![ឯកឧត្តម ឆាយ ឫទ្ធិសែន អញ្ជើញដឹកនាំកិច្ចប្រជុំស្ដីពី ការដឹកជញ្ជូនលើសទម្ងន់កំរិតកំណត់លើបណ្ដាញផ្លូវជនបទ នៃកម្ពុជា 12 2 17](https://www.mrd.gov.kh/wp-content/uploads/2024/08/2-17-150x150.jpg)
លោក ទូច ស៊ីផាត ដឹកនាំកិច្ចប្រជុំបេសកកម្មគាំទ្រការអនុវត្តគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារ កសិករ និងពាណិជ្ជូបនីយកម្មកសិកម្ម
- ថ្ងៃទី២៥ ខែមិនា ឆ្នាំ២០២៤ ម៉ោង ៤:០០ ល្ងាច
- សកម្មភាពក្រសួង
![លោក ទូច ស៊ីផាត ដឹកនាំកិច្ចប្រជុំបេសកកម្មគាំទ្រការអនុវត្តគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារ កសិករ និងពាណិជ្ជូបនីយកម្មកសិកម្ម 2 1 4 1](https://www.mrd.gov.kh/wp-content/uploads/2024/03/1-4-1-1000x644.jpg)
រាជធានីភ្នំពេញ៖ នៅព្រឹកថ្ងៃចន្ទ ១រោច ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៥ ខែមីនា ឆ្នាំ២០២៤ នៅទីស្ដីការក្រសួង លោក ទូច ស៊ីផាត អគ្គនាយរងរដ្ឋបាល និងហិរញ្ញវត្ថុ និងជាប្រធានគ្រប់គ្រងគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារ កសិករ និងពាណិជ្ជូបនីយកម្មកសិកម្ម (SAAMBAT) បានអញ្ជើញដឹកនាំកិច្ចប្រជុំបេសកកម្មគាំទ្រការអនុវត្តគម្រោង ដោយមានការអញ្ជើញចូលរួមពីក្រុមការងារអនុវត្តគម្រោង នៃអង្គភាពដឹកនាំគម្រោងក្រសួងអភិវឌ្ឍន៍ជនបទ, ក្រុមការងារអនុវត្តគម្រោង នៃអង្គភាពអនុវត្តគម្រោងក្រសួងសេដ្ឋកិច្ច និងហិរញ្ញវត្ថុ, ក្រុមបេសកកម្មនៃមូលនិធិអន្តរជាតិសម្រាប់អភិវឌ្ឍន៍កសិកម្ម (IFAD) និងធនាគារវិនិយោគអឺរ៉ុប (EIB)។
លោក ទូច ស៊ីផាត ប្រធានគ្រប់គ្រងគម្រោង SAAMBAT បានលើកឡើងថា កិច្ចប្រជុំនេះពិតជាមានសារៈសំខាន់ណាស់សម្រាប់ការអនុវត្តគម្រោង ដែលកិច្ចប្រជុំផ្ដោតលើចំណុចសំខាន់ៗដូចខាងក្រោម៖
– ការពិនិត្យមើលវឌ្ឍនភាពរួម និងការពិនិត្យឡើងវិញការអនុវត្ដការងាររបស់សមាសភាពទី១ និង សមាសភាពទី២ គិតចាប់តាំងពីខែវិច្ឆិកា ឆ្នាំ២០២៣
– ការពិនិត្យមើលវឌ្ឍនភាពរួម និងការពិនិត្យឡើងវិញនៃការកំណត់គោលដៅ, យុទ្ធសាស្រ្តយេនឌ័រ និងការបញ្ចប់សេចក្តីព្រាងគោលនយោបាយយេនឌ័រ
– ការពិនិត្យលើប្រព័ន្ធត្រួតពិនិត្យ និងវាយតម្លៃ និងការកែសម្រួលក្របខ័ណ្ឌលទ្ធផលការងារ, ធ្វើបច្ចុប្បន្នភាពឯកសារណែនាំការអនុវត្តគម្រោង និងរៀបចំការសិក្សាអំពីផលជះចុងគ្រា នៅឆ្នាំ២០២៥
– ការពិភាក្សាអំពីកាលបរិច្ឆេទ និងជម្រើសនៃការបញ្ចប់គម្រោង
បេសកកម្មគាំទ្រការអនុវត្តគម្រោងនេះ មានរយៈពេល ០៨ថ្ងៃ គឺចាប់ពីថ្ងៃទី២៥ ខែមីនា ដល់ថ្ងៃទី០១ ខែមេសា ឆ្នាំ២០២៤ ដោយមានការប្រជុំពិភាក្សា ពិនិត្យលើវឌ្ឍនភាពរួមនៃការអនុវត្តគម្រោងកន្លងមក ការពិភាក្សាលើបញ្ហា និងការប្រឈមដែលជួបប្រទះ ដើម្បីស្វែងរកដំណោះស្រាយសម្រាប់ធានាដំណើរការអនុវត្តគម្រោងតាមផែនការដែលគ្រោងទុក។ ជាមួយគ្នានេះ ក្រុមបេសកកម្មក៏ចុះពិនិត្យមើលវឌ្ឍនភាព និងដំណើរការស្ថាបនាផ្លូវ, ជួបប្រជុំជាមួយសហគមន៍ជាអ្នកទទួលផលគម្រោងដែលរស់នៅតាមខ្សែផ្លូវ និងពិនិត្យលើដំណើរការបណ្ដុះបណ្ដាលជំនាញវិជ្ជាជីវៈ។
សូមបញ្ជាក់ថា៖ គម្រោង SAAMBAT បែងចែកជា ២ សមាសភាគគឺ៖
សមាសភាគទី១ អនុវត្តដោយក្រសួងអភិវឌ្ឍន៍ជនបទ ត្រូវស្ថាបនាផ្លូវជនបទ កែលម្អផ្សារសហគមន៍ កំពង់ដសហគមន៍ និងសាងសង់កន្លែងប្រមូលផ្តុំកសិផលសម្រាប់បណ្តុំកសិករ។
សមាសភាគទី២ អនុវត្តដោយក្រសួងសេដ្ឋកិច្ច និងហិរញ្ញវត្ថុ ត្រូវបណ្តុះបណ្តាលជំនាញ សហគ្រាស និងបច្ចេកវិទ្យា ដោយចែកជា ៣ អនុសមាសភាគរួមមាន៖
– អនុសមាសភាគ ២.១៖ បណ្តុះបណ្តាលជំនាញយុវជន និងសហគ្រាស អនុវត្តដោយអង្គភាពអភិវឌ្ឍន៍ជំនាញ (SDU)
– អនុសមាសភាគ ២.២៖ បច្ចេកវិទ្យាឌីជីថលសម្រាប់ច្រវ៉ាក់ផលិតកម្មជនបទអនុវត្តដោយមជ្ឈ-មណ្ឌលបណ្តុះធុរកិច្ចថ្មី “តេជោ”(TSC)
– អនុសមាសភាគ ២.៣៖ ការសិក្សាស្រាវជ្រាវគោលនយោបាយ អនុវត្តដោយមជ្ឈមណ្ឌលសិក្សាគោលនយោបាយ (CPS)៕