ក្រុមការងារសម្របសម្រួលគម្រោង “ការកសាងភូមិសន្តិភាព តាមរយៈការអភិវឌ្ឍសហគមន៍ជនបទចម្រុះ” បើកវគ្គបណ្តុះបណ្តាលស្តីពី ការជួសជុល និងថែទាំគ្រឿងយន្តកសិកម្មខ្នាតតូច

ខេត្តបន្ទាយមានជ័យ ៖ នាថ្ងៃសុក្រ និងសៅរ៍ ៩-១០រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣១ ខែឧសភា និងថ្ងៃទី០១ ខែមិថុនា ឆ្នាំ២០២៤ ក្រុមការងារសម្របសម្រួលគម្រោង “ការកសាងភូមិសន្តិភាព តាមរយៈការអភិវឌ្ឍសហគមន៍ជនបទចម្រុះ” នៃមន្ទីរអភិវឌ្ឍន៍ជនបទខេត្តបន្ទាយមានជ័យ បានបើកវគ្គបណ្តុះបណ្តាលស្តីពី ការជួសជុល និងថែទាំគ្រឿងយន្តកសិកម្មខ្នាតតូច ។

វគ្គបណ្តុះបណ្តាលនេះ បានប្រព្រឹត្តទៅរយៈពេល ២ថ្ងៃ នៅភូមិថ្មី ឃុំម៉ាឡៃ ស្រុកម៉ាឡៃ ដែលមានសិក្ខាកាមចូលរួមសរុបចំនួន ១៧នាក់។ នៅក្នុងវគ្គបណ្តុះបណ្តាលនេះដែរ សិក្ខាកាមគ្រប់ៗរូបបានសិក្សាទាំងទ្រឹស្តី និងអនុវត្តសាកល្បងជាក់ស្ដែង លើជំនាញរើម៉ាស៊ីន ដំឡើងគ្រឿងបង្គុំតាមលំដាប់ សម្រាប់ម៉ាស៊ីនប្រើប្រេងម៉ាស៊ូត ក្នុងនោះមានប្រព័ន្ធប្រអប់លេខ  និងសំណុំកូនជ្រូករបស់គ្រឿងយន្តកសិកម្មខ្នាតតូច ៕