ស្រះសហគមន៍មួយកំពុងត្រូវបានស្ថាបនាឡើង ដើម្បីផ្គត់ផ្គង់ទឹកស្អាត និងទឹកសុវត្ថិភាពសម្រាប់បរិភោគ ជូនប្រជាពលរដ្ឋនៅមូលដ្ឋាន ក្នុងខេត្តត្បូងឃ្មុំ

ខេត្តត្បូងឃ្មុំ៖ នាថ្ងៃពុធ ១០រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៨ ខែវិច្ឆិកា ឆ្នាំ២០២៣ លោក ស សេន អនុប្រធានមន្ទីរអភិវឌ្ឍន៍ជនបទ បានដឹកនាំក្រុមការងារបច្ចេកទេសការិយាល័យផ្គត់ផ្គង់ទឹកជនបទ ចុះត្រួតពិនិត្យការដ្ឋានជីកស្រះទឹកសហគមន៍ ១កន្លែង មានទំហំ បណ្ដោយប្រវែង ៩៥ម៉ែត្រ  ទទឹងប្រវែង ៨៥ម៉ែត្រ និងជម្រៅប្រវែង ៤ម៉ែត្រ ស្ថិតនៅភូមិត្រពាំងព្រីង ឃុំត្រពាំងព្រីង ស្រុកតំបែរ ខេត្តត្បូងឃ្មុំ ក្នុងក្របខណ្ឌគម្រោងពង្រឹងសមត្ថភាពផលិតភាពជនបទ របស់ក្រសួងអភិវឌ្ឍន៍ជនបទ ដោយប្រើប្រាស់ហិរញ្ញប្បទានជំនួយរបស់ធនាគារវិនិយោគហេដ្ឋារចនាសម្ព័ន្ធអាស៊ី (AIIB) និងថវិកាបដិភាគរបស់រាជរដ្ឋាភិបាលកម្ពុជា ។

គម្រោងសាងសង់ស្រះទឹកសហគមន៍នេះ បានចាប់ផ្ដើមដំណើរកាលពីខែវិច្ឆិកា ឆ្នាំ២០២៣ គិតមកដល់ពេលនេះ លទ្ធផលសម្រេចបាន ៥% ហើយ ហើយគ្រោងនឹងបញ្ចប់១០០% នៅដើមឆ្នាំ២០២៤ ខាងមុខនេះ ។

ស្រះទឹកសហគមន៍នេះ ត្រូវបានសាងសង់ឡើងដើម្បីផ្គត់ផ្គង់ទឹកស្អាត និងឆ្លើយតបទៅនឹងតម្រូវការក៏ដូចជាសំណូមពររបស់ប្រជាពលរដ្ឋក្នុងមូលដ្ឋាន ដែលត្រូវការទឹកស្អាត និងទឹកសុវត្ថិភាពសម្រាប់បរិភោគ សម្រាប់ផ្គត់ផ្គង់លើវិស័យកសិកម្មខ្នាតតូច និងការប្រើប្រាស់ក្នុងជីវភាពប្រចាំថ្ងៃ៕