ខេត្តពោធិ៍សាត់៖ ថ្ងៃសុក្រ ៣កើត ខែមិគសិរ ឆ្នាំថោះបញ្ចស័ក ព.ស ២៥៦៧ ត្រូវនឹងថ្ងៃទី១៥ ខែធ្នូ ឆ្នាំ២០២៣ នៅសាលប្រជុំមន្ទីរអភិវឌ្ឍន៍ជនបទខត្តពោធិ៍សាត់ បានរៀបចំកិច្ចប្រជុំបូកសរុបការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ ស្តីពីការងារផ្គត់ផ្គង់ទឹកស្អាត និងលើកកម្ពស់អនាម័យជនបទ របស់ក្រុមការងារលេខាធិការដ្នានបច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់ អនាម័យជនបទ (RWSSH) ក្រោមអធិបតីភាព លោក ធីម សុធារ៉ា ប្រធានមន្ទីរ និងជាប្រធានក្រុមការងារលេខាធិការដ្នាន និងមានការអញ្ជើញចូលរួមពីអង្គការដៃគូ ចំនួន១១អង្គការ និងមន្រ្តីជំនាញរបស់មន្ទីរអភិវឌ្ឍន៍ជនបទខេត្ត សរុប១៨ រូប ស្រ្តី ៥រូប។

 

ជាលទ្ធផលក្នុងឆ្នាំ២០២៣ ខេត្តពោធិ៍សាត់មានអត្រាគ្របដណ្តប់លើវិស័យ ទឹកស្អាត និងអនាម័យទូទាំងខេត្ត មានដូចខាងក្រោម៖

-ស្រុកវាលវែង វិស័យទឹកស្អាត ៨០,០២% និងអនាម័យ ៦៥%

-ស្រុកតាលោសែនជ័យ វិស័យទឹកស្អាត ៨៧,៨០% និងអនាម័យ ៩៥%

-ស្រុកកណ្តៀង វិស័យទឹកស្អាត ៨៥,៩២% និងអនាម័យ ៨២%

-ស្រុកភ្នំក្រវាញ វិស័យទឹកស្អាត ៩២,៨៩% និងអនាម័យ ៩០%

-ស្រុកក្រគរ វិស័យទឹកស្អាត ៨៦,០៦% និងអនាម័យ ៨០%

-ស្រុកបាកាន វិស័យទឹកស្អាត ៨៥,០៣% និងអនាម័យ ៨៣%

-ក្រុងពោធិ៍សាត់ វិស័យទឹកស្អាត ៩២,១៤% និងអនាម័យ ៩០%

 

សូមបញ្ជាក់ផងដែរថា ក្នុងឆ្នាំ២០២៣នេះ ខេត្តពោធិ៍សាត់បានធ្វើការប្រកាសឃុំបញ្ឈប់ការបន្ទោរបង់ពាសវាលពាសកាល (ODF)បានចំនួន ៧ឃុំ រូមមាន៖

-ឃុំស្យា និងឃុំកញ្ជរ ស្ថិតក្នុងស្រុកកណ្តៀង

-ឃុំអន្សាចំបក់ ស្ថិតក្នុងស្រុកក្រគរ

-ឃុំព្រងិល ឃុំសំរោង និងឃុំបាក់ចិញ្ចៀន ស្ថិតក្នុងស្រុកភ្នំក្រវាញ

-និងឃុំផ្ទះរុង ស្ថិតក្នុងស្រុកតាលោសែនជ័យ។

 

សម្រាប់ទិសដៅឆ្នាំ២០២៤ មន្ទីរអភិវឌ្ឍន៍ជនបទខេត្តពោធិ៍សាត់ បានជ្រើសរើសយកស្រុកតាលោសែនជ័យ ជាស្រុកដែលបញ្ឈប់ការបន្ទោរបង់ពាសវាលពាសកាល (ODF) ដំបូងក្នុងខេត្តពោធិ៍សាត់។

 

កិច្ចប្រជុំនេះបានបញ្ចប់ទៅក្រោមបរិយាកាសកិច្ចសហប្រតិបត្តិការល្អ និងមានភាពស្និទ្ធស្នាលបំផុត។

