ឯកឧត្តម ជ្រាយ ប៉ុម អគ្គនាយកបច្ចេកទេស អញ្ជើញជាអធិបតីក្នុងសិក្ខាសាលាពិគ្រោះយោបល់ស្តីពី “ការវាយតម្លៃលើកម្មវិធីទឹកស្អាត និងអនាម័យប្រចាំប្រទេស”

រាជធានីភ្នំពេញ៖ នៅថ្ងៃព្រហស្បតិ៍ ៤កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែវិច្ឆិកា ឆ្នាំ២០២៣ អគ្គនាយកដ្ឋានបច្ចេកទេស នៃក្រសួងអភិវឌ្ឍន៍ជនបទ បានរៀបចំសិក្ខាសាលាពិគ្រោះយោបល់ស្តីពី “ការវាយតម្លៃលើកម្មវិធីទឹកស្អាត និងអនាម័យប្រចាំប្រទេស” នៅសាលប្រជុំភ្នំពេញ២ កោះពេជ្រ (GIA Tower) ក្រោមអធិបតីភាព ឯកឧត្តម ជ្រាយ ប៉ុម អគ្គនាយកបច្ចេកទេស តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ។

ក្នុងនោះផងដែរក៏មានការអញ្ជើញចូលរួមពី លោក លោកស្រីអគ្គនាយករងបច្ចេកទេស លោកប្រធាន អនុប្រធាន និងក្រុមការងារនៃនាយកដ្ឋានថែទាំសុខភាពជនបទ លោកស្រីអនុប្រធាននាយកដ្ឋាន និងក្រុមការងារនៃនាយកដ្ឋានផ្គត់ផ្គង់ទឹកជនបទ និងតំណាងក្រសួងពាក់ព័ន្ធរួមមាន៖ តំណាងក្រសួងបរិស្ថាន តំណាងក្រសួងអប់រំ យុវជន និងកីឡា, តំណាងក្រសួងសុខាភិបាល, តំណាងក្រសួងសាធារណៈការ និងដឹកជញ្ជូន, តំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, អង្គការដៃគូ, ស្ថាប័នឯកជន, និងតំណាងគ្រឹះស្ថានអប់រំ សរុបចំនួន ៣៧ រូបស្រ្តី ១០រូប ចូលរួមដោយផ្ទាល់ និងតាមរយ:អនឡាញ។

សិក្ខាសាលានេះ ត្រូវបានរៀបចំឡើងដោយមាន កិច្ចសហការគាំទ្រពី អង្គការ UNICEF និងអង្គការ WaterAid ក្នុងគោលបំណងដូចខាងក្រោម៖

–  តាមដានវឌ្ឍនភាពឆ្ពោះទៅរកគោលដៅកម្មវិធីទឹកស្អាត និងអនាម័យទូទាំងប្រទេស

–  ផ្តល់ឱកាសឱ្យភាគីពាក់ព័ន្ធមានការសន្ទនាក្នុងន័យស្ថាបនាចំណុចខ្វះខាត កំណត់អាទិភាព និងបញ្ហាប្រឈមនៃវិស័យ WASH

–  ពិនិត្យ និងប្រើប្រាស់ឯកសារវិស័យទឹកស្អាត និងអនាម័យដែលមានស្រាប់

–  វាយតម្លៃរួមគ្នាអំពីវឌ្ឍនភាព និងពិភាក្សាអំពីយុទ្ធសាស្រ្តកម្រិតប្រទេសលើឆន្ទៈនយោបាយលើ WASH, វេទិកាពហុភាគីទំនាក់ទំនងជាមួយវិស័យផ្សេងទៀត, វឌ្ឍនភាពលើការប្តេជ្ញាចិត្ត ហិរញ្ញវត្ថុ, និងវិសមភាពក្នុងការកំណត់គោលដៅ

ជាលទ្ធផល សិក្ខាសាលា សម្រេចបានរួមមាន៖

១. បានពិភាក្សា និងវាយតម្លៃរួមលើ CSA framework

២. លទ្ធផលពិន្ទុដែលវាយតម្លៃតាមក្រុមបានបង្ហាញថាវិស័យទឹកស្អាត និងអនាម័យក្នុងប្រទេសកម្ពុជាមានភាពល្អប្រសើរឡើង

៣.ស័្វយវាយតម្លៃអាចឱ្យកែលម្អការយល់ដឹងអំពីវិស័យ WASH

៤. បានឯកភាពគ្នាលើបញ្ហាប្រឈមធំៗ ដែលវិស័យនេះកំពុងប្រឈម និងការបង្កើតទស្សនៈរួមគ្នាសម្រាប់វិស័យ WASH៕