ឯកឧត្តមបណ្ឌិត ចាន់ ដារ៉ុង រដ្ឋលេខាធិការ និងជានាយកគម្រោងខ្សែច្រវាក់ផលិតកម្មដោយភាតរៈបរិស្ថាន តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយ ឯកឧត្តម អ៊ឹង វណ្ណា អនុរដ្ឋលេខាធិការ និងជាប្រធានគ្រប់គ្រងគម្រោង បានចូលរួមជាមួយក្រុមបេសកកម្មរបស់ធនាគារអភិវឌ្ឍន៍អាស៊ី (ADB) អញ្ជើញចុះពិនិត្យ និងវាយតម្លៃការអនុវត្តពាក់កណ្តាលគម្រោង (Mid Term Review Mission) របស់គម្រោងខ្សែច្រវាក់ផលិតកម្មដោយភាតរៈបរិស្ថាន (CFAVC) នៅខេត្តកំពត

ខេត្តកំពត៖ នៅថ្ងៃពុធ ១៣កើត ខែភទ្របទ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី២៧ ខែកញ្ញា ឆ្នាំ ២០២៣ ឯកឧត្តមបណ្ឌិត ចាន់ ដារ៉ុង រដ្ឋលេខាធិការ និងជានាយកគម្រោងខ្សែច្រវាក់ផលិតកម្មដោយភាតរៈបរិស្ថាន តំណាងដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ អមដំណើរដោយ ឯកឧត្តម អ៊ឹង វណ្ណា អនុរដ្ឋលេខាធិការ និងជាប្រធានគ្រប់គ្រងគម្រោង បានចូលរួមជាមួយក្រុមបេសកកម្មរបស់ធនាគារអភិវឌ្ឍន៍អាស៊ី (ADB) អញ្ជើញចុះពិនិត្យ និងវាយតម្លៃការអនុវត្តពាក់កណ្តាលគម្រោង (Mid Term Review Mission) របស់គម្រោងខ្សែច្រវាក់ផលិតកម្មដោយភាតរៈបរិស្ថាន (CFAVC) នៅខេត្តកំពត ដោយមានសមាសភាពចូលរួម ក្នុងបេសកកម្មពិនិត្យខ្សែផ្លូវនោះ រួមមាន៖ ថ្នាក់ដឹកនាំ និងមន្រ្តីជំនាញរបស់គម្រោងខ្សែច្រវាក់ផលិតកម្មដោយភាតរៈបរិស្ថាន នៃក្រសួងកសិកម្ម រុក្ខាប្រមាញ់ និងនេសាទ ក្រសួងអភិវឌ្ឍន៍ជនបទ ក្រសួងធនធានទឹក និងឧតុនិយម មន្រ្តីជំនាញរបស់ធនាគារអភិវឌ្ឍន៍អាស៊ី និងមន្រ្តីគម្រោងនៃមន្ទីរអភិវឌ្ឍន៍ជនបទខេត្តកំពតផងដែរ។

ក្រុមបេសកកម្មបានចុះត្រួតពិនិត្យការងារស្ថាបនាខ្សែផ្លូវរបស់គម្រោង CFAVC ដែលជួយគាំទ្រដល់សហគមន៍កសិកម្ម “រស្មីសាមគ្គីអមតៈ” និងសហគមន៍កសិកម្ម “កសិករសាមគ្គីរុងរឿង” ចំនួន ២ខ្សែ ដូចខាងក្រោម៖

–  ខ្សែផ្លូវទី១ (KP1) ផ្លូវឈូក ជុំគិរី-ម្លិច-ច្រេស-ផ្លូវជាតិលេខ៣ ស្ថាបនាជាផ្លូវក្រាលកៅស៊ូពីរជាន់ (DBST) មានប្រវែង ១១,៩៤៨ គ.ម ស្ថិតនៅក្នុងឃុំច្រេស ស្រុកជុំគិរី និងឃុំក្រាំងស្នាយ ស្រុកឈូក ដែលសម្រេចបានលទ្ធផលប្រមាណ ជា ៨២%។

–  ខ្សែផ្លូវទី២ (KP2) វត្តទួលផ្ចឹក – ផ្លូវជាតិលេខ៤១ ស្ថាបនាជាផ្លូវក្រាលកៅស៊ូពីរជាន់ (DBST) មានប្រវែង ៨,១០៤ គ.ម ស្ថិតនៅក្នុងឃុំស្រែចែង ស្រុកជុំគិរី ដែលខ្សែផ្លូវនេះសម្រេចបានលទ្ធផល ១០០%។