ព្រឹកថ្ងៃសុក្រ ៧ កើត ខែមាឃ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី ៣១ ខែមករា ឆ្នាំ ២០២០ លោក លាភ សំណាង ប្រធាននាយកដ្ឋានរដ្ឋបាល និងបុគ្គលិក បានដឹកនាំមន្រ្តីរាជការក្រោមឱវាទនាយកដ្ឋានប្រជុំបូកសរុបលទ្ធផលការងារប្រចាំខែមករា និងពិភាក្សាលើកទិសដៅការងារអនុវត្ដសម្រាប់ខែកុម្ភៈ ឆ្នាំ២០២០ ដើម្បីពង្រេឹងរបៀបរបបការងារឲ្យកាន់តែប្រសើរ និងមានប្រសិទ្ធិភាពការងារ។
នៅថ្ងៃពុធ ៥កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែមករា ឆ្នាំ២០២០ ក្រសួងអភិវឌ្ឍន៍ជនបទបានដំណើរការសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារឆ្នាំ២០២០ ដែលមានសមាជិកចូលរួមសរុបចំនួន ៨០០រូប។ អង្គសន្និបាតបានឯកភាពលើរបាយការណ៍ស្តីពីលទ្ធផលការងារឆ្នាំ២០១៩ និងទិសដៅការងារសម្រាប់ឆ្នាំ២០២០ ដែលមានគោលដៅឆ្លើយតបទាំងស្រុងទៅនឹងផែនការយុទ្ធសាស្រ្តអភិវឌ្ឍន៍ជនបទឆ្នាំ២០១៩-២០២៣ របស់ក្រសួងអភិវឌ្ឍន៍ជនបទ។ ទិសដៅឆ្នាំ២០២០ នេះ មានដូចតទៅ៖
ទី១. បន្តរួមចំណែកយ៉ាងពេញទំហឹងជាមួយរាជរដ្ឋាភិបាល ក្នុងការការពារនិងរក្សាឱ្យបានយ៉ាងរឹងមាំនូវសន្តិភាព ស្ថិរភាពនយោបាយនិងសេដ្ឋកិច្ច សន្តិសុខ និងសណ្តាប់ធ្នាប់សាធារណៈ។
ទី២. បន្តអនុវត្តយ៉ាងសកម្មនូវយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលសម្រាប់
វិស័យអភិវឌ្ឍន៍ជនបទ ដើម្បីរួមចំណែកជំរុញកំណើន ការងារ សមធម៌ និងប្រសិទ្ធភាពដោយមានអភិបាលកិច្ចល្អជាស្នូល។
ទី៣. បន្តអភិវឌ្ឍន៍សមត្ថភាពមន្រ្តីរាជការ និងអភិវឌ្ឍន៍ស្ថាប័នឱ្យកាន់តែមានភាពប្រសើរឡើងថែមទៀត ដើម្បីលើកកម្ពស់ប្រសិទ្ធភាពការងាររបស់ក្រសួង។
ទី៤. សិក្សាបច្ចេកវិទ្យាថ្មីៗ សម្រាប់បម្រើដល់ការស្ថាបនាផ្លូវ ស្ពាននៅជនបទ ដែលមានគុណភាពរឹងមាំ និងធន់ជាមួយការប្រែប្រួលអាកាសធាតុ។
ទី៥. ដំណើរការឱ្យបានទាន់ពេលវេលាកំណត់នូវការសិក្សាគម្រោង និងការអនុវត្តការងារស្ថាបនា ថែទាំ និងជួសជុលផ្លូវជនបទ ស្ពាន និងសំណង់សិល្បការ្យគ្រប់ប្រភេទ ប្រកបដោយគុណភាព សោភ័ណភាព ធន់ទៅនឹងការប្រែប្រួលអាកាសធាតុ ហើយត្រូវផ្តល់អាទិភាពដល់គម្រោង ដោយអនុលោមតាមភាពចាំបាច់ និងលទ្ធភាពនៃថវិកា។
ទី៦. ជំរុញឱ្យគ្រប់អង្គភាពដែលអនុវត្តគម្រោងហិរញ្ញប្បទានផ្ទាល់ និងគម្រោងសហប្រតិបត្តិការជាមួយដៃគូអភិវឌ្ឍន៍លើការងារស្ថាបនា ថែទាំ និងជួសជុល និងសំណង់សិល្បការ្យគ្រប់ប្រភេទ ធ្វើការបញ្ជាក់គុណភាពនៃសំណាកសម្ភារ និងវត្ថុធាតុដើមនៅមន្ទីរពិសោធន៍របស់ក្រសួងអភិវឌ្ឍន៍ជនបទ។
