ខេត្តស្ទឹងត្រែង៖ នារសៀលថ្ងៃអង្គារ ៧កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៩ ខែធ្នូ ឆ្នាំ២០២៣ លោកវណ្ណ សាឬទ្ធិ ប្រធានការិយាល័យ និងលោក ហេង ពិសិដ្ឋ មន្ត្រីនាយកដ្ឋានថែទាំសុខភាពជនបទ បានសហការជាមួយមន្រ្តីបច្ចេកទេសមន្ទីរអភិវឌ្ឍន៍ជនបទ ខេត្តស្ទឹងត្រែង បានចូលរួមពិធីអបអរសាទរទិវាជាតិលើកកម្ពស់អនាម័យជនបទ ១៣ វិច្ឆិកា លើកទី១៤ នៅសាលាបឋមសិក្សាស្រុកសៀមប៉ាង ដែលរៀបចំដោយអង្គការវឌ្ឍនភាព។ ក្នុងនោះផងដែរមានការអញ្ជើញចូលរួមពី តំណាងស្រុកសៀមប៉ាង និងតំណាងស្រុកបូរីអូរស្វាយសែនជ័យ តំណាងអង្គការវឌ្ឍនភាព លោកមេឃុំ លោកមេភូមិ ប្រជាពលរដ្ឋ និងសិស្សានុសិស្ស ដែលមានអ្នកចូលរួម ចំនួន៥០០នាក់ ស្រី២២០នាក់។

 

ពិធីនេះមានគោលបំណងដើម្បីបង្កើនការយល់ដឹងដល់សហគមន៍ជនបទអំពីការប្រតិបត្តិអនាម័យលើសារទាំងបីគឺ:

១.ការប្រើប្រាស់បង្គន់អនាម័យ

២.ការហូបទឹកសុវត្ថិភាព

៣.ការលាងសម្អាតដៃនឹងសាប៊ូ។

 

ជាលទ្ធផលនៃកម្មវិធីទទួលបានចំនុចមួយចំនួនដូចខាងក្រោម៖

១.លោក ស្រី វិន ប្រធានកម្មវិធីអង្គការវឌ្ឍនភាព មានចំណាប់អារម្មណ៍ចូលរួមក្នុងកម្មវិធី ដោយបង្ហាញសហគមន៍អំពីសារអនាម័យទាំងបី។

២.មតិសំណេះសំណាល លោក វណ្ណ សាឬទ្ធិ ប្រធានការិយាល័យបានលើកឡើងពីអត្ថប្រយោជន៍នៃការប្រតិបត្តិអនាម័យ  និងផលប៉ះពាល់ដោយសារកង្វះអនាម័យ ព្រមទាំងជំរុញឱ្យអាជ្ញាធរមូលដ្ឋានបង្កើនការអប់រំដល់ប្រជាពលរដ្ឋជាប្រចាំ។

៣.លោកអភិបាលរងស្រុកសៀមប៉ាងបានឡើងអានសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

៤.គណៈអធិបតី លោកមេឃុំ ប្រជាពលរដ្ឋ និងសិស្សានុសិស្សបានចូលរួមលាងសម្អាតដៃនឹងសាប៊ូជានិមិត្តរូបបង្ហាញក្នុង កម្មវិធី។

៥.អង្គការវឌ្ឍនភាពបានចែកសាប៊ូចំនូន៦៥០ ដុំ ដល់អ្នកចូលរួម។

ខេត្តព្រះសីហនុ ៖ នារសៀលថ្ងៃសុក្រ ១០កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២២ ខែធ្នូ ឆ្នាំ២០២៣ នៅមន្ទីរអភិវឌ្ឍន៍ជនបទខេត្តព្រះសីហនុ ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជួបសំណេះសំណាល និងសាកសួរសុខទុក្ខថ្នាក់ដឹកនាំ និងមន្ត្រីរាជការ នៃមន្ទីរអភិវឌ្ឍន៍ជនបទខេត្តព្រះសីហនុសរុប ២០នាក់ ស្រី ១នាក់។

