លោកស្រី សំ សុម៉ាលី អនុប្រធាននាយកដ្ឋាន បានដឹកនាំក្រុមការងារនាយកដ្ឋានអភិវឌ្ឍន៍ជនជាតិភាគតិច អញ្ជើញចូលរួមអបអរសាទរទិវាអន្តរជាតិជនជាតិដើមភាគតិចពិភពលោក លើកទី២៩ និងលើកទី១៩ នៅកម្ពុជា ក្រោមប្រធានបទ “យុវជនជនជាតិដើមភាគតិចជាតួអង្គនៃការផ្លាស់ប្តូរ ដើម្បីសិទ្ធិស្វ័យសម្រេច”

ខេត្តបន្ទាយមានជ័យ ៖ នាព្រឹកថ្ងៃចន្ទ ១១រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវថ្ងៃទី១១ ខែកញ្ញា ឆ្នាំ២០២៣ នៅក្នុងបរិវេណវត្តសុវណ្ណបព្ធតាវនារាមប្រាសាទជ្រាប់ចាស់ ស្ថិតក្នុងភូមិជ្រាប់ចាស់ ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ លោកស្រី សំ សុម៉ាលី អនុប្រធាននាយកដ្ឋាន បានដឹកនាំក្រុមការងារនាយកដ្ឋានអភិវឌ្ឍន៍ជនជាតិភាគតិច អញ្ជើញចូលរួមអបអរសាទរទិវាអន្តរជាតិជនជាតិដើមភាគតិចពិភពលោក លើកទី២៩ និងលើកទី១៩ នៅកម្ពុជា ក្រោមប្រធានបទ “យុវជនជនជាតិដើមភាគតិចជាតួអង្គនៃការផ្លាស់ប្តូរ ដើម្បីសិទ្ធិស្វ័យសម្រេច”  ដែលរៀបចំដោយមន្ទីរអភិវឌ្ឍន៍ជនបទខេត្តបន្ទាយមានជ័យ ក្រោមអធិបតីភាពឯកឧត្តម ឡោ ប៊ុនពេជ្រ សមាជិកក្រុមប្រឹក្សាខេត្ត និងលោក លី សុវណ្ណារិទ្ធិ អភិបាលខេត្តស្ដីទី នៃគណៈអភិបាលខេត្តបន្ទាយមានជ័យ ដោយមានការអញ្ជើញចូលពីតំណាងក្រុមប្រឹក្សាខេត្ត គណៈអភិបាលខេត្ត មន្ទីរអភិវឌ្ឍន៍ជនបទខេត្ត មន្ទីរពាក់ព័ន្ធជុំវិញខេត្ត តំណាងអភិបាលក្រុង-ស្រុក កងកម្លាំងស្រុកទាំង៣ប្រភេទ តំណាងលោកមេឃុំ និងបងប្អូនជនជាតិដើមភាគតិចកួយ ចំនួន ២ភូមិ(ភូមិជ្រាប់ថ្ចាស់ និងជ្រាប់ថ្មី) ដែលមានចំនួនសរុប ៤៣៥ នាក់។

ការប្រារព្ធពិធីអបអរសាទរនេះ  មានគោលបំណងសំខាន់ៗចំនួន  ៤ ដូចខាងក្រោម ៖

១. រម្លឹកដល់ទិវាជនជាតិដើមភាគតិចពិភពលោក និងកម្ពុជា

២. លើកកម្ពស់ភាពជាដៃគូជាមួយស្ថាប័នពាក់ព័ន្ធ  សង្គមស៊ីវិល និងភាពជាដៃគូអភិវឌ្ឍន៍លើការងារអភិវឌ្ឍន៍ និងអភិរក្សប្រកបដោយចីរភាព

៣. លើកកម្ពស់ការយល់ដឹងអំពីសិទ្ធិជនជាតិដើមភាគតិច ជាពិសេសស្រ្តី និងយុវជនក្នុងការការពារវប្បធម៌-ប្រពៃណី ដើម្បីលុបបំបាត់ទម្រង់នៃការរើសអើងលើជនជាតិដើមភាគតិច

៤. ដើម្បីចែករំលែកវប្បធម៌តាមរយ:ការតាំងបង្ហាញផលិតផលរបស់បងប្អូនជនជាតិដើមភាគតិច  ដើម្បីបង្កើនការយល់ដឹងឲ្យកាន់តែច្បាស់អំពីរបៀបរស់នៅរបស់បងប្អូនជនជាតិដើមភាគតិច។

ពិធីបានប្រព្រឹត្តទៅក្រោមបរិយាកាសរីករាយនិងស្និទ្ធស្នាលជាទីបំផុត។ ហើយជាលទ្ធផល អ្នកចូលរួមបានយល់ដឹងអំពីអត្តសញ្ញាណ ប្រពៃណី វប្បធម៌ និងបញ្ហាប្រឈមរបស់ស្រ្តី និងយុវជនជនជាតិដើមភាគតិចទាំងអស់៕