លោក ថោង អ៊ុំវ៉ារិន និងមន្ត្រីបច្ចេកទេសរបស់មន្ទីរអភិវឌ្ឍន៍ជនបទខេត្តស្វាយរៀង បានចុះសហការជាមួយរដ្ឋបាលឃុំ ដើម្បីពិនិត្យមើលការប្រើប្រាស់ទឹកអណ្តូងស្នប់នៅតាមខ្នងផ្ទះប្រជាពលរដ្ឋ

ខេត្តស្វាយរៀង៖ នៅថ្ងៃពុធ ១កើត ខែពិសាខ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០៨ ខែឧសភា ឆ្នាំ២០២៤  លោក ថោង អ៊ុំវ៉ារិន អនុប្រធានមន្ទីរ និងមន្ត្រីបច្ចេកទេសការិយាល័យផ្គត់ផ្គង់ទឹកជនបទរបស់មន្ទីរ បានចុះសហការជាមួយរដ្ឋបាលឃុំគគីរសោម និងឃុំមនោរម្យ ស្រុកស្វាយទាប ដើម្បីពិនិត្យមើលការប្រើប្រាស់ទឹកអណ្តូងស្នប់នៅតាមខ្នងផ្ទះប្រជាពលរដ្ឋ សរុបចំនួន ៥អណ្តូង ដែលមាននីវ៉ូទឹកកម្រិត ៦,៧ម ដល់ ៧,៧ម ជាហេតុធ្វើអោយទឹកអណ្តូងស្នប់មានទុយយោមុខកាត់ ៤២មម ទៅ ៤៩មម ពិបាកក្នុងការបូមប្រើប្រាស់នៅរដូវប្រាំងនេះ។

បន្ទាប់ពីបានចុះពិនិត្យជាក់ស្តែងរួចមកឃើញថា នៅតាមខ្នងផ្ទះប្រជាពលរដ្ឋ នៅទីតាំងខាងលើ ការប្រើប្រាស់ទឹកអណ្តូងរបស់ពួកគាត់នៅប្រើប្រាស់បានជារៀងរាល់ថ្ងៃ។

ជាមួយគ្នានេះដែរ ក្រុមការងារបានណែនាំដូចជា៖

ទី១.បានផ្សព្វផ្សាយ និងណែនាំពីរបៀបកែច្នៃប្រើម៉ូទ័របូម និងណែនាំឱ្យខួងអណ្តូងទុយយោមុខកាត់ចាប់ពី៨០មម ទៅ១០០មមឡើងទៅ។

ទី២. សូមអោយគ្រួសារមានខ្នងផ្ទះជាប់ៗគ្នាឬនៅក្នុងភូមិជាមួយគ្នាជួយចែករំលែកការប្រើប្រាស់ទឹកសម្រាប់គ្រួសារមានបញ្ហាអណ្តូងស្នប់មិនអាចប្រើប្រាស់បាននៅរដូវប្រាំងនេះ។

ទី៣. សូមផ្អាកការបូមទឹកក្រោមដីយកធ្វើចំការ និងស្រែប្រាំង។