 

បន្ទាប់ពីបានស្ដាប់របាយការណ៍បូកសរុបលទ្ធផលការងារឆ្នាំ២០២៣ និងទិសដៅការងារឆ្នាំ២០២៤ ដោយលោក ប្រាក់ សុវណ្ណ ប្រធាន មន្ទីរអភិវឌ្ឍន៍ជនបទខេត្តព្រះសីហនុ  រួចមក ឯកឧត្ដម ឆាយ ប្ញទ្ធិសែន បានពាំនាំនូវបណ្ដាំផ្ញើសាកសួរសុខទុក្ខ និងពរសព្វសាធុការពីសំណាក់ សម្តេចអគ្គមហាសេនាបតីតេជោ ហ៊ុន សែន​ សម្តេចកិត្តិព្រឹទ្ធបណ្ឌិតប៊ុន​ រ៉ានី​ ហ៊ុន​ សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា ព្រមទាំងបានសម្ដែងនូវការកោតសរសើរ  និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការមន្ទីរអភិវឌ្ឍន៍ជនបទខេត្ត ធ្វើឱ្យសម្រេចបានលទ្ធផលគួរជាទីមោទន។

 

ឯកឧត្ដមរដ្ឋមន្ត្រី បានថ្លែងថា ដើម្បីរួមចំណែកអនុវត្តយុទ្ធសាស្រ្តបញ្ចកោណ និងចក្ខុវិស័យឆ្នាំ២០៣០ និងឆ្នាំ២០៥០ របស់រាជរដ្ឋាភិបាល ក្រសួងអភិវឌ្ឍន៍ជនបទ បាននឹងកំពុងខិតខំធ្វើឱ្យសម្រេចបាននូវចក្ខុវិស័យរបស់ខ្លួនគឺ លើកកម្ពស់គុណភាព និងគុណតម្លៃរបស់ប្រជាជននៅតំបន់ជនបទទាំងផ្នែកសេដ្ឋកិច្ច សង្គម និងវប្បធម៌ ។

 

ដើម្បីចូលរួមចំណែកអនុវត្តយុទ្ធសាស្រ្ដនេះឱ្យមានប្រសិទ្ធភាព ឯកឧត្ដមរដ្ឋមន្រ្ដី បានផ្ដល់នូវអនុសាសន៍មួយចំនួនដូចខាងក្រោម ៖

 

១- ត្រូវរក្សាសមិទ្ធផល និងស្នាដៃរបស់រាជរដ្ឋាភិបាលដែលមានស្រាប់ និងត្រូវបន្តបង្កើនស្នាដៃថ្មីៗបន្ថែមទៀតដើម្បីចូលរួមសម្រេចឱ្យបានចក្ខុវិស័យកម្ពុជា ធ្វើឱ្យប្រជាជនមានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០ និងប្រាក់ចំណូលកម្រិតខ្ពស់ក្នុងឆ្នាំ២០៥០។

 

២-  មន្ទីរត្រូវខិតខំបំពេញតួនាទីជាសេនាធិការឱ្យបានល្អ និងសុចរិតដល់រដ្ឋបាលខេត្ត និងសហការល្អជាមួយមន្ទីរពាក់ព័ន្ធនានា ព្រមទាំងអាជ្ញាធរគ្រប់លំដាប់ថ្នាក់ អង្គការដៃគូរ ដើម្បីជំរុញការងារអភិវឌ្ឍន៍ជនបទឱ្យកាន់មានប្រសិទ្ធភាពថែមទៀត។

 