រាជធានីភ្នំពេញ៖ នាព្រឹកថ្ងៃពុធ ៨កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២០ ខែធ្នូ ឆ្នាំ២០២៣ នៅទីស្ដីការក្រសួង ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងជាប្រធានកិត្តិយសក្រុមការងារសកម្មភាពជនមានពិការភាពក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីសំណេះសំណាលជាមួយមន្ត្រីរាជការ មន្ត្រីជាប់កិច្ចសន្យា និងបុគ្គលិកមានពិការភាព របស់ក្រសួងអភិវឌ្ឍន៍ជនបទ ក្នុងឱកាសទិវាជនមានពិការភាពកម្ពុជាលើកទី២៥ និងទិវាជនមានពិការភាពអន្តរជាតិលើកទី៤១ ក្រោមប្រធាន “ដំណោះស្រាយប្រកបដោយនវានុវត្តន៍ដើម្បីសង្គមមួយមានផាសុកវត្ថុ និងសមធម៌” ។

 

ពិធីសំណេះសំណាលនេះ ត្រូវបានប្រារព្ធឡើង ក្នុងគោលបំណងអបអរសាទរភាពជោគជ័យនៃវិស័យពិការភាពនៅកម្ពុជា និងបង្ហាញពីឆន្ទៈរបស់រាជរដ្ឋាភិបាល ក្នុងការលើកកម្ពស់សិទ្ធិ និងការចូលរួមរបស់ជនមានពិការភាព ព្រមទាំងដាក់ឱ្យអនុវត្តផែនការយុទ្ធសាស្ត្រជាតិស្តីពីពិការភាព ២០១៩-២០២៣ ដោយមានការអញ្ជើញចូលរួមពីសំណាក់ ឯកឧត្តមរដ្ឋលេខាធិការប្រចាំការ, ឯកឧត្តមរដ្ឋលេខាធិការ អនុរដ្ឋលេខាធិការ, ឯកឧត្តមអគ្គនាយក, អគ្គនាយករង, ឯកឧត្តម លោក លោកស្រីប្រធាននាយកដ្ឋាន ជាថ្នាក់ដឹកនាំ ព្រមទាំងមន្ដ្រីរាជការ មន្ត្រីជាប់កិច្ចសន្យា និងបុគ្គលិកមានពិការភាព របស់ក្រសួងអភិវឌ្ឍន៍ជនបទ សរុបចំនួន ៧២រូប។

 

យោងតាមរបាយការណ៍របស់ ឯកឧត្ដម សុខ ម៉េង អនុរដ្ឋលេខាធិការ និងជាប្រធានក្រុមការងារសកម្មភាពជនមានពិការភាពរបស់ក្រសួងអភិវឌ្ឍន៍ជនបទ បានបញ្ជាក់ថា ក្រោមឱវាទក្រសួងអភិវឌ្ឍន៍ជនបទ មានមន្ត្រីរាជការ មន្ត្រីជាប់កិច្ចសន្យា និងបុគ្គលិកជាជនមានពិការភាព សរុបចំនួន ៣៨នាក់ ស្មើ ៣,៨% ធៀបនឹងចំនួនមន្ដ្រីរាជការសរុបនៃក្រសួងអភិវឌ្ឍន៍ជនបទ ក្នុងនោះនៅទីស្ដីការក្រសួងមានចំនួន ១១នាក់ និងនៅតាមបណ្ដាមន្ទីរអភិវឌ្ឍន៍ជនបទរាជធានី ខេត្ត មានចំនួន ២៧នាក់។

 

ក្នុងឱកាសនោះដែរ ឯកឧត្ដម បាន បូរ័ត្ន អគ្គនាយករដ្ឋបាល និងហិរញ្ញវត្ថុ បានឡើងអាន ព្រះរាជសាររបស់ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងឱកាសទិវាជនមានពិការភាពកម្ពុជាលើកទី២៥ និងទិវាជនមានពិការភាពអន្តរជាតិលើកទី៤១ ។

 

ក្នុងនាម រដ្ឋមន្ត្រី និងជាប្រធានកិត្តិយសក្រុមការងារសកម្មភាពជនមានពិការភាពក្រសួងអភិវឌ្ឍន៍ជនបទ ឯកឧត្ដម ឆាយ ឫទ្ធិសែន បានពាំនាំសេចក្តីនឹករលឹក  និងការសាកសួរសុខទុក្ខពីសំណាក់ សម្ដេចអគ្គមហាសេនាបតីតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្តេចមហាបវរធិបតី ហ៊ុន  ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា  ជូនដល់មន្ត្រីរាជការ មន្ត្រីជាប់កិច្ចសន្យា និងបុគ្គលិកមានពិការភាពទាំងអស់ ព្រមទាំងបានមានប្រសាសន៍ថា បងប្អូនមានពិការភាពទាំងអស់ បានចូលរួមចំណែកធ្វើឱ្យសម្រេចបានជោគជ័យរបស់ក្រសួងលើការងារអភិវឌ្ឍន៍ជនបទផងដែរ ។ ក្រសួងនឹងបន្តលើកទឹកចិត្តដល់បងប្អូនមន្ត្រីមានពិការភាពឱ្យចូលរួមគ្រប់សកម្មភាពរបស់ក្រសួង។