ទី៧. ដាក់ឱ្យអនុវត្តសាកល្បងនូវប្រព័ន្ធទិន្នន័យ Rural Road Asset Management System (RRAMS) ដែលជាបច្ចេកវិទ្យាទំនើបសម្រាប់រៀបចំផែនការថែទាំ និងជួសជុលផ្លូវជនបទ។
ទី៨. ចុះស្រង់ទិន្នន័យផ្លូវ ស្ពាន លូ ប្រព័ន្ធផ្គត់ផ្គង់ទឹក និងបង្គន់អនាម័យនៅតាមជនបទ ដើម្បីជាមូលដ្ឋានក្នុងការរៀបចំផែនការមេឱ្យមានសង្គតិភាព។
ទី៩. ជំរុញការចុះបញ្ជីអត្តសញ្ញាណជនជាតិដើមភាគតិចឱ្យបានជាអតិបរមា។
ទី១០. បង្កើនសេវាផ្គត់ផ្គង់ទឹកជនបទដើម្បីឆ្ពោះទៅសម្រេចឱ្យបានតាមគោលដៅ ៩០% នៅឆ្នាំ២០២៣ ដូចមានចែងក្នុងផែនការយុទ្ធសាស្រ្តអភិវឌ្ឍន៍ជនបទឆ្នាំ២០១៩-២០២៣។
ទី១១. បន្តជំរុញការងារសម្អាតនិងអនាម័យជនបទ ពិសេសការងារលុបបំបាត់ការបន្ទោបង់ពាសវាលពាសកាល Open Defecation Free (ODF) នៅខេត្តគោលដៅចំនួន០៥ រួមមាន ស្វាយរៀង កំពង់ស្ពឺ កែប កំពង់ឆ្នាំង និងព្រៃវែង បានទាំងស្រុងនៅឆ្នាំ២០២៣។ រាជធានីនិងខេត្តដទៃ ក៏ត្រូវខិតខំយកចិត្តទុកដាក់លើការងារនេះដែរឱ្យបានសកម្ម ដោយប្រមូលផ្តុំលើការងារអប់រំផ្សព្វផ្សាយ និងការងារសាងសង់បន្ទប់ទឹកនិងបង្គន់អនាម័យ។
ទី១២. រៀបចំស្នើសុំធ្វើវិសោធនកម្ម (១).អនុក្រឹត្យលេខ ៥១ ស្តីពីការរៀបចំនិងការប្រព្រឹត្តទៅរបស់ក្រសួងអភិវឌ្ឍន៍ជនបទ, (២).អនុក្រឹត្យលេខ ១៤១ ស្តីពីការបង្កើតគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ និង(៣).អនុក្រឹត្យលេខ ១៩៧ ស្តីពីការគ្រប់គ្រងដីចំណីតាមបណ្តាញផ្លូវជាតិ និងផ្លូវរថភ្លើង។
ទី១៣. តាក់តែងគោលនយោបាយជាតិស្តីពីការអភិវឌ្ឍផ្លូវជនបទ និងធ្វើបច្ចុប្បន្នភាពបទដ្ឋានបច្ចេកទេសស្តីពីការស្ថាបនា ថែទាំ និងជួសជុលផ្លូវជនបទ និងសំណង់សិល្បការ្យ។
ទី១៤. បង្កើនសកម្មភាពសេដ្ឋកិច្ចជនបទ និងសហគ្រិនភាព ដើម្បីគាំទ្រដល់ការបង្កើតការងារនិងមុខរបរ សំដៅបន្ថែមប្រាក់ចំណូលដល់គ្រួសារនីមួយៗ និងទប់ស្កាត់ការធ្វើចំណាកស្រុកស្រុកដោយប្រថុយប្រថាន។
ទី១៥. សហប្រតិបត្តិការជាមួយក្រសួងសាធារណការនិងដឹកជញ្ជូន ដើម្បីរៀបចំបែបបទនិងវិធីសាស្រ្តនៃការបង្កើតផែនការមេសម្រាប់អភិវឌ្ឍន៍ផ្លូវថ្នល់ ការរៀបចំគម្រោងប្លង់ និងការកំណត់អាទិភាពគម្រោង។
ទី១៦. ពង្រឹង និងពង្រីកកិច្ចសហប្រតិបត្តិការល្អជាមួយដៃគូអភិវឌ្ឍន៍ អង្គការមិនមែនរដ្ឋាភិបាល និង
វិស័យឯកជន ដើម្បីកៀរគរប្រភពធនធានហិរញ្ញវត្ថុ បច្ចេកទេស និងបច្ចេកវិទ្យាថ្មីៗ សម្រាប់ទ្រទ្រង់វិស័យអភិវឌ្ឍន៍ជនបទ ឱ្យមានការរីកចម្រើន។