៣-  មន្ទីរត្រូវបង្កើតឱ្យមានប្រព័ន្ធផ្សព្សផ្សាយឌីជីថល ក្រុមអ្នកនាំពាក្យ ដើម្បីផ្ដល់ព័ត៌មាន ក្នុងគោលដៅចូលរួមផ្សព្វផ្សាយពីស្នាដៃ និងសមិទ្ធផលរបស់រាជរដ្ឋាភិបាល ក៏ដូចជារបស់ក្រសួងឱ្យបានទូលំទូលាយដល់ស្រទាប់មហាជន។

 

៤-  ថ្នាក់ដឹកនាំមន្ទីរត្រូវមានការលើកទឹកចិត្តដល់មន្ត្រីរាជការតាមរយៈ ការដំឡើងតួនាទី ឋានន្ដរសក្ដិ គ្រឿងឥស្សរិយយស ប័ណ្ណសរសើរ  ឬ ជារង្វាន់តាមរយ: មធ្យោបាយផ្សេងៗ ។

 

៥-  ត្រូវមានសាមគ្គីភាពផ្ទៃក្នុងឱ្យបានល្អ មិនប្រកាន់បក្ខពួក យកចិត្តទុកដាក់មន្ត្រីរាជការមានពិការភាព មន្ដ្រីរាជការជាស្រ្ដីមានផ្ទៃពោះ ឬមានកូនតូចជាដើម។

 

៦-  មន្ទីរត្រូវមានរបបប្រជុំប្រចាំខែ ត្រីមាស ឆមាស ប្រចាំឆ្នាំ ឱ្យបានទៀងទាត់ ដើម្បីវាយតម្លៃការងារ ដោយយកគោលការណ៍សមូហភាពដឹកនាំ បុគ្គលទទួលខុសត្រូវ ។

 

ពិធីសំណេះសំណាលនេះ បានបញ្ចប់ទៅក្រោមបរិយាកាសសប្បាយរីករាយ និងមានភាពស្និទ្ធស្នាលបំផុត៕

រាជធានីភ្នំពេញ៖ នាព្រឹកថ្ងៃព្រហស្បតិ៍ ៩កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២១ ខែធ្នូ ឆ្នាំ២០២៣ នៅទីស្តីការក្រសួង ឯកឧត្តម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំកិច្ចប្រជុំពិភាក្សាប្រមូលព័ត៌មានពាក់ព័ន្ធជាមួយនឹងការអនុវត្តពន្ធអាករនានា នៅក្នុងគម្រោងសហប្រតិបត្តិការជាមួយដៃគូអភិវឌ្ឍន៍ ក្នុងក្របខ័ណ្ឌក្រសួងអភិវឌ្ឍន៍ជនបទ។

 

កិច្ចប្រជុំនេះ ត្រូវបានរៀបចំឡើងក្នុងគោលបំណងធ្វើបច្ចុប្បន្នភាពលើព័ត៌មានពាក់ព័ន្ធជាមួយការអនុវត្តពន្ធអាករនានានៅក្នុងគម្រោងសហប្រតិបត្តិការ ជាមួយដៃគូអភិវឌ្ឍន៍ នៅក្នុងក្រសួងអភិវឌ្ឍន៍ជនបទ ដើម្បីប្រសិទ្ធភាព និងងាយស្រួលទៅថ្ងៃអនាគត ដោយមានការអញ្ជើញចូលរួមពីសំណាក់ ឯកឧត្តមរដ្ឋលេខាធិការ ឯកឧត្តមអនុរដ្ឋលេខាធិការ ឯកឧត្តមអគ្គាធិការ ឯកឧត្តមអគ្គនាយក ឯកឧត្តម លោក លោកស្រី ប្រធានគ្រប់គ្រងគម្រោងអភិវឌ្ឍន៍នានា ក្នុងក្របខ័ណ្ឌក្រសួងអភិវឌ្ឍន៍ជនបទ៕

