ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជួបសំណេះសំណាលជាមួយថ្នាក់ដឹកនាំទទួលបន្ទុកនាយកដ្ឋាន និងមន្ត្រីរាជការនៃនាយកដ្ឋានអភិវឌ្ឍន៍សហគមន៍ និងនាយកដ្ឋានអភិវឌ្ឍន៍ជនជាតិភាគតិច

រាជធានីភ្នំពេញ៖  នៅរសៀលថ្ងៃពុធ ៦រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៦ ខែកញ្ញា ឆ្នាំ២០២៣  នៅទីស្តីការក្រសួង ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជួបសំណេះសំណាលជាមួយថ្នាក់ដឹកនាំទទួលបន្ទុកនាយកដ្ឋាន និងមន្ត្រីរាជការនៃនាយកដ្ឋានអភិវឌ្ឍន៍សហគមន៍ និងនាយកដ្ឋានអភិវឌ្ឍន៍ជនជាតិភាគតិច។

បន្ទាប់ពីបានស្ដាប់របាយការណ៍សង្ខេបរបស់ឯកឧត្តម អឿន ធារិទ្ធ ទីប្រឹក្សាក្រសួង និងជាប្រធាននាយកដ្ឋានអភិវឌ្ឍន៍សហគមន៍ និង លោកស្រី នួន មុនីចិន្ដា ប្រធាននាយកដ្ឋានអភិវឌ្ឍន៍ជនជាតិភាគតិច ស្តីពីវឌ្ឍនភាពការងារ និងសមិទ្ធផលសម្រេចបាន បញ្ហា ការប្រឈម និងទិសដៅការងាររបស់នាយកដ្ឋានទាំងពីរ សម្រាប់ឆមាសទី១ ឆ្នាំ២០២៣ លើការងារអភិវឌ្ឍន៍សហគមន៍ និងជនជាតិដើមភាគតិចរួចមក ឯកឧត្ដមរដ្ឋមន្រ្ដី បានសម្ដែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីជំនាញនាយកដ្ឋានទាំងពីរ ដែលសម្រេចបានលទ្ធផលគួរជាទីមោទនៈ។ នាយដ្ឋានទាំងពីរ បានដើរតួនាទីយ៉ាងសំខាន់ និងបានចូលរួមចំណែក ក្នុងការលើកកម្ពស់ជីវភាពរស់នៅរបស់ប្រជាពលរដ្ឋនៅជនបទ ឱ្យរស់នៅប្រកបដោយភាពសម្បូរសប្បាយ ដែលនេះគឺជាលះបង់របស់មន្រ្ដីរាជការគ្រប់រូបរហូតធ្វើឱ្យទទួលបានការគាំទ្រយ៉ាងច្រើនលើសលប់ ពីសំណាក់ប្រជាពលរដ្ឋនៅទូទាំងប្រទេស តាមរយៈការចូលរួមបោះឆ្នោតជ្រើសតាំងតំណាងរាស្ត្រកន្លងមកថ្មីៗនេះ។

ក្នុងឱកាសសំណេះសំណាលនោះ ឯកឧត្ដមរដ្ឋមន្រ្ដី ក៏បានផ្ដល់នូវអនុសាសន៍ណែនាំ និងផ្តាំផ្ញើជូនដល់ថ្នាក់ដឹកនាំទទួលបន្ទុក និងមន្ត្រីរាជការក្រោមឱវាទនាយកដ្ឋានទាំងពីរ ដែលមានខ្លឹមសារដូចខាងក្រោម៖

១. ផ្អែកលើសមិទ្ធផលដែលមានស្រាប់ នាយកដ្ឋានត្រូវខិតខំជំរុញបង្កើតសមិទ្ធផល និងស្នាដៃថ្មីៗបន្ថែមទៀត  ដើម្បីរួមចំណែកអភិវឌ្ឍន៍នៅជនបទឱ្យកាន់តែរីកចម្រើនបន្ថែមទៀត ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល សម្រាប់នីតិកាលទី៧  ឈានសម្រេចចក្ខុវិស័យកម្ពុជាឆ្នាំ២០៣០ ជាប្រទេសចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានប្រាក់ចំណូលខ្ពស់។