ថ្ងៃពុធ ៥កើត ខែមាឃ ឆ្នាំកុរ ឯកស័ក ព.ស.២៥៦៣
រាជធានីភ្នំពេញ ថ្ងៃទី២៩ ខែមករា ឆ្នាំ២០២០
នៅរសៀលថ្ងៃពុធ ៥កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែមករា ឆ្នាំ២០២០ នៅសណ្ឋាគារសុខា រាជធានីភ្នំពេញ ក្រសួងអភិវឌ្ឍន៍ជនបទ បានរៀបចំពិធីបិទសន្និបាតបូកសរុបការងារប្រចាំឆ្នាំ២០១៩ និងទិសដៅការងារឆ្នាំ២០២០ ក្រោមអធិបតីភាព ឯកឧត្តម យឹម ឆៃលី ឧបនាយករដ្ឋមន្ត្រី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ អញ្ជើញចូលរួមក្នុងសន្និបាតនេះមាន ឯកឧត្តម លោកជំទាវ លោក លោកស្រី នាងកញ្ញា ជាថ្នាក់ដឹកនាំ និងមន្ត្រីរាជការក្រសួងអភិវឌ្ឍន៍ជនបទ តំណាងក្រសួង ស្ថាប័ន តំណាងដៃគូអភិវឌ្ឍន៍ អង្គការមិនមែនរដ្ឋាភិបាល តំណាងអាជ្ញាធរដែនដីរាជធានី-ខេត្ត សរុបជាង ៨០០នាក់។
នៅក្នុងពិធីបិទសន្និបាតនេះ ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានធ្វើរបាយការណ៍បូកសរុបលទ្ធផលសន្និបាត ដោយបានលើកឡើងថា អង្គសន្និបាតបានសម្តែងនូវការអបអរសាទរ និងវាយតម្លៃខ្ពស់ ចំពោះមគ្គុទេសក៍ភាពដឹកនាំរដ្ឋប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោនាយករដ្ឋមន្ត្រី ដែលធ្វើឲ្យកម្ពុជាយើងទទួលបាននូវសន្តិភាព ឯកភាពជាតិ ស្ថិរភាពនយោបាយ សណ្តាប់ធ្នាប់សង្គម និងស្ថិរភាពម៉ាក្រូសេដ្ឋកិច្ច ព្រមទាំងរក្សាបានទាំងស្រុងនូវអធិបតេយ្យភាព និងបូរណភាពទឹកដី។ ស្ថិតក្នុងបរិយាកាសសុខដុមនៃសង្គមជាតិ ក្រសួងអភិវឌ្ឍន៍ជនបទ បានអនុវត្តភារកិច្ចនិងយុទ្ធសាស្ត្ររបស់ខ្លួនដោយជោគជ័យ និងទទួលបានអបអរសាទរ និងវាយតម្លៃខ្ពស់ពីអង្គសន្និបាត។
នៅក្នុងសុន្ទរកថាបិទសន្និបាត ឯកឧត្តមឧបនាយករដ្ឋមន្ត្រី ក្នុងនាមរាជរដ្ឋាភិបាលកម្ពុជា បានថ្លែងនូវការកោតសរសើរចំពោះថ្នាក់ដឹកនាំ និងមន្ត្រីរាជការទាំងអស់នៃក្រសួងអភិវឌ្ឍន៍ជនបទ ស្ថាប័នពាក់ព័ន្ធនានា អាជ្ញាធរដែនដីគ្រប់លំដាប់ថ្នាក់ និងដៃគូអភិវឌ្ឍន៍នានា ដែលបានធ្វើសហប្រតិបត្តិការគ្នាយ៉ាងល្អប្រសើរ សម្រេចបាននូវស្នាដៃធំៗជាច្រើនក្នុងឆ្នាំ២០១៩ និងបានសម្តែងគាំទ្រដល់ការកំណត់ទិសដៅការងារសម្រាប់ឆ្នាំ២០២០។ ឯកឧត្តមឧបនាយករដ្ឋមន្ត្រីបានលើកឡើងថា ក្នុងពេលកន្លងមកនេះ កម្ពុជាបានសម្រេចសមិទ្ធផលថ្មីៗជាច្រើនលើគ្រប់វិស័យក្នុងដំណើរអភិវឌ្ឍន៍របស់ខ្លួន តាមរយៈការអនុវត្តដោយជោគជ័យនូវកម្មវិធីនយោបាយ និងយុទ្ធសាស្ត្រចតុកោណ ដែលជាពិសេស ធានាបាននូវសុខសន្តិភាព ស្ថិរភាព សន្តិសុខ សណ្តាប់ធ្នាប់សង្គម ប្រជាធិបតេយ្យ ការអភិវឌ្ឍ និងអធិបតេយ្យជាតិ ដែលជាកុសលនៃគោលនយោបាយ “ឈ្នះ ឈ្នះ” របស់សម្តេចអគ្គមហាសេនាបតីតេជោ ហ៊ុន សែន។ ជាមួយគ្នានេះ ឯកឧត្តម បានបញ្ជាក់ថា សេដ្ឋកិច្ចកម្ពុជានៅតែបន្តសម្រេចបានកំណើនខ្ពស់ ហើយផលិតផលក្នុងស្រុកសរុបជាមធ្យមសម្រាប់ប្រជាជនម្នាក់ៗបានកើនជាបន្តបន្ទាប់ ហើយអត្រានៃភាពក្រីក្រក៏ត្រូវបានកាត់បន្ថយជាបន្តបន្ទាប់ផងដែរ។
ឯកឧត្តមឧបនាយករដ្ឋមន្ត្រីក៍បានបន្តថា បច្ចុប្បន្នរាជរដ្ឋាភិបាលក្នុងនីតិកាលទី៦ នៃរដ្ឋសភា ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន បានអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ ដើម្បីបន្តអភិវឌ្ឍប្រទេសឲ្យកាន់តែរីកចម្រើនខ្លាំងក្លា និងធានាដល់ការលើកកម្ពស់ជីវភាពរបស់ប្រជាជនទូទៅ តាមរយៈការអនុវត្តគោលនយោបាយ និងវិធានការជាក់ស្តែងនានាឲ្យមានប្រសិទ្ធភាពខ្ពស់ សំដៅបង្កើនចំណូលរបស់ប្រជាជន លើកស្ទួយខាងសង្គមកិច្ច ពង្រឹងយុត្តិធម៌ សមធម៌សង្គម ព្រមទាំងផ្តល់នូវសេវាសាធារណៈឲ្យបានកាន់តែល្អប្រសើរ។ ឯកឧត្តម បានបញ្ជាក់បន្ថែមថា ការអភិវឌ្ឍហេដ្ឋារចនាសម្ព័ន្ធជនបទ ការផ្គត់ផ្គង់ទឹកស្អាត និងអនាម័យជនបទ កំណែទម្រង់រដ្ឋបាល និងការលើកកម្ពស់សមត្ថភាព ការអភិវឌ្ឍសហគមន៍ និងសេដ្ឋកិច្ចជនបទ គឺសុទ្ធតែបានរួមចំណែកយ៉ាងធំធេង ក្នុងការជួយរាជរដ្ឋាភិបាលឲ្យសម្រេចបាននូវកម្មវិធីនយោបាយ និងយុទ្ធសាស្ត្រចតុកោណ ជាក់ស្តែងគឺបានជួយកែលម្អជីវភាពរស់នៅរបស់ប្រជាពលរដ្ឋនៅទូទាំងប្រទេស។ ជាមួយគ្នានេះ ឯកឧត្តមឧបនាយករដ្ឋមន្ត្រី បានផ្តល់ជាអនុសាសន៍ដល់ក្រសួងអភិវឌ្ឍន៍ជនបទឲ្យបន្តសហការណ៍ជាមួយក្រសួង ស្ថាប័ន និងដៃគូរអភិវឌ្ឍន៍ទាំងអស់ចំនួន ១១ ចំណុចគឺ៖
ជាទីបញ្ចប់ ឯកឧត្តមឧបនាយករដ្ឋមន្ត្រី បានប្រសិទ្ធពរ ជូនឯកឧត្តម លោកជំទាវ តំណាងស្ថានទូត ភ្ញៀវកិត្តិយសជាតិ អន្តរជាតិ អស់លោក លោកស្រី នាងកញ្ញាទាំងអស់ និងបានប្រកាសបិទសន្និបាតជាផ្លូវការ ព្រមទាំងបានបំពាក់មេដាយការងារជូនមន្ត្រីរាជការក្រសួងផងដែរ៕
នៅព្រឹកថ្ងៃពុធ ៥កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៩ ខែមករា ឆ្នាំ២០២០ នៅសណ្ឋាគារសុខា រាជធានីភ្នំពេញ ក្រសួងអភិវឌ្ឍន៍ជនបទបានរៀបចំពិធីបើកសន្និបាតបូកសរុបការងារប្រចាំឆ្នាំ២០១៩ និងទិសដៅការងារឆ្នាំ២០២០ ក្រោមអធិបតីភាព ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ អញ្ជើញចូលរួមក្នុងសន្និបាតនេះមាន ឯកឧត្តម លោកជំទាវ លោក លោកស្រី នាងកញ្ញា ជាថ្នាក់ដឹកនាំ និងមន្ត្រីរាជការក្រសួងអភិវឌ្ឍន៍ជនបទ តំណាងក្រសួង ស្ថាប័ន តំណាងដៃគូអភិវឌ្ឍន៍ អង្គការមិនមែនរដ្ឋាភិបាល តំណាងអាជ្ញាធរដែនដីរាជធានី-ខេត្ត សរុបជាង ៨០០នាក់។