នៅព្រឹកថ្ងៃពុធ ៨កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២០ ខែធ្នូ ឆ្នាំ២០២៣ ឯកឧត្តម សាន វិសាល តំណាងដ៏ខ្ពង់ខ្ពស់ ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានដឹកនាំគណៈកម្មការអន្តរក្រសួង រួមមានតំណាងក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យ វាយតម្លៃ លើការងារស្ថាបនាផ្លូវក្រាលដីល្បាយក្រួសចំនួន ១ខ្សែ ប្រវែង ៣២០០ម៉ែត្រ ទទឹងខ្នងលើ ៨ម៉ែត្រ កម្រាស់០,២ម៉ែត្រ ស្ថាបនាលូប្រអប់មុខពីរចំនួន ២កន្លែង លូមូលមុខបីចំនួន ១កន្លែង លូមូលមុខមួយចំនួន ៣កន្លែង និងស្លាកឈ្មោះផ្លូវចំនួន ២កន្លែង ស្ថិតនៅក្នុងដីសម្បទានសង្គមកិច្ច ភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ។

 

ខ្សែផ្លូវខាងលើ អនុវត្តដោយ នាយកដ្ឋានផ្លូវលំជនបទ នៃក្រសួងអភិវឌ្ឍន៍ជនបទ។       បន្ទាប់ពីបានពិនិត្យ និងប្រជុំវាយតម្លៃការងារខាងលើរួច គណៈកម្មការអន្តរក្រសួង សម្រេចវាយតម្លៃ ទទួលយក ១០០%៕

ខេត្តត្បូងឃ្មុំ៖ កាលពីថ្ងៃអង្គារ ៧កើត  ខែមិគសិរ  ឆ្នាំថោះ  បញ្ចស័ក  ព.ស.២៥៦៧  ត្រូវនឹងថ្ងៃទី១៩  ខែធ្នូ  ឆ្នាំ២០២៣ ឯកឧត្តម ទ្រី  មេង  រដ្ឋលេខាធិការ  តំណាងដ៏ខ្ពង់ខ្ពស់  ឯកឧត្តម  ឆាយ  ឫទ្ធិសែន  រដ្ឋមន្ត្រីក្រសួងអភិវឌ្ឍន៍ជនបទ  ដឹកនាំគណៈកម្មការអន្តរក្រសួង  រួមមាន៖  ក្រសួងអភិវឌ្ឍន៍ជនបទ  និងក្រសួងសេដ្ឋកិច្ច  និងហិរញ្ញវត្ថុ និងមានការអញ្ចើញចូលរួមអមដំណើរដោយ លោក  អាន  ស៊ីណា  ប្រធានមន្ទីរ  និងក្រុមការងារបច្ចេកទេសផ្លូវជនបទរបស់មន្ទីរអភិវឌ្ឍន៍ជនបទខេត្តត្បូងឃ្មុំ  បានចុះពិនិត្យ  និងវាយតម្លៃលើការងារជួសជុលផ្លូវលក្ខណៈថែទាំជាលក្ខណៈខួប ផ្លូវក្រាលល្បាយក្រួស ០២ខ្សែ ប្រវែងសរុប ១៤ ០០០ម៉ែត្រ ទទឹងខ្នងលើ ៥ ម៉ែត្រ ស្ថិតក្នុងឃុំព្រែកអាជី ឃុំគគីរ និងឃុំមេមង ស្រុកក្រូចឆ្មា និងស្រុកមេមត់ ដែលបានអនុវត្តដោយមន្ទីរអភិវឌ្ឍន៍ជនបទខេត្តត្បូងឃ្មុំ  ដោយប្រើប្រាស់ថវិកាជាតិ  តាមរយៈក្រសួងអភិឌ្ឍន៍ជនបទ។