 

ឆ្លៀតក្នុងពិធីសំណេះសំណាលនោះ ឯកឧត្ដមរដ្ឋមន្ត្រី បានផ្ដាំផ្ញើជូនមន្ដ្រីរាជការ មន្ត្រីជាប់កិច្ចសន្យា និងបុគ្គលិកមានពិការភាពទាំងអស់ដូចខាងក្រោម៖

 

–  សូមបន្ដខិតខំអនុវត្តតួនាទី ភារកិច្ច គោរពវិន័យការងារ ក្រមសីលធម៌មន្ដីរាជការ ដោយអនុវត្តតាមគោលការណ៍ ផ្អែកលើសមិទ្ធផលដែលមានស្រាប់ បន្ដខិតខំបង្កើនសមិទ្ធផលថ្មីៗបន្ថែមទៀត ដើម្បីចូលរួមចំណែកសម្រេចបាននូវយុទ្ធសាស្រ្តបញ្ចកោណ និងចក្ខុវិស័យឆ្នាំ២០៣០ និងឆ្នាំ២០៥០។

 

–  សូមចូលរួមផ្សព្វផ្សាយនូវគោលនយោបាយ, គោលការណ៍,ច្បាប់, និងបទដ្ឋានគតិយុត្តនានា ដល់ប្រជាជននៅតំបន់ជនបទ នៅពេលបំពេញការងារ។

 

–  សូមបន្ដចូលរួមថែរក្សាសន្ដិភាព, សាមគ្គីភាព, ឯកភាពផ្ទៃក្នុង និងសហការគ្នាដើម្បីអនុវត្តការងារសំដៅសម្រេចការងារអភិវឌ្ឍន៍ជនបទឱ្យទទួលបានជោគជ័យតាមផែនការដែលបានគ្រោងទុក៕

ខេត្តស្ទឹងត្រែង៖ កាលពីថ្ងៃព្រហស្បតិ៍ ២កើត ខែមិគសិរ  ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី១៤ ខែធ្នូ ឆ្នាំ២០២៣ ឯកឧត្ដម ធូ ចាន់ពៅ អភិបាលរងខេត្ត តំណាងឯកឧត្ដម អភិបាលនៃគណៈអភិបាលខេត្តស្ទឹងត្រែង ជាគណៈធិបតី លោកវេជ្ជបណ្ឌិត លន់ សាយតេង ប្រធាននាយកដ្ឋានថែទាំសុខភាពជនបទ លោក ព្រំ ចាន់ថា ប្រធានមន្ទីរអភិវឌ្ឍន៍ជនបទខេត្ត លោក ជឹម ចរណៃ ទីប្រឹក្សាបច្ចេកទេស និងលោក លៀម លួន  ប្រធានកម្មវិធីអង្គការវឌ្ឍនភាព បានសហការរៀបចំកិច្ចប្រជុំថ្នាក់ខេត្តស្តីពី “ការពន្លឿនស្ថានភាពបញ្ចប់ការបន្ទោបង់ពាសវាលពាសកាល ODF ”  នៅសាលប្រជុំរដ្ឋបាលសាលាខេត្តស្ទឹងត្រែង ដោយឡែកកិច្ចប្រជុំនេះមានការអញ្ជើញចូលរួមពីតំណាងមន្ទីរពាក់ព័ន្ធជុំវិញខេត្ត និងអភិបាលរងក្រុង-ស្រុកទាំង៦ ក្នុងខេត្ត  ព្រមទាំងអង្គការដៃគូរ សរុបចំនួន២៨នាក់ ស្រី ០៦នាក់ ។

គោលបំណងសំខាន់នៃកិច្ចប្រជុំមានបីចំណុច៖

១. ដើម្បីពិនិត្យវឌ្ឍនភាពនៃការសម្រេចបានស្ថានភាពបញ្ចប់ការបន្ទោបង់ពាសវាលពាសកាល (ODF) និងបញ្ហាប្រឈមពាក់ព័ន្ធការងារ ODF ក្នុងខេត្ត។