នៅក្នុងពិធីបើកសិន្និបាត ឯកឧត្តមបណ្ឌិតរដ្ឋមន្ត្រីបានសម្តែងនូវការស្វាគមន៍យ៉ាងកក់ក្តៅជូនចំពោះគណៈអធិបតី និងអង្គសន្និបាតទាំងមូល និងបានមានប្រសាសន៍ថា រាជរដ្ឋាភិបាលក្នុងនីតិកាលទី៦ ក្រោមការដឹនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានដាក់ចេញនៅយុទ្ធសាស្រ្តចតុកោណដំណាក់កាលទី៤ ដែលជារបៀបវារៈគោលនយោបាយ សង្គមសេដ្ឋកិច្ច ផែនការយុទ្ធសាស្រ្តអភិវឌ្ឍន៍ជាតិ ឆ្នាំ២០១៩-២០២៣ និងគោលដៅអភិវឌ្ឍប្រកបដោយចីរភាពរបស់កម្ពុជាឆ្នាំ២០៣០ ដោយបានកំណត់លម្អិតបន្ថែមនូវវិធានការ និងផែនការសកម្មភាពតាមវិស័យ និងបញ្ជាក់ការទទួលខុសត្រូវក្នុងការអនុវត្តរបស់ក្រសួង-ស្ថាប័ន ថ្នាក់ជាតិ និងថ្នាក់ក្រោមជាតិ។ ជាលទ្ធផល ការអភិវឌ្ឍសេដ្ឋកិច្ច មានសន្ទុះដ៏លឿន មានកំណើនខ្ពស់រក្សាបាននូវស្ថិរភាពម៉ាក្រូសេដ្ឋកិច្ច ក្នុងបរិការណ៍អតិផរណាទាប អត្រាប្តូរប្រាក់មានស្ថិរភាព និងកាត់បន្ថយភាពក្រីក្ររបស់ប្រជាជនបានឆាប់រហ័សនៅទូទាំងប្រទេស។ ជាមួយគ្នានេះ ក្រសួងអភិវឌ្ឍន៍ជនបទ បានដាក់ចេញផែនការយុទ្ធសាស្រ្តអភិវឌ្ឍន៍ជនបទឆ្នាំ២០១៩-២០២៣ ដែលមានទិសដៅចម្បងគឺជំរុញឲ្យមានការផ្លាស់ប្តូរគុណភាពនៃការរស់នៅរបស់ប្រជាជនជនបទ ទាំងខាងសម្ភារនិងស្មារតី។ លើមូលដ្ឋាននេះ ក្រសួងអភិវឌ្ឍន៍ជនបទបានកំណត់យកផែនការយុទ្ធសាស្រ្តចំនួន៤ ដែលប្រែក្លាយទៅជាកម្មវិធីនៃការងាររបស់ក្រសួងសម្រាប់រយៈពេល៥ឆ្នាំខាងមុខ។ ក្រសួងបានកំណត់កម្មវិធីអាទិភាពចំនួន៤ រួមមាន កម្មវិធីទី១.ការអភិវឌ្ឍសមត្ថភាពនិងធនធានមនុស្ស, កម្មវិធីទី២. ការអភិវឌ្ឍនហេដ្ឋារចនាសម្ព័ន្ធរូបវន្តនិងគមនាគមន៍, ទី៣.ការកែលម្អលក្ខខណ្ឌនៃការរស់នៅរបស់សហគមន៍ជនបទ និងទី៤.ពិពិធកម្មសកម្មភាពសេដ្ឋកិច្ចជនបទ។
ឯកឧត្តមបណ្ឌិតរដ្ឋមន្ត្រី បានបញ្ជាក់អំពី ភាពរីចម្រើននៃវិស័យអភិវឌ្ឍជនបទ ដោយបានលើកបង្ហាញពី សមិទ្ធផលចម្បងៗដែលក្រសួងសម្រេចបានក្នុងឆ្នាំ២០១៩ ដោយផ្អែកតាមយុទ្ធសាស្ត្រ ដែលមានកក្តារួមផ្សំជាច្រើន សហការគាំទ្រពីក្រសួង-ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងដៃគូអភិវឌ្ឍន៍នានា រួមមានដូចជា ១.ការងារពង្រឹងស្ថាប័ន ការកសាងសមត្ថភាព និងការអភិវឌ្ឍធនធានមនុស្ស ជាយុទ្ធសាស្រ្តចម្បងទី១ សម្រាប់គាំទ្រដល់ដំណើរការរបស់ក្រសួងទាំងមូល ជាពិសេសការអនុវត្តកម្មវិធីកំណែ ទម្រង់នានារបស់រាជរដ្ឋាភិបាល ដូចជាកំណែទម្រង់រដ្ឋបាលសាធារណៈ ការគ្រប់គ្រងហិរញ្ញវត្ថុសាធារណៈ និងកំណែទម្រង់វិមជ្ឈការ និងសហវិមជ្ឈការជាដើម, ២.