ជាលទ្ធផលបន្ទាប់ពីក្រុមការងារបានចុះត្រួតពិនិត្យ និងវាយតម្លៃផ្នែកបច្ចេកទេសរួចរាល់ គណៈកម្មការត្រួតពិនិត្យ បានឯកភាពទទួល យកលទ្ធផលការអនុវត្តការងាររបស់មន្ទីរអភិវឌ្ឍន៍ជនបទ ខេត្តត្បូងឃ្មុំ ដោយសម្រេចបាន ១០០% និងស្របតាមបញ្ជីប៉ាន់តម្លៃ និងបទដ្ឋានបច្ចេកទេស ដែលអាចទទួលយកបាន។

ឯកឧត្ដមរដ្ឋលេខាធិការ បានផ្ដល់ជាអនុសាសន៍ណែនាំ ដល់មន្ទីរឱ្យខិតខំថែរក្សាផ្លូវ និងណែនាំប្រជាពលរដ្ឋកុំឱ្យដឹកលើសទម្ងន់កំណត់ កុំចាក់ដីខ្ពស់ជាងផ្លូវ ជាពិសេសចូលរួមគោរពច្បាប់ចរាចរផ្លូវគោកទាំងអស់គ្នា។

ខេត្តកណ្តាល៖ នៅថ្ងៃចន្ទ ៦កើត  ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨ ខែធ្នូ  ឆ្នាំ២០២៣ លោកស្រី សោម ស្រីតុល អនុប្រធានការិយាល័យថែទាំសុខភាពជនបទ បានដឹកនាំក្រុមការងារមន្ទីរអភិវឌ្ឍន៍ជនបទខេត្តកណ្ដាល សហការជាមួយក្រុមការងារបច្ចេកទេសវិស័យផ្គត់ផ្គង់ទឹកស្អាត និងអនាម័យជនបទ (DWG) ស្រុកពញាឮ បានចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+)ថ្នាក់ឃុំ នៅឃុំផ្សារដែក និងឃុំវិហារហ្លួង ស្រុកពញាឮ ខេត្តកណ្តាល ដោយមានការអញ្ជើញចូលរួមដោយ លោក ស្មាន ហ្វីន អភិបាលរង នៃគណៈអភិបាលស្រុកពញាឮ តំណាងលោក ថន សុវណ្ណា អភិបាល នៃគណៈអភិបាលស្រុកពញាឮ លោក លោកស្រីប្រធាន អនុប្រធាន និងមន្ត្រីការិយាល័យជំនាញចំណុះរដ្ឋបាលស្រុកពញាឮ លោក លោកស្រីមេឃុំ លោកមេប៉ុស្ដិ៍គ្រប់ឃុំ លោកគ្រូពេទ្យ លោកនាយកសាលា និងលោកអនុប្រធានការិយាល័យសេដ្ឋកិច្ច និងអភិវឌ្ឍន៍សហគន៍ លោកប្រធានការិយាល័យកសិកម្ម និងបរិស្ថានស្រុកពញាឮ។

 

គោលបំណង នៃការចុះផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាលកម្រិតខ្ពស់ ដើម្បីធានាបាននូវសុក្រិតភាពនៃការបញ្ចប់បន្ទោបង់ពាសវាលពាសកាលកម្រិតខ្ពស់ (ODF+) ឱ្យស្របតាមលក្ខខណ្ឌ និងគោលការណ៍កំណត់របស់ក្រសួងអភិវឌ្ឍន៍ជនបទ។

 

យោងតាមការចុះផ្ទៀងផ្ទាត់ ក្រុមការងារបានបូកសរុប និងវាយតម្លៃថា ឃុំផ្សារដែក និងឃុំវិហារហ្លួង ស្រុកពញាឮ ត្រូវបានជាប់ជាឃុំបញ្ចប់ការបន្ទោបង់ពាសវាលពាសកាលកម្រិតខ្ពស់ (ODF+) ចាប់ពីថ្ងៃទី១៨ ខែធ្នូ ឆ្នាំ២០២៣ ស្របទៅតាមគោលការណ៍ណែនាំរបស់ក្រសួងអភិវឌ្ឍន៍ជនបទ ៕