២. នាយកដ្ឋានអភិវឌ្ឍន៍សហគមន៍ ត្រូវខិតខំពង្រឹងសមត្ថភាពគណៈកម្មការអភិវឌ្ឍន៍ភូមិ (គ.អ.ភ.)។

៣. នាយកដ្ឋានអភិវឌ្ឍន៍ជនជាតិដើមភាគតិច ត្រូវខិតខំពង្រឹងសមត្ថភាពគណៈកម្មការអភិវឌ្ឍន៍សហគមន៍ជនជាតិដើមភាគតិច និងត្រូវខិតខំរៀបចំបញ្ចប់ផែនទីទីតាំងរស់នៅនៃសហគមន៍ជនជាតិដើមភាគតិច។

៤. សិក្សា បង្កើតឱ្យមានភូមិគំរូ ដោយជ្រើសរើសយកភូមិដែលមានសក្ដានុពល និងអំណោយផល លើផ្នែកសេដ្ឋកិច្ច ទេសចរណ៍ ឬកសិផលផ្សេងៗ តាមស្ថានភាពភូមិសាស្ដ្រ ជាពិសេសនៅតំបន់សហគមន៍ជនជាតិដើមភាគតិច។

៥. រៀបចំបង្កើតវគ្គបណ្ដុះបណ្ដាលបំណិនជីវិត ឬជំនាញចាំបាច់ជូនដល់សហគមន៍ ឱ្យស្របតាមតម្រូវការ និងស្ថានភាពជាក់ស្ដែង។

៦. បណ្ដុះបណ្ដាលជំនាញទន់ ពាក់ព័ន្ធការផ្លាស់ប្ដូរឥរិយាបថ ការផ្លាស់ប្ដូរផ្នត់គំនិត សីលធម៌នៃការរស់នៅប្រកបដោយកិច្ចសហការ និងសាមគ្គីភាពគ្នាខ្ពស់។

៧. ថ្នាក់ដឹកនាំ និងមន្ត្រីនៃនាយកដ្ឋានទាំងពីរត្រូវគោរពវិន័យ របៀបរបបធ្វើការ កំណត់របបប្រជុំតាមដាន និងត្រួតពិនិត្យជាប្រចាំខែ ត្រីមាស ឆមាស ឱ្យបានទៀងទាត់ និងត្រូវរាយការណ៍ និងសុំយោបល់ឱ្យបានទាន់ពេលវេលា។

៨. នាយកដ្ឋាទាំងពីរត្រូវត្រៀមរបាយការណ៍សមិទ្ធផលរបស់នាយកដ្ឋាន សម្រាប់រៀបចំសន្និបាតបូកសរុបលទ្ធផលការងារប្រចាំឆ្នាំ២០២៣ និងទិសដៅការងារឆ្នាំបន្ត ដែលគ្រោងនឹងប្រារព្ធនៅថ្ងៃទី២២ ខែធ្នូ ឆ្នាំ២០២៣។

៩.  ពង្រឹងសាមគ្គីភាពផ្ទៃក្នុងឱ្យរឹងមាំ ដើម្បីបំពេញការងារឱ្យកាន់តែមានប្រសិទ្ធភាពខ្ពស់ ដោយយកចិត្តទុកដាក់លើសុខទុក្ខរបស់មន្រ្ដីរាជការមានជំងឺ មន្រ្ដីរាជការមានពិការភាព ជាពិសេសមន្ដ្រីរាជការជាស្រ្ដីមានផ្ទៃពោះ តាមរយៈការលើកទឹកចិត្ត និងការអនុគ្រោះពេលវេលាបំពេញការងារ។

ពិធីសំណេះសំណាលត្រូវបានបញ្ចប់ទៅក្រោមបរិយាកាសសប្បាយរីករាយ និងមានភាពស្និទ្ធស្នាលជាទីបំផុត៕