត្តគោលដៅទាំង៥ ព្រមទាំងក្រុមហ៊ុនទទួលការសាងសង់ផ្លូវ។

គម្រោងបាននឹងកំពុងដំណើរការស្ថាបនាផ្លូវកម្រាលកៅស៊ូពីរជាន់ ចំនួន ៣៩ខ្សែ  ប្រវែងសរុប ៣៨៣,៨២គីឡូម៉ែត្រ នៅក្នុងខេត្តគោលដៅចំនួន ៥ រួមមាន ខេត្តតាកែវ កណ្តាល កំពង់ឆ្នាំង កំពង់ស្ពឺ និងខេត្តកំពត  ហើយវឌ្ឍនភាពនៃការអនុវត្តគម្រោង គិតត្រឹមដំណាច់ខែកក្កដា ឆ្នាំ២០២៤ គម្រោងសម្រេចបានលទ្ធផលជារួមប្រមាណ ៩៣% ដែលគ្រោងនឹងបញ្ចប់ដំណើរការសាងសង់ទាំងស្រុងនៅខែកញ្ញា ឆ្នាំ២០២៤ ខាងមុខ។

តំណាងធនាគារអាហរ័ណ – នីហរ័ណកូរ៉េ បានកោតសរសើរដល់ថ្នាក់ដឹកនាំ និងក្រុមការងារក្រសួងអភិវឌ្ឍន៍ជនបទ ក្រុមទីប្រឹក្សាបច្ចេកទេស ដែលបានខិតខំយកចិត្តទុកដាក់ក្នុងការងារអនុវត្តគម្រោង និងបានស្នើសុំជំរុញឲ្យបញ្ចប់ការងារដែលនៅសេសសល់បានជោគជ័យតាមផែនការ៕

ខេត្តព្រះវិហារ៖  នារសៀលថ្ងៃអង្គារ២កើត ខែស្រាពណ៍ ឆ្នាំរោង ឆស័ក ព.ស.២៥៦៨ត្រូវនឹងថ្ងៃទី៦ ខែសីហា ឆ្នាំ២០២៤ ឯកឧត្តម សាន វិសាល រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ដឹកនាំគណ:កម្មការអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសួងសេដ្ឋកិច្ច និងហិរញ្ញវត្ថុ អមដំណើរដោយប្រធានមន្ទីរអភិវឌ្ឍន៍ជនបទ និងមន្ត្រីបច្ចេកទេស បានចុះត្រួតពិនិត្យ វាយតម្លៃបញ្ចប់សុពលភាព លើការងារស្តាឡើងវីញ នូវផ្លូវក្រាលដីល្បាយក្រួសចំនួន ១ ខ្សែ ប្រវែង ១១,៥ គីឡូម៉ែត្រ ទទឹង ៧ ម៉ែត្រ កម្រាស់ ២០ ស.ម ចាប់ពីផ្លូវជាតិ៦២ ស្ថិតនៅភូមិកោងយោងដល់ភូមិយាង ឃុំយាង ស្រុកជាំក្សាន្ត អនុវត្តដោយកងវិស្វកម្ម ក្រសួងការពារជាតិ ។

បន្ទាប់ត្រួតពិនិត្យ និងវាយតម្លៃ ក្រុមការងារការបានប្រជុំពិភាក្សាយល់ព្រមទទួលបញ្ជប់សុពលភាពខ្សែផ្លូវខាងលើនេះ។

ឆ្លៀតក្នុងឱកាសនោះ ឯកឧត្ដម បានជួបសំណេះសំណាងជាមួយបងប្អូនប្រជាពលរដ្ឋដែលរស់នៅតាមសងខាងផ្លូវ ព្រមទាំងពាំនាំសារផ្ដាំផ្ញើសាកសួរសុខទុក្ខពី ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទផងដែរ៕

រាជធានីភ្នំពេញ៖ នារសៀលថ្ងៃអង្គារ ២កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៦ ខែសីហា ឆ្នាំ២០២៤ ឯកឧត្តម គី សុផល ប្រធាននាយកដ្ឋានអភិវឌ្ឍន៍សេដ្ឋកិច្ចជនបទ បានដឹកនាំកិច្ចប្រជុំបូកសរុបរលទ្ធផលការងារប្រចាំខែកក្កដា និងលើកទិសដៅខែសីហា ឆ្នាំ២០២៤ ដោយមានការចូលរួមពី ថ្នាក់ដឹកនាំ មន្រ្តីរាជការ និងមន្រ្តីកិច្ចសន្យា សរុបចំនួន ២៨រូប។

កិច្ចប្រជុំនេះរៀបចំឡើងដើម្បីបូកសរុបលទ្ធផលការងារដែលបានអនុវត្តកន្លងមករបស់ការិយាល័យជំនាញនីមួយៗ, រៀបចំផែនការសកម្មភាពដែលការិយាល័យនីមួយៗត្រូវអនុវត្ត នៅខែបន្ទាប់ ជាពិសេសដើម្បីពង្រឹងលើការងារគ្រប់គ្រង និងរដ្ឋបាលរបស់នាយកដ្ឋាន៕