យុទ្ធសាស្រ្តចម្បងទី២ បានផ្តោតលើវិស័យអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍ ដែលបច្ចុប្បន្នកំពុងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ច និងការកាត់បន្ថយនូវភាពក្រីក្រ ដោយមានការចូលរួមពីដៃគូរអភិវឌ្ឍន៍ជាពហុភាគី និងទ្វេរភាគី, ៣.យុទ្ធសាស្រ្តចម្បងទី៣ ក្រសួងបានកំណត់លើការងារកែលម្អលក្ខខណ្ឌនៃការរស់នៅរបស់សហគមន៍ជនបទ ក្នុងគោលបំណងផ្លាស់ប្តូរទម្លាប់រស់នៅរបស់ប្រជាពលរដ្ឋនៅតាមតំបន់ជនបទដែលធ្លាប់ពឹងផ្អែកស្ទើរទាំងស្រុងទៅលើធម្មជាតិ ពុំមានអនាម័យធ្វើជាមធ្យោបាយក្នុងការរស់នៅ មកជាការរស់នៅ តាមបែបវិទ្យាសាស្រ្ត។ ករណីនេះ ក្រសួងបានកំណត់ចក្ខុវិស័យឆ្នាំ២០២៥ ប្រជាពលរដ្ឋគ្រប់រូបរស់នៅ សហគមន៍ជនបទ ត្រូវទទួលបានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព និង ៤.យុទ្ធសាស្រ្តចម្បងចុងក្រោយ ក្រសួងបានផ្តោលើការងារពិពិធកម្មសកម្មភាពសេដ្ឋកិច្ចជនបទ ដើម្បីលើកកម្ពស់កម្រិតជីវភាពរស់នៅប្រចាំថ្ងៃរបស់ប្រជាពលរដ្ឋជនបទ និងជនជាតិដើមភាគតិច ដើម្បីរួមចំណែកកាត់បន្ថយភាពក្រីក្រឲ្យបានជាង១%ក្នុងមួយឆ្នាំ តាមរយៈការធ្វើពិពិតកម្មការងារ និងមុខរបរ ដើម្បីបង្កើនប្រាក់ចំណូល។
ជាទីបញ្ចប់ ឯកឧត្តមបណ្ឌិតរដ្ឋមន្ត្រី បានស្នើសុំសមាជិក សមាជិកានៃអង្គសន្និបាតឲ្យចូលរួមផ្តល់មតិក្នុងកម្មវិធីពិភាក្សាឲ្យបានផុលផុសទៅតាមរបៀបវារៈសន្និបាត ហើយចូលរួមគាំទ្រ និងអនុវត្តឲ្យបានសកម្មបន្តទៀតនូវគោលនយោបាយសំខាន់ៗលើវិស័យអភិវឌ្ឍន៍ជនបទ និងទិសដៅការងារសំខាន់ៗដែលត្រូវអនុវត្តនៅឆ្នាំ២០២០ ឲ្យទៅជាចលនារួមដ៏ខ្លាំងក្លា សំដៅសម្រេចឲ្យបានជាផ្លែផ្កាបន្តទៀតសម្រាប់ឧត្តមប្រយោជន៍របស់ជាតិ និងបានប្រកាស់បើកសន្និបាតជាផ្លូវការ៕
ឯកឧត្ដមបណ្ឌិត អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ បានទទួលជួបឯកអគ្គរដ្ឋទូតសហរដ្ឋអាមេរិកប្រចាំកម្ពុជា
ក្នុងជំនួបសម្ដែងការគួរសម និងពិភាក្សាការងារជាមួយ ឯកឧត្ដមបណ្ឌិត អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ នារសៀលថ្ងៃទី ២៣ ខែមករា ឆ្នាំ២០២០ នៅទីស្ដីការក្រសួង ឯកឧត្ដម Patrick Murphy ឯកអគ្គរដ្ឋទូតថ្មីសហរដ្ឋអាមេរិកប្រចាំនៅព្រះរាជាណាចក្រកម្ពុជា បានសម្ដែងនូវការគាំទ្រចំពោះការថែរក្សាសុខសន្តិភាពរបស់ប្រជាពលរដ្ឋ និងប្រទេសកម្ពុជា ហើយចង់ឲ្យក្រសួងអភិវឌ្ឍន៍ជនបទចាត់ទុកសហរដ្ឋអាមេរិកជាដៃគូរដែលអាចជឿជាក់ក្នុងការអភិវឌ្ឍន៍។