ខេត្តកំពង់ឆ្នាំង៖ នៅថ្ងៃអង្គារ ៧កើត ខែមិគសិរ ឆ្នាំថោះ ព.ស. ២៥៦៧ ត្រូវនឹងថ្ងៃទី១៩ ខែធ្នូ ឆ្នាំ ២០២៣ លោក  ម៉ែន   វីរៈ  តំណាងគម្រោងថ្នាក់ជាតិ និងលោក ឈុន សូផាត ប្រធានការិយាល័យផ្គត់ផ្គង់ទឹកជនបទ តំណាង លោក ជិន រដ្ឋា ប្រធានមន្ទីរអភិវឌ្ឍន៍ជនបទ ខេត្តកំពង់ឆ្នាំង  បានរៀបចំបើកវគ្គបណ្តុះបណ្តាល (ស្តីពីទម្លាប់ល្អក្នុងការអនុវត្តអនាម័យជាប្រចាំ និង សេចក្តីណែនាំពីវិធីសាស្រ្តក្នុងការសម្របសម្រួលការប្រើឧបករណ៍នៃការផ្លាស់ប្តូរឥរិយាបថ)  ដែលរៀបចំដោយគម្រោង  ពង្រឹងសមត្ថភាពផលិតភាពជនបទ (NRR PCP) ក្រោមហិរញប្បទានរបស់ (AIIB) ។ ដោយមានការអញ្ជើញ ចូលរួមពីមន្រ្តីគម្រោងជាតិ -ខេត្ត  និងទីប្រឹក្សាគម្រោង ព្រមទាំងសមាជិកក្រុមស្នូលប្រើប្រាស់ទឹក និងអនាម័យមកពីស្រះសហគមន៍ទាំង៨ របស់គម្រោងដែលមានសមាភាពចូលរួម ២៩នាក់ ស្រី ១០នាក់។

គោលបំណងនៃកិច្ចប្រជុំដើម្បីពង្រឹងសមត្ថភាពផលិតភាពជនបទ ការប្រើប្រាស់ទឹក ការថែទាំប្រភពទឹកប្រកបដោយគុណភាព និងនិរន្តរភាព។

ជាលទ្ធផលដែលសិក្ខាកាទទួលបានក្រោមការបណ្ដុះបណ្ដាលរួមមាន៖

-ទទួលបាននូវចំណេះដឹកជំនាញសម្របសម្រួលនៃការប្រើប្រាស់ឧបករណ៍នៃការផ្លាស់ប្ដូរឥរិយាបថ

-យល់ដឹងពីតួនាទីភារកិច្ច និងការទទួលខុសត្រូវ របស់ក្រុមស្នូលនៃក្រុមអ្នកប្រើប្រាស់ទឹក និងអនាម័យ ក្នុងការអនុវត្តកម្មវិធី WASH ឱ្យមានប្រសិទ្ធភាពក្នុងគម្រោង។

 

វគ្គបណ្ដុះបណ្ដាលបានបញ្ចប់ប្រកបដោយបរិយាកាស និងកិច្ចសហប្រតិបត្តិល្អ និងមានភាពស្និទ្ធស្នាលបំផុត។

