![លោក សំ នីតូ ប្រធានមន្ទីរអភិវឌ្ឍន៍ជនបទខេត្តស្វាយរៀងចុះពិនិត្យមើលទីតាំងត្រូវដាក់ស្លាកព័ត៌មានរបស់គម្រោងនៅស្រុកស្វាយជ្រំ ខេត្តស្វាយរៀង 15 photo 2024 09 03 16 32 49 3](https://www.mrd.gov.kh/wp-content/uploads/2024/09/photo_2024-09-03_16-32-49-3-150x150.jpg)
ឯកឧត្តមបណ្ឌិត សួស គង់ អញ្ជើញចូលរួមក្នុងវេទិកាស្វែងយល់អំពីហានិភ័យឆ្នាំ២០២៤ (Understanding Risk, 2024_UR24) នៅប្រទេសជប៉ុន
- ថ្ងៃទី២៤ ខែមិថុនា ឆ្នាំ២០២៤ ម៉ោង ៤:៣៥ ល្ងាច
- សកម្មភាពក្រសួង
![ឯកឧត្តមបណ្ឌិត សួស គង់ អញ្ជើញចូលរួមក្នុងវេទិកាស្វែងយល់អំពីហានិភ័យឆ្នាំ២០២៤ (Understanding Risk, 2024_UR24) នៅប្រទេសជប៉ុន 2 photo 2024 06 24 00 35 53 2](https://www.mrd.gov.kh/wp-content/uploads/2024/06/photo_2024-06-24_00-35-53-2-1000x462.jpg)
ប្រទេសជប៉ុន ៖ នាថ្ងៃអាទិត្យ ១០កើត-សុក្រ១៥កើត ខែជេស្ឋ ឆ្នាំរោង ព.ស.២៥៦៨ ត្រូវនឹងថ្ងៃទី១៦-២១ ខែមិថុនា ឆ្នាំ២០២៤ នៅទីក្រុងហ៊ីមេជី (HIMEJI) ប្រទេសជប៉ុន ឯកឧត្តមបណ្ឌិត សួស គង់ រដ្ឋលេខាធិការ និងជាអ្នកសម្របសម្រួលគម្រោងគ្រប់គ្រងគ្រោះមហន្តរាយនៅកម្ពុជានិងអាស៊ីអគ្នេយ៍ ជំហានទី២ (SEADRM 2) និងលោក ទាង ឆាយហៀង អនុប្រធាននាយកដ្ឋានផែនការ និងទំនាក់ទំនងសាធារណ: និងជាប្រធានគ្រប់គ្រងគម្រោង SEADRM 2 បានអញ្ជើញចូលរួមក្នុងវេទិកាស្វែងយល់អំពីហានិភ័យឆ្នាំ២០២៤ (Understanding Risk, 2024_UR24) ដែលរៀបចំដោយធនាគារពិភពលោក (WB) ក្រោមអធិបតីភាពលោកបណ្ឌិត Guangzhe Chen អនុប្រធានធនាគារពិភពលោក ដោយមានអ្នកចូលរួម ប្រមាណ ១ ៥៥០នាក់ មកពី ១៣៥ប្រទេស។
វេទិកាខាងលើមានគោលបំណង ដើម្បីផ្តល់វេទិកាពិភាក្សាអំពីការវាយតម្លៃហានិភ័យនៃគ្រោះមហន្តរាយ ការធ្វើបទបង្ហាញអំពីសមិទ្ធផលល្អៗ និងការវិវត្តនៃបច្ចេកវិទ្យាចុងក្រោយ សម្រាប់វិស័យគ្រប់គ្រងគ្រោះមហន្តរាយ ក្រោមប្រធានបទ “ប្រពៃណី ការឆ្នៃប្រឌិត និងភាពធន់ ដែលនឹងផ្តោតលើការកសាងអនាគតប្រកបដោយនិរន្តរភាព និងភាពធន់ ចំពោះបេតិកភ័ណ្ឌវប្បធម៌” ដោយបានផ្តោតទៅលើប្រធានបទជាច្រើន ទាក់ទងទៅនឹងបច្ចេកវិទ្យាថ្មីៗពាក់ព័ន្ធនឹងការព្យាករណ៍គ្រោះធម្មជាតិ ប្រព័ន្ធផ្ដល់សញ្ញាអាសន្ន និងប្រធានបទមួយចំនួនទៀតពាក់ព័ន្ធនឹងការប្រែប្រួលអាកាសធាតុ ការធានារ៉ាប់រងផ្នែកហិរញ្ញវត្ថុ យេនឌ័រ និងប្រព័ន្ធគាំពារសន្តិសុខសង្កមជាដើម។
វេទិកាពិភាក្សាអំពីការវាយតម្លៃហានិភ័យនៃគ្រោះមហន្តរាយ ឆ្នាំ២០២៤ នេះ ពិតជាមានសារ:សំខាន់ ដែលផ្ដល់ឱកាសដល់អ្នកចូលរួម និងជាពិសេសដៃគួរអភិវឌ្ឍន៍អាចធ្វើកិច្ចសហប្រតិបត្តិការ និងការផ្លាស់ប្ដូរគំនិត និងបទពិសោធន៍ ព្រមទាំងបង្កើនចំណេះដឹងផ្នែកគ្រប់គ្រងគ្រោះមហន្តរាយថែមទៀតផង៕