ឯកឧត្តម ជា ស្រ៊ុន អញ្ជើញចុះពិនិត្យស្ពានឈើមួយកន្លែងដែលមានប្រវែង ៥៥ម៉ែត្រ ទទឹង ៣,៥ម៉ែត្រ នៅឃុំអូរស្វាយ ស្រុកបុរីអូរស្វាយសែនជ័យ ដែលបានរងការបាក់រលំដោយសារជំនន់ទឹកភ្លៀង

ខេត្តស្ទឹងត្រែង ៖ នាថ្ងៃពុធ ១២កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៧ ខែកក្ដដា ឆ្នាំ២០២៤ ឯកឧត្តម ជា ស្រ៊ុន រដ្ឋលេខាធិការ និងជាប្រធានលេខាធិការដ្ឋានគ្រប់គ្រងគ្រោះមហន្តរាយនៃក្រសួងអភិវឌ្ឍន៍ជនបទ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមនិងឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង អមដំណើរដោយអភិបាលស្រុក ប្រធាន អនុប្រធានមន្ទីរពាក់ព័ន្ធ ចុះពិនិត្យស្ពានឈើមួយកន្លែងដែលមានប្រវែង ៥៥ម៉ែត្រ ទទឹង ៣,៥ម៉ែត្រ ស្ថិតនៅភូមិ អូររុន ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង រងការបាក់រលំដោយសារជំនន់ទឹកភ្លៀងកាលពីថ្ងៃទី១៣ ខែកក្កដា ឆ្នាំ២០២៤ មិនអាចធ្វើចរាចរណ៍បាន។

បន្ទាប់ពីពិនិត្យនារសៀលថ្ងៃទី១៧ ខែកក្កដា ឆ្នាំ២០២៤ ក្រុមការងារឯកភាពជូនមន្ទីរអភិវឌ្ឍន៍ជនបទខេត្តស្ទឹងត្រែង សហការជាមួយរដ្ឋបាលស្រុកបុរីអូរស្វាយសែនជ័យ សិក្សាធ្វើការជួសជុលបន្ទាន់ដើម្បីតភ្ជាប់ស្ពានឈើនេះជូនប្រជាពលរដ្ឋធ្វើការឆ្លងកាត់បានជាបណ្តោះអាសន្ន។ រួចបន្តសិក្សាដើម្បីធ្វើការសាងសង់ជាស្ពានថ្មីឡើងវិញសម្រាប់ប្រើប្រាស់បានយូរអង្វែង។

សូមបញ្ជាក់ថា ស្ពាននេះឆ្លងកាត់ភ្ជាប់ពីភូមិរុន និងភូមិ វឺន សៀន ដែលមានប្រជាពលរដ្ឋឆ្លងកាត់ស្ពាននេះ ចំនួន ២០៧គ្រួសារ ប្រជាជនប្រមាណជា ១០០០នាក់៕