ខេត្តសៀមរាប៖ នៅថ្ងៃអង្គារ ៧កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៩ ខែធ្នូ ឆ្នាំ២០២៣ លោកស្រី សេង កុសុមា ប្រធានការិយាល័យ បានចូលរួមសិក្ខាសាលាពិគ្រោះយោបល់ថ្នាក់ជាតិ ស្តីពីបញ្ហាប្រឈមរបស់សហគមន៍ជនជាតិដើមភាគតិចជុំវិញការអនុវត្តច្បាប់ និងក្រមបរិស្ថាន និងធនធានធម្មជាតិ ក្នុងគោលបំណងដើម្បីពិនិត្យឡើងវិញ និងបង្ហាញអំពីការព្រួយបារម្ភអំពីបញ្ហាប្រឈម ជុំវិញការអនុវត្តច្បាប់ ស្តីពីតំបន់ការពារធម្មជាតិ និងក្រមបរិស្ថាន និងធនធានធម្មជាតិ នៅសណ្ឋាគារសេនជូរី ខេត្តសៀមរាប ដែលសមាសភាពចូលរួមមាន ឯកឧត្តមតំណាងសមាជិកព្រឹទ្ធសភា តំណាងរាស្ត្រមណ្ឌលខេត្តសៀមរាប តំណាងក្រសួងមហាផ្ទៃ តំណាងក្រសួងរៀបចំដែនដី តំណាង គជអប និងតំណាងសហគមន៍ជនជាតិដើមភាគតិចចំនួន ១៦អំបូរជនជាតិដើមភាគតិច មកពីខេត្តចំនួន ១២ខេត្ត សរុបចំនួន ១៨០នាក់។

ជាលទ្ធផល ជនជាតិដើមភាគតិចបានយល់ឃើញថា មាត្រា ៣៦៤ និងមាត្រា ៣៦៩ នៃក្រមបរិស្ថាន និងធនធានធម្មជាតិ ហាក់ជាក្តីកង្វល់របស់សហគមន៍ជនជាតិដើមភាគតិច ក្នុងន័យកាត់បន្ថយសិទ្ធិប្រើប្រាស់ដីធ្លី អាស្រ័យផល អនុផលធនធានធម្មជាតិ ដែលរារាំងសិទ្ធិក្នុងការអភិវឌ្ឍ និងអភិរក្សមរតកវប្បធម៌ ប្រពៃណី វប្បធម៌ និងផលប្រយោជន៍របស់ជនជាតិដើមភាគតិចក្នុងវិស័យធនធានធម្មជាតិ។

ខេត្តពោធិ៍សាត់៖ នាថ្ងៃអង្គារ ៧កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៩ ខែធ្នូ ឆ្នាំ២០២៣ លោក និន ស៊ីណាត អនុប្រធានមន្ទីរ និងលោក ឃុត ទូច ប្រធានការិយាល័យផ្លូវជនបទ នៃមន្ទីរអភិវឌ្ឍន៍ជនបទខេត្តពោធិ៍សាត់ បានចុះពិនិត្យមើលវឌ្ឍនភាពការងារគម្រោងស្តារផ្លូវក្រួសក្រហមមួយខ្សែដែលរងគ្រោះដោយគ្រោះទឹកជំនន់ ឆ្នាំ២០២៣  គឺផ្លូវ ភូមិស្ទឹង-កំពង់រកា-ដំរីស មានប្រវែង ៧ ២០០ ម៉ែត្រដែលមាន ពីរកំណាត់គឺ

 

– កំណាត់ទី១ មានប្រវែង ៤ ៧០០ម៉ែត្រ

 

– កំណាត់ទី២ មានប្រវែង ២ ៣០០ម៉ែត្រ។

 

សូមបញ្ជាក់ថា ខ្សែផ្លូវនេះមានសំណង់រំដោះទឹក ៥កន្លែងគឺ មានលូប្រអប់ ១កន្លែង លូមូលភ្លោះ ១កន្លែង និងលូមូលទោល ៣កន្លែង ដែលកំពុងស្ថាបនាដោយនាយកដ្ឋានផ្លូវលំជនបទនៃក្រសួងអភិវឌ្ឍន៍ជនបទ។

 

ការងារសម្រេចបាន គឺបានពង្រីកតួផ្លូវ លើកកូដដីស សាងសង់សំណង់លូទាំង ៥កន្លែងរួចរាល់ជាស្ថាពរ ហើយបានក្រាលក្រួសក្រហមប្រវែង ៩០០ម៉ែត្រ។

 