២. ដើម្បីឆ្លុះបញ្ចាំងពីការអនុវត្តគោលការណ៍ណែនាំស្តីពីការផ្ទៀងផ្ទាត់ ODF កន្លងមក និងរំលឹកអំពីសូចនាករ ODF វិធីសាស្រ្តកំណត់សំណាកអង្កេតស្ថានភាពអនាម័យតាមខ្នងផ្ទះ។

៣. ដើម្បីពិនិត្យកំណត់គោលដៅ ODF ខេត្តស្ទឹងត្រែងឡើងវិញ ឈានទៅសម្រេចឱ្យបានជាខេត្ត ODF នៅដំណាច់ឆ្នាំ២០២៣ ឬដើមឆ្នាំ២០២៤។

ជាលទ្ធផលកិច្ចប្រជុំសម្រេចបានដូចខាងក្រោម៖

១. បានធ្វើបទបង្ហាញពីសូចនាករ ODF តាមគោលការណ៍ណែនាំនិងពិនិត្យកំណត់គោលដៅ ODF ខេត្តស្ទឹងត្រែង ឡើងវិញដើម្បីសម្រេចបាននៅដំណាច់ឆ្នំា២០២៣។

២. ពិភាក្សាលើបញ្ហាប្រឈម និងដំណោះស្រាយដែលដឹកនំាដោយប្រធាន PWG។

៣. ស្រុកសៀមបូក ត្រៀមនឹងចុះផ្ទៀងផ្ទាត់ និងប្រកាសបញ្ចប់ការបន្ទោបង់ពាសវាលពាសកាលនៅចុងខែធ្នូខាងមុខនេះ។

៤. រដ្ឋបាលក្រុង-ស្រុកទាំង៦ បានធ្វើការតាំងចិត្តឱ្យសម្រេចបានការបញ្ចប់ការបន្ទោបង់ពាសវាលពាសកាលដូចខាងក្រោម ៖

– ស្រុកសៀមបូក គ្រោងនឹងបញ្ចប់នៅខែធ្នូ ឆ្នាំ២០២៣

– ក្រុងស្ទឹងត្រែង គ្រោងនឹងបញ្ចប់នៅខែមីនា ឆ្នាំ២០២៤

– ស្រុកបុរីអូរស្វាយសែនជ័យ គ្រោងនឹងបញ្ចប់នៅខែមិថុនា ឆ្នាំ២០២៤

– ស្រុកថាឡាបរីវ៉ាត់ គ្រោងនឹងបញ្ចប់នៅខែធ្នូ ឆ្នាំ២០២៤

– ស្រុកសេសាន គ្រោងនឹងបញ្ចប់នៅខែនិថុនា ឆ្នាំ២០២៤

– ស្រុកសៀមប៉ាង គ្រោងនឹងបញ្ចប់ នៅខែមីនា ឆ្នាំ២០២៥

កិច្ចប្រជុំបានបញ្ចប់ក្រោមបរិយាកាស ល្អប្រសើរកិច្ចសហប្រតិបត្តិការខ្ពស់ និងមានភាពស្និទ្ធស្នាលបំផុត។

ខេត្តពោធិ៍សាត់៖ នាថ្ងៃសៅរ៍ ៤កើត ខែមិគសិរ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១៦ ខែធ្នូ  ឆ្នាំ២០២៣ លោក ប្លង់ បញ្ញា អនុប្រធានមន្ទីរ រួមដំណើរដោយ លោក យឹម ជុក អនុប្រធានការិយាល័យ និងលោក សុខ គឹមសេង អនុប្រធានការិយាល័យ បានចូលរួមជាមួយគណ:ប្រតិភូ អញ្ជើញមកពីក្រសួងអភិវឌ្ឍន៍ជនបទ រួមជាមួយនិងម្ចាស់ជំនួយ បានអញ្ជើញទៅពិនិត្យសុពលភាពការងារសាងសង់អណ្តូងស្នប់  និងស្រះទឹកសហគមន៍ ក្នុងក្របខណ្ឌគម្រោងផ្គត់ផ្គង់ទឹកជនបទកម្ពុជា ក្រោមជំនួយឥតសំណងពីសាធារណរដ្ឋប្រជាមានិតចិន សម្រាប់ខេត្តពោធិ៍សាត់ក្នុង ឆ្នាំ២០២០-២០២១ ដែលមានអណ្ដូងសរុប ១០០អណ្ដូង ក្នុងនោះមានអណ្ដូងចំនួន ២អណ្ដូង ជាប្រភេទអណ្ដូង មានជម្រៅជ្រៅ  និងស្រះសហគមន៍ទំហំ ៥០ម៉ែត្រ x៥០ម៉ែត្រ ជម្រៅ ៤ម៉ែត្រ ចំនួន ៧ស្រះ ក្នុងនោះស្រះធម្មតាមាន ៣ស្រះ និងស្រះដែលរៀបជើងទេរ មាន ៤ស្រះ  ។

 

គម្រោងសម្រេចបានលទ្ធផលដូចខាងក្រោម ៖

 

-ក្រុងពោធិ៍សាត់ចំនួន ១០អណ្ដូង

-ស្រុកកណ្តៀងចំនួន ៥អណ្ដូង ,ស្រះសហគមន៍ ចំនួន ១ស្រះ

-ស្រុកបាកាន ចំនួន ៣ស្រះ

-ស្រុកតាលោសែនជ័យ ចំនួន ១ស្រះ

-ស្រុកភ្នំក្រវាញ ចំនួន ២អណ្ដូង

-ស្រុកវាលវែង ចំនួន ៨៣អណ្ដូង ;ស្រះសហគមន៍ ចំនួន ១ស្រះ

-ស្រុកក្រគរ ចំនួន ១ស្រះ ៕

ខេត្ដបន្ទាយមានជ័យ៖ ចាប់ពីថ្ងៃអង្គារ ១៥រោច ខែកត្តិក ដល់ថ្ងៃសុក្រ ៣កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងពីថ្ងៃទី១២ ដល់ថ្ងៃទី១៥ ខែធ្នូ ឆ្នាំ២០២៣ ក្រុមការងារគម្រោងកសាងភូមិសន្ដិភាពតាមរយៈការអភិវឌ្ឍសហគមន៍ជនបទចម្រុះ នៃគម្រោងភូមិសន្ដិភាពកម្ពុជា-កូរ៉េ ដឹកនាំដោយ លោក សួន សុវន្ដារ អនុប្រធានមន្ទីរអភិវឌ្ឍន៍ជនបទ និងជាប្រធានក្រុមសម្របសម្រួលបានបែងចែកក្រុមគ្រូបង្គោលជា ៣ក្រុមគឺ ៖

 

១-ក្រុមគ្រូបង្គោលមន្ទីរអភិវឌ្ឍន៍ជនបទខេត្ដ

២-ក្រុមគ្រូបង្គោលមន្ទីរកិច្ចការនារីខេត្ដ

៣-ក្រុមគ្រូបង្គោលគណៈកម្មាធិការគ្រោះមហន្ដរាយខេត្ដ បានអញ្ជើញទៅបណ្ដុះបណ្ដាលដល់ជនបង្គោលភូមិ ក្រោមប្រធានបទដូចខាងក្រោម៖

 

-ការគ្រប់គ្រងហិរញ្ញវត្ថុគ្រួសារ

-បច្ចេកវិទ្យាឌីជីថល

-សមភាពយេនឌ័រ

-ការគ្រប់គ្រងគ្រោះមហន្ដរាយ និងបម្រែបម្រួលអាកាសធាតុ

 

វគ្គបណ្ដុះបណ្ដាលនេះ បានរៀបចំធ្វើនៅភូមិគោលដៅរបស់គម្រោងគឺ នៅភូមិចែង មានសិក្ខាកាមចូលរួមចំនួន ២១នាក់ ស្រី១៤នាក់, នៅភូមិប្រិយ៍ មានសិក្ខាកាមចំនួន ២០នាក់ ស្រី ០៨នាក់, នៅភូមិពន្លៃថ្មី មានសិក្ខាកាមចំនួន ២២នាក់ ស្រី ១១នាក់ ក្នុងភូមិសាស្រ្ដ ឃុំទ្រាស ស្រុកស្វាយចេក ។

 

ដោយឡែកនៅភូមិថ្មី មានសិក្ខាកាមចូលរួមចំនួន ២០នាក់ ស្រី១១នាក់, នៅភូមិខ្វាវលិច​ មានសិក្ខាកាមចំនួន ២១ ស្រី១៤នាក់, នៅភូមិតេជោភ្នំឆ័ត្រមាន សិក្ខាកាមចំនួន ២២នាក់ ស្រី០៥នាក់  នៅក្នុងភូមិសាស្រ្ដឃុំស្វាយចេក ស្រុកស្វាយចេក ខេត្ដបន្ទាយមានជ័យ ៕

