ខេត្តកណ្តាលនឹងក្លាយជាខេត្តបញ្ចប់ការបន្ទោរបង់ពាសកាលកម្រិតខ្ពស់(ODF+) ក្នុងពេលឆាប់ៗខាងមុខនេះ

ខេត្តកណ្តាល៖  នៅព្រឹកថ្ងៃចន្ទ ៤រោច ខែបុស្ស​ ឆ្នាំថោះ​ បញ្ចស័ក​ ព. ស.២៥៦៧ ត្រូវនឹងថ្ងៃទី២៩ ខែមករា ឆ្នាំ២០២៤ ឯកឧត្តម នុត ពុធដារ៉ា អភិបាលរងខេត្ត ជាប្រធាន PWG និងជាប្រធានក្រុមការ​ងារ​ចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+)ថ្នាក់​ខេត្ត​ បានដឹកនាំក្រុមការងារ(ODF+) រួមមាន:មន្ទីរអភិវឌ្ឍន៍ជនបទខេត្ត មន្ទីរ​ធម្មការ​ និងសាសនា​ខេត្ត មន្ទីរកិច្ចការនារីខេត្ត ក្រុមការងារ​(DWG)​ ស្រុក​ តំណាងនាយកប្រចាំប្រទេសអង្គការ water Aid បានចុះផ្ទៀងផ្ទាត់លើការបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+)នៅស្រុកខ្សាច់កណ្តាល។

ក្នុងឱកាសចុះផ្ទៀងផ្ទាត់ ឯកឧត្តម នុត ពុធដារ៉ា អភិបាលរងខេត្ត បានបញ្ជាក់ថា៖ ការចុះផ្ទៀងផ្ទាត់ (ODF+) នៅស្រុកខ្សាច់កណ្ដាលនាពេលនេះ គឺជាការចុះវាយតម្លៃដោយថ្នាក់ខេត្ត ដើម្បីបញ្ជាក់អំពីសុក្រិតភាពនៃការអះអាងតាមរយ:សេចក្តីប្រកាសផ្ទៃក្នុង(ODF+) របស់រដ្ឋបាលស្រុកខ្សាច់កណ្តាល និងការផ្តល់កិត្តិយសប្រកបដោយគុណតម្លៃ ជូនប្រជាពលរដ្ឋក្នុងស្រុកខ្សាច់កណ្តាល ដែលបានចូលរួមប្រតិបត្តិអនាម័យល្អ ស្របតាមគោលការណ៍ណែនាំ របស់ក្រសួងអភិវឌ្ឍន៍ជនបទ ។ បន្ទាប់ពីការត្រួតពិនិត្យថ្នាក់ ក្រុង-ស្រុកបានបញ្ចប់រួចជាស្ថាពរហើយ ក្រុមការងារថ្នាក់ជាតិនឹងចុះមកវាយតម្លៃថ្នាក់ខេត្តវិញម្ដង ។ ការចុះរបស់ថ្នាក់ជាតិក៏ដូចជាថ្នាក់ខេត្តដែរ គឺមានការចាប់ឆ្នោតយកស្រុក ក្រុង ឃុំ សង្កាត់ និងភូមិ ដើម្បីចុះត្រួតពិនិត្យ ។ ដូច្នេះអាជ្ញាធរ ភូមិ ឃុំ ស្រុក ត្រូវត្រៀមខ្លួនឱ្យរួចរាល់ ត្រូវប្រាកដថាក្នុងមូលដ្ឋានរបស់ខ្លួនគឺនៅតាមខ្នងផ្ទះរបស់ប្រជាពលរដ្ឋ សាលាស្រុក មណ្ឌលសុខភាព សាលារៀន វត្តអារាម ការ៉ាសសាំង អាហារដ្ឋាន និងសាលាឃុំ ជាដើមត្រូវមានបង្គន់អនាម័យប្រើប្រាស់បានត្រឹមត្រូវ មានភាពស្អាត មិនមានក្លិន មានទឹក និងសាប៊ូ សំដៅធ្វើឱ្យការចុះវាយតម្លៃ (ODF+) ក្នុងខេត្តកណ្ដាលទទួលបានលទ្ធផលល្អប្រសើរ។

ឯកឧត្ដម បានបន្ថែមថា៖ រដ្ឋបាលខេត្តកណ្តាល ក្រោមការដឹកនាំរបស់ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្ត បានធ្វើឱ្យមានការអភិវឌ្ឍលើគ្រប់វិស័យ ក្នុងនោះ វិស័យផ្គត់ផ្គង់ទឹកស្អាត និងអនាម័យជនបទ មានការរីកចម្រើនគួរឱ្យកត់សម្គាល់  គឺសង្ឃឹមជឿជាក់ថា “ខេត្តកណ្តាលធ្វើបាន” ហើយធ្វើបានយ៉ាងល្អ ដើម្បីសម្រេចឱ្យបានជាខេត្តបញ្ចប់ការបន្ទោបង់ពាសវាលពាសកាលកម្រិតខ្ពស់(ODF+) ក្នុងពេលឆាប់ៗខាងមុខនេះ។

ឯកឧត្ដម អភិបាលរងខេត្ត មានជំនឿជឿជាក់ថា ការជំរុញឱ្យសម្រេចបាន(ODF+) នេះគឺពិតជាអាចធ្វើទៅបាន ហើយធ្វើបានយ៉ាងលឿន ថែមទៀតផង។ ព្រោះបើយោងលើសូចនាករ ដូចដែលតំណាងមន្ទីរអភិវឌ្ឍន៍ជនបទ បានលើកឡើងនាពេលមុននេះ គឺខេត្តកណ្តាលហាក់ដូចជាមានស្ទើរគ្រប់លក្ខខណ្ឌស្រេចទៅហើយ។ ប៉ុន្តែទោះយ៉ាងណាយើងមិនត្រូវមោទនភាព ដោយបោះបង់ការព្យាយាម បោះបង់ការអប់រំផ្សព្វផ្សាយ និងការជំរុញបន្ថែមលើការងារអនាម័យ បរិស្ថាន ការសាងសង់បង្គន់ផ្ទាល់ខ្លួនបន្ថែមទៀត ក៏ដូចជាការសាងសង់បង្គន់ប្រកបដោយបរិយាបន្ន នៅតាមស្ថាប័ន និងអង្គភាពផ្តល់សេវាផងដែរ។ ដូច្នេះយើងត្រូវរួមសាមគ្គីគ្នា សហការគ្នា ប្តេជ្ញាធ្វើឱ្យស្ថានការណ៍ប្រែប្រួលពីខេត្ត ODF ទី៣ ទៅជាខេត្តសម្រេច បាន (ODF+) នាពេលឆាប់ៗខាងមុខនេះ៕