លោកជំទាវ ឡាយ វីរៈបុត្រ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អញ្ជើញចូលរួមកិច្ចប្រជុំលើការងារ វឌ្ឍនភាព បញ្ហាប្រឈម និងការអនុវត្តអនុសាសន៍ របស់គណៈកម្មាធិការសិទ្ធិកុមារ នៃអង្គការសហប្រជាជាតិ

រាជធានីភ្នំពេញ៖ នៅថ្ងៃចន្ទ ៨រោច ខែអស្សុជ  ឆ្នាំថោះ ព.ស.២៥៦៧ ត្រូវនឹងថ្ងៃទី៦ ខែវិច្ឆិកា ឆ្នាំ២០២៣ នៅសណ្ឋាគារកាំបូឌីយ៉ាណា លោកជំទាវ ឡាយ វីរៈបុត្រ អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ និងលោក ខុន លីដូ អនុប្រធាននាយកដ្ឋានថែទាំសុខភាពជនបទ បានចូលរួមកិច្ចប្រជុំលើការងារ វឌ្ឍនភាព បញ្ហាប្រឈម និងការអនុវត្តអនុសាសន៍ របស់គណៈកម្មាធិការសិទ្ធិកុមារ នៃអង្គការសហប្រជាជាតិ ក្រោមអធិបតីភាព លោកជំទាវ ខៀវ បូរី រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ជា សុមេធី រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា ។ សមាសភាពចូលរួមមាន ក្រសួង-ស្ថាប័នពាក់ព័ន្ធ តំណាងគណៈកម្មាធិការសិទ្ធិកុមារនៃអង្គការសហប្រជាជាតិ ប្រធានអង្គការ UNICEF ចំនួន ៨០ នាក់ ។

គោលបំណងនៃកិច្ចប្រជុំគឺដើម្បី បង្ហាញនិងពិភាក្សាលើខ្លឹមសារការងារ វឌ្ឍនភាព បញ្ហាប្រឈម និងការអនុវត្តអនុសាសន៍ របស់គណៈកម្មាធិការសិទ្ធិកុមារ នៃអង្គការសហប្រជាជាតិ។

ជាលទ្ធផល: ក្រសួងពាក់ព័ន្ធ និងអាជ្ញាធរជាតិមួយចំនួនបានចូលរួមផ្តល់ជាយោបល់និងអនុសាសន៍មួយចំនួនបន្ថែមទៀត លើសេចក្តីព្រាងរបាយការណ៍ លើកទី៤ ទី៥ ស្តីពីការអនុវត្តសិទ្ធិកុមារនៅកម្ពុជា ។ ក្នុងនោះក្រសួងអភិវឌ្ឍន៍ជនបទ ស្ថិតនៅ Concluding Observation (COB) របស់អង្គការសហប្រជាជាតិ លេខ៤០ ដែលពាក់ព័ន្ធនឹង ការផ្តល់អាទិភាព និងលទ្ធភាពទទួលបានទឹកស្អាត និងអនាម័យ ជាពិសេសតំបន់ជនបទ និងជនជាតិដើមភាគតិច។