មន្ទីរអភិវឌ្ឍន៍ជនបទខេត្តពោធិ៍សាត់ បានចុះពិនិត្យស្ថានភាពប្រើប្រាស់ទឹកដោយជ្រើសរើសទីតាំងសម្រាប់សាងសង់អណ្ដូងស្នប់ចំនួន ៣អណ្ដូង ក្នុងស្រុកតាលោសែន និងជួសជុលអណ្តូងបានចំនួន ២អណ្តូងក្នុងស្រុកកណ្តៀង

ខេត្តពោធិ៍សាត់ ៖ ថ្ងៃពុធ ៨រោច ខែចេត្រ ឆ្នាំរោង ឆស័ក ព.ស.២៥៦៧ ត្រូវនឹងថ្ងៃទី០១ ខែឧសភា ឆ្នាំ២០២៤ លោក ប្លង់ បញ្ញា អនុប្រធានមន្ទីរអភិវឌ្ឍន៍ជនបទខេត្តពោធិសាត់ ព្រមទាំងមន្ត្រីជំនាញ បានចុះពិនិត្យស្ថានភាពប្រើប្រាស់ទឹករបស់ប្រជាពលរដ្ឋ និងបានជ្រើសរើសទីតាំងសម្រាប់សាងសង់អណ្ដូងស្នប់ចំនួន ៣អណ្ដូង នៅឃុំតាលោ ស្រុកតាលោសែន ខេត្តពោធិ៍សាត់ ។

ជាលទ្ធផល ក្រុមការងារបានកំណត់បានទីតាំងចំនួន ៣ សម្រាប់ខួងអណ្តូងប្រើប្រាស់ គឺនៅភូមិប្រហាលចំនួន ០១អណ្តូង និងភូមិរហាលទិលចំនួន ០២អណ្តូង និងជាមួយគ្នានេះក៏បានចុះពិនិត្យការដ្ឋានខួងអណ្តូងនៅភូមិសំសាន្ត ឃុំតាលោ ស្រុកតាលោសែនផងដែរ។ នៅថ្ងៃដដែលនេះ ក្រុមការងារមន្ទីរអភិវឌ្ឍន៍ជនបទចំនួន ៤រូប ក៏បានចុះជួសជុលអណ្ដូងស្នប់ជូនប្រជាពលរដ្ឋបានចំនួន០២ អណ្ដូង នៅភូមិស្ទឹង ឃុំកណ្ដៀង ស្រុកកណ្ដៀង និងបានជួសជុលអណ្តូងស្នប់នៅភូមិស្រះស្រង់ សង្កាត់ព្រៃញី ក្រុងពោធិ៍សាត់ ដោយមានប្រជាពលរដ្ឋប្រើប្រាស់សរុប ៣៨គ្រួសារ។