នាថ្ងៃព្រហស្បតិ៍ ៩រោច ខែជេស្ឋ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី២៣ ខែមិថុនា ឆ្នាំ២០២២ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ តំណាងឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណ:កម្មការអន្តរក្រសួង រួមមានតំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ អញ្ចើញត្រួតពិនិត្យ និងវាយតម្លៃផ្លូវចំនួន ០២ គម្រោង ដែលអនុវត្តដោយ នាយកដ្ឋានវិស្វកម្ម ក្រសួងការពារជាតិ ដូចខាងក្រោម ៖

គម្រោងទី ១ ៖ ការងារស្ថាបនាផ្លូវក្រាលកៅស៊ូប្រភេទពីរជាន់ប្រភេទ DBST ចំនួន ០១ ខ្សែ ប្រវែង ៣ ៣០០ ម៉ែត្រ ទទឹងខ្នងលើ ៦ ម៉ែត្រ ចិញ្ចើមផ្លូវក្រាលក្រួសក្រហម ទទឹងម្ខាងៗមានប្រវែង ១ម៉ែត្រ កម្រាស់ ០,២ ម៉ែត្រ មានលូមូលចំនួន ០២ កន្លែង តភ្ជាប់ពីភូមិកណ្តាល ទៅភូមិបន្លិច ឃុំសំរោង ស្រុកអូរជ្រៅ ខេត្តបន្ទាយមានជ័យ។

គម្រោងទី ២ ៖ ការងារស្តារឡើងវិញផ្លូវក្រាលបេតុងចំនួន ០២ ខ្សែ ប្រវែងសរុប ២ ៧៥០ ម៉ែត្រ ទទឹងខ្នងលើ ៦ ម៉ែត្រ កម្រាស់ ០,២ម៉ែត្រ មានរៀបថ្មសំណាញ់តាមជើងទេរផ្លូវ ប្រវែង ៥០០ម៉ែត្រ សាងសង់លូប្រអប់មុខមួយចំនួន ០១ កន្លែង សាងសង់លូមូលមុខពីរចំនួន ០១កន្លែង និងផ្លាកឈ្មោះផ្លូវចំនួន ០២កន្លែង ជាផ្លូវដែលខូចដោយសារជំនន់ទឹកភ្លៀងនៅឆ្នាំ២០២១ ស្ថិតនៅភូមិកោះកែវ និងភូមិអង្គាបុស្ស ឃុំឬស្សីក្រោក ស្រុកមង្គលបុរី ខេត្តបន្ទាយមានជ័យ។

ជាលទ្ធផលគណៈកម្មការអន្តរក្រសួងបានសម្រេចឯកភាពទទួលយកដោយបញ្ចប់រយៈពេលធានាសុពលភាពជាស្ថាបពរគម្រោងទាំង ២ ខាងលើនេះ៕

នារសៀលថ្ងៃពុធ ៨រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២២ ខែមិថុនា ឆ្នាំ២០២២ ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជេីញចូលរួមក្នុងកិច្ចប្រជុំ គណៈកម្មការដឹកនាំនៃ គណៈកម្មាធិការភាពជាដៃគូសកលនៃការសំអាត និង ទឹកស្អាត សម្រាប់ទាំងអស់គ្នា (Sanitation and Water for All) ក្នុងនាមជាគណៈកម្មការដឹកនាំ សម្រាប់តំបន់ អាស៊ី និង ប៉ាស៊ីហ្វិក តាមរយៈប្រព័ន្ធវីដេអូ Online។

នាព្រឹកថ្ងៃពុធ ៨រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២២ ខែមិថុនា ឆ្នាំ២០២ ២ នៅទីស្ដីការក្រសួង ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពឆមាសទី១ ឆ្នាំ២០២២ និងលើកទិសដៅការងារសម្រាប់អនុវត្តបន្តឆមាសទី២ របស់ក្រសួងអភិវឌ្ឍន៍ជនបទ៕

ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ព្រមទាំងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងអភិវឌ្ឍន៍ជនបទ សូមគោរពផ្ញើសារលិខិតថ្វាយព្រះពរ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្នុងឱកាសនៃព្រះរាជពិធីចម្រើនព្រះជន្មគម្រប់ ៨៦ យាងចូល ៨៧ ព្រះវស្សា ដែលនឹងប្រព្រឹត្តទៅនាថ្ងៃទី១៨ ខែមិថុនា ឆ្នាំ២០២២៕

នាព្រឹកថ្ងៃព្រហស្បតិ៍ ១០កើត ខែជេស្ឋ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី០៩ ខែមិថុនា ឆ្នាំ២០២២ នៅទីស្ដីការក្រសួង ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ និង លោក Rho Hyunjun នាយកទីភ្នាក់ងារសហប្រត្តិការអន្តរជាតិកូរ៉េ (KOICA) ប្រចាំនៅកម្ពុជា បានអញ្ជើញចុះហត្ថលេខាលើកំណត់ហេតុនៃកិច្ចពិភាក្សាគម្រោងកសាងសន្តិភាព និងភាពរុងរឿងក្នុងភូមិ តាមរយៈការអភិវឌ្ឍសហគមន៍ចម្រុះ ដែលជាជំនួយឥតសំណងរបស់រដ្ឋាភិបាលនៃសាធារណរដ្ឋកូរ៉េ ។

គម្រោងខាងលើនឹងអនុវត្តរយៈពេល ៥ឆ្នាំ ពីឆ្នាំ ២០២២-២០២៦ នៅក្នុងខេត្តគោលដៅចំនួន ៣ រួមមាន ខេត្តបាត់ដំបង បន្ទាយមានជ័យ និងខេត្តប៉ៃលិន មានគោលបំណងជាអាទិភាពចំនួន ៣ គឺ ៖

១- កែលម្អបរិស្ថានរស់នៅរបស់ប្រជាពលរដ្ឋនៅតាមជនបទ
២- បង្កើនប្រាក់ចំណូលដល់ប្រជាកសិករ និង
៣-ពង្រឹងអភិបាលកិច្ចនៅសហគមន៍ជនបទ។

គម្រោងនេះមានបេសកម្មប្រែក្លាយអតីតតំបន់សមរភូមិប្រយុទ្ធឲ្យទៅជាភូមិដ្ឋានដែលមានសន្តិភាព និងភាពសម្បូររុងរឿង ដោយផ្តោតលើការអភិវឌ្ឍសហគមន៍ជនបទប្រកបដោយចីរភាព៕

ក្នុងជំនួបសម្ដែងការគួរសម និងពិភាក្សាការងារជាមួយឯកឧត្ដម Pablo Kang ឯកអគ្គរាជទូតអូស្រ្ដាលីប្រចាំនៅកម្ពុជា និងលោកជំទាវ Karlene Maywald ក្រុមប្រឹក្សាភិបាលអង្គការ Water Aid អូស្រ្ដាលី ព្រមទាំងសហការី កាលពីថ្ងៃទី៣១ ខែឧសភា ឆ្នាំ២០២២ នៅទីស្ដីការក្រសួង ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានស្នើសុំឲ្យរដ្ឋាភិបាលអូស្រ្ដាលីបន្តជួយគាំទ្របន្ថែមទៀតចំពោះការវិនិយោគលើហេដ្ឋារចនាសម្ព័ន្ធ ការផ្គត់ផ្គង់ទឹកស្អាត និងអនាម័យជនបទ ព្រោះនេះជាតម្រូវការមូលដ្ឋានក្នុងការអភិវឌ្ឍន៍ប្រទេស ព្រមទាំងប្ដេជ្ញាបន្តកិច្ចសហប្រតិបត្តិការជាមួយបណ្ដាអង្គការដៃគូដែលគាំទ្រដោយរដ្ឋាភិបាលអូស្រ្ដាលី។