ខេត្តព្រះវិហារ៖ ថ្ងៃសុក្រ ៣ កើត ខែមិគសិរ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៥ ខែធ្នូ ឆ្នាំ២០២៣ លោកស្រីឆាយ សុវណ្ណា អនុប្រធានមន្ទីរ រួមជាមួយ លោក ញាណ គង់ ប្រធានការិយាល័យផ្គត់ផ្គង់ទឹកជនបទ និងលោកស្រី សែម សំណាង ប្រធានការិយាល័យថែទាំសុខភាពជនបទ បានចូលរួមសម្របសម្រួលសិក្ខាសាលាថ្នាក់ស្រុក ស្តីពីការបង្កើតផែនការយុទ្ធសាស្រ្ត “ពន្លឿនជំរុញបញ្ឈប់ការបន្ទោបង់ពាសវាលពាសកាល និងគ្រោងថវិកាទឹកស្អាត និងអនាម័យ និងការប្រកាសអនុវត្តកម្មវិធីការអប់រំភាពជាអ្នកដឹកនាំ (កម្មវិធីប្រកួតជើងឯកអនាម័យឃុំ) នៅសាលប្រជុំសាលាស្រុកសង្គមថ្មី ក្រោមអធិបតីភាព លោក ស៊ាប កែវជីវ៉ា អភិបាលស្រុកសង្គមថ្មី។ វគ្គសិក្ខាសាលានេះសហការគាំទ្រដោយអង្គការ Water Aid និងមានការអញ្ជើញចូលរួមពីសំណាក់លោកអភិបាលរងស្រុក មន្រ្តីមកទីចាត់ការផែនការវិនិយោគខេត្ត សមាជិកសមាជិការក្រុមការងារ DWG ស្រុក និងអង្គការដៃគូ ដែលមានអ្នកចូលរួមសរុប ចំនួន៣៥នាក់ ស្រី១៣នាក់។

 

ជាលទ្ធផលនៃសិក្ខាសាលានេះរួមមាន៖

 

១-តាមបណ្តាឃុំធ្វើផែនការ ODF របស់ឃុំនីមួយៗ អោយ ODF ត្រឹមត្រីមាសទី៤ ឆ្នាំ២០២៤។

 

២-ស្រុកធ្វើផែនការ ODFស្រុក ត្រឹមដំណាច់ឆ្នាំ២០២៤។

 

៣-ឃុំចំនួន៥ឃុំបានចុះឈ្មោះចូលរួមក្នុងកម្មវិធីប្រកួតជើងឯកអនាម័យឃុំ។

ខេត្តកំពង់ធំ៖ នាព្រឹកថៃ្ងចន្ទ ៦កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែធ្នូ ឆ្នាំ២០២៣ លោក តាន់ វាសនា ប្រធានមន្ទីរស្តីទីអភិវឌ្ឍន៍ជនបទខេត្តកំពង់ធំ បានអមដំណើរ ឯកឧត្តម ងួន រតនៈ អភិបាលនៃគណៈអភិបាលខេត្តកំពង់ធំ តំណាងដ៏ខ្ពង់ខ្ពស់ឯកឧត្តមបណ្ឌិត ថោង ខុន ទេសរដ្ឋមន្ត្រីទទួលបន្ទុកបេសកកម្មពិសេស ជាប្រធានក្រុមការងាររាជរដ្ឋាភិបាលចុះជួយខេត្តកំពង់ធំ អញ្ជើញចូលរួមក្នុងកម្មវិធីជួបសំណេះសំណាល និងដោះស្រាយបញ្ហាប្រព័ន្ធប្រឡាយទឹកនៅសហគមន៍មុំបី ដើម្បីយកទឹកទៅប្រើប្រាស់សម្រាប់ស្រូវប្រាំង ប្រមាណជាង ៦០០ហិកតា ស្ថិតនៅទួលតាមុំ នៃភូមិគោកត្របែក ឃុំស្រឡៅ ស្រុកតាំងគោក ខេត្តកំពង់ធំ។

 

ប្រឡាយទឹកមួយខែ្សនៅតំបន់អាងទឹកមុំបីនេះ អាចយកទឹកទៅស្រោចស្រពដល់ស្រូវប្រាំងជាច្រើនហិចតា ដែលកំពុងតែរងការខូចខាត ក្នុងការជួយសង្រ្គោះស្រូវប្រាំងឱ្យបានទាន់ពេលវេលា។ ហើយបច្ចុប្បន្នប្រជាពលរដ្ឋដែលនៅក្នុងភូមិសាស្ដ្រខាងលើទទួលបានសុវត្ថិភាពនៅក្នុងការបង្កបង្កើនផល  មិនមានការភ័យខ្លាច។

