រាជធានីភ្នំពេញ៖ នារសៀលថ្ងៃសុក្រ ៩រោច ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២១ ខែកុម្ភៈ ឆ្នាំ២០២៥ ក្រសួងអភិវឌ្ឍន៍ជនបទ បានរៀបចំពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ ក្រោមអធិបតីភាព ឯកឧត្តម សុខ ចិន្តាសោភា ឧបនាយករដ្ឋមន្រ្តី តំណាងដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដោយមានការអញ្ជើញចូលរួមជាកិត្តិយសពីសំណាក់ សមាជិករាជរដ្ឋាភិបាល តំណាងព្រឹទ្ធសភា រដ្ឋសភា ក្រសួង ស្ថាប័ន អង្គទូត ដៃគូអភិវឌ្ឍន៍ ភ្លៀវកិត្តិយសជាតិ អន្ដរជាតិ ព្រមទាំងថ្នាក់ដឹកនាំ និងមន្ដ្រីរាជការ ក្រសួងអភិវឌ្ឍន៍ជនបទ ទាំងនៅថ្នាក់ជាតិ និងថ្នាក់ក្រោមជាតិ សរុបចំនួន ៧៩៥នាក់ នៅទីស្ដីការក្រសួងក្រសួងអភិវឌ្ឍន៍ជនបទ។
ជាកិច្ចចាប់ផ្ដើម ឯកឧត្ដមរដ្ឋមន្ដ្រី ឆាយ ប្ញទ្ធិសែន បានអានសុន្ទរកថាស្វាគមន៍ ជូនគណៈអធិបតី និងសមាជិក សមាជិកា នៃអង្គសន្និបាតទាំងមូល ដោយបានគូសបញ្ជាក់ថា ដំណើរការនៃការអភិវឌ្ឍនប្រទេស ជាពិសេសអង្គពិធីដ៏អធិកអធម និងមានអត្ថន័យនាថ្ងៃនេះ ប្រព្រឹត្តឡើងបានដោយសារគុណបំណាច់នៃសុខសន្តិភាពពេញលេញនៅទូទាំងប្រទេស ដែលកើតចេញពីពលីកម្មយ៉ាងធំធេងដោយយកជីវិតធ្វើជាដើមទុនរបស់ សម្តេចអគ្គមហាសេនាបតីតេជោ ហ៊ុន សែន។ រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលជាការបន្តវេនជាប្រវត្តិសាស្រ្តពី សម្តេចតេជោ បិតាស្ថាបនិកសន្តិភាព និងជាអតីតនាយករដ្ឋាមន្ត្រីកម្ពុជា ស្ថាបនិកមគ្គទេសក៏នៃឯកនយោបាយឈ្ន-ឈ្នះ បាននិងកំពុងបន្តដឹកនាំថែរក្សាសុខសន្តិភាពស្ថិរភាពនយោបាយ និងជំរុញការអភិវឌ្ឍឱ្យកាន់តែរីកចម្រើនជូនជាតិ និងប្រជាជន។ ជាមួយគ្នានេះ ឯកឧត្ដមរដ្ឋមន្ដ្រី បានធ្វើរបាយការណ៍បូកសរុបលទ្ធផលសន្និបាត ដែលបានដំណើរការរយៈពេលកន្លង ១ថ្ងៃកន្លះមក ដោយបានបង្ហាញនូវសមិទ្ធផលដែលក្រសួងសម្រេចបាន ក្នុងឆ្នាំ២០២៤ តាមកម្មវិធីអាទិភាពទាំង៤ របស់ក្រសួង រួមមាន៖ ទី១.ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទ ទី២. ការកែលម្អលក្ខខណ្ឌនៃការរស់នៅរបស់សហគមន៍ជនបទ ទី៣. ការធ្វើពិពិធកម្មសកម្មភាពសេដ្ឋកិច្ចជនបទ និងទី៤.