លទ្ធផលជារួមការងារទាំងមូលសម្រេចបាន ប្រមាណជា៦០%នៃការងារទាំងស្រុង៕

ខេត្តព្រះវិហារ៖ ថ្ងៃចន្ទ៦កើត-៨កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៨-២០ ខែធ្នូ ឆ្នាំ២០២៣ លោកស្រី ឆាយ សុវណ្ណា អនុប្រធានមន្ទីរអភិវឌ្ឍន៍ជនបទខេត្តព្រះវិហារ បានដឹកនាំក្រុមគ្រូបង្គោលថ្នាក់ខេត្ត ដើម្បីបើកវគ្គបណ្តុះបណ្តាល ស្តីពីការពន្លឿនស្ថានភាពបញ្ចប់ការបន្ទោបង់ពាសវាលពាសកាល(ODF) តាមរយៈវិធីសាស្រ្តពង្រឹងប្រព័ន្ធអនាម័យជនបទនៅក្រុងព្រះវិហារ ដោយមានការចូលរួមមាន លោកអភិបាលរងក្រុង ចៅសង្កាត់រង គ.ក.ន.ក សង្កាត់ តំណាងការិយាល័យអប់រំ មណ្ឌលសុខភាព ការិយាល័យពាក់ព័ន្ធក្នុងក្រុង  សរុបអ្នកចូលរួម១២នាក់។

 

ក្នុងនោះមេរៀនដែលត្រូវធ្វើបទបង្ហាញរួមមាន៖

 

– ការសិក្សា និងរៀនសូត្របទពិសោធន៍ ការអនុវត្តល្អរវាងគ្នា

– ការកំណត់អត្តសញ្ញាណ ភាគីពាក់ព័ន្ធ និងអ្នកដឹកនាំ។

– សារៈសំខាន់នៃក្រុមការងារបច្ចេកទេសវិស័យផ្គត់ផ្គង់ទឹកស្អាត ការសំអាត និងអនាម័យជនបទថ្នាក់ខេត្ត ថ្នាក់ស្រុក ក្នុងការជម្រុញពន្លឿនការបញ្ចប់ការបន្ទោបង់ពាសវាលពាសកាល

– ការកំណត់អត្តសញ្ញាណគ្រួសារក្រីក្រ និងកំណត់ក្រុមជនងាយរងគ្រោះ

– ការស្រង់ទិន្នន័យអនាម័យ និងការគូសផែនទីអនាម័យភូមិ

– ផែនទីបង្ហាញពីដំណើរឆ្ពោះទៅកាន់ភាពជោគជ័យនៃការបញ្ចប់ការបន្ទោបង់ពាសវាលពាសកាល

-នការប្រើប្រាស់ទិន្នន័យអនាម័យ និងការតាមដាន

– ការកៀគរធនធាន

– ការរៀបចំកិច្ចប្រជុំឆ្លុះបញ្ចាំង

– ការផ្ទៀងផ្ទាត់ស្ថានភាពបញ្ចប់ការបន្ទោបង់ពាសវាលពាសកាល

-យុទ្ធនាការរាប់ថយក្រោយ ដើម្បីសម្រេចបញ្ចប់ការបន្ទោបង់ពាសវាលពាសកាល

គោលបំណងនៃវគ្គបណ្តុះបណ្តាលគឺ៖

– ដើម្បីអោយអ្នកចូលរួម ទទួលបានចំណេះដឹង ជំនាញ និងបទពិសោធន៍ថ្មី ដើម្បីជំរុញពន្លឿនការបញ្ចប់ការបន្ទោបង់ពាស វាលពាសកាល ថ្នាក់ភូមិ ឃុំ ស្រុក និងខេត្ត

– ដើម្បីអោយអ្នកចូលរួម បានឃើញ និងលឺផ្ទាល់ពីភាគីពាក់ព័ន្ធសំខាន់ ដែលបានធ្វើឲ្យមូលដ្ឋានរបស់គាត់បានបញ្ចប់ការ បន្ទោបង់ពាសវាលពាសកាល៕