ឯកឧត្ដមបណ្ឌិត អ៊ុក រ៉ាប៊ុន បានសម្ដែងនូវការស្វាគមន៍ចំពោះឯកឧត្ដម Patrick Murphy ដែលត្រូវបានរដ្ឋាភិបាលសហរដ្ឋអាមេរិកតែងតាំងជាឯកអគ្គរដ្ឋទូតថ្មី ប្រចាំនៅព្រះរាជាណាចក្រកម្ពុជា និងបានជម្រាបជូន ឯកអគ្គរដ្ឋទូតអំពីតួនាទី និងភារកិច្ចរបស់ក្រសួងអភិវឌ្ឍន៍ជនបទគឺ លើកកំរិតកម្ពស់ជីវភាពរស់នៅរបស់ប្រជាពលរដ្ឋ រួមទាំងបងប្អូនជនជាតិដើមភាគតិចដែលកំពុងរស់នៅតំបន់ជនបទឲ្យកាន់តែល្អប្រសើរឡើង ដោយផ្ដោតទៅលើការស្ដារ និងកសាងហេដ្ឋារចនាសម្ព័ន្ធរូបវ័ន្ដ រួមមាន ផ្លូវ ស្ពាន សាលារៀន មណ្ឌលសុខភាព និងផ្ដល់សេវាសាធារណៈផ្សេងៗទៀត ដែលជាការបំពេញបន្ថែមទៅលើមុខងាររបស់ក្រសួង ស្ថាប័នផ្សេងៗរបស់រាជរដ្ឋាភិបាល។
ឯកឧត្ដមបណ្ឌិតរដ្ឋមន្រ្ដី បានលើកយកមុខងារ និងភាពខុសគ្នារវាងក្រសួងសាធារណៈការ និងដឹកជញ្ជូន និងក្រសួងអភិវឌ្ឍន៍ជនបទ ក្នុនោះក្រសួងសាធារណៈការធ្វើការគ្រប់គ្រងផ្លូវជាតិ និងផ្លូវខេត្ត ដោយឡែកក្រសួងអភិវឌ្ឍន៍ជនបទបានធ្វើការគ្រប់គ្រងបណ្ដាញផ្លូវនៅជនបទប្រមាណជាង ៤ ម៉ឺនគីឡូម៉ែត្រ ដូចគ្នានិងការអនុវត្តន៍គម្រោងផ្គត់ផ្គង់ទឹកស្អាត និងអនាម័យជនបទផងដែរ។
ក្រៅពីនោះក្រសួងអភិវឌ្ឍន៍ជនបទ បានធ្វើការងារសង្គមកិច្ចផងដែរ ដូចជា ការបង្កើតមុខរបរជូនប្រជាពលរដ្ឋនៅជនបទតាមរយៈការបណ្ដុះបណ្ដាលមុខជំនាញវិជ្ជាជីវៈបន្ថែមក្រៅពីការបង្កបង្កើនផលស្រូវ ដែលការងារនេះបានអនុវត្តនៅមជ្ឈមណ្ឌលអភិវឌ្ឍន៍ជនបទនៅតាមបណ្ដាខេត្ត។ ឯកឧត្ដមបណ្ឌិតរដ្ឋមន្រ្ដី បានជម្រាបជូនឯកអគ្គរដ្ឋទូតអំពីផែនការយុទ្ធសាស្រ្ដអភិវឌ្ឍន៍ជនបទឆ្នាំ ២០១៩-២០២៣ ដោយផ្ដោតទៅលើ ការពង្រឹងស្ថាប័ន និងកសាងសមត្ថភាពមន្រ្ដីរាជការ , កែលម្អលក្ខខណ្ឌនៃការរស់នៅរបស់សហគមន៍ជនបទ , ជំរុញសកម្មភាពសេដ្ឋកិច្ចជនបទ និងអភិវឌ្ឍនហេដ្ឋារចនាសម្ព័ន្ធគមនាគមន៍ ដោយធ្វើការកែលម្អផ្លូវនៅជនបទជាបណ្ដើរៗ ពីផ្លូវក្រាលក្រួសក្រហម ឲ្យទៅជាផ្លូវក្រាលកៅស៊ូពីរជាន់ប្រភេទ DBST និងផ្លូវបេតុង ចំពោះតំបន់ដែលងាយរងគ្រោះ។
ក្រសួងអភិវឌ្ឍន៍ជនបទបាននឹងកំពុងបន្តសហប្រតិបត្តិការជាមួយដៃគូរផ្សេងៗទៀតរួមមាន ធនាគារអភិវឌ្ឍន៍អាស៊ី ADB ធនាគារពិភពលោក WB មូលនិធិអន្ដរជាតិសម្រាប់អភិវឌ្ឍន៍កសិកម្ម IFAD និងអង្គការមិនមែនរដ្ឋាភិបាលចំនួន ៥៣ អង្គការទៀត។ ឯកឧត្ដមបានបន្តទៀតថា ក្រសួងបានទទួលការគាំទ្រពីភាគីចំនួន ៣ គឺ មូលនិធិគ្រួសារស្តូន , អង្គារ IDE និង USID កំពុងអនុវត្តគម្រោងលើកកម្ពស់អនាម័យជនបទនៅក្នុងភូមិគោលដៅ១ ៦០០ ភូមិ ក្នុងខេត្តព្រៃវែង,សៀមរាប,កំពង់ធំ,កណ្ដាល និងខេត្តឧត្ដរមានជ័យ ក្នុងនោះ USID នឹងផ្ដល់ថវិកា ១០ លាន ដុល្លារអាមេរិក ក្នុងករណីគម្រោងដែលអនុវត្តដោយ មូលនិធិគ្រួសារស្តូន , អង្គារ IDE ទទួលបានជោគជ័យ។
ឯកឧត្ដម Patrick Murphy បានវាយតម្លៃខ្ពស់ចំពោះតួនាទី និងភារកិច្ចរបស់ក្រសួងអភិវឌ្ឍន៍ជនបទ ព្រោះថាប្រជាពលរដ្ឋកម្ពុជាប្រមាណ ៨០% កំពុងរស់នៅទីជនបទ ។ ជាមួយនេះក្រសួងក៏មានបញ្ហាប្រឈមខ្លះ ដូចជាបញ្ហាបម្រែបម្រួលអាកាសធាតុ ការចំណាកស្រុក ការផ្គត់ផ្គង់ទឹក បញ្ហាពុករលួយ ការបោះឆ្នោតជាដើម ។ ឯកឧត្ដមឯកអគ្គរដ្ឋទូតថ្មីប្រចាំនៅកម្ពុជា បានបន្តថា សហរដ្ឋអាមេរិកគាំទ្រចំពោះការថែរក្សាសុខសន្តិភាពរបស់ប្រជាពលរដ្ឋ និងប្រទេសកម្ពុជា ហើយចង់ឲ្យក្រសួងអភិវឌ្ឍន៍ជនបទចាត់ទុកសហរដ្ឋអាមេរិកជាដៃគូរដែលអាចជឿជាក់ក្នុងការអភិវឌ្ឍន៍ប្រទេសកម្ពុជា។
ឯកឧត្ដមបណ្ឌិតរដ្ឋមន្រ្ដី បានថ្លែងអំណរគុណដល់រដ្ឋាភិបាលអាមេរិក និងបានជូនពរ ឯកឧត្ដម Patrick Murphy ទទួលបានជោគជ័យក្នុងបេសកកម្មការទូត ប្រចាំនៅព្រះរាជាណាចក្រកម្ពុជា៕
(អត្ថបទ ជា វិសែស )
នាព្រឹកថ្ងៃ ពុធ ១កើត ខែមិគសិរ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី ២៧ ខែវិច្ឆិកា ឆ្នាំ២០១៩ ឯកឧត្តមបណ្ឌិត អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញពិនិត្យការដ្ឋានសាងសង់ និងជួសជុលផ្លូវ ស្ពាន ជាបន្ទាន់ ដែលទទួលរងការខូចខាតដោយសារទឹកជំនន់ ចាប់ពីគល់ស្ពានគីហ្សូណា ឃុំទន្លេបិទទៅដល់ស្ពានព្រែកតាកុច ដែលមានប្រវែង ៦៩,៥ គ.ម ស្ថិតនៅក្នុងស្រុកត្បូងឃ្មុំ និងស្រុកក្រូចឆ្មារ និងកំណាត់ផ្លូវពីឃុំប៉ឹស២ ទៅឃុំឈូក ដែលមាន ប្រវែង ៩ គ.ម ស្ថិតក្នុងស្រុកក្រូចឆ្មារ ខេត្តត្បូងឃ្មុំ។
នាព្រឹកថ្ងៃអង្គារ ១៥រោច ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៦ ខែវិច្ឆិកា ឆ្នាំ២០១៩ នៅវិទ្យាស្ថានបច្ចេកវិទ្យាកម្ពុជា រាជធានីភ្នំពេញ ឯកឧត្តមបណ្ឌិត អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងទិវាជាតិលើកកម្ពស់អនាម័យជនបទលើកទី ១០ ក្រោមប្រធានបទ “អនាម័យសម្រាប់ទាំងអស់គ្នា ” និងពិធីប្រកាសផ្សព្វផ្សាយផែនការសកម្មភាពជាតិជំហានទី ២ និងផែនការត្រៀមបម្រុងឆ្លើយតបគ្រោះអាសន្នស្ដីពី ការផ្គត់ផ្គង់ទឹក ការសំអាត និងអនាម័យជនបទ ឆ្នាំ ២០១៩-២០២៣។