​ឯកឧត្តមបណ្ឌិតសភាចារ្យ អ៊ុក រ៉ាប៊ុន​ បានជម្រាបជូនអំពីស្ថានភាពរបស់ក្រសួងអភិវឌ្ឍន៍ជនបទ ដែលមានមន្រ្ដីជាង ៥០០ នាក់នៅថ្នាក់កណ្ដាល និងជាង ១ ០០០នាក់នៅថ្នាក់ខេត្ត និងបានលើកឡើងពីទំនាក់ទំនងការទូតរវាងប្រទេសទាំងពីរកម្ពុជា អូស្រ្ដាលី ដែលរហូតមកដល់ពេលនេះជាខួបលើកទី ៧០ ហើយ។ ជាមួយនេះរដ្ឋាភិបាលអូស្រ្ដាលីបានជួយកម្ពុជាអភិវឌ្ឍធនធានមនុស្ស ដោយឡែកថ្នាក់ដឹកនាំ មន្រ្ដីរាជការក្រសួងអភិវឌ្ឍន៍ជនបទក៏បានទទួលអាហារូបការណ៍ថ្នាក់អនុបណ្ឌិតផងដែរ។

ឯកឧត្ដមបណ្ឌិតសភាចារ្យ បានបន្តទៀតថា ក្រសួងអភិវឌ្ឍន៍ជនបទមានយុទ្ធសាស្រ្ដសំខាន់ៗចំនួន ២ គឺ៖ ១- ការកែលម្អលក្ខខណ្ឌនៃការរស់នៅរបស់សហគមន៍ជន, ទី២ គឺ ការលើកកម្ពស់ជីវភាពេពរស់នៅរបស់ប្រជាពលរដ្ឋនៅជនបទឲ្យកាន់តែល្អប្រសើរឡើងតាមរយៈការអភិវឌ្ឍន៍ហេដ្ឋារចនាសម្ព័ន្ធរូបវន្ត និងគមនាគមន៍។

ជាការឆ្លើយតបលោកជំទាវ Karlene Maywald ក្រុមប្រឹក្សាភិបាលអង្គការ Water Aid អូស្រ្ដាលី​ បានមានប្រាសាន៍ថា កម្មវិធីអភិវឌ្ឍន៍របស់ក្រសួងអភិវឌ្ឍន៍ជនបទ គឺប្រហាក់ប្រហែលជាមួយកម្មវិធីរបស់អង្គការ Water aid ដែលកំពុងធ្វើសកម្មភាពនៅកម្ពុជាដែរ ។ អង្គការ Water aid នឹងបន្តកិច្ចសហប្រតិបត្តិការជាមួយក្រសួងអភវឌ្ឍន៍ជនបទបន្តទៀតក្នុងវិស័យផ្គត់ផ្គង់ទឹកស្អាត និងអនាម័យជនបទ។

ក្នុងឱកាសនោះដែរ ឯកឧត្ដម Pablo Kang ឯកអគ្គរាជទូតអូស្រ្ដាលីប្រចាំនៅកម្ពុជា​ បានបញ្ជាក់ថា រដ្ឋាភិបាលអូស្រ្ដាលីបានជួយកម្ពុជាផ្នែកទឹកស្អាត និងអនាម័យ ហើយមានអង្គការចំនួន ២៥ កំពុងធ្វើសកម្មភាពនៅកម្ពុជា ក្នុងនោះក៏មានអង្គការ Water Aid ផងដែរ ។ រដ្ឋាភិបាលអូស្រ្ដាលី បានផ្ដោតការយកចិត្តទុកដាក់លើការកសាង និងស្ដារហេដ្ឋារចនាសម្ព័ន្ធជនបទ ព្រោះជាការតភ្ជាប់ផ្នែកសេដ្ឋកិច្ច និងទទួលបានសេវាសង្គមផ្សេងៗ ដែលជាតម្រូវការចាំបាច់បំផុតនៅមូលដ្ឋានជនបទ និងការធ្វើសមាហរណកម្មជាមួយគម្រោងផ្សេងៗទៀត ដូចជាការធ្វើវិនិយោគលើការងារទឹកស្អាត និងអនាម័យជនបទជាដើម ៕

ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ព្រមទាំងថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃក្រសួងអភិវឌ្ឍន៍ជនបទ សូមគោរពផ្ញើសារលិខិតជូនពរ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា នាឱកាសប្រារព្ធខួបកំណើតគម្រប់ ៨៨ ឈានចូល ៨៩ ឆ្នាំ ដែលប្រព្រឹត្តទៅនៅថ្ងៃទី២៥ ខែឧសភា ឆ្នាំ ២០២២៕

នាព្រឹកថ្ងៃពុធ ៣រោច ខែពិសាខ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៨ ខែឧសភា ឆ្នាំ២០២២ ឯកឧត្ដមបណ្ឌិត នួន ដាញ៉ិល រដ្ឋលេខាធិការ តំណាងឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំប្រតិភូចូលរួមកិច្ចប្រជុំថ្នាក់រដ្ឋមន្ត្រីស្តីពី ទឹក និងអនាម័យសម្រាប់ទាំងអស់គ្នា។ កិច្ចប្រជុំនេះបានប្រារព្ធនៅទីក្រុង Jakarta ប្រទេសឥណ្ឌូនេស៊ី ដោយមានការចូលរួមពីថ្នាក់ដឹកនាំមកពីទីភ្នាក់ងារអង្គការសហប្រជាជាតិ សង្គមស៊ីវិល ម្ចាស់ជំនួយទ្វេភាគី ពហុភាគី ស្ថាប័នស្រាវជ្រាវ និងសិក្សា វិស័យឯកជន ព្រមទាំងស្ថាប័នហិរញ្ញវត្ថុអន្តរជាតិ និងអង្គការសប្បុរសធម៌ ក្នុងគោលបំណងពិភាក្សា ចែករំលែកមេរៀន បទពិសោធន៍ និងកំណត់សកម្មភាពជាក់ស្តែង ក្នុងការកសាង និងពន្លឿនការទទួលបានទឹកស្អាត និងអនាម័យសម្រាប់ទាំងអស់គ្នា៕

នាព្រឹកថ្ងៃពុធ ៣រោច ខែពិសាខ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ១៨ ខែឧសភា ឆ្នាំ២០២២ ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំប្រតិភូក្រសួងអភិវឌ្ឍន៍ជនបទ អញ្ជើញគោរពវិញ្ញាណក្ខន្ធសព ឯកឧត្តម សន្តិបណ្ឌិត ឌុល គឿន តំណាងរាស្ត្រមណ្ឌលខេត្តកណ្តាល នីតិកាលទី៦ នៃរដ្ឋសភា ដែលបានទទួលមរណភាពកាលពីថ្ងៃទី ១៥ ខែឧសភា ឆ្នាំ ២០២២ ក្នុងជន្មាយុ ៧៤ ឆ្នាំ ដោយរោគាពាធ៕

នាព្រឹកថ្ងៃអង្គារ ២រោច ខែពិសាខ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៧ ខែឧសភា ឆ្នាំ២០២២ នៅសួនច្បារថ្មីសម្ដេចចៅហ្វាវាំង គង់ សំអុល ស្ថិតក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីប្រកាសទទួលស្គាល់ជាផ្លូវការ ក្រុងកំពង់ឆ្នាំង ជាក្រុងបានបញ្ចប់ការបន្ទោបង់ពាសវាលពាសកាល (ODF) ដំបូងគេបង្អស់ក្នុងចំណោម ក្រុង ស្រុក ក្នុងខេត្តកំពង់ឆ្នាំង៕