ពង្រឹងសេវាគាំទ្ររដ្ឋបាល និងកិច្ចការទូទៅ។ ឯកឧត្ដមរដ្ឋមន្រ្ដី ក៏បានលើកឡើងអំពីយុទ្ធសាស្ដ្រ និងទិសដៅបន្តរបស់ក្រសួង សម្រាប់ឆ្នាំ២០២៥ ចំនួន ៥ គឺ អភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទប្រកបដោយភាពធន់, ការលើកកម្ពស់ការទទួលបានទឹកស្អាត និងអនាម័យបរិស្ថានជនបទ, ការជំរុញអភិវឌ្ឍសហគមន៍ជនបទ និងចលនាភូមិគំរូ, ការលើកម្ពស់ការធ្វើពិពិធកម្មសេដ្ឋកិច្ចជនបទ, និងការគ្រប់គ្រងស្ថាប័ន និងសេវាគាំទ្រទូទៅ ដែលមានចក្ខុវិស័យ “កសាងតំបន់ជនបទកម្ពុជាប្រកបដោយវិបុលភាព បរិយាបន្ន នវានុវត្តន៍ ឌីជីថល និងភាពធន់ ទាំងផ្នែកសេដ្ឋកិច្ច សង្គម និងវប្បធម៌” ក្នុងគោលដៅចូលរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១ ដែលមានចក្ខុវិស័យកសាងកម្ពុជា ជាប្រទេសដែលមានចំណូលមធ្យមកម្រិតខ្ពស់នៅ ឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
បន្ទាប់មក ឯកឧត្តមឧបនាយករដ្ឋមន្រ្តី សុខ ចិន្តាសោភា បានសម្តែងនូវការកោតសរសើរ និងវាយតម្លៃខ្ពស់ចំពោះសមិទ្ធផលនានាដែលក្រសួងអភិវឌ្ឍន៍ជនបទសម្រេចបានក្នុងរយៈពេល ១ឆ្នាំ កន្លងមក និងបានឯកភាពជាមួយទិសដៅសម្រាប់អនុវត្តបន្ត ដើម្បីឈានឆ្ពោះទៅសម្រេចបាននូវចក្ខុវិស័យរបស់ក្រសួង ដែលជាមូលដ្ឋានចូលរួមចំណែកសម្រេចនូវយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលមានបាវចនា ដើម្បីកំណើន ការងារ សមធម៌ ប្រសិទ្ធភាព និងចីរភាព និងបានកំណត់យកអាទិភាពគន្លឹះចំនួន ៥ គឺ៖ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ។ ឯកឧត្តមឧបនាយករដ្ឋមន្រ្តី ក៏បានលើកឡើងអំពី ការរីកចម្រើនយ៉ាងរហ័សនៅតំបន់ជនបទកម្ពុជានាពេលពេលបច្ចុប្បន្ន លើគ្រប់វិស័យ ជាពិសេស មានហេដ្ឋារចនាសម្ព័ន្ធខ្វាត់ខ្វែង ប្រទាក់ក្រឡាប្រកបដោយគុណភាព, មានទឹកស្អាតប្រើប្រាស់, មានអនាម័យល្អប្រសើរ, មានមុខរបរ, មានសកម្មភាពសេដ្ឋកិច្ចនានា ដើម្បីបង្កើនប្រាក់ចំណូល និងលើកកម្ពស់ជីវភាព ដែលលទ្ធផលទាំងនេះជាចំណែកដ៏សំខាន់នៃការខិតខំរបស់រាជរដ្ឋាភិបាលក្នុងការកាត់បន្ថយភាពក្រីក្រ។ លើសពីនេះទៀត ឯកឧត្តមឧបនាយករដ្ឋមន្រ្តី បានផ្ដល់អនុវសាសន៍គន្លឹះមួយចំនួន ដើម្បីឱ្យការរៀបចំផែនការសម្រាប់ឆ្នាំ២០២៥ លើវិស័យអភិវឌ្ឍន៍ជនបទ កាន់តែមុតស្រួច និងអនុវត្តទៅប្រកបដោយប្រសិទ្ធភាព និងស័ក្តិសិទ្ធភាព ស្របតាមចក្ខុវិស័យដែលបានកំណត់៕
