ឯកឧត្តមបណ្ឌិត នួន ដាញ៉ិល អញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្តីពី “ការសិក្សាវាយតម្លៃផលប៉ះពាល់ជាវិជ្ជមាននៃប្រព័ន្ធចែកចាយទឹកតាមបំពង់ខ្នាតតូចគ្រប់គ្រងដោយសហគមន៍”

រាជធានីភ្នំពេញ ៖ នាព្រឹកថ្ងៃសុក្រ ៣រោច ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២០ ខែកញ្ញា ឆ្នាំ២០២៤ នៅសណ្ឋាគារកាំបូឌីណយ៉ាណា ឯកឧត្តមបណ្ឌិត នួន ដាញ៉ិល រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្តីពី “ការសិក្សាវាយតម្លៃផលប៉ះពាល់ជាវិជ្ជមាននៃប្រព័ន្ធចែកចាយទឹកតាមបំពង់ខ្នាតតូចគ្រប់គ្រងដោយសហគមន៍” ដែលរៀបចំដោយអង្គការទស្សនៈពិភពលោក (World Vision)។

សិក្ខាសាលានេះ មានគោលបំណង ៖ (១). បង្ហាញអំពីការរកឃើញសំខាន់ៗពីលទ្ធផលវាយតម្លៃផលប៉ះពាល់នៃប្រព័ន្ធចែកចាយទឹកតាមបំពង់ខ្នាតតូចដែលគ្រប់គ្រងដោយសហគមន៍ (២). ការដាក់ជម្រើសមួយនៃគំរូអាជីវកម្មប្រកបដោយនិរន្តរភាពសម្រាប់ពង្រីកសេវាកម្មទឹកស្អាត ទៅដល់ជនដែលងាយរងគ្រោះក្នុងសហគមន៍ និង (៣). ការផ្តល់ធាតុចូល និងឯកភាពលើអនុសាសន៍ពីស្ថាប័នពាក់ព័ន្ធសំខាន់ៗ ដែលរួមមាន អ្នកបង្កើតគោលនយោបាយ ម្ចាស់ជំនួយ អង្គការមិនមែនរដ្ឋាភិបាលក្នុងស្រុក និងអន្តរជាតិ និងសហគមន៍គ្រប់គ្រងទឹក៕