ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានអនុញ្ញាតឱ្យលោក Rho Hyunjun នាយកទីភ្នាក់ងារសហប្រតិបត្តិការអន្ដរជាតិកូរ៉េ (KOICA) ប្រចាំនៅកម្ពុជា និងសហការីចូលជួបសម្ដែងការគួរសម និងពិភាក្សាការងារ

នារសៀលថ្ងៃសុក្រ ៣កើត ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី ០៤ ខែកុម្ភៈ ឆ្នាំ២០២២ នៅទីស្ដីការក្រសួង ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានអនុញ្ញាតឲ្យលោក Rho Hyunjun នាយកទីភ្នាក់ងារសហប្រតិបត្តិការអន្ដរជាតិកូរ៉េ (KOICA) ប្រចាំនៅកម្ពុជា និងសហការីចូលជួបសម្ដែងការគួរសម និងពិភាក្សាការងារ។ KOICA គឺជាដៃគូអភិវឌ្ឍន៍ដ៏សកម្មមួយរបស់ក្រសួងអភិវឌ្ឍន៍ជនបទដែលបាន និងកំពុងផ្តល់ការគាំទ្រដល់សកម្មភាពអភិវឌ្ឍន៍ជនបទជាច្រើននៅកម្ពុជា។

ក្នុងជំនួបនេះដែរ លោកនាយក KOICA និងសហការីបានសម្តែងការកោតសរសើរចំពោះទំនាក់ទំនង និងសហប្រតិបត្តិការដ៏ល្អរវាងក្រសួងអភិវឌ្ឍន៍ជនបទ និងKOICA ហើយបានរាយការណ៍អំពីវឌ្ឍនភាពនៃការសិក្សាគម្រោងអភិវឌ្ឍន៍ថ្មីគឺ “គម្រោងការកសាងសន្តិភាព និងភាពរុងរឿងក្នុងភូមិតាមរយៈការអភិវឌ្ឍន៍សហគមន៍ជនបទចម្រុះ” ដើម្បីប្រែក្លាយអតីតតំបន់សមរភូមិឲ្យទៅជាភូមិដ្ឋានដែលមានសន្តិភាព និងភាពសម្បូររុងរឿង ដោយផ្តោតលើការអភិវឌ្ឍន៍សហគមន៍ប្រកបដោយចីរភាព” គម្រោងនេះមានសមាសភាគធំៗចំនួនបីគឺ កែលម្អបរិស្ថានរស់នៅ បង្កើនប្រាក់ចំណូលដល់កសិករ និងពង្រឹងសហគមន៍ជនបទ ដែលត្រូវអនុវត្តន៍រយៈពេល ៦០ខែ (ឆ្នាំ 2022-2026)៕