 

គួរបញ្ជាក់ផងថា ប្រជាពលរដ្ឋដែលបានស្នើសុំប្រឡាយទឹកមួយខ្សែប្រវែង ៨ ០០០ ម៉ែត្រ និងទទឹងប្រវែង ១៦ ម៉ែត្រ ដើម្បីយកទឹកមកប្រើប្រាស់ជូនប្រជាពលរដ្ឋចំនួន ៨០ គ្រួសារ ដែលកំពុងតែធ្វើស្រូវប្រាំង៕

ខេត្តព្រះវិហារ៖ ថ្ងៃព្រហស្បតិ៍ ២ កើត ខែមិគសិរ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៤ ខែធ្នូ ឆ្នាំ២០២៣ លោកស្រី ឆាយ សុវណ្ណា អនុប្រធានមន្ទីរ រួមជាមួយ លោក ញាណ គង់ ប្រធានការិយាល័យផ្គត់ផ្គង់ទឹកជនបទ និងលោកស្រី សែម សំណាង ប្រធានការិយាល័យថែទាំសុខភាពជនបទ បានចូលរួមសម្របសម្រួលសិក្ខាសាលាថ្នាក់ស្រុក ស្តីពីការបង្កើតផែនការយុទ្ធសាស្រ្ត “ពន្លឿនជំរុញបញ្ឈប់ការបន្ទោបង់ពាសវាលពាសកាល និងគ្រោងថវិកាទឹកស្អាត និងអនាម័យ និងការប្រកាសអនុវត្តកម្មវិធីការអប់រំភាពជាអ្នកដឹកនាំ (កម្មវិធីប្រកួតជើងឯកអនាម័យឃុំ) នៅសាលប្រជុំសាលាស្រុករវៀង។

 

វគ្គសិក្ខាសាលានេះសហការគាំទ្រដោយអង្គការ Water Aid និងមានការអញ្ជើញចូលរួមពីសំណាក់លោកប្រធានក្រុមប្រឹក្សាស្រុក លោក លោកស្រីអភិបាលរងស្រុក មន្រ្តីទីចាត់ការផែនការវិនិយោគខេត្ត សមាជិកសមាជិការក្រុមការងារ DWG ស្រុក និងអង្គការដៃគូ ដែលមានអ្នកចូលរួមសរុប ចំនួន៤៦នាក់ ស្រី២០នាក់។

 

ជាលទ្ធផលនៃសិក្ខាសាលានេះរួមមាន៖

១-តាមបណ្តាឃុំនីមួយៗធ្វើផែនការ ODF អោយទទួលបាន ODF ត្រឹមត្រីមាសទី៣ ឆ្នាំ២០២៤ (ក្នុងនោះមាន៣ឃុំ គ្រោង ODF នៅត្រីមាសទី១ ឆ្នាំ២០២៤)។

 

២-ស្រុកធ្វើផែនការ ODFស្រុក ត្រឹមដំណាច់ឆ្នាំ២០២៤។

 

៣-ឃុំចំនួន១១ឃុំបានចុះឈ្មោះចូលរួមក្នុងកម្មវិធីប្រកួតជើងឯកអនាម័យឃុំ៕

ខេត្តព្រះសីហនុ៖ នៅថ្ងៃពុធ ១កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៣ ខែធ្នូ ឆ្នាំ២០២៣ ឯកឧត្ដមបណ្ឌិត ជ្រុន ថេរ៉ាវ៉ាត រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ឆាយ ប្ញទ្ធិសែន រដ្ឋមន្រ្ដី ក្រសួងអភិវឌ្ឍន៍ជនបទ បានដឹកនាំគណៈប្រតិភូអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ និងវាយតម្លៃលទ្ធផលការងារសាងសង់ផ្លូវថ្មី ចំនួន ០១ខ្សែ ប្រវែងសរុប ៤ ៥០០ ម៉ែត្រ, ទទឹងខ្នងលើ ៧ ម៉ែត្រ, បាតក្រោមដីស ១០ ម៉ែត្រ និងសាងសង់លូកាត់ទទឹងផ្លូវ ចំនួន ០៤កន្លែង ស្ថិតនៅ ភូមិចំណោតរាម និងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។

បន្ទាប់ពីបានចុះត្រួតពិនិត្យជាក់ស្តែងលើការងារសាងសង់ផ្លូវថ្មី គណៈកម្មការបានឯកភាពទទួលយក ១០០% ចំពោះលទ្ធផលសាងសង់ផ្លូវថ្មី ០១ខ្សែខាងលើ ព្រមទាំងបានថ្លែងអំណរគុណដល់កងវិស្វកម្មតេជោ ហ៊ុន សែន សៀមរាប ដែលបានស្ថាបនា លូកាត់ផ្លូវបន្ថែម ចំនួន ០៣ កន្លែងទៀត ក្រៅកិច្ចសន្យាសាងសង់ផ្លូវផងដែរ។

ឆ្លៀតក្នុងឱកាសនោះដែរ ឯកឧត្តមរដ្ឋលេខាធិការ បានសំណូមពរដល់អាជ្ញាធរមូលដ្ឋានភូមិ ឃុំ ចូលរួមថែរក្សាផ្លូវនេះឱ្យបានល្អ និងចូលរួមទប់ស្កាត់ការដឹកជញ្ជូនលើសទម្ងន់កំណត់ ដើម្បីរក្សាគុណភាពផ្លូវឱ្យជាប់បានយូរ ងាយស្រួលក្នុងការធ្វើដំណើរ ពិសេសពលរដ្ឋត្រូវចាត់ទុកផ្លូវទាំងអស់នៅក្នុងមូលដ្ឋានជាផ្លូវរបស់ខ្លួន៕

ថ្ងៃទី១៣ ដល់ថ្ងៃទី ១៥ ខែធ្នូ ឆ្នាំ២០២៣  ឯកឧត្តម ភួង សោភា រដ្ឋលេខាធិការ និងជាអ្នកសម្របសម្រួលគម្រោងពង្រឹងសមត្ថភាពផលិតភាពជនបទ (NRRPCP) តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ អមដំណើរដោយលោក David John Moles (Project Management Specialist) បានចុះត្រួតពិនិត្យវឌ្ឍនភាពការងារសាងសាងសង់ផ្លូវកៅស៊ូ ២ ជាន់ ប្រភេទ DBST ចំនួន ០២ខ្សែ និងស្រះ ០១ កន្លែង  ដោយ÷

– ខ្សែផ្លូវទី១÷មានប្រវែង ១៤,០៣ គ.ម  (Batch 2, Lot 5) ដែលតភ្ជាប់ពីឃុំក្រែក ស្រុកពញាក្រែក ទៅឃុំទឹកជ្រៅ ស្រុកតំបែរ ខេត្តត្បូងឃ្មុំ  និងកំពុងសាងសង់បានប្រមាណ៣០% ហេីយ (ប្រភេទផ្លូវក្រាលកៅស៊ូពីរជាន់ DBSTប្រវែង ១៣,១៧ គីឡូម៉ែត្រ និងផ្លូវបេតុងសរសៃដែក ប្រវែង ៨៦៦ ម៉ែត្រ )។

– ខ្សែទី២÷មានប្រវែង ១០,៦៨ គីឡូម៉ែត្រ ចំណុចចាប់ផ្ដើមពីឃុំជីផុច ទៅ ឃុំច្រេស ក្នុងស្រុកមេសាង។

– ស្រះសហគមន៍÷  ០១កន្លែង មានទំហំទទឹង ៣៣ ម៉ែត្រ និងបណ្តោយ ៤១ ម៉ែត្រ ជម្រៅ ៤ ម៉ែត្រ និងខ្នងទំនប់កំពស់ ១ ម៉ែត្រស្ថិតក្នុងភូមិស្គារ ឃុំគោកខ្ចាក ស្រុកកំពង់ត្របែក ខេត្តព្រៃវែង  ។

 

បន្ទាប់មកឯកឧត្តមបានអញ្ជើញជាអធិបតីបើកកម្មវិធីផ្សព្វផ្សាយអំពីសុវត្ថិភាពចរាចរណ៍ ដែលរៀបចំដោយក្រុមការងារនៃគម្រោងពង្រឹងសមត្ថភាពផលិតភាពជនបទ (NRRPC) ក្នុងបរិវេណវត្តចន្ទ្រគ្រឹស្នា ភូមិច្រេស ឃុំច្រេស ស្រុកមេសាង ខេត្តព្រៃវែង